- ರಾಘವೇಂದ್ರ ಭಟ್‌, ಬೆಂಗಳೂರು ಮಹಾರಾಷ್ಟ್ರ, ಗುಜರಾತ್‌, ದಿಲ್ಲಿ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಪರಿಸ್ಥಿತಿ ದಿನದಿಂದ ದಿನಕ್ಕೆ ಉಲ್ಬಣಗೊಳ್ಳುತ್ತಿದ್ದರೆ, ರಾಜ್ಯದಲ್ಲಿ ಪಾಸಿಟಿವ್‌ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದೆ. ದೇಶದಲ್ಲಿ ಈಗ ಕರ್ನಾಟಕಕ್ಕೆ ಮೂರನೇ ಸ್ಥಾನ. 512 ಪ್ರಕರಣಗಳಲ್ಲಿ 193 ಮಂದಿ ಆಗಲೇ ಗುಣಮುಖರಾಗಿ ಬಿಡುಗಡೆ ಹೊಂದಿದ್ದಾರೆ. ಕಳೆದ ಎರಡು ದಿನಗಳಲ್ಲಿ ದಾಖಲಾದ ಪಾಸಿಟೀವ್‌ ಪ್ರಕರಣಗಳು ಕೇವಲ 11. ಅದು ಕೂಡಾ ರೆಡ್‌ ಜೋನ್‌ಗೆ ಸೀಮಿತವಾಗಿಯಷ್ಟೇ ಹೊಸ ಪ್ರಕರಣಗಳು ವರದಿಯಾಗುತ್ತಿವೆ. ಸಿಎಂ ಬಿ.ಎಸ್‌. ಯಡಿಯೂರಪ್ಪ ಮತ್ತು ಸಚಿವ ಸಂಪುಟ ಸನ್ನಿವೇಶಕ್ಕೆ ತಕ್ಕಂತೆ ತೆಗೆದುಕೊಂಡ ನಿರ್ಧಾರಗಳು, ಜನರ ಸಹಕಾರ, ವೈದ್ಯಕೀಯ, ಪೊಲೀಸ್‌ ಸಿಬ್ಬಂದಿಯ ಸಹಕಾರದಿಂದ ಇದು ಸಾಧ್ಯವಾಗಿದೆ. ಲಾಕ್‌ಡೌನ್‌ಗೆ ಮೊದಲೇ ಬಂದ್: ದೇಶದಲ್ಲಿ ಲಾಕ್ಡೌನ್ ಘೋಷಣೆಗೆ ಮುನ್ನವೇ ರಾಜ್ಯದಲ್ಲಿ ಬಹುತೇಕ ಎಲ್ಲ ವ್ಯವಸ್ಥೆಗಳನ್ನು ಬಂದ್ ಮಾಡಿದ್ದು ಗಂಭೀರತೆಯನ್ನು ಅರ್ಥ ಮಾಡಿಕೊಂಡಿದ್ದಕ್ಕೆ ಪುರಾವೆ. ಟಾಸ್ಕ್‌ಫೋರ್ಸ್‌ ಬೆಂಗಾವಲು: ಡಾ. ದೇವಿ ಶೆಟ್ಟಿ ಮತ್ತು ಡಾ. ಸುದರ್ಶನ್‌ ಬಳ್ಳಾಲ್‌ ನೇತೃತ್ವದಲ್ಲಿ ಎರಡು ಟಾಸ್ಕ್‌ಫೋರ್ಸ್‌ ರಚಿಸಿದ ಅದರ ಶಿಫಾರಸಿನಂತೆ ಹೆಜ್ಜೆ ಇಟ್ಟಿದ್ದು ರಾಜ್ಯಕ್ಕೆ ಲಾಭವಾಯಿತು. ಆಸ್ಪತ್ರೆಗಳು, ವಾರ್‌ರೂಮ್: ಎಲ್ಲ ಜಿಲ್ಲೆಗಳಲ್ಲೂ ಕೊರೊನಾ ಚಿಕಿತ್ಸೆಗೆ ಪ್ರತ್ಯೇಕ ಆಸ್ಪತ್ರೆ ನಿಯೋಜನೆ. ಪ್ರತ್ಯೇಕ ವಾರ್‌ ರೂಮ್‌ ಮೂಲಕ ಎಲ್ಲ ಚಟುವಟಿಕೆಗಳ ಮೇಲೆ ನಿಗಾ. ಸಂಪರ್ಕಿತರ ಯಶಸ್ವಿ ಪತ್ತೆ: ಕೇಸು ಪತ್ತೆಯಾದ ಕೂಡಲೇ ಟ್ರಾವೆಲ್‌ ಹಿಸ್ಟರಿ ಬೆನ್ನತ್ತಿ, ಸಂಪರ್ಕಿತರನ್ನು ಪತ್ತೆ ಹಚ್ಚಿ ಕ್ವಾರಂಟೈನ್‌ಗೆ ಒಳಪಡಿಸಿದ್ದರಿಂದ ಸೋಂಕು ಹರಡುವಿಕೆಗೆ ಕಡಿವಾಣ. ತುರ್ತು ಚಿಕಿತ್ಸೆ, ಭರವಸೆ: ದುಬೈಯಿಂದ ಬಂದವರನ್ನು ಆರಂಭಿಕ ಹಂತದಲ್ಲೇ ಚಿಕಿತ್ಸೆಗೆ ಒಳಪಡಿಸಿದ್ದು ಮತ್ತು ಸೋಂಕಿತರಲ್ಲಿ ಭರವಸೆ ತುಂಬಿದ್ದರಿಂದ ಗುಣಮುಖ ವೇಗ ಹೆಚ್ಚಳ. ಜನರ ಅಪೂರ್ವ ಸ್ಪಂದನ: ಸಿಎಂ ಸೂಚನೆ ಮತ್ತು ಪ್ರಧಾನಿ ಮನವಿಗೆ ಇಡೀ ರಾಜ್ಯದ 95% ಜನರು ಸ್ಪಂದಿಸಿ, ಮನೆಯೊಳಗೇ ಉಳಿದು ಬೆಂಬಲ ಸೂಚಿಸಿದರು. ಕೆಲವೇ ಅಹಿತಕರ ಘಟನೆಗಳು ನಡೆದವು. ಜನರ ಸ್ವಯಂ ಲಾಕ್ಡೌನ್: ರಾಜ್ಯದ ಹಲವಾರು ಕಡೆಗಳಲ್ಲಿ ಜನರೇ ಸ್ವತಃ ತಮ್ಮ ಬಡಾವಣೆಗೆ, ತಮ್ಮ ಊರಿಗೆ ಬೇಲಿ ಹಾಕಿಕೊಂಡು ಸೋಂಕಿತರ ಪ್ರವೇಶವನ್ನು ತಪ್ಪಿಸಲು ಯತ್ನಿಸಿದರು. ಡಿಸಿ, ಎಸ್ಪಿಗಳ ಕಟ್ಟುನಿಟ್ಟು: ಜಿಲ್ಲಾಡಳಿತಗಳು ಅತ್ಯಂತ ಕಠಿಣವಾಗಿ ನಡೆದುಕೊಂಡಿದ್ದು ಯಶಸ್ಸಿನಲ್ಲಿ ದೊಡ್ಡ ಪಾತ್ರ ವಹಿಸಿದೆ. ಕೆಲವು ಡಿಸಿಗಳು ಯಾರ ಮಾತನ್ನೂ ಕೇಳದೆ ಲಾಕ್ಡೌನ್ ಪಾಲನೆ ಮಾಡಿದ್ದರಿಂದ ಸುಮಾರು 11 ಜಿಲ್ಲೆಗಳಲ್ಲಿಒಂದೇ ಒಂದು ಪ್ರಕರಣವೂ ವರದಿಯಾಗಲಿಲ್ಲ. ಸೀಲ್‌ಡೌನ್‌, ಕಂಟೈನ್ಮೆಂಟ್: ಒಂದೇ ಪ್ರದೇಶದಲ್ಲಿ ಪ್ರಕರಣಗಳು ಹೆಚ್ಚಾದಾಗ ಸೀಲ್‌ಡೌನ್‌ ಮಾಡುವುದು, ಕಂಟೈನ್ಮೆಂಟ್ ಏರಿಯಾಗಳೆಂದು ಗುರುತಿಸಿ ಎಲ್ಲ ರೀತಿಯ ಕಟ್ಟೆಚ್ಚರಗಳನ್ನು ವಹಿಸಿದ್ದು. ಕಾರ್ಮಿಕರ ನಿರ್ವಹಣೆ: ಲಾಕ್ಡೌನ್ ಆದ ಕೂಡಲೇ ಗೊಂದಲಕ್ಕೆ ಒಳಗಾದ ಕಾರ್ಮಿಕರಿಗೆ ಸೂಕ್ತ ಆಶ್ರಯ, ಆಹಾರವನ್ನು ಭರವಸೆ ತುಂಬಿದ್ದರಿಂದ ಓಡಾಟಕ್ಕೆ ತಡೆ ಬಿತ್ತು.
from India & World News in Kannada | VK Polls https://ift.tt/2VJu4UG
