ವಿಜಯ್‌ ಕೋಟ್ಯಾನ್‌ ಮಂಗಳೂರು: ಆನ್‌ಲೈನ್‌ ಮೂಲಕ 5 ನಿಮಿಷದಲ್ಲಿ ನಿಮ್ಮ ಖಾತೆಗೆ ಸಾಲ ಎಂದು ಆಮಿಷವೊಡ್ಡುವ ನೂರಾರು ಆ್ಯಪ್‌ಗಳು ದಿನೇ ದಿನೆ ಯುವ ಸಮಾಜದ ಪಾಲಿಗೆ ಉರುಳಾಗುತ್ತಿದೆ. ಈ ಜಾಲಕ್ಕೆ ಬಿದ್ದ ಅದೆಷ್ಟೋ ಮಂದಿ ಅದರಿಂದ ಹೊರಬರಲಾಗದೆ ಚಡಪಡಿಸುತ್ತಿದ್ದು, ಮರ್ಯಾದೆಗೆ ಅಂಜಿ ಜೀವವನ್ನೇ ಕಳೆದುಕೊಳ್ಳುತ್ತಿದ್ದಾರೆ. ಆನ್‌ಲೈನ್‌ ಸಾಲದ ಕೂಪಕ್ಕೆ ಡಿ.31ರಂದು ಉಡುಪಿ ಕುಂದಾಪುರದ ಹೆಮ್ಮಾಡಿಯಲ್ಲಿ ವಿಘ್ನೇಶ್‌ ಎಂಬ ಯುವಕ ಬಲಿಯಾದರೆ, ಜ.10ರಂದು ಪಕ್ಷಿಕೆರೆ ಕಿನ್ನಿಗೋಳಿಯ ಸುಶಾಂತ್‌ ಎಂಬಾತ ಶರಣಾಗಿದ್ದಾನೆ. ಇಬ್ಬರೂ ಡೆತ್‌ನೋಟ್‌ ಬರೆದಿಟ್ಟಿದ್ದು, ಅದರಲ್ಲಿಆನ್‌ಲೈನ್‌ ಸಾಲದಿಂದ ಹೊರಬರಲಾಗದೆ ಮೃತಪಟ್ಟಿರುವುದಾಗಿ ಹೇಳಿದ್ದಾರೆ. ಈ ಮೂಲಕ 11 ದಿನದ ಅಂತರದಲ್ಲಿ ಇಬ್ಬರು ಈ ಜಾಲಕ್ಕೆ ಸಿಲುಕಿ ಮೃತಪಟ್ಟಂತಾಗಿದೆ. ಆನ್‌ಲೈನ್‌ ಜಾಲದ ಕರಿನೆರಳು: ಗೂಗಲ್‌ನಲ್ಲಿ ಆನ್‌ಲೈನ್‌ ಲೋನ್‌ ಎಂದು ತಡಕಾಡಿದ ಕೂಡಲೇ ನೂರಾರು ಆ್ಯಪ್‌ಗಳು ಸಾಲದ ವಿವರ ನೀಡುತ್ತವೆ. ಆ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿ ಅವರು ಕೇಳುವ ಸಾಲಗಾರನ ದಾಖಲೆಗಳನ್ನು ಸಲ್ಲಿಸಿದ ಕೆಲವೇ ಕ್ಷಣದಲ್ಲಿ ಬ್ಯಾಂಕ್‌ ಖಾತೆಗೆ ಹಣ ಜಮೆಯಾಗುತ್ತದೆ. ಆದರೆ ಈ ಆನ್‌ಲೈನ್‌ ಲೋನ್‌ಗಳೇ ದಿನ ಕಳೆದಂತೆ ಕಂಟಕವಾಗಿ ಪರಿಣಮಿಸುತ್ತಿದೆ. ದೇಶಾದ್ಯಂತ ವ್ಯಾಪಿಸಿರುವ ಆನ್‌ಲೈನ್‌ ಲೋನ್‌ನ ಹಿಂದೆ ದೊಡ್ಡ ವಂಚನಾ ಜಾಲವೇ ಅಡಗಿದೆ. ಆನ್‌ಲೈನ್‌ಗೆ ಮೊರೆ: ಸಾಮಾನ್ಯವಾಗಿ ಸಾಲ ಬೇಕಾದಾಗ ಬ್ಯಾಂಕ್‌ಗಳು ನಾನಾ ದಾಖಲೆಗಳನ್ನು ಕೇಳುವ ಕಾರಣ ಕೆಲವು ಸುಲಭದಲ್ಲಿ ಸಿಗುವ ಆನ್‌ಲೈನ್‌ ಸಾಲಕ್ಕೆ ಮೊರೆ ಹೋಗುತ್ತಾರೆ. 4 ದಿನದಿಂದ ಒಂದು ತಿಂಗಳ ಅವಧಿಗೆ ಆ ಸಾಲಗಳನ್ನು ನೀಡಲಾಗುತ್ತಿದೆ. ಸಾಲಕ್ಕೆ ಆನ್‌ಲೈನ್‌ ಅರ್ಜಿ ಸಲ್ಲಿಸುವಾಗ ಆಧಾರ್‌, ಪಾನ್‌, ಬ್ಯಾಂಕ್‌ ಖಾತೆ, ಉದ್ಯೋಗ, ವೇತನ ವಿವರ ಜತೆಗೆ ಸಾಲಗಾರನ ಭಾವಚಿತ್ರಗಳನ್ನು ಪಡೆಯಲಾಗುತ್ತದೆ. 4 ವಿಧದಲ್ಲಿ ಟಾರ್ಚರ್‌: ಆನ್‌ಲೈನ್‌ ಸಾಲ ಪಡೆದ ಬಳಿಕ ನಿಗದಿತ ಕಂತಿನಂತೆ ಪಾವತಿ ಮಾಡಬೇಕು. ಒಂದು ವೇಳೆ ಪಾವತಿ ಮಾಡದಿದ್ದರೆ ಪ್ರಾರಂಭಿಕ ಹಂತದಲ್ಲಿ ಮೊಬೈಲ್‌ ಕರೆ ಮಾಡಿ ಸಾಲ ಕಟ್ಟಲು ಒತ್ತಡ ಹಾಕಲಾಗುತ್ತದೆ. ಎರಡನೇ ಹಂತದಲ್ಲಿ ಗೂಂಡಾಗಳಿಂದ ಕರೆ ಮಾಡಿ ಬೆದರಿಕೆ ಹಾಕಲಾಗುತ್ತದೆ. ಇದಾದ ಬಳಿಕವೂ ಕಟ್ಟದಿದ್ದರೆ ಆ್ಯಪ್‌ ಮೂಲಕ ಸಾಲಗಾರನ ಹತ್ತಿರ ಸಂಬಂಧಿ, ಗೆಳೆಯರ ದತ್ತಾಂಶ ಪಡೆದು ಅವರಿಗೆ ಕರೆ, ಸಂದೇಶ ಕಳುಹಿಸಿ ಹಣ ಕಟ್ಟಲು ಒತ್ತಡ ಹಾಕುತ್ತಾರೆ. ನಾಲ್ಕನೇ ಅಸ್ತ್ರವಾಗಿ ಸಾಲಗಾರನ ಫೊಟೋದ ಮೇಲೆ 'ವಂಚಕ' ಸಂದೇಶ ಹಾಕಿ ಫೇಸ್‌ಬುಕ್‌, ಟ್ವಿಟರ್‌, ಇನ್‌ಸ್ಟಾಗ್ರಾಂ ಸೇರಿದಂತೆ ಸಾಮಾಜಿಕ ಜಾಲತಾಣದಲ್ಲಿ ಹಾಕುವ ಬೆದರಿಕೆ ಹಾಕುತ್ತಾರೆ. ಇದರಿಂದ ಬೆಸತ್ತು ಹಲವರು ತಪ್ಪು ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರೆ. ವಾರಕ್ಕೆ ಶೇ.30ಕ್ಕೂ ಬಡ್ಡಿ: ಆನ್‌ಲೈನ್‌ ಸಾಲಕ್ಕೆ ವಾರಕ್ಕೆ ಶೇ.30ರಷ್ಟು ಬಡ್ಡಿ ವಿಧಿಸಲಾಗುತ್ತದೆ. 5 ಸಾವಿರ ರೂ. ಸಾಲಕ್ಕೆ ಅರ್ಜಿ ಹಾಕಿದರೆ ಒಂದು ವಾರದಲ್ಲಿ ಹೆಚ್ಚುವರಿ 1500 ರೂ.ಗೂ ಅಧಿಕ ಬಡ್ಡಿ ಕಟ್ಟಬೇಕು. 300ಕ್ಕೂ ಅಧಿಕ ಆ್ಯಪ್‌ಗಳು
- ಭಾರತದಲ್ಲಿ 300ಕ್ಕೂ ಅಧಿಕ ಆನ್‌ಲೈನ್‌ ಸಾಲ ಕೊಡುವ ಆ್ಯಪ್‌ಗಳು ಸಕ್ರಿಯ
- ಬೆಂಗಳೂರು ಸೇರಿದಂತೆ ರಾಜ್ಯದ ಹಲವೆಡೆ ಆನ್‌ಲೈನ್‌ ಸಾಲ ನೀಡುವ ಮೈಕ್ರೋ ಫೈನಾನ್ಸ್‌ ಆ್ಯಪ್‌ಗಳ ಜಾಲ
- ಆನ್‌ಲೈನ್‌ ಸಾಲ ನೀಡುವ ಈ ಕಂಪನಿಗಳು ಆರ್‌ಬಿಐಯಡಿ ನೋಂದಣಿಯಾಗಿರುವುದಿಲ್ಲ.
- ಆನ್‌ಲೈನ್‌ ಸಾಲ ಪಡೆಯಲು 25-45 ವರ್ಷದ ತಿಂಗಳ ವೇತನ ಪಡೆಯುವ ಯುವಕರೇ ಟಾರ್ಗೆಟ್‌
- ಸಾಲ ಪಡೆದ ಬಳಿಕ ವಾರಕ್ಕೆ ಶೇ.30ಕ್ಕೂ ಅಧಿಕ ಬಡ್ಡಿ ವಿಧಿಸಿ ಸಾಲಗಾರರಿಗೆ ಕಿರುಕುಳ
from India & World News in Kannada | VK Polls https://ift.tt/3GnnIPS
