ಬೆಂಗಳೂರು: ದೇಶದಲ್ಲಿ ಕೊರೊನಾ ವೈರಸ್‌ ಅಟ್ಟಹಾಸ ಮೆರೆಯುತ್ತಿದೆ. ಕೋವಿಡ್-10 ಮಹಾಮಾರಿಯನ್ನು ನಿಯಂತ್ರಣ ಮಾಡಲು ಸರ್ಕಾರ, ಆರೋಗ್ಯ ಇಲಾಖೆ ಹರಸಾಹಸ ಪಡುತ್ತಿದ್ದಾರೆ. ಹೀಗಿದ್ದರೂ ಈ ಅಪಾಯಕಾರಿ ವೈರಸ್‌ ಜನರನ್ನು ಬಲಿಪಡೆದುಕೊಳ್ಳುತ್ತಲೇ ಸಾಗುತ್ತಿದೆ. ಕೊರೊನಾ ವೈರಸ್‌ ಜೊತೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಕೊರೊನಾ ಕುರಿತಾದ , ಕೋಮು ಪ್ರಚೋದಕ ಬರಹಗಳು, ಫೋಟೋ, ವಿಡಿಯೋಗಳನ್ನು ಹರಿಯಬಿಟ್ಟು ವೈರಲ್ ಮಾಡುತ್ತಿರುವ ಕಿಡಿಗೇಡಿತನ ಹೆಚ್ಚಾಗುತ್ತಿದೆ. ವೈರಸ್‌ ಆರೋಗ್ಯದ ಸ್ವಾಸ್ಥ್ಯ ಕೆಡಿಸಿದರೆ ವೈರಲ್‌ಗಳು ಸಮಾಜದ ಸ್ವಾಸ್ಥ್ಯವನ್ನು ಕೆಡಿಸುತ್ತಿದೆ. ಸಾಮಾಜಿಕ ಜಾಲತಾಣಗಳಾದ ವಾಟ್ಸಪ್‌, ಫೇಸ್‌ಬುಕ್‌, ಟ್ವಿಟ್ಟರ್‌ಗಳಲ್ಲಿ ಅಸಲಿ ಸುದ್ದಿ ಹಾಗೂ ನಕಲಿ ಸುದ್ದಿಗಳನ್ನು ಪತ್ತೆ ಹಚ್ಚುವುದು ತ್ರಾಸದಾಯಕವಾಗಿದೆ. ಕಿಡಿಗೇಡಿಗಳು ಸಾಕಷ್ಟು ನಕಲಿ ಸುದ್ದಿಗಳನ್ನು ಹರಡಿಬಿಡುತ್ತಿದ್ದಾರೆ. ಜನರು ಅದನ್ನು ಸತ್ಯ ಎಂದೇ ನಂಬಿಕೊಂಡು ಬೇರೆ ಕಡೆಗಳಲ್ಲಿ ಹಂಚುತ್ತಾರೆ. ಈ ಮೂಲಕ ಸುಳ್ಳು ಸುದ್ದಿಯೊಂದು ವೈರಲ್ ಆಗಿ ಜನರ ನಡುವೆ ಸತ್ಯ ಎಂದೇ ಬಿಂಬಿತವಾಗಿಬಿಡುತ್ತದೆ. ಅದರಲ್ಲೂ ಕೊರೊನಾ ಕುರಿತಾಗಿ ಹಲವಾರು ಸುಳ್ಳು ಸುದ್ದಿಗಳು ಸಾಮಾಜಿಕ ಜಾಲತಾಣಗಳ ತುಂಬಾ ಹರಿದಾಡುತ್ತಿವೆ. ವೈದ್ಯರ ಹೆಸರಿನಲ್ಲಿ ಕೊರೊನಾಗೆ ಚಿಕಿತ್ಸೆಗಳ ಕುರಿತಾಗಿ ತಪ್ಪು ಮಾಹಿತಿಗಳನ್ನು ಹೊಂದಿರುವ ಬರಹಗಳು ವೈರಲ್ ಆಗುತ್ತಿವೆ. ಕೊರೊನಾ ಸೋಂಕು ಹರಡುವ ಭಯದಲ್ಲಿ ಜನರು ಇದುವೇ ಸತ್ಯ ಎಂದು ನಂಬಿಕೊಂಡು ಬಿಡುತ್ತಿದ್ದಾರೆ. ಪರಿಣಾಮ ಇದು ಸಾಕಷ್ಟು ಸಮಸ್ಯೆಗಳನ್ನು ಸೃಷ್ಟಿ ಮಾಡುತ್ತಿವೆ. ಅಷ್ಟೇ ಅಲ್ಲದೆ ಕೊರೊನಾ ಸೋಂಕಿಗೆ ತಳುಕು ಹಾಕಿ ಧಾರ್ಮಿಕ ಪ್ರಚೋದನೆ, ವ್ಯಕ್ತಿಗತ ನಿಂದನೆ ಮಾಡುವಂತಹ ಸಾಕಷ್ಟು ಪೋಸ್ಟ್‌ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಇದು ಸಾಮಾಜಿಕವಾಗಿ ಅಪಾಯಕಾರಿ ಸನ್ನಿವೇಶವನ್ನು ಸೃಷ್ಟಿ ಮಾಡುವ ಸಾಧ್ಯತೆಗಳನ್ನು ಅಲ್ಲಗಳೆಯುವ ಹಾಗಿಲ್ಲ. ಜೊತೆಗೆ ಸರ್ಕಾರದ ಇಲಾಖೆಗಳ ಹೆಸರಿನಲ್ಲೂ ನಕಲಿ ಪೋಸ್ಟ್‌ಗಳು, ದಾಖಲೆಗಳನ್ನು ತಿದ್ದುವ ಮೂಲಕ ಅವುಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಯಬಿಡಲಾಗುತ್ತಿದೆ. ಇದನ್ನು ಸರ್ಕಾರದ ಆದೇಶಗಳೆಂದು ನಂಬಿಕೊಂಡು ಜನರು ಮೋಸ ಹೋಗುತ್ತಿದ್ದಾರೆ. ಇಂತಹ ಹಲವಾರು ಘಟನೆಗಳು ನಡೆದು ಕೊನೆಗೆ ಸಂಬಂಧಪಟ್ಟ ಇಲಾಖೆಗಳು ಸ್ಪಷ್ಟೀಕರಣ ಕೊಡುವ ಹಂತಕ್ಕೂ ತಲುಪಿದೆ. ಇಷ್ಟೇ ಇಲ್ಲ, ಕೊರೊನಾ ಸಂಕಷ್ಟದ ಪರಿಸ್ಥಿತಿಯನ್ನು ದುರ್ಭಳಕೆ ಮಾಡಿಕೊಳ್ಳುವ ಕಿಡಿಗೇಡಿಗಳ ತಂಡವೂ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗುತ್ತಿದೆ. ಕೆಲವು ಫೋಟೋಗಳನ್ನು ಹಾಕಿ ಇವರು ಸಂಕಷ್ಟದಲ್ಲಿದ್ದಾರೆ ಎಂದು ಜನರನ್ನು ನಂಬಿಸಿ ಹಣ ದೋಚುವ ಖದೀಮರ ಬಗ್ಗೆಯೂ ಸಾಮಾಜಿಕ ಜಾಲತಾಣದಲ್ಲಿರುವರು ಎಚ್ಚರಿಕೆ ವಹಿಸಬೇಕಾಗಿದೆ. ಸಾಮಾಜಿಕ ಜಾಲತಾಣಗಳ ಮೇಲೆ ಪೊಲೀಸರು ಕಣ್ಣಿಟ್ಟರೂ ಇದರ ಕೃತ್ಯಗಳಿಗೆ ಕಡಿವಾಣ ಬಿದ್ದಿಲ್ಲ. ಈ ನಿಟ್ಟಿನಲ್ಲಿ ಸೈಬರ್‌ ಪೊಲೀಸರು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಸಮಾಜದ ನೆಮ್ಮದಿ ಕೆಡಿಸುವ ಕಿಡಿಗೇಡಿ ನೆಟ್ಟಿಗರ ವಿರುದ್ಧ ಸೂಕ್ತ ಕ್ರಮಗಳನ್ನು ಜರಗಿಸಬೇಕಾಗಿದೆ.
from India & World News in Kannada | VK Polls https://ift.tt/3bMFnRu
