ಜೊಹಾನ್ಸ್ಬರ್ಗ್: ದಕ್ಷಿಣ ಆಫ್ರಿಕಾ ವಿರುದ್ಧ ಎರಡನೇ ಟೆಸ್ಟ್ ಪಂದ್ಯದ ಪ್ರಥಮ ಇನಿಂಗ್ಸ್ನಲ್ಲಿ ವೃತ್ತಿ ಜೀವನದ ಶ್ರೇಷ್ಠ ಬೌಲಿಂಗ್ ಪ್ರದರ್ಶನ ತೋರಿದ 7 ವಿಕೆಟ್ ಸಾಧನೆ ಮಾಡಿದರು. ಆ ಮೂಲಕ ದಕ್ಷಿಣ ಆಫ್ರಿಕಾ 229 ರನ್ಗಳಿಗೆ ಆಲ್ಔಟ್ ಆಗುವಲ್ಲಿ ಮಧ್ಯಮ ವೇಗಿ ಪ್ರಮುಖ ಪಾತ್ರವಹಿಸಿದರು. ಇದರೊಂದಿಗೆ ದಕ್ಷಿಣ ಆಫ್ರಿಕಾ ವಿರುದ್ಧ ಟೆಸ್ಟ್ ಕ್ರಿಕೆಟ್ನಲ್ಲಿ ಅತ್ಯಂತ ಶ್ರೇಷ್ಠ ಬೌಲಿಂಗ್ ಪ್ರದರ್ಶನ ತೋರಿದ ಭಾರತದ ಮೊದಲ ಬೌಲರ್ ಎಂಬ ಸಾಧನೆಗೆ ಶಾರ್ದುಲ್ ಠಾಕೂರ್(61ಕ್ಕೆ 7) ಭಾಜನರಾದರು. ಆ ಮೂಲಕ ಹಿರಿಯ ಆಫ್ ಸ್ಪಿನ್ನರ್ ಆರ್ ಅಶ್ವಿನ್(66ಕ್ಕೆ 7) ಅವರ ದಾಖಲೆಯನ್ನು ಪುಡಿ-ಪುಡಿ ಮಾಡಿದರು. ಎರಡನೇ ದಿನದಾಟದ ಬಳಿಕ ತಮ್ಮ ಪ್ರದರ್ಶನ ಬಗ್ಗೆ ಸುದ್ದಿಗಾರರು ಕೇಳಿದ್ದಕ್ಕೆ ಶಾರ್ದುಲ್ ಠಾಕೂರ್ ಪ್ರತಿಕ್ರಿಯಿಸಿದರು. "ಇಲ್ಲಿಯವರೆಗೂ ಇದು ನನ್ನ ಶ್ರೇಷ್ಠ ಪ್ರದರ್ಶನ ಎಂಬುದು ನಿಜ. ಆದರೆ ಟೆಸ್ಟ್ ಕ್ರಿಕೆಟ್ನಲ್ಲಿ ನನ್ನಿಂದ ಇನ್ನೂ ಅತ್ಯುತ್ತಮ ಪ್ರದರ್ಶನ ಮೂಡಿಬರಬೇಕಾಗಿದೆ," ಎಂದು ಹೇಳಿದರು. ನ್ಯೂಜಿಲೆಂಡ್ 229 ರನ್ಗಳಿಗೆ ಆಲ್ಔಟ್ ಆದ ಬಳಿಕ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಭಾರತ ತಂಡ ಎರಡನೇ ದಿನದಾಟದ ಅಂತ್ಯಕ್ಕೆ ಎರಡು ವಿಕೆಟ್ ನಷ್ಟಕ್ಕೆ 85 ರನ್ ಗಳಿಸಿದ್ದು 58 ರನ್ ಮುನ್ನಡೆ ಸಾಧಿಸಿದೆ. ಚೇತೇಶ್ವರ್ ಪೂಜಾರ(35*) ಹಾಗೂ ಅಜಿಂಕ್ಯ ರಹಾನೆ(11*) ಮೂರನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. "ದೇಶಿ ರೆಡ್ ಬಾಲ್ ಹಾಗೂ ವೈಟ್ ಬಾಲ್ ಕ್ರಿಕೆಟ್ನಲ್ಲಿ ನನ್ನ ಪ್ರದರ್ಶನವನ್ನು ಪುರಸ್ಕರಿಸಲಾಗಿದೆ. ಭಾರತ ತಂಡದ ಪರ ಆಡುವ ಅವಕಾಶ ಸಿಕ್ಕಾಗಲೆಲ್ಲಾ ನಾನು ನನ್ನಿಂದ ಸಾಧ್ಯವಾದಷ್ಟು ಉತ್ತಮ ಪ್ರದರ್ಶನ ತೋರಲು ಪ್ರಯತ್ನಿಸುತ್ತೇನೆ. ಅದರಲ್ಲೂ ಟೆಸ್ಟ್ ಕ್ರಿಕೆಟ್ನಲ್ಲಿ ಒಂದು ಹೆಜ್ಜೆ ಮುಂದೆ ಇರುತ್ತೇನೆ," ಎಂದು ಎರಡನೇ ದಿನದಾಟದ ಅಂತ್ಯಕ್ಕೆ ನಡೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. "ಕೆಂಪು ಚೆಂಡಿನಲ್ಲಿ ಆಡಿದಾಗಲೂ ನನ್ನ ಶಕ್ತಿ ಒಂದೇ ರೀತಿ ಇರುತ್ತದೆ ಹಾಗೂ ವಿಕೆಟ್ಗಳನ್ನು ಕಬಳಿಸುವುದನ್ನು ಎದುರು ನೋಡುತ್ತಿರುತ್ತೇನೆ," ಎಂದು ಹೇಳಿದ ಶಾರ್ದುಲ್, ಆಲ್ರೌಂಡರ್ ಆಗುವಲ್ಲಿ ತಮ್ಮ ಮೇಲೆ ಪ್ರಭಾವ ಬೀರಿದ ಬಾಲ್ಯದ ಕೋಚ್ ದಿನೇಶ್ ಲಾಡ್ ಅವರನ್ನು ಸ್ಮರಿಸಿಕೊಂಡರು. "ನನ್ನ ಕ್ರಿಕೆಟ್ ವೃತ್ತಿ ಜೀವನದ ಮೇಲೆ ಸಾಕಷ್ಟು ಪ್ರಭಾವವನ್ನು ಬೀರಿದ್ದಾರೆ. ಇವರು ನನಗೆ ಎರಡನೇ ಪೋಷಕರು. ಇವರು ನನ್ನನ್ನು ಸಾಕಷ್ಟು ಪೋಷಿಸಿ ಬೆಳೆಸಿದ್ದಾರೆ. ಬೋರಿವಾಲಿಯಲ್ಲಿ ನನ್ನನ್ನು ಶಾಲೆಗೂ ಇವರೇ ಸೇರಿಸಿದ್ದರು. ಆ ಮೂಲಕ ನನ್ನ ಜೀವನ ಸಂಪೂರ್ಣ ಬದಲಾಯಿತು," ಎಂದು ತಮ್ಮ ಬಾಲ್ಯದ ಕೋಚ್ ಮಾಡಿದ್ದ ದೊಡ್ಡ ಸಹಾಯವನ್ನು ಟೀಮ್ ಇಂಡಿಯಾ ಆಲ್ರೌಂಡರ್ ಸ್ಮರಿಸಿಕೊಂಡು ಭಾವುಕರಾದರು. ಸಂಕ್ಷಿಪ್ತ ಸ್ಕೋರ್(ಎರಡನೇ ದಿನದಾಟದ ಅಂತ್ಯಕ್ಕೆ) ಭಾರತ: ಪ್ರಥಮ ಇನಿಂಗ್ಸ್ 63.1 ಓವರ್ಗಳಿಗೆ 202/10 (ಕೆ.ಎಲ್ ರಾಹುಲ್ 50, ಆರ್ ಅಶ್ವಿನ್ 46, ಮಯಾಂಕ್ ಅಗರ್ವಾಲ್ 26; ಮಾರ್ಕೊ ಯೆನ್ಸನ್ 31 ಕ್ಕೆ 4, ಕಗಿಸೊ ರಬಾಡ 64 ಕ್ಕೆ 3, ಡುವಾನ್ ಓಲಿವಿಯರ್ 64ಕ್ಕೆ 3) ದಕ್ಷಿಣ ಆಫ್ರಿಕಾ: ಪ್ರಥಮ ಇನಿಂಗ್ಸ್ 79.4 ಓವರ್ಗಳಿಗೆ 229/10 (ಕೀಗನ್ ಪೀಟರ್ಸನ್ 62, ಡೀನ್ ಎಲ್ಗರ್ 28, ತೆಂಬ ಬವೂಮ 51; ಮೊಹಮ್ಮದ್ ಶಮಿ 52 ಕ್ಕೆ 2), ಶಾರ್ದುಲ್ ಠಾಕೂರ್ 61 ಕ್ಕೆ 7, ಜಸ್ಪ್ರಿತ್ ಬುಮ್ರಾ 49 ಕ್ಕೆ 1) ಭಾರತ: ದ್ವಿತೀಯ ಇನಿಂಗ್ಸ್ 20 ಓವರ್ಗಳಿಗೆ 85/2 (ಚೇತೇಶ್ವರ್ ಪೂಜಾರ 35*, ಮಯಾಂಕ್ ಅಗರ್ವಾಲ್ 26, ಅಜಿಂಕ್ಯ ರಹಾನೆ 11*; ಮಾರ್ಕೊ ಯೆನ್ಸನ್ 18ಕ್ಕೆ 1, ಡುವಾನ್ ಓಲಿವಿಯರ್ 22ಕ್ಕೆ 1)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3t4fs3v
