ವಾಷಿಂಗ್ಟನ್: 'ನಾವು ಯುದ್ಧದಲ್ಲಿ ಹೋರಾಡುತ್ತಿಲ್ಲ, ಹೀಗಾಗಿ ಅನಾಮಿಕರಂತೆ ಸಾಯಬೇಕಾದ ಅವಶ್ಯಕತೆಯಿಲ್ಲ. ದಯವಿಟ್ಟು ನಮ್ಮನ್ನು ಕಾಪಾಡಿ..' ಇದೂ ಕೊರೊನಾ ವೈರಸ್ ಪೀಡಿತ ಯುದ್ಧ ಹಡಗೊಂದರ ಕ್ಯಾಪ್ಟನ್ ಡೊನಾಲ್ಡ್ ಟ್ರಂಪ್ ಸರ್ಕಾರಕ್ಕೆ ಮನವಿ ಮಾಡಿರುವ ಪರಿ. ಹೌದು, ಅಮೆರಿಕದ ನೌಕಾಸೇನೆಯ ಯುದ್ಧ ಹಡಗಿನಲ್ಲಿ ಮಾರಕ ಕೊರೊನಾ ವೈರಸ್ ಕಾಣಿಸಿಕೊಂಡಿದೆ. ಹಡಗಿನಲ್ಲಿರುವ ನೌಕಾಸೇನೆಯ ಸೈನಿಕರಲ್ಲಿ ಕೊರೊನಾ ವೈರಸ್ ಪಾಸಿಟಿವ್ ಪ್ರಕರಣಗಳು ಹೆಚ್ಚಾಗುತ್ತಿವೆ. ಪರಮಾಣು ಶಸ್ತ್ರಗಳನ್ನು ಹೊತ್ತು ಗಸ್ತು ತಿರುಗುತ್ತಿರುವ ನೌಕಾಸೇನೆಯ 'ಥಿಯೊಡೋರ್ ರೂಸ್‌ವೆಲ್ಟ್' ಎಂಬ ಯುದ್ಧ ಹಡಗಿನ ಸೈನಿಕರಲ್ಲಿ ಕೊರೊನಾ ವೈರಸ್ ಕಾಣಿಸಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಹಡಗಿನ ಕ್ಯಾಪ್ಟನ್ ಬ್ರೆಟ್ ಕ್ರೊಜಿಯರ್ ನೌಕಾಪಡೆಯ ಉನ್ನತ ಅಧಿಕಾರಿಗಳಿಗೆ ನಾಲ್ಕು ಪುಟಗಳ ಪತ್ರ ಬರೆದಿದ್ದಾರೆ. ಹಡಗಿನಲ್ಲಿ ಒಟ್ಟು 5 ಸಾವಿರ ಸೈನಿಕರಿದ್ದು, ದಿನದಿಂದ ದಿನಕ್ಕೆ ಕೊರೊನಾ ಪಾಸಿಟಿವ್ ಪ್ರಕರಣಗಳು ಹೆಚ್ಚಾಗುತ್ತಿವೆ. ಅಲ್ಲದೇ ಹಡಗಿನಲ್ಲಿ ಕೊರೊನಾ ಪೀಡಿತರನ್ನು ಕ್ವಾರಂಟೈನ್‌ನಲ್ಲಿ ಇಡಲು ಸೂಕ್ತ ಸೌಲಭ್ಯಗಳೂ ಇಲ್ಲ ಎಂದು ಕ್ಯಾಪ್ಟನ್ ಬ್ರೆಟ್ ಪತ್ರದ ಮೂಲಕ ಅಲವತ್ತುಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಕೂಡಲೇ ನೆರವಿಗೆ ಬರುವಂತೆ ನೌಕಾಪಡೆಯ ಉನ್ನತ ಅಧಿಕಾರಿಗಳಿಗೆ ಮನವಿ ಮಾಡಿರುವ ಕ್ಯಾಪ್ಟನ್ ಬ್ರೆಟ್, ಶಾಂತಿಯ ಸಮಯದಲ್ಲಿ ಹೀಗೆ ಸೈನಿಕರು ಸಾಯುವುದನ್ನು ತಪ್ಪಿಸಬೇಕು ಎಂದು ಭಾವನಾತ್ಮಕವಾಗಿ ಮನವಿ ಮಾಡಿದ್ದಾರೆ. ಇನ್ನು ಈ ಪತ್ರಕ್ಕೆ ಸ್ಪಂದಿಸಿರುವ ಅಮೆರಿಕದ ನೌಕಾಸೇನೆಯ ಕಾರ್ಯದರ್ಶಿ ಥಾಮಸ್ ಮಾಡ್ಲಿ, 'ಥಿಯೊಡೋರ್ ರೂಸ್‌ವೆಲ್ಟ್' ಯುದ್ಧ ಹಡಗಿನಲ್ಲಿರುವ ಧೀರ ಸೈನಿಕರನ್ನು ಕಾಪಾಡುವುದು ನಮ್ಮ ಜವಾಬ್ದಾರಿ ಎಂದು ಭರವಸೆ ನೀಡಿದ್ದಾರೆ.
from India & World News in Kannada | VK Polls https://ift.tt/39xoVTw
