ಚೀ.ಜ.ರಾಜೀವ ಮೈಸೂರು: ಕೊರೊನಾದ ಬಿಡುವಿನ ವೇಳೆಯಲ್ಲಿ ಮನೆಯಲ್ಲಿಯೇ ಉಳಿದಿರುವ ವಿದ್ಯಾರ್ಥಿಗಳ ಕಲಿಕೆಗೆ ಸಹಾಯವಾಗಲಿ ಎಂದು ಆರಂಭಿಸಿರುವ '' ಯೂ-ಟ್ಯೂಬ್‌ ಚಾನೆಲ್ ಸುಮಾರು 2 ಲಕ್ಷದಷ್ಟು ವಿದ್ಯಾರ್ಥಿಗಳನ್ನು ಮುಟ್ಟಿದೆ ! ಸರಕಾರಿ ಪ್ರಥಮ ದರ್ಜೆ ಕಾಲೇಜುಗಳಲ್ಲಿ ಪದವಿ ಮತ್ತು ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡುತ್ತಿರುವ ಸುಮಾರು 4 ಲಕ್ಷದಷ್ಟು ವಿದ್ಯಾರ್ಥಿಗಳಿಗಾಗಿ ಇಲಾಖೆ ಜ್ಞಾನ ನಿಧಿ ಚಾನೆಲ್ ಆರಂಭಿಸಿದೆ. ನುರಿತ ಅಧ್ಯಾಪಕರು ತಮ್ಮ ಪಠ್ಯ ವಿಷಯಕ್ಕೆ ಸಂಬಂಧಿಸಿದಂತೆ ನೀಡಿದ 20ರಿಂದ 30 ನಿಮಿಷ ಅವಧಿಯ ಉಪನ್ಯಾಸವನ್ನು ಚಿತ್ರೀಕರಿಸಿ, ಅದನ್ನೇ ಯೂ ಟ್ಯೂಬ್‌ಗೆ ಅಪ್‌ಲೋಡ್‌ ಮಾಡಲಾಗುತ್ತಿದೆ. ಇದನ್ನು ವಿದ್ಯಾರ್ಥಿಗಳು ಯಾವಾಗ ಬೇಕಾದರೂ ವೀಕ್ಷಿಸಿ, ತಮ್ಮ ಕಲಿಕೆಯನ್ನು ಉತ್ತಮೀಕರಿಸಿಕೊಳ್ಳುತ್ತಿದ್ದಾರೆ. ''ಕಲೆ, ವಿಜ್ಞಾನ ಮತ್ತು ವಾಣಿಜ್ಯ ವಿಷಯಕ್ಕೆ ಸಂಬಂಧಿಸಿದ ಸುಮಾರು 40 ವಿಷಯಗಳ ಕುರಿತು ಮೂರು ಸಾವಿರ ಈ ಕಂಟೆಂಟ್‌(ವೀಡಿಯೊ ಉಪನ್ಯಾಸ) ಅನ್ನು ನಾವು ಜ್ಞಾನನಿಧಿ ಯೂ ಟ್ಯೂಬ್‌ಗೆ ಜೋಡಿಸಿದ್ದೇವೆ. ಇದುವರೆಗೆ ಸುಮಾರು 2 ಲಕ್ಷ ವಿದ್ಯಾರ್ಥಿಗಳು ಇದನ್ನು ನೋಡಿರುವ ಕುರಿತು ನಮಗೆ ಮಾಹಿತಿ ಸಿಕ್ಕಿದೆ,'' ಎಂದು ಯೋಜನೆಯ ರಾಜ್ಯ ಸಮನ್ವಯಕಾರ ಬಿ.ಮಂಜುನಾಥ್‌ ವಿಜಯ ಕರ್ನಾಟಕಕ್ಕೆ ತಿಳಿಸಿದರು.
ಅನಿವಾರ್ಯವಾದ ರಜೆ ಸ್ಥಿತಿಗೆ ಕಾಲವನ್ನೇ ದೂಡಿರುವ ಹಿನ್ನೆಲೆಯಲ್ಲಿ ಶಿಕ್ಷಣ ಇಲಾಖೆ ಆನ್‌ಲೈನ್‌ ಶಿಕ್ಷಣಕ್ಕೆ ಹೆಚ್ಚು ಒತ್ತು ನೀಡಿದೆ. ಹಾಗಾಗಿ, ಯೂಟ್ಯೂಬ್‌, ವಾಟ್ಸ್‌ ಆ್ಯಪ್‌, ಟ್ವಿಟರ್‌, ಗೂಗಲ್‌ ಕ್ಲಾಸ್‌ ರೂಂನಂಥ ಡಿಜಿಟಲ್‌ ವೇದಿಕೆಗಳ ಮೂಲಕ ಕಾಲೇಜು ಅಧ್ಯಾಪಕರು ತಮ್ಮ ವಿದ್ಯಾರ್ಥಿಗಳಿಗೆ ಪಾಠ-ಪ್ರವಚನ ನೀಡಲಾರಂಭಿಸಿದ್ದಾರೆ. ಈ ಥರಾವರಿ ಡಿಜಿಟಲ್‌ ವೇದಿಕೆಗಳ ಪೈಕಿ ಶೇ.50ರಷ್ಟು ಭಾಗವನ್ನು ಯೂ ಟ್ಯೂಬ್‌ ಜ್ಞಾನ ನಿಧಿಯೇ ಆವರಿಸಿಕೊಂಡಿದೆ. ''ಇಲಾಖೆಯಲ್ಲಿರುವ 8 ಸಾವಿರ ಅಧ್ಯಾಪಕರ ಪೈಕಿ ನಾಲ್ಕು ಸಾವಿರ ಅಧ್ಯಾಪಕರು ಜ್ಞಾನನಿಧಿಗೆ ಪಠ್ಯ ಭಾಷಣ ಸಿದ್ಧಪಡಿಸುತ್ತಿದ್ದಾರೆ. ಈಗಾಗಲೇ 10 ಸಾವಿರ ಕಂಟೆಂಟ್‌ ಸಿದ್ಧವಿದೆ. ನಮಗೆ ಮೂರು ಸಾವಿರ ಕಂಟೆಂಟ್‌ ಅನ್ನು ಮಾತ್ರ ಯೂ ಟ್ಯೂಬ್‌ಗೆ ಅಪ್‌ಲೋಡ್‌ ಮಾಡಲು ಸಾಧ್ಯವಾಗಿದೆ. ಪ್ರತಿದಿನ 200 ಪಠ್ಯವನ್ನು ಜೋಡಿಸುತ್ತಲೇ ಇದ್ದೇವೆ,'' ಎಂದು ವಿವರಿಸುತ್ತಾರೆ ಮಂಜುನಾಥ್‌. ''ನಾಲ್ಕು ಲಕ್ಷ ವಿದ್ಯಾರ್ಥಿಗಳ ಶೇ.50ರಷ್ಟು ವಿದ್ಯಾರ್ಥಿಗಳು ಇದರ ಪ್ರಯೋಜನ ಪಡೆದಿದ್ದಾರೆ. ಇಂಥಾ ಪಠ್ಯಗಳ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿ, ಅಲ್ಲಿಯೇ ಪ್ರತಿಕ್ರಿಯಿಸಿದ್ದಾರೆ. ಆದರೆ, ಶೇ.20ರಿಂದ 30ರಷ್ಟು ಮಕ್ಕಳಿಗೆ ಡಿಜಿಟಲ್‌ ಸೌಲಭ್ಯ ಕೈಗೆಟಕುವುದೇ ಕಷ್ಟ. ಬಾಕಿ ಉಳಿದ ಮಕ್ಕಳಿಗೆ ಡಿಜಿಟಲ್‌ ಸೌಲಭ್ಯವಿದ್ದರೂ ಅವರು ಇನ್ನೂ ನಾವು ನೀಡುತ್ತಿರುವ ಡಿಜಿಟಲ್‌ ಮಾಧ್ಯಮದ ಶಿಕ್ಷಣದತ್ತ ಹೊರಳಿಲ್ಲ. ಇದಕ್ಕೆ ಕಾರಣ ತಿಳಿದಿಲ್ಲ,'' ಎನ್ನುತ್ತಾರೆ ಇಲಾಖೆಯ ಉನ್ನತ ಅಧಿಕಾರಿಯೊಬ್ಬರು. ಸಂಕಷ್ಟ ಕಾಲದ ಆಸರೆ ಕೊರೊನಾ ಸೃಷ್ಟಿಸಿರುವ ಈ ಸಂಕಟದ ಬಿಡುವಿನ ವೇಳೆಯಲ್ಲಿ ಜ್ಞಾನನಿಧಿ ಯೂ ಟ್ಯೂಬ್‌ ಚಾನೆಲ್ ಪದವಿ ವಿದ್ಯಾರ್ಥಿಗಳು ಕಲಿಯಲು ವರದಾನವಾಗಿದೆ. ಇದುವರೆಗಿನ ಅನುಭವದ ಆಧಾರದ ಮೇಲೆ ಹೇಳುವುದಾದರೆ, ಯೂ ಟ್ಯೂಬ್‌ ಚಾನೆಲ್ ಯಾವತ್ತೂ ತರಗತಿ ಪಾಠ-ಪ್ರವಚನಕ್ಕೆ ಪರ್ಯಾಯವಲ್ಲ. ಅಲ್ಲಿನ ಭಾವವನ್ನು ಇಲ್ಲಿನಿರೀಕ್ಷಿಸಲು ಸಾಧ್ಯವಿಲ್ಲ. ಆದರೆ, ಮೈಸೂರು ವಿವಿಯ ಪ್ರಾಧ್ಯಾಪಕರು ಬೋಧನೆ ಮಾಡಿದ್ದನ್ನು ಗುಲ್ಬರ್ಗಾ ವಿವಿಯ ವಿದ್ಯಾರ್ಥಿಗಳು ನೋಡಬಹುದು, ಆಲಿಸಬಹುದು, ಕಲಿಯಬಹುದು ಎನ್ನುತ್ತಾರೆ ಪ್ರೊ.ಬಿ.ವಿ. ವಸಂತಕುಮಾರ್‌. ಪದವಿ, ಸ್ನಾತಕೋತ್ತರ ಪದವಿ ವಿದ್ಯಾರ್ಥಿಗಳಿಗೆ ಪಠ್ಯದಲ್ಲಿ ನಿಗದಿಪಡಿಸಿರುವ ಅಕ್ಕಮಹಾದೇವಿ, ಜೇಡರ ದಾಸಿಮಯ್ಯ, ನೀಲಮ್ಮನ ಹಾಗೂ ಅಂಬಿಗರ ಚೌಡಯ್ಯನಿಗೆ ಸಂಬಂಧಿಸಿದ 100 ವಚನಗಳ ಕುರಿತು ತಲಾ 20 ನಿಮಿಷದ 27 ವೀಡಿಯೋ ಹಾಕಿದ್ದೇನೆ. ನಮ್ಮ ಸಮಯವೂ ವ್ಯರ್ಥವಾಗುತ್ತಿಲ್ಲ. ವಿದ್ಯಾರ್ಥಿಗಳಿಗೂ ಅನುಕೂಲವಾಗಿದೆ. -ಪ್ರೊ.ಬಿ.ವಿ.ವಸಂತಕುಮಾರ್‌, ಅಧ್ಯಾಪಕರು, ಮಹಾರಾಣಿ ಕಾಲೇಜು, ಮೈಸೂರು
from India & World News in Kannada | VK Polls https://ift.tt/3f3injp
