: ದೇಶಾದ್ಯಂತ ಕೋವಿಡ್‌ ಮೂರನೇ ಅಲೆಯ ಅಬ್ಬರದ ನಡುವಯೇ, 12 ರಿಂದ 14 ವರ್ಷ ವಯೋಮಾನದ ಮಕ್ಕಳಿಗೂ ಶೀಘ್ರ ಕೋವಿಡ್‌ ನೀಡಲು ಸಿದ್ಧತೆ ನಡೆಸಿದೆ. ಮಾರ್ಚ್ 1 ರಿಂದ 12 - 18 ವಯೋಮಾನದ ಮಕ್ಕಳಿಗೆ ಲಸಿಕಾ ಅಭಿಯಾನ ಆರಂಭವಾಗಲಿದೆ ಎಂದು ನೀತಿ ಆಯೋಗದ ಕೋವಿಡ್‌-19 ಕಾರ್ಯಪಡೆ ಮುಖ್ಯಸ್ಥ ಡಾ. ಎನ್‌. ಕೆ. ಅರೋರಾ ಸೋಮವಾರ ತಿಳಿಸಿದ್ದಾರೆ. ಜನವರಿ 3 ರಿಂದ ಸರಕಾರ 15 - 18 ವಯೋಮಾನದವರಿಗೆ ಸೋಂಕಿನ ಲಸಿಕೆ ಅಭಿಯಾನ ಆರಂಭಿಸಿದೆ. ಈಗಾಗಲೇ ನಿರೀಕ್ಷಿತ 7.4 ಕೋಟಿ ಮಕ್ಕಳ ಪೈಕಿ, 3.45 ಕೋಟಿ 'ಕೋವ್ಯಾಕ್ಸಿನ್‌' ಮೊದಲ ಡೋಸ್‌ ಪಡೆದಿದ್ದಾರೆ. ಇವರೆಲ್ಲರಿಗೂ ಎರಡನೇ ಡೋಸ್‌ ಪಡೆಯಲು 28 ದಿನಗಳ ಅಂತರ ನಿಗದಿಪಡಿಸಲಾಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ. 15 - 18 ವಯೋಮಾನದವರ ವ್ಯಾಕ್ಸಿನೇಷನ್‌ ನಿಗದಿತ ಅವಧಿಗಿಂತಲೂ ಬೇಗ ಮುಗಿದರೆ, ಫೆಬ್ರವರಿ ಅಂತ್ಯಕ್ಕೇ 12 - 14 ವಯೋಮಾನದವರಿಗೆ ವ್ಯಾಕ್ಸಿನೇಷನ್‌ ಆರಂಭಿಸಲಾಗುವುದು. ದೇಶದಲ್ಲಿ ಕೊರೊನಾ ಸೋಂಕು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮಕ್ಕಳನ್ನು ಸೋಂಕಿನಿಂದ ರಕ್ಷಿಸುವುದು ಇದರ ಉದ್ದೇಶ ಎಂದು ಸಚಿವಾಲಯ ತಿಳಿಸಿದೆ. 'ಹದಿ ಹರೆಯದ ಮಕ್ಕಳು ಹೆಚ್ಚು ಕ್ರಿಯಾಶೀಲರಾಗಿರುವುದರಿಂದ ಅವರಿಗೆ ರೋಗ ನಿರೋಧಕ ಶಕ್ತಿ ಮುಖ್ಯ. ಶಾಲೆಗಳು, ಕಾಲೇಜುಗಳಿಗೆ ಹೋಗುವುದರಿಂದ ಸೋಂಕು ತಗುಲುವ ಅಪಾಯ ಹೆಚ್ಚು. ಬಹು ಬೇಗ ವ್ಯಾಪಿಸುವ ಒಮಿಕ್ರಾನ್‌ ರೂಪಾಂತರಿಯ ಸೋಂಕು ಅಧಿಕವಾಗಿರುವ ಹಿನ್ನೆಲೆಯಲ್ಲಿ ಹೆಚ್ಚಿನ ಸಂಖ್ಯೆಯ ಮಕ್ಕಳಿಗೆ ಲಸಿಕೆ ನೀಡಲು ನಿರ್ಧರಿಸಲಾಗಿದೆ' ಎಂದಿದ್ದಾರೆ. ಆದರೆ, 12 - 14 ವಯೋಮಾನದ ಮಕ್ಕಳಿಗೆ ಯಾವ ಲಸಿಕೆ ನೀಡಲಾಗುತ್ತಿದೆ ಎಂಬ ಬಗ್ಗೆ ಇನ್ನೂ ನಿರ್ಧಾರ ಕೈಗೊಂಡಿಲ್ಲ. ಪ್ರಸ್ತುತ 15 - 18 ವಯೋಮಾನದವರಿಗೆ ನೀಡಲಾಗುತ್ತಿರುವ 'ಕೋವ್ಯಾಕ್ಸಿನ್‌' ಲಸಿಕೆಯನ್ನೇ ಈ ಮಕ್ಕಳಿಗೂ ನೀಡುವ ಸಾಧ್ಯತೆಯಿದೆ. ಕೋಮಾರ್ಬಿಡ್‌ ಮಕ್ಕಳಿಗೆ ಆದ್ಯತೆಯಿರಲಿ: ಈ ಕುರಿತು ಪ್ರತಿಕ್ರಿಯಿಸಿರುವ ಭಾರತೀಯ ಮಕ್ಕಳ ತಜ್ಞರ ಅಕಾಡೆಮಿಯ ಮಾಜಿ ಅಧ್ಯಕ್ಷ ಡಾ. ಪ್ರಮೋದ್‌ ಜೋಗ್‌ ಅವರು, 'ಮಕ್ಕಳಿಗೆ ಲಸಿಕೆ ನೀಡಿಕೆ ವಿಸ್ತರಣೆ ಸ್ವಾಗತಾರ್ಹ ಹೆಜ್ಜೆಯಾಗಿದೆ. ಆದರೆ, 5 - 14 ವಯೋಮಾನದ, ಇತರೆ ಆರೋಗ್ಯ ಸಮಸ್ಯೆ ಹೊಂದಿರುವ ಮಕ್ಕಳನ್ನು ಸರಕಾರ ಆದ್ಯತೆಯಾಗಿ ಪರಿಗಣಿಸಬೇಕು' ಎಂದು ಸಲಹೆ ನೀಡಿದ್ದಾರೆ. 12 ವರ್ಷಕ್ಕಿಂತ ಕಿರಿಯರಿಗೆ? ದೇಶದಲ್ಲಿ 12 ವರ್ಷ ಅಥವಾ ಅದಕ್ಕಿಂತ ಕಿರಿಯ ಮಕ್ಕಳಿಗೆ ಲಸಿಕೆ ನೀಡುವ ಕುರಿತು 'ನೀಲ ನಕ್ಷೆ' ಒದಗಿಸುವಂತೆ ಸರಕಾರಕ್ಕೆ ನಿರ್ದೇಶನ ನೀಡಬೇಕು ಎಂದು ದಿಲ್ಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಲಾಗಿದೆ. ಸೋಮವಾರ ಅರ್ಜಿಯನ್ನು ಸ್ವೀಕರಿಸಿರುವ ಮುಖ್ಯ ನ್ಯಾಯಮೂರ್ತಿ ಡಿ. ಎನ್‌. ಪಟೇಲ್‌ ನೇತೃತ್ವದ ಪೀಠ, ಮಾರ್ಚ್ 22ಕ್ಕೆ ಇದರ ವಿಚಾರಣೆ ನಡೆಸುವುದಾಗಿ ತಿಳಿಸಿದೆ. ಬಲವಂತ ಮಾಡಲ್ಲ: ಕೇಂದ್ರದ ಸ್ಪಷ್ಟನೆ ಯಾವುದೇ ವ್ಯಕ್ತಿಯ ಸ್ವಯಂ ಪ್ರೇರಿತ ಒಪ್ಪಿಗೆ ಇಲ್ಲದೆ ಬಲವಂತವಾಗಿ ಲಸಿಕೆ ನೀಡುವುದಿಲ್ಲ ಎಂದು ಕೇಂದ್ರ ಸರಕಾರ ಸುಪ್ರೀಂ ಕೋರ್ಟ್‌ಗೆ ತಿಳಿಸಿದೆ. ಈ ಕುರಿತು ನ್ಯಾಯಾಲಯಕ್ಕೆ ಕೇಂದ್ರ ಆರೋಗ್ಯ ಸಚಿವಾಲಯ ಅಫಿಡವಿಟ್‌ ಸಲ್ಲಿಸಿದ್ದು, ಇದುವರೆಗೆ ದೇಶದಲ್ಲಿನ ಲಸಿಕಾ ಅಭಿಯಾನದ ಅಂಕಿ - ಅಂಶಗಳು ಹಾಗೂ ಸಾಧನೆಯ ಬಗ್ಗೆ ಮಾಹಿತಿ ನೀಡಿದೆ. ಲಾಕ್‌ಡೌನ್‌ ಉದ್ದೇಶವಿಲ್ಲ ಕರ್ನಾಟಕ ರಾಜ್ಯದಲ್ಲಿ ದೈನಂದಿನ ಕೋವಿಡ್‌ ಸೋಂಕು ಗಣನೀಯವಾಗಿ ಹೆಚ್ಚುತ್ತಿದ್ದರೂ, ಹೆಚ್ಚಿನ ನಿರ್ಬಂಧ ಕ್ರಮಗಳಿಗೆ ಮುಂದಾಗದೆ ಹಾಲಿ ಸ್ಥಿತಿಯನ್ನೇ ಸದ್ಯಕ್ಕೆ ಮುಂದುವರಿಸಲು ಸರಕಾರ ತೀರ್ಮಾನಿಸಿದೆ. ರಾಜ್ಯದಲ್ಲಿ ಕೋವಿಡ್‌ ಕಾರಣಕ್ಕೆ ಲಾಕ್‌ಡೌನ್‌ ಅಥವಾ ಇನ್ನಷ್ಟು ಕಠಿಣ ನಿಯಮ ಜಾರಿಗೆ ತರುವ ಉದ್ದೇಶವಿಲ್ಲ. ವಾರಂತ್ಯ ಕರ್ಫ್ಯೂ ಮುಂದುವರಿಸಬೇಕೆ ಅಥವಾ ಸಡಿಲಗೊಳಿಸಬೇಕೇ ಎಂಬ ಬಗ್ಗೆ ಶುಕ್ರವಾರ ಸಭೆಯಲ್ಲಿ ತೀರ್ಮಾನಿಸಲಾಗುವುದು ಎಂದು ಕಂದಾಯ ಸಚಿವ ಆರ್‌. ಅಶೋಕ್‌ ತಿಳಿಸಿದ್ದಾರೆ. ಸಿಎಂ ಬಸವರಾಜ ಬೊಮ್ಮಾಯಿ ಅಧ್ಯಕ್ಷತೆಯಲ್ಲಿ ಸೋಮವಾರ ನಡೆದ ಕೋವಿಡ್‌ ಕುರಿತ ವರ್ಚುವಲ್‌ ಸಭೆಯ ಬಳಿಕ ಅವರು ಈ ವಿಷಯ ತಿಳಿಸಿದ್ದಾರೆ. ದಿನದ ಬೆಳವಣಿಗೆ.. * ದಿಲ್ಲಿ, ಮುಂಬಯಿ, ಬೆಂಗಳೂರಲ್ಲಿ ಇಳಿದ ಸೋಂಕು * ಬೆಂಗಳೂರಿನಲ್ಲಿ 15 ಸಾವಿರ ಸೇರಿ ರಾಜ್ಯದಲ್ಲಿ 27,156 ಕೇಸ್‌ * ಕೋವಿಡ್‌ ಚಿಕಿತ್ಸೆಗೆ ಕೇಂದ್ರದಿಂದ ಹೊಸ ಮಾರ್ಗಸೂಚಿ * ಕೋವಿಡ್‌ ನಿರ್ಬಂಧ ಸಡಿಲಿಸಿದ ಪ.ಬಂಗಾಳ ಸರಕಾರ * ದೇಶಾದ್ಯಂತ 2.58 ಲಕ್ಷ ಹೊಸ ಕೇಸ್‌, 385 ಸಾವು
from India & World News in Kannada | VK Polls https://ift.tt/3nyDU9B
