: ಗ್ಯಾಸ್‌ ಪೈಪ್‌ ಲೈನ್‌ ಯೋಜನೆ ಪ್ರಧಾನಿ ಮೋದಿ ಅವರ ಕನಸಿನ ಯೋಜನೆಯಲ್ಲ. ಖಾಸಗಿ ಕಂಪನಿಗಳ ಕಮಿಷನ್‌ ಯೋಜನೆ ಎಂದು ಕೆಪಿಸಿಸಿ ವಕ್ತಾರ ಎಂ. ಲಕ್ಷ್ಮಣ್‌ ಆರೋಪಿಸಿದರು. 'ಯೋಜನೆ ಅನುಷ್ಠಾನಕ್ಕೆ ಕೇಂದ್ರ ಸರಕಾರ 17 ಖಾಸಗಿ ಕಂಪನಿಗಳಿಗೆ ಬಿಡ್‌ ನೀಡಿದ್ದು, ಗ್ಯಾಸ್‌ ವಿತರಣೆಯನ್ನು ಖಾಸಗೀಕರಣ ಮಾಡುವ ಹುನ್ನಾರವಿದೆ. ಇದು ಬಿಜೆಪಿಯ ಹಿಡನ್‌ ಅಜೆಂಡಾ. 2024ಕ್ಕೆ ಯುಪಿಎ ಅಧಿಕಾರಕ್ಕೆ ಬಂದರೂ ಸಬ್ಸಿಡಿ ನೀಡಲು ಸಾಧ್ಯವಾಗದ ರೀತಿ ಖಾಸಗೀಕರಣಗೊಳಿಸಲಾಗುತ್ತಿದೆ' ಎಂದು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ದೂರಿದರು. 500 ರೂ.ಗೆ ಗ್ಯಾಸ್‌ ಶುದ್ಧ ಸುಳ್ಳು '500 ರೂಪಾಯಿಗೆ ಗ್ಯಾಸ್‌ ಸಿಲಿಂಡರ್‌ ನೀಡುವುದು ಸುಳ್ಳು ಆಶ್ವಾಸನೆ. ಈ ವಿಚಾರದಲ್ಲಿ ಸಂಸದ ಪ್ರತಾಪ್‌ ಸಿಂಹ ಸತ್ಯ ಮರೆ ಮಾಚಿದ್ದಾರೆ. ಹೊಸ ಸಂಪರ್ಕ ಪಡೆಯಲು 6 ಸಾವಿರ ಠೇವಣಿ ಜತೆಗೆ ನಾನಾ ಶುಲ್ಕ ಸೇರಿ ಆರಂಭದಲ್ಲೇ 7,154 ರೂ. ಕಟ್ಟಬೇಕು. ಸರಿಯಾಗಿ ಬಿಲ್‌ ಪಾವತಿಸದಿದ್ದರೆ ಸಂಪರ್ಕ ಕಡಿತವಾಗುತ್ತದೆ. ಗ್ಯಾಸ್‌ ದರವನ್ನೂ ಖಾಸಗಿಯವರೇ ನಿಗದಿ ಮಾಡಲಿದ್ದು, ಗ್ಯಾಸ್‌ ಬೆಲೆ ದುಬಾರಿಯಾಗಲಿದೆ. ಇದರಿಂದ ಬಡಬಗ್ಗರನ್ನು ಸುಲಿಗೆ ಮಾಡಲಾಗುತ್ತದೆ' ಎಂದು ಹೇಳಿದರು. ಖಾಸಗಿಯವರ ಕಾಳಜಿ ಏಕೆ? 'ಸಂಸದ ಪ್ರತಾಪ ಸಿಂಹ ಅವರಿಗೆ ಖಾಸಗಿ ಕಂಪನಿಗಳ ಮೇಲೆ ಹೆಚ್ಚು ಕಾಳಜಿ ಏಕೆ? ಕೋವಿಡ್‌ ಕೇರ್‌ ಸೆಂಟರ್‌ಗಳಲ್ಲಿ ಕಮಿಷನ್‌ ಪಡೆಯುತ್ತಿದ್ದೀರಿ ಎಂದು ರೋಹಿಣಿ ಸಿಂಧೂರಿ ಆರೋಪಿಸಿದಾಗ ಅವರನ್ನು ಜಿಲ್ಲೆಯಿಂದಲೇ ಓಡಿಸಿದಿರಿ. ನಂಜನಗೂಡಿನ ಜ್ಯುಬಿಲಿಯಂಟ್‌ ಕಾರ್ಖಾನೆ ವಿರುದ್ಧ ಎಫ್‌ಐಆರ್‌ ದಾಖಲಾಗಲು ಬಿಡದೆ ವಕಾಲತ್ತು ವಹಿಸಿದಿರಿ. ಇದರ ಹಿಂದಿನ ಉದ್ದೇಶ ಏನು? ಗ್ಯಾಸ್‌ ಯೋಜನೆಯಲ್ಲಿ ನಿಮ್ಮ ಶಾಸಕರು ಕಮಿಷನ್‌ ಕೇಳುತ್ತಿದ್ದಾರಾ? ಪಾಲಿಕೆ ಸದಸ್ಯರು ಯಾಕೆ ಸಭೆಗೆ ಬರುತ್ತಿಲ್ಲ? ಯೋಜನೆಗೆ 700 ಕೋಟಿ ರೂ. ವಿನಿಯೋಗಿಸಲಾಗುತ್ತಿದ್ದು, ಪ್ರತಾಪ್‌ ಸಿಂಹಗೆ ಶೇ. 10ರಷ್ಟು ಕಮಿಷನ್‌ ಹೋಗಿದೆ ಎಂದು ಜನ ಮಾತನಾಡಿಕೊಳ್ಳುತ್ತಿದ್ದಾರೆ. ಈ ಕುರಿತು ಪ್ರತಾಪ ಸಿಂಹ ಸ್ಪಷ್ಟನೆ ನೀಡಬೇಕು' ಎಂದು ಆಗ್ರಹಿಸಿದರು. ಒಡೆಯರ್‌ ಧೂಳಿಗೂ ಸಮವಲ್ಲ ' - ಕೊಡಗಿಗೆ ಸಂಸದ ಪ್ರತಾಪ್‌ ಸಿಂಹ ಕೊಡುಗೆ ಶೂನ್ಯ. ಕಾಂಗ್ರೆಸ್‌ ಸರಕಾರದ ಅವಧಿಯ ಯೋಜನೆಗಳನ್ನು ಮಾತ್ರ ಇವರು ಪೂರ್ಣಗೊಳಿಸುತ್ತಿದ್ದಾರೆ. ಬಿಜೆಪಿ ಸರಕಾರದ ಅವಧಿಯಲ್ಲಿ ನೂತನ ಯೋಜನೆಗಳನ್ನು ಜಾರಿಗೊಳಿಸಿಲ್ಲ. ರಾಜರ ನಂತರ ನಾನೇ ಎನ್ನುವ ಪ್ರತಾಪ ಸಿಂಹ ನಾಲ್ವಡಿಯವರ ಧೂಳಿಗೂ ಸಮವಲ್ಲ. ಅವರಿಗೆ ಅವಮಾನ ಮಾಡಬೇಡಿ' ಎಂದರು. 'ಪ್ರತಾಪ ಸಿಂಹ ಮೈಸೂರಿಗೆ ಕಾಂಗ್ರೆಸ್‌ ಕೊಡುಗೆ ಒಪ್ಪಿಕೊಂಡಿರುವುದಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ. ಸಿದ್ದರಾಮಯ್ಯ ಅವರು ನೀಡಿರುವ ಕಾರ್ಯಕ್ರಮಗಳನ್ನು ಒಪ್ಪಿಕೊಂಡಿದ್ದಾರೆ. ಹಾಗೆಯೇ ಬೆಂಗಳೂರು - ಮೈಸೂರು ಹೆದ್ದಾರಿ ಕಾಮಗಾರಿಯ ಶ್ರೇಯಸ್ಸು ಸಿದ್ದರಾಮಯ್ಯ ಮತ್ತು ಆಸ್ಕರ್‌ ಫರ್ನಾಂಡೀಸ್‌ ಅವರಿಗೆ ಸಲ್ಲಬೇಕು' ಎಂದರು. ಫೋಟೋ ತೆಗೆಸಿಕೊಂಡಿದ್ದೇ ಸಾಧನೆ 'ಆರು ತಿಂಗಳ ಆಡಳಿತದ ಬಗ್ಗೆ ಪುಸ್ತಕ ಬಿಡುಗಡೆ ಮಾಡಿರುವ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಕೆಲ ಸಾಧನೆಗಳನ್ನು ಸೇರಿಸಿಲ್ಲ. ಜಿಲ್ಲಾ ಉಸ್ತುವಾರಿ ಸಚಿವರನ್ನು ಬದಲಾಯಿಸಿದ್ದು, ಬಿಟ್‌ ಕಾಯಿನ್‌ ದಂಧೆಯಲ್ಲಿ ಕಾಡಿಬೇಡಿ ತಪ್ಪಿಸಿಕೊಂಡಿದ್ದು, ಮೇಕೆದಾಟು ಯೋಜನೆ ಅನುಷ್ಠಾನಕ್ಕೆ ತರುವಲ್ಲಿ ವಿಫಲರಾಗಿರುವುದು, ಕೊರೊನಾ ಹೆಸರಿನಲ್ಲಿ ಲೂಟಿ ಮಾಡುತ್ತಿರುವುದು, ಆಶ್ವಾಸನೆಗಳ ಮೂಲಕ ಸುಳ್ಳಿನ ಸರಮಾಲೆ ಸೃಷ್ಟಿಸಿರುವುದು, 1.7 ಲಕ್ಷ ಕೋಟಿ ಸಾಲ ಮಾಡಿರುವುದು, ಗೋವಿಗೆ ಮುತ್ತಿಡುವ ಫೋಟೋ ತೆಗೆಸಿಕೊಂಡಿರುವುದು.. ಇವೆಲ್ಲ ಬೊಮ್ಮಾಯಿಯವರ 6 ತಿಂಗಳ ಸಾಧನೆ' ಎಂದು ಟೀಕಿಸಿದರು. ಪಕ್ಷದ ನಗರಾಧ್ಯಕ್ಷ ಆರ್‌. ಮೂರ್ತಿ, ಬಿ.ಎಂ. ರಾಮು, ಶ್ರೀನಾಥ್‌ ಬಾಬು ಇದ್ದರು. 'ಜನ ಸಾಮಾನ್ಯರನ್ನು ಸುಲಿಗೆ ಮಾಡಲು ಮೈಸೂರಿನಲ್ಲಿ ಗ್ಯಾಸ್‌ ಪೈಪ್‌ಲೈನ್‌ ಅಳವಡಿಸಲಾಗುತ್ತಿದೆ. ಇದು ಕಮಿಷನ್‌ ದಂಧೆ. ಶಾಸಕರ ವಿರುದ್ಧ ಕೇವಲವಾಗಿ ಮಾತನಾಡುವ ಸಂಸದ ಪ್ರತಾಪ ಸಿಂಹ ವರ್ತನೆಯನ್ನು ಯಾರೂ ಒಪ್ಪಲ್ಲ' ಎಂದು ಕೆಪಿಸಿಸಿ ವಕ್ತಾರೆ ಮಂಜುಳಾ ಮಾನಸ ಹೇಳಿದ್ದಾರೆ.
from India & World News in Kannada | VK Polls https://ift.tt/H6iyEjFdZ
