ಪ್ರಮೋದ ಹರಿಕಾಂತ ಕಾರವಾರ ಉತ್ತರ ಕನ್ನಡ: ನೆರೆಯ ರಾಜ್ಯದಲ್ಲಿ ಲಕ್ಷಾಂತರ ಜನರು ಒಂದೆಡೆ ಸೇರಿ ಹೊಸ ವರ್ಷಾಚರಣೆ ನಡೆಸಿದ್ದಾರೆ. ಅಲ್ಲಿಗೆ ಪಾರ್ಟಿಗೆ ಹೋಗಿದ್ದ ರಾಜ್ಯ ಜನರು ವಾಪಸ್‌ ಬರಲಾರಂಭಿಸಿದ್ದು, ಗಡಿ ಜಿಲ್ಲೆಗಳಲ್ಲಿ ಕೊರೊನಾ ಭೀತಿ ಆವರಿಸಿದೆ. ಗೋವಾದಲ್ಲಿ ಈಗಾಗಲೇ ಒಂದು ಒಮಿಕ್ರಾನ್‌ ಕೇಸ್‌ ಪತ್ತೆಯಾಗಿದೆ. ಜತೆಗೆ ಸದ್ಯ 1338 ಸಕ್ರಿಯ ಕೋವಿಡ್‌ ಪ್ರಕರಣಗಳು ಇವೆ. ಎಲ್ಲರಿಗೂ ಆಸ್ಪತ್ರೆಯಲ್ಲಿಯೇ ಚಿಕಿತ್ಸೆ ನೀಡಲಾಗುತ್ತಿದೆ. ಜಿಲ್ಲೆಯಷ್ಟೇ ಚಿಕ್ಕದಾಗಿರುವ ಗೋವಾ ರಾಜ್ಯದಲ್ಲಿ ಕೋವಿಡ್‌ ಪಾಸಿಟಿವ್‌ ದರ ಕೂಡ ಶೇ.6.25ರಷ್ಟಿದೆ. ಶುಕ್ರವಾರ ರಾತ್ರಿ ನಡೆದ ಪಾರ್ಟಿಯಲ್ಲಿ ಉತ್ತರ ಕನ್ನಡ ಜಿಲ್ಲೆಯ ಜತೆಗೆ ಬೆಳಗಾವಿ, ಹುಬ್ಬಳ್ಳಿ, ಬಳ್ಳಾರಿ, ಹಾವೇರಿ, ಬೆಂಗಳೂರು ಸೇರಿದಂತೆ ವಿವಿಧ ಜಿಲ್ಲೆಗಳ ಪ್ರವಾಸಿಗರು ಪಾಲ್ಗೊಂಡಿದ್ದಾರೆ. ಅವರೆಲ್ಲರೂ ಶನಿವಾರದಿಂದ ಉತ್ತರ ಕನ್ನಡ, ಬೆಳಗಾವಿ ಮಾರ್ಗವಾಗಿ ತವರಿಗೆ ಮರಳುತ್ತಿದ್ದಾರೆ. ಆದರೆ, ರಾಜ್ಯದ ಗಡಿಯಲ್ಲಿ ಯಾರೊಬ್ಬರನ್ನೂ ಸರಿಯಾಗಿ ತಪಾಸಣೆ ಮಾಡುತ್ತಿಲ್ಲ. ಕೇವಲ ಹೆಸರು, ಮೊಬೈಲ್‌ ಸಂಖ್ಯೆ ಸಂಗ್ರಹಿಸಿ ಬಿಡಲಾಗುತ್ತಿದೆ. ಗೋವಾ ರಾಜ್ಯಕ್ಕೆ ಹೊಂದಿಕೊಂಡಿರುವ ಬೆಳಗಾವಿ ಜಿಲ್ಲೆಯಲ್ಲಿಯೂ ಇದೇ ಸ್ಥಿತಿ ಇದೆ. ಹಾಗಾಗಿ ಗಡಿ ಜಿಲ್ಲೆಗಳಲ್ಲಿ ಹೆಚ್ಚಿನ ಆತಂಕ ಎದುರಾಗಿದೆ. ಉತ್ತರಕನ್ನಡ ಜಿಲ್ಲೆಯಲ್ಲಿ ಕೋವಿಡ್‌-19 ಪಾಸಿಟಿವ್‌ ದರ ಶೇ.0.40ರ ಆಸು ಪಾಸಿನಲ್ಲಿದೆ. ನಿತ್ಯ 5, 6 ಪಾಸಿಟಿವ್‌ ಪ್ರಕರಣವಷ್ಟೇ ಪತ್ತೆಯಾಗುತ್ತಿದೆ. ಇನ್ನೊಂದು ಗಡಿ ಜಿಲ್ಲೆ ಬೆಳಗಾವಿಯಲ್ಲೂ ಪಾಸಿಟಿವ್‌ ದರ ಶೇ.1ಕ್ಕಿಂತ ಕಡಿಮೆ ಇದೆ. ಈಗ ಗೋವಾದಲ್ಲಿ ನಡೆದ ಹೊಸ ವರ್ಷಾಚರಣೆಯಲ್ಲಿ ಉತ್ತರ ಕನ್ನಡ ಜಿಲ್ಲೆ ಸೇರಿ ಸುತ್ತಲಿನ ಜಿಲ್ಲೆಗಳ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡಿರುವ ಕಾರಣಕ್ಕೆ ಕೋವಿಡ್‌ ತಪಾಸಣೆ ಸಾಮರ್ಥ್ಯವನ್ನು ಹೆಚ್ಚಿಸಲಾಗಿದೆ. ಉತ್ತರ ಕನ್ನಡ ಜಿಲ್ಲೆಯ 2500 ಮಾದರಿ ತಪಾಸಣೆ ಸಾಮರ್ಥ್ಯವನ್ನು ನಾಲ್ಕು ಸಾವಿರಕ್ಕೆ ಹೆಚ್ಚಿಸಲಾಗಿದೆ. ಇನ್ನೊಂದಡೆ, ಗೋವಾ ಪ್ರವಾಸಕ್ಕೆ ಹೋಗಿ ಬಂದವರ ಮೇಲೆ ಜಿಲ್ಲಾಡಳಿತವೂ ಯಾವುದೇ ನಿಗಾ ಇಟ್ಟಿಲ್ಲ. ಪ್ರಯಾಣಿಕರು ಎರಡು ಡೋಸ್‌ ವ್ಯಾಕ್ಸಿನ್‌ ಪಡೆದಿದ್ದಾರೆಯೇ ಎನ್ನುವ ಪರಿಶೀಲನೆಯೂ ಸರಿಯಾಗಿ ನಡೆಯುತ್ತಿಲ್ಲ. ಎರಡು ರಾಜ್ಯಗಳ ನಡುವೆ ದಾರಿ ಮುಕ್ತವಾಗಿ ಇರುವುದರಿಂದ ಕರ್ನಾಟಕದಲ್ಲಿ ಹೊಸ ವರ್ಷಾಚರಣೆ ತಡೆಲು ಕರ್ಫ್ಯೂ ಜಾರಿ ಮಾಡಿದ್ದಾದರೂ ಏಕೆ ಎಂದು ಇಲ್ಲಿನ ಉದ್ಯಮಿಗಳು ಪ್ರಶ್ನಿಸುತ್ತಿದ್ದಾರೆ. ಗೋವಾ ಪಾಸಿಟಿವ್‌ ಕೇಸ್‌ ಹೆಚ್ಚಳ ಗೋವಾ ರಾಜ್ಯದಲ್ಲಿ ಕೆಲವೇ ತಿಂಗಳಲ್ಲಿ ವಿಧಾನಸಭೆ ಚುನಾವಣೆ ಬರಲಿದೆ. ಅಲ್ಲದೆ, ಹೊಸ ವರ್ಷಾಚರಣೆ ಅಲ್ಲಿನ ವ್ಯಾಪಾರಿಗಳಿಗೆ ಆದಾಯದ ಮಹತ್ವದ ದಿನಗಳು. ಹಾಗಾಗಿ ಗೋವಾ ಸರಕಾರ ಜನರ ವಿರೋಧ ಕಟ್ಟಿಕೊಳ್ಳದೆ ಹೊಸ ವರ್ಷಾಚರಣೆಗೆ ಅವಕಾಶ ಕೊಟ್ಟಿದೆ. ಆದರೆ, ವರ್ಷಾಚರಣೆಯಲ್ಲಿ ಕೋವಿಡ್‌ 19 ಸಾಮಾನ್ಯ ಮಾರ್ಗಸೂಚಿಯನ್ನೂ ಕಡೆಗಣಿಸಲಾಗಿದೆ. ಇನ್ನೊಂದೆಡೆ ಗೋವಾದಲ್ಲಿ ಕಳೆದೊಂದು ವಾರದಿಂದ ಕೋವಿಡ್‌ 19 ಪಾಸಿಟಿವ್‌ ಪ್ರಕರಣಗಳ ಸಂಖ್ಯೆ ಹೆಚ್ಚಾಗಿದೆ. ಪ್ರತಿ ನಿತ್ಯ 200-300 ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗುತ್ತಿವೆ. ಜ.1ರಂದೂ 310 ಪಾಸಿಟಿವ್‌ ಕೇಸ್‌ ಪತ್ತೆಯಾಗಿದೆ. ಗುಣಮುಖರಾಗುತ್ತಿರುವವರ ಸಂಖ್ಯೆಯೂ ಕಡಿಮೆ ಆಗಿದೆ. ಹಾಗಾಗಿ ವಿದೇಶಿಗರು ಬಂದು ಹೋಗುವ ರಾಜ್ಯದಲ್ಲಿ ಮುಕ್ತವಾಗಿ ರಾತ್ರಿ ಪಾರ್ಟಿ ನಡೆಸಿರುವುದು ಸ್ಥಳೀಯರಲ್ಲಿಯೂ ಆತಂಕ ಮೂಡಿಸಿದೆ. ಗೋವಾ ರಾಜ್ಯದ ಕೋವಿಡ್‌ ಕೇಸ್‌
- ಸಕ್ರಿಯ ಪ್ರಕರಣ- 1338
- ಸೋಂಕಿತರ ಸಾವು- 3522
- ಒಂದು ವಾರದಲ್ಲಿ ಸೋಂಕಿತರ ಸಾವು- 3
- ಒಂದು ವಾರದಲ್ಲಿ ಪಾಸಿಟಿವ್‌ ಕೇಸ್‌- 1217
- ಪಾಸಿಟಿವ್‌ ರೇಟ್‌- ಶೇ.6.25
from India & World News in Kannada | VK Polls https://ift.tt/3HuaK2G
