: ಜಿಲ್ಲೆ ಹಾನಗಲ್ ತಾಲೂಕಿನ ಅಕ್ಕಿ ಆಲೂರು ಗ್ರಾಮ, ಇದೀಗ ಎಲ್ಲರ ಗಮನ ಸೆಳೆಯುತ್ತಿದೆ. ಇದಕ್ಕೆ ಕಾರಣ ಗ್ರಾಮದಲ್ಲಿ ಇರುವ ರಕ್ತದಾನ ಮಾಡುವವರ ಸಂಖ್ಯೆ..! ಹೌದು.. ಅಕ್ಕಿ ಆಲೂರು ಗ್ರಾಮದಲ್ಲಿ ಸುಮಾರು 600ಕ್ಕೂ ಅಧಿಕ ರಕ್ತದಾನಿಗಳಿದ್ದಾರೆ. ಇಲ್ಲಿಯ ಯುವಕರು ಸ್ನೇಹ ಮೈತ್ರಿ ಬ್ಲಡ್ ಆರ್ಮಿ ಗ್ರೂಪ್ ರಚಿಸಿಕೊಂಡು ರಕ್ತದಾನದ ಸೇವೆಗೆ ಸನ್ನದ್ಧರಾಗಿದ್ದಾರೆ. ಪೊಲೀಸ್ ಪೇದೆ ಕರಿಬಸಪ್ಪ ಗೊಂದಿ ನೇತೃತ್ವದಲ್ಲಿ ಸ್ಥಾಪಿತವಾದ ಸ್ನೇಹ ಮೈತ್ರಿ ಗ್ರೂಪ್, ಜಿಲ್ಲೆಯಲ್ಲಿಯೇ ಅತಿ ಹೆಚ್ಚು ಕ್ಯಾಂಪ್ ಮಾಡಿದ ಗ್ರೂಪ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಗ್ರೂಪ್ನಲ್ಲಿ ವಿದ್ಯಾರ್ಥಿಗಳಿದ್ದಾರೆ, ವಿದ್ಯಾರ್ಥಿನಿಯರಿದ್ದಾರೆ, ವರ್ತಕರು, ಗೃಹ ರಕ್ಷಕ ದಳ, ಸರ್ಕಾರದ ವಿವಿಧ ಇಲಾಖೆಯ ನೌಕರರು ಸಹ ಈ ಸೇರಿದ್ದಾರೆ. ಹೆರಿಗೆ ಸಮಯದಲ್ಲಿ, ಅಪಘಾತದ ಸಮಯದಲ್ಲಿ ರಕ್ತ ಬೇಕು ಅಂದರೆ ಸಾಕು ಈ ಗ್ರೂಪ್ನ ಸದಸ್ಯರು ರಕ್ತದಾನ ಮಾಡಲು ಮುಂದಿರುತ್ತಾರೆ. ಅಷ್ಟೇ ಅಲ್ಲ, ತಲೆಸೀಮಿಯಾ ಸೇರಿದಂತೆ ಪ್ರತಿ ತಿಂಗಳು ರಕ್ತ ಬೇಕಾಗುವ ರೋಗಿಗಳಿಗೆ ಈ ಗ್ರೂಪ್ ಸದಸ್ಯರು ಜೀವ ದಾನಿಗಳಾಗಿದ್ಧಾರೆ. ಹಾವೇರಿ ಅಕ್ಕಪಕ್ಕದ ಧಾರವಾಡ, ದಾವಣಗೆರೆ ಮಾತ್ರವಲ್ಲ, ಅವಶ್ಯಬಿದ್ದಾಗ ಗೋವಾ ರಾಜ್ಯಕ್ಕೂ ತೆರಳಿ ರಕ್ತದಾನ ಮಾಡಿದ ಖ್ಯಾತಿ ಇಲ್ಲಿಯ ರಕ್ತದಾನಿಗಳದ್ದು..! ಪ್ರತಿ ಮೂರು ತಿಂಗಳಿಗೊಮ್ಮ ರಕ್ತದಾನ ಮಾಡುವ ನಿಯಮಿತ ರಕ್ತದಾನಿಗಳು ಸಹ ಇಲ್ಲಿದ್ದಾರೆ. ರಕ್ತ ಭಂಡಾರಗಳಿಗೆ ಈ ಗ್ರೂಪ್ನ ಸದಸ್ಯರು ಪ್ರತಿ ಮೂರು ತಿಂಗಳಿಗೊಮ್ಮೆ ಹೋಗಿ ರಕ್ತ ದಾನ ಮಾಡುತ್ತಾರೆ. ಈ ರೀತಿ ಇಲ್ಲಿ 50 ಬಾರಿ ರಕ್ತ ದಾನ ಮಾಡಿದ ದಾಖಲೆ ವೀರರೂ ಸಹ ಇದ್ದಾರೆ. ಈ ರೀತಿ ರಕ್ತದಾನ ಮಾಡಿದ ದಾನಿಗಳನ್ನ ಸ್ನೇಹ ಮೈತ್ರಿ ಬ್ಲಡ್ ಆರ್ಮಿ ಪ್ರೋತ್ಸಾಹಿಸುತ್ತದೆ. ಕೇವಲ ರಕ್ತದಾನವಲ್ಲದೆ, ರಕ್ತದಾನದ ವಿಚಾರಕ್ಕೆ ಸಂಬಂಧಿಸಿದಂತೆ ಇರುವ ಮೂಡನಂಬಿಕೆಗಳನ್ನು ಹೋಗಲಾಡಿಸುವ ಕಾರ್ಯವನ್ನೂ ಸಹ ಈ ಗ್ರೂಪ್ ಮಾಡುತ್ತಿದೆ. ಇದಲ್ಲದೆ ಸಾರಿಗೆ ಇಲಾಖೆಯ ಸಹಕಾರದೊಂದಿದೆ ರಕ್ತದಾನ ರಥ ಸಹ ರಚಿಸಲಾಗಿದ್ದು, ಈ ವಾಹನದಲ್ಲಿ ರಕ್ತದಾನ ಕುರಿತ ಎಲ್ಲ ವಿವರಗಳಿವೆ. ರಕ್ತದಾನದ ಜೊತೆಗೆ ನೇತ್ರ ದಾನ, ದೇಹ ದಾನ ಕುರಿತಂತೆಯೂ ಈ ಗ್ರೂಪ್ ಅರಿವು ಮೂಡಿಸುತ್ತಿದೆ. ಈ ಗುಂಪಿನ ಕಾರ್ಯ ವೈಖರಿ ಗುರುತಿಸಿರುವ ಗೂಗಲ್ ಸಂಸ್ಥೆಯು, ಅಕ್ಕಿ ಆಲೂರು ಗ್ರಾಮಕ್ಕೆ 'ದ ಹೋಂ ಟೌನ್ ಆಫ್ ಬ್ಲಡ್ ಡೋನೇಟರ್' ಎಂಬ ಹೆಸರು ನೀಡಿ ಗೌರವಿಸಿದೆ. ಇದರಿಂದ ಉತ್ತೇಜಿತರಾಗಿರುವ ಸ್ನೇಹ ಮೈತ್ರಿ ಬ್ಲಡ್ ಆರ್ಮಿ, ಇದೀಗ ಗ್ರಾಮದ ಆರಂಭ ಮತ್ತು ಅಂತ್ಯದ ರಸ್ತೆಗಳಲ್ಲಿ 'ರಕ್ತದಾನಿಗಳ ತವರೂರು ಅಕ್ಕಿಆಲೂರು' ಎಂಬ ನಾಮಪಲಕ ಹಾಕಿದೆ. ಜೊತೆಗೆ ಈ ನಾಮಪಲಕಗಳಲ್ಲಿ ಸೆಲ್ಪಿಸ್ಪಾಟ್ ಮಾಡಲಾಗಿದ್ದು, ರಕ್ತದಾನ ಮಾಡಿದ ನಂತರ ರಕ್ತದಾನಿಗಳು ಇಲ್ಲಿ ಸೆಲ್ಪಿ ತಗೆದುಕೊಳ್ಳಬಹುದು. 'ರಕ್ತ ದಾನ ಮಾಡಲು ಸದಾ ನಾವು ಸನ್ನದ್ದರಾಗಿದ್ದೇವೆ. ನಾವು ರಕ್ತ ದಾನ ಮಾಡುವ ಮೂಲಕ ಜೀವ ದಾನ ಮಾಡುತ್ತೇವೆ. ನೀವು ಜೀವ ದಾನಕ್ಕೆ ರೆಡಿನಾ? ನಾನು ರಕ್ತ ಸೈನಿಕ.. ನೀವು..?' ಎಂಬ ಶೀರ್ಷಿಕೆ ಮತ್ತು ಅಡಿಬರಹಗಳು ಆಕರ್ಷಕವಾಗಿದ್ದು, ರಕ್ತದಾನವನ್ನು ಉತ್ತೇಜಿಸುತ್ತೀವೆ. ಈಗಾಗಲೇ ರಕ್ತದಾನ ಮಾಡಿರುವ ಗ್ರಾಮಸ್ಥರು ಇಂತಹ ಗ್ರಾಮದಲ್ಲಿ ತಾವು ಜನಿಸಿರುವುದಕ್ಕೆ ಹೆಮ್ಮೆ ವ್ಯಕ್ತಪಡಿಸುತ್ತಾರೆ.
from India & World News in Kannada | VK Polls https://ift.tt/3I0rejt
