: ರಾಜ್ಯದಲ್ಲಿ ಮೂರನೇ ಅಲೆ ಮಕ್ಕಳ ಮೇಲೆ ದಾಳಿ ಮಾಡುತ್ತದೆ ಎಂಬ ಊಹೆ ಇತ್ತು. ಈಗ ರಾಜ್ಯದಲ್ಲಿ ಮಕ್ಕಳಲ್ಲಿ ಸೋಂಕು ಹೆಚ್ಚು ಕಂಡು ಬರುತ್ತಿರುವುದು ನಿಜವಾದರೂ ಒಟ್ಟಾರೆ ಪರೀಕ್ಷೆಗೆ ಹೋಲಿಸಿದರೆ ಇದು ಗಣನೀಯವಾಗಿಯೇನೂ ಇಲ್ಲ ಎಂದು ಆರೋಗ್ಯ ಇಲಾಖೆ ಮೂಲಗಳು ತಿಳಿಸಿವೆ. ರಾಜ್ಯದಲ್ಲಿ ಶನಿವಾರ ದಾಖಲಾದ 32,000 ಪ್ರಕರಣಗಳಲ್ಲಿ 500 ಮಂದಿ ಸೋಂಕಿತರಾಗಿದ್ದರು. ನಿಜವೆಂದರೆ, ಈಗ ನಡೆಯುತ್ತಿರುವ ಪರೀಕ್ಷೆಗಳಲ್ಲಿ ಹೆಚ್ಚು ಮಕ್ಕಳದ್ದೇ ಆಗಿವೆ. ಅಷ್ಟಾದರೂ ಗಣನೀಯ ಪ್ರಮಾಣದಲ್ಲಿ ಕೇಸುಗಳು ದಾಖಲಾಗುತ್ತಿಲ್ಲ. ಶಾಲೆಗಳು, ಹಾಸ್ಟೆಲ್‌ಗಳಲ್ಲಿ ಹೆಚ್ಚು ಪರೀಕ್ಷೆಗಳು ನಡೆಯುತ್ತಿವೆ. ಅಲ್ಲಿ ಕೆಲವು ಪ್ರಕರಣಗಳು ಕಂಡು ಬರುತ್ತಿವೆ. ಹಾಗಂತ ಹೆಚ್ಚಿನವರಿಗೆ ಯಾವುದೇ ಲಕ್ಷಣಗಳು ಇರುವುದಿಲ್ಲ. ಕೆಲವರಲ್ಲಷ್ಟೇ ಸೌಮ್ಯ ಲಕ್ಷಣಗಳು ಕಾಣಿಸಿಕೊಂಡಿವೆ. ರಾಜ್ಯ ಕೋವಿಡ್‌ 19 ವಾರ್‌ ರೂಮ್‌ ಮಾಹಿತಿ ಪ್ರಕಾರ, ಎರಡನೇ ಅಲೆಗೆ ಹೋಲಿಸಿದರೆ ಮೂರನೇ ಅಲೆಯಲ್ಲಿ ಮಕ್ಕಳಲ್ಲಿ (0 ರಿಂದ 18 ವರ್ಷಗಳು) ಸೋಂಕಿನ ಪ್ರಮಾಣ ಹೆಚ್ಚಾಗಿ ಕಂಡು ಬರುವುದಿಲ್ಲ, ಮಕ್ಕಳಲ್ಲಿ ಸೋಂಕು ಕಡಿಮೆಯಾಗಿದೆ. ಪಾಸಿಟಿವಿಟಿ ತಾಳೆ ಮಾಡಿದಾಗಲೂ ಇದು ಸ್ಪಷ್ಟವಾಗಿದೆ. ಲಸಿಕೆ ನೀಡದ ಕಾರಣ ಮೂರನೇ ಅಲೆ ಮಕ್ಕಳನ್ನು ಹೆಚ್ಚು ಗುರಿಯಾಗಿಸಬಹುದು ಎಂದು ಹಲವಾರು ತಜ್ಞರು ಎಚ್ಚರಿಸಿದ್ದರು. ಆದರೆ ಪ್ರಸ್ತುತ ಆರಂಭವಾಗಿರುವ ಅಲೆಯಲ್ಲಿ ವಯಸ್ಕರಿಗೆ ಹೋಲಿಸಿದರೆ ಮಕ್ಕಳು ಕಡಿಮೆ ಸೋಂಕಿಗೆ ಒಳಗಾಗಿದ್ದಾರೆ. ಕೋವಿಡ್‌ ವಾರ್‌ ರೂಮ್‌ ವರದಿಯ ಪ್ರಕಾರ, ಮೊದಲ ಅಲೆಯಿಂದ ಇಲ್ಲಿಯವರೆಗೆ, ರಾಜ್ಯದಲ್ಲಿ 0 - 9 ವರ್ಷದೊಳಗಿನ 98,286 ಮಕ್ಕಳಿಗೆ ಕೋವಿಡ್‌ ಪಾಸಿಟಿವ್‌ ಬಂದಿದೆ. ಆದರೆ 10 - 19 ವಯಸ್ಸಿನ 2,53,154 ರೋಗಿಗಳಲ್ಲಿ ಪಾಸಿಟಿವ್‌ ಪತ್ತೆಯಾಗಿದೆ. ಇತರ ವಯೋಮಾನದವರಿಗೆ ಹೋಲಿಸಿದರೆ ಈ ಎರಡು ವಯೋಮಾನದವರಲ್ಲಿ ಮರಣ ಪ್ರಮಾಣ ಕಡಿಮೆಯಾಗಿದೆ. 0-9 ವಯೋಮಾನದವರಲ್ಲಿ 67 ಮತ್ತು 10-19 ವಯಸ್ಸಿನ ವ್ಯಾಪ್ತಿಯಲ್ಲಿ 94 ಸಾವುಗಳು ಸಂಭವಿಸಿವೆ. ಶಾಲೆಗಳಿಗೆ ರಜೆ: ವಿಜಯಪುರ ಜಿಲ್ಲೆಯ ಡವಳಗಿ ಬಾಲಕಿಯರ ವಸತಿ ನಿಲಯದಲ್ಲಿದ್ದ 20 ಮಕ್ಕಳಿಗೆ ಸೋಂಕು ದೃಢಪಟ್ಟಿದೆ. ಪಾಸಿಟಿವಿಟಿ ದರ ಶೇ. 5ಕ್ಕಿಂತ ಹೆಚ್ಚು ಕಂಡು ಬಂದರೆ ಶಾಲೆಗಳಿಗೆ ರಜೆ ನೀಡುವಂತೆ ಜಿಲ್ಲಾಧಿಕಾರಿ ಪಿ. ಸುನಿಲ್‌ ಸೂಚಿಸಿದ್ದಾರೆ. ರಾಯಚೂರು ಜಿಲ್ಲೆಯಲ್ಲಿ ಕಳೆದ ನಾಲ್ಕು ದಿನಗಳಲ್ಲಿ 98 ಮಕ್ಕಳಲ್ಲಿ ಸೋಂಕು ಪತ್ತೆಯಾಗಿದೆ. ಕಣ್ತಪ್ಪಿಸಿ ಯಾತ್ರೆ ಹೊರಟಿದ್ದ ಸೋಂಕಿತರಿಗೆ ತಡೆ ಸೋಂಕು ಇದ್ದರೂ ಚಿಕಿತ್ಸೆ ಪಡೆಯದೇ ಆರೋಗ್ಯ ಇಲಾಖೆಯವರ ಕಣ್ತಪ್ಪಿಸಿ ಅಯ್ಯಪ್ಪನ ದರ್ಶನಕ್ಕೆ ಹೊರಟಿದ್ದ ಕೆ. ಆರ್. ಪೇಟೆ ತಾಲೂಕಿನ ಅಕ್ಕಿಹೆಬ್ಬಾಳು ಹೋಬಳಿ ಮಂಚಿಬೀಡಿನ 30 ಭಕ್ತರನ್ನು ಪೊಲೀಸರು ವಾಪಸ್‌ ಕರೆ ತಂದಿದ್ದು, ಬಸ್‌ ವಶಕ್ಕೆ ಪಡೆದಿದ್ದಾರೆ. ತಾಲೂಕಿನ ಅಕ್ಕಿಹೆಬ್ಬಾಳು ಹೋಬಳಿ ಮಂಚಿಬೀಡು ಗ್ರಾಮದಲ್ಲಿ ಅಯ್ಯಪ್ಪನ ದರ್ಶನಕ್ಕೆ ಹೊರಟಿದ್ದ 30 ಮಂದಿ ಮಾಲಾಧಾರಿಗಳಲ್ಲಿ 15 ಮಂದಿಗೆ ಕೋವಿಡ್‌ ಸೋಂಕು ದೃಢಪಟ್ಟಿತ್ತು. ಆದರೆ, ಅವರು ಇಲಾಖೆಯ ಕಣ್ತಪ್ಪಿಸಿ ಬಸ್‌ನಲ್ಲಿ ಯಾತ್ರೆಗೆ ಹೊರಟಿದ್ದರು. ಇದನ್ನು ತಿಳಿದ ಅಧಿಕಾರಿಗಳು ಪೊಲೀಸ್‌ ಇಲಾಖೆಗೆ ಮಾಹಿತಿ ನೀಡಿದರು. ಪೊಲೀಸ್‌ ಇನ್ಸ್‌ಪೆಕ್ಟರ್‌ ಎಂ. ಕೆ. ದೀಪಕ್‌ ಮತ್ತು ನಿರಂಜನ ಅವರ ಮಾರ್ಗದರ್ಶನದಲ್ಲಿ ಬಸ್‌ ಅನ್ನು ಬೆನ್ನಟ್ಟಿ ಚಾಮರಾಜ ನಗರ ಜಿಲ್ಲೆಯ ಬೇಗೂರು ಬಳಿ ತಡೆ ಹಿಡಿದು ವಾಪಸ್‌ ಕರೆ ತರಲಾಗಿದೆ. ಅವರನ್ನು ಕೋವಿಡ್‌ ಕೇರ್‌ ಸೆಂಟರ್‌ಗೆ ದಾಖಲಿಸಲಾಗಿದೆ.
from India & World News in Kannada | VK Polls https://ift.tt/33pyI0D
