- ಕಾರ್ತಿಕ್‌ ಯು.ಎಚ್‌., ಬೆಂಗಳೂರು ಅಮೆರಿಕ ಹಾಗೂ ಚೀನಾದಲ್ಲಿ ಈ ಕುರಿತು ಅಧ್ಯಯನಗಳು ನಡೆದಿದ್ದು, ಕೆಲ ರೋಗಿಗಳ ಕಣ್ಣೀರಿನಲ್ಲಿಯೂ ವೈರಸ್ ಕಂಡುಬಂದಿದೆ. ಆದರೆ, ರಾಜ್ಯದಲ್ಲಿ ಸದ್ಯಕ್ಕೆ ಅಂತಹ ಯಾವುದೇ ಘಟನೆಗಳಾಗಲೀ, ಅಧ್ಯಯನಗಳಾಗಲೀ ಇದುವರೆಗೆ ನಡೆದಿಲ್ಲ. ಕೊರೊನಾ ರೋಗಿಯಲ್ಲಿರುವ ವೈರಸ್ ಆರೋಗ್ಯವಂತ ವ್ಯಕ್ತಿಯ ದೇಹವನ್ನು ಮೂಗು, ಬಾಯಿ ಹಾಗೂ ಕಣ್ಣಿನ ಮೂಲಕ ಪ್ರವೇಶಿಸುತ್ತದೆ. ಹೀಗೆ ಪ್ರವೇಶಿಸಿದ ವೈರಸ್ ಕಣ್ಣಿಗೂ ಹಾನಿ ಉಂಟು ಮಾಡುತ್ತದೆ. ಆದರೆ, ಕೆಲವೇ ರೋಗಿಗಳಲ್ಲಿ ಈ ಸಮಸ್ಯೆ ಕಂಡು ಬರುತ್ತದೆ. ಮುಖ್ಯವಾಗಿ ಈ ವೈರಸ್ ಕಣ್ಣಿನ ತೆಳು ಪರದೆಯಾದ ಕಂಜಕ್ಟಿವಾದ ಮೇಲೆ ಹಾನಿ ಮಾಡುತ್ತದೆ. ಸಾಮಾನ್ಯವಾಗಿ ಕಂಜಕ್ಟಿವಾಗೆ ಹಾನಿಯಾದರೆ 'ಕಂಜಂಕ್ಟಿವೈಟಿಸ್‌ ಸೋಂಕು' ಬರುತ್ತದೆ. ಈ ಸೋಂಕು ಬಂದ ಬಳಿಕ ಕಣ್ಣು ಕೆಂಪಾಗುವಿಕೆ, ಸದಾ ನೀರು ಬರುವುದು, ತುರಿಕೆ, ಊದಿಕೊಳ್ಳುವುದೂ ಸೇರಿದಂತೆ ಕೆಲ ಲಕ್ಷಣಗಳು ಕಂಡು ಬರುತ್ತವೆ. ಕೊರೊನಾ ರೋಗಿಗಳಿಗೆ ಈ ಸೋಂಕು ಬಂದಾಗ ಕಣ್ಣೀರು ಬಂದರೆ ಅದರ ಮೂಲಕ ವೈರಸ್ ಹೊರಗೆ ಬರುವ ಸಾಧ್ಯತೆ ಇರುತ್ತದೆ. ''ಚೀನಾದಲ್ಲಿ30 ಕೊರೊನಾ ರೋಗಿಗಳ ಮೇಲೆ ನಡೆದ ಅಧ್ಯಯನದಲ್ಲಿ ಒಬ್ಬ ರೋಗಿಯಲ್ಲಿ ಕಂಜಂಕ್ಟಿವೈಟಿಸ್‌ ಸೋಂಕು ಕಂಡುಬಂದಿದೆ ಹಾಗೂ ಕಣ್ಣೀರಿನಲ್ಲಿ ವೈರಸ್ ಪತ್ತೆಯಾಗಿದೆ. ರಾಜ್ಯದಲ್ಲಿ ಈವರೆಗೂ ಅಂತಹ ಪ್ರಕರಣ ಪತ್ತೆಯಾಗಿರುವ ಬಗ್ಗೆ ಖಾತರಿಯಾಗಿಲ್ಲ,'' ಎನ್ನುತ್ತಾರೆ ಡಾ. ಅಗರ್‌ವಾಲ್‌ ಕಣ್ಣಿನ ಆಸ್ಪತ್ರೆಯ ನೇತ್ರ ತಜ್ಞೆ ಡಾ.ಸಂಜನಾ ವತ್ಸ. ಕೊರೊನಾ ಸೋಂಕು ಮೂಗು, ಬಾಯಿಯ ಮೂಲಕ ಹರಡುತ್ತದೆ ಎಂದು ಜನರಿಗೆ ಗೊತ್ತಿರುವುದರಿಂದ ಮಾಸ್ಕ್‌ ಧರಿಸುತ್ತಾರೆ. ಆದರೆ ಕಣ್ಣಿನ ಮೂಲಕವೂ ವೈರಸ್ ಪ್ರವೇಶಿಸುತ್ತದೆ ಎಂಬುದನ್ನು ಜನರು ಮರೆಯುತ್ತಿದ್ದಾರೆ. ಹೀಗಾಗಿ, ಈ ಸಮಯದಲ್ಲಿ ಕಣ್ಣಿನ ಸುರಕ್ಷತೆ ಕಡೆಗೂ ಗಮನಹರಿಸಬೇಕಿದೆ. ಕಣ್ಣು, ಮೂಗು, ಬಾಯಿ ಮುಟ್ಟುವ ಮುನ್ನ ಕೈಶುಚಿಗೊಳಿಸಿರಬೇಕು ಎಂದು ಆರೋಗ್ಯ ಇಲಾಖೆ ಸಲಹೆ ನೀಡುತ್ತಲೇ ಇದೆ. ಕಾಂಟ್ಯಾಕ್ಟ್ ಲೆನ್ಸ್‌ ಬಳಸುವವರು ಈ ಶುಚಿತ್ವದ ವಿಚಾರದಲ್ಲಿ ಎಲ್ಲರಿಗಿಂತ ಹೆಚ್ಚು ಎಚ್ಚರ ವಹಿಸಬೇಕು ಎಂದು ತಜ್ಞರು ಕಿವಿಮಾತು ಹೇಳಿದ್ದಾರೆ. ''ಕೈಯನ್ನು ಸೋಪಿನಲ್ಲಿ ಚೆನ್ನಾಗಿ ತೊಳೆದು ಕಾಂಟ್ಯಾಕ್ಟ್ ಲೆನ್ಸ್‌ ಮುಟ್ಟಬೇಕು. ಪ್ರತಿ ದಿನ ಲೆನ್ಸ್‌ ಸ್ವಚ್ಛಗೊಳಿಸಬೇಕು. ಹೊಸದಾಗಿ ತಪಾಸಣೆಗೆ ಬರುವವರಿಗೆ ಸಾಧ್ಯವಾದಷ್ಟು ಕನ್ನಡಕ ಬಳಸಿ ಎಂದು ಹೇಳುತ್ತಿದ್ದೇವೆ,'' ಎಂದು ಡಾ.ಸಂಜನಾ ವತ್ಸ ತಿಳಿಸಿದರು. ತಜ್ಞರು ನೀಡಿದ ಸಲಹೆ
- ಕೊಳಕಾದ ಕೈಯಲ್ಲಿ ಕಣ್ಣು ಮುಟ್ಟಬೇಡಿ
- ಕಣ್ಣು ಕೆಂಪಾದರೆ, ಊದಿಕೊಂಡರೆ ವೈದ್ಯರ ಬಳಿ ತಪಾಸಣೆ ಮಾಡಿಸಿಕೊಳ್ಳಿ
- ಹೊರಗೆ ಹೋದಾಗ ಮಾಸ್ಕ್‌ ಜತೆ ಗಾಗಲ್‌ ಕೂಡ ಧರಿಸಿ.
from India & World News in Kannada | VK Polls https://ift.tt/3eThlWW
