ಪಾರ್ಲ್‌(): ದಕ್ಷಿಣ ಆಫ್ರಿಕಾ ತಂಡ ತವರಿನಲ್ಲಿ ಅತ್ಯುತ್ತಮ ಕ್ರಿಕೆಟ್ ಆಡುತ್ತಿದೆ. ಆದರೆ ನಾವು ಮತ್ತೆ ಮಧ್ಯದಲ್ಲಿ ಅದೇ ತಪ್ಪು ಮಾಡುತ್ತಿದ್ದೇವೆ. ಈ ಕಾರಣದಿಂದಲೇ ನಾವು ಸೋಲು ಅನುಭವಿಸಬೇಕಾಯಿತು ಎಂದು ಭಾರತ ತಂಡದ ನಾಯಕ ತಿಳಿಸಿದ್ದಾರೆ. ಶುಕ್ರವಾರ ಇಲ್ಲಿನ ಬೊಲೆಂಡ್‌ ಪಾರ್ಕ್‌ ಸ್ಟೇಡಿಯಂನಲ್ಲಿ ನಡೆದಿದ್ದ ಎರಡನೇ ಓಡಿಐ ಪಂದ್ಯದಲ್ಲಿ ಟಾಸ್‌ ಗದ್ದು ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡ ತನ್ನ ಪಾಲಿನ 50 ಓವರ್‌ಗಳಿಗೆ 6 ವಿಕೆಟ್‌ ನಷ್ಟಕ್ಕೆ 287 ರನ್‌ ಗಳಿಸಿತು. ಬಳಿಕ 288 ರನ್‌ ಗುರಿ ಹಿಂಬಾಲಿಸಿದ ದಕ್ಷಿಣ ಆಫ್ರಿಕಾ ತಂಡ ಇನ್ನೂ 11 ಎಸೆತಗಳು ಬಾಕಿ ಇರುವಾಗಲೇ 7 ವಿಕೆಟ್‌ ಜಯ ಸಾಧಿಸಿತು. ಆ ಮೂಲಕ 2-0 ಅಂತರದಲ್ಲಿ ವಶಪಡಿಸಿಕೊಂಡಿತು. ಪಂದ್ಯದ ಬಳಿಕ ಪೋಸ್ಟ್‌ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಮಾತನಾಡಿದ ಕೆ.ಎಲ್‌ ರಾಹುಲ್‌, "ತವರು ಪರಿಸ್ಥಿತಿಗಳಲ್ಲಿ ದಕ್ಷಿಣ ಆಫ್ರಿಕಾ ತಂಡ ಅತ್ಯುತ್ತಮ ಕ್ರಿಕೆಟ್ ಆಡುತ್ತಿದೆ. ಆದರೆ ನಾವು ಮಧ್ಯದಲ್ಲಿ ಅದೇ ತಪ್ಪನ್ನೇ ಮಾಡುತ್ತಿದ್ದೇವೆ. ಇದು ನಮಗೆ ಒಳ್ಳೆಯ ಕಲಿಕೆಯಾಗಿದೆ. ಇನ್ನಷ್ಟು ಸುಧಾರಣೆ ಕಂಡುಕೊಳ್ಳುತ್ತೇವೆಂಬ ಆಶಾಭಾವನೆ ನಮಗಿದೆ," ಎಂದು ಹೇಳಿದರು. "ದೊಡ್ಡ ಟೂರ್ನಿಗೆ ಆಗಮಿಸಿದಾಗ ಮಧ್ಯಮ ಕ್ರಮಾಂಕದಲ್ಲಿನ ಜೊತೆಯಾಟಗಳು ಪಂದ್ಯದಲ್ಲಿ ತುಂಬಾ ನಿರ್ಣಾಯಕವಾಗುತ್ತವೆ. ಅಷ್ಟೇ ಅಲ್ಲದೆ ಮಧ್ಯಮ ಓವರ್‌ಗಳಲ್ಲಿ ನಾವು ಸುಧಾರಿಸಿಕೊಳ್ಳಬೇಕಾದ ಅಗತ್ಯವಿದೆ. ಈ ಅಂಶಗಳನ್ನು ನಾವು ಸರಿ ಮಾಡಿಕೊಳ್ಳಬೇಕು. ಈ ತಪ್ಪುಗಳನ್ನು ನಾವು ಆದಷ್ಟು ಬೇಗ ತಿದ್ದಿಕೊಂಡು ಉತ್ತಮ ಹಾದಿಯಲ್ಲಿ ಹೆಜ್ಜೆ ಹಾಕಬೇಕಾಗಿದೆ," ಎಂದರು. ಮೊದಲನೇ ಓಡಿಐ ಪಂದ್ಯದಲ್ಲಿ ಶಿಖರ್‌ ಧವನ್‌ ಹಾಗೂ ವಿರಾಟ್‌ ಕೊಹ್ಲಿ ಬ್ಯಾಟಿಂಗ್‌ ಪ್ರದರ್ಶನ ಹಾಗೂ ಎರಡನೇ ಓಡಿಐ ಪಂದ್ಯದಲ್ಲಿ ರಿಷಭ್‌ ಪಂತ್‌ ಅವರ ಬ್ಯಾಟಿಂಗ್‌ ಪ್ರದರ್ಶನವನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದ ಕೆ.ಎಲ್‌ ರಾಹುಲ್‌, ಇವು ನಮ್ಮ ಪಾಲಿಗೆ ಸಕಾರಾತ್ಮಕ ಅಂಶಗಳಾಗಿವೆ ಎಂದು ಹೇಳಿದರು. "ಮೊದಲನೇ ಪಂದ್ಯದಲ್ಲಿ ಶಿಖರ್‌ ಧವನ್‌ ಹಾಗೂ ವಿರಾಟ್‌ ಕೊಹ್ಲಿ ಬ್ಯಾಟಿಂಗ್‌ ಹಾದಿ ಅತ್ಯುತ್ತಮವಾಗಿತ್ತು ಹಾಗೂ ಇಂದು(ಶುಕ್ರವಾರ) ರಿಷಭ್‌ ಪಂತ್‌ ಬ್ಯಾಟಿಂಗ್‌ ಕೂಡ ಅದ್ಭುತವಾಗಿತ್ತು. ಇವರು ಆರಂಭಿಕ 20 ಎಸೆತಗಳಲ್ಲಿ ಎಚ್ಚರಿಕೆಯಿಂದ ಆಡಿ ನಂತರ ಸ್ಪಿನ್ನರ್‌ಗಳ ಮೇಲೆ ದಾಳಿ ನಡೆಸಿದರು," ಎಂದು ಶ್ಲಾಘಿಸಿದರು. ಬಯೋ-ಬಬಲ್‌ ನಮ್ಮ ಪಾಲಿಗೆ ಕಠಿಣವಾಗಿದೆ ಹಾಗೂ ಟೆಸ್ಟ್‌ ಸರಣಿಯಲ್ಲಿನ ವೈಫಲ್ಯತೆ ಇದೀಗ ಓಡಿಐ ಸರಣಿಯಲ್ಲಿಯೂ ಮುಂದುವರಿದಿದೆ ಎಂದ ರಾಹುಲ್‌, ಜಸ್ಪ್ರಿತ್ ಬುಮ್ರಾ ಸ್ಟ್ಯಾಂಡ್‌ ಔಟ್‌ ಬೌಲರ್‌ ಎಂದು ಗುಣಗಾನ ಮಾಡಿದರು. "ಜಸ್ಪ್ರಿತ್ ಬುಮ್ರಾ ನಮಗೆ ಸ್ಟ್ಯಾಂಡ್‌ ಔಟ್‌ ಬೌಲರ್‌ ಆಗಿದ್ದು, ಇಂದು(ಶುಕ್ರವಾರ) ಯುಜ್ವೇಂದ್ರ ಚಹಲ್‌ ಅತ್ಯುತ್ತಮವಾಗಿ ಕಂಡಿದ್ದಾರೆ. ಬಯೋ-ಬಬಲ್‌ನಲ್ಲಿ ಉಳಿಯುವುದು ನಮ್ಮ ಪಾಲಿಗೆ ಕಠಿಣವಾಗಿದೆ. ಆದರೆ ನಮ್ಮ ಶಕ್ತಿ ಅದ್ಭುತವಾಗಿದೆ. ಸವಾಲುಗಳನ್ನು ನಾವು ಇಷ್ಟಪಡುತ್ತೇವೆ. ಮೂರನೇ ಹಾಗೂ ಕೊನೆಯ ಪಂದ್ಯದಲ್ಲಿ ಗೆಲುವು ಪಡೆಯಲು ನಾವು ಪ್ರಯತ್ನಿಸುತ್ತೇವೆ," ಎಂದು ಕೆ.ಎಲ್‌ ರಾಹುಲ್‌ ಮಾತು ಮುಗಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/33GpVHV
