ಲಾಹೋರ್‌: ಯೂಟ್ಯೂಬ್‌ ಚಾನಲ್‌ನಲ್ಲಿನ ಅಸಭ್ಯ ಹೇಳಿಕೆಗಳನ್ನು ನೀಡಿದ ಹಿನ್ನೆಲೆಯಲ್ಲಿ ಕಾನೂನು ಸಲಹೆಗಾರ ತಫಝುಲ್ ರಿಝ್ವಿ, ಪಾಕ್‌ನ ಮಾಜಿ ಕ್ರಿಕೆಟಿಗ ವಿರುದ್ಧ ಕ್ರಿಮಿನಲ್‌ ವಿಚಾರಣೆ ಮತ್ತು ಮಾನನಷ್ಟ ಮೊಕದ್ದಮೆ ಹೂಡಿದ್ದಾರೆ. ಈ ಬಗ್ಗೆ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದ್ದು, ಮಾಜಿ ವೇಗದ ಬೌಲರ್‌ ತಮ್ಮ ಯೂಟ್ಯೂಬ್‌ ಚಾನಲ್‌ನಲ್ಲಿ ಬಳಕೆ ಮಾಡಿರುವ ಪದಗಳ ಕುರಿತಾಗಿ ಅಸಮಾಧಾನ ಹೊರಹಾಕಿದೆ. ಈ ನಿಟ್ಟಿನಲ್ಲಿ ರಿಝ್ವಿ ತಮ್ಮ ನಿರ್ದೇಶನದಲ್ಲಿ ಕ್ರಮಕ್ಕೆ ಮುಂದಾಗಿದ್ದಾರೆ ಎಂದು ತಿಳಿಸಿದೆ. "ಶೊಯೇಬ್‌ ಅಖ್ತರ್ ಅವರು ಬಳಕೆ ಮಾಡಿರುವ ಪದಗಳಿಂದ ಪಾಕಿಸ್ತಾನ ಕ್ರಿಕೆಟ್ ಮಂಡಳಿಗೆ ಬಹಳ ಬೇಸರವಾಗಿದೆ. ಪಿಸಿಬಿ ಕಾನೂನು ವಿಭಾಗ ಮತ್ತು ಕಾನೂನು ಸಲಹೆಗಾರರ ಕುರಿತಾಗಿ ಸಾರ್ವಜನಿಕವಾಗಿ ಮಾತನಾಡುವ ವೇಳೆ ಅಸಭ್ಯ ಹೇಳಿಕೆಗಳನ್ನು ಅವರು ನೀಡಿದ್ದಾರೆ. ಬಳಸಿರುವ ಭಾಷೆ ನಿಜಕ್ಕೂ ಅಸಹನೀಯ. ನಾಗರೀಕ ಸಮಾಜದಲ್ಲಿ ಈ ರೀತಿಯ ಮಾತುಗಳನ್ನು ಸಹಿಸಲು ಸಾಧ್ಯವಿಲ್ಲ," ಎಂದಿದೆ. "ಇದೀಗ ಪಿಸಿಬಿ ಕಾನೂನು ಸಲಹೆಗಾರರಾದ ತಫಝುಲ್ ರಿಝ್ವಿ ತಮ್ಮದೇ ನಿರ್ದೇಶನದಲ್ಲಿ ಶೊಯೇಬ್‌ ಅಖ್ತರ್ ವಿರುದ್ಧ ಮಾನನಷ್ಟ ಮೊಕದ್ದಮೆ ಮತ್ತು ಕ್ರಿಮಿನಲ್‌ ವಿಚಾರಣೆಯನ್ನು ಆಗ್ರಹಿಸಿದ್ದಾರೆ. ಪಿಸಿಬಿ ಕೂಡ ತನ್ನ ಹಕ್ಕನ್ನು ಕಾಯ್ದುಕೊಳ್ಳಲಿದೆ," ಎಂದು ತನ್ನ ಹೇಳಿಕೆಯಲ್ಲಿ ವಿವರಿಸಿದೆ. ಶೊಯೇಬ್‌ ಅಖ್ತರ್, ಇತ್ತೀಚೆಗೆ ತಮ್ಮ ಯೂಟ್ಯೂಬ್‌ ಚಾನಲ್‌ನಲ್ಲಿ ಪಾಕಿಸ್ತಾನದ ಪ್ರತಿಭಾನ್ವಿತ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ಉಮರ್‌ ಅಕ್ಮಲ್‌ ವಿರುದ್ಧ ಹೇರಲಾಗಿರುವ 3 ವರ್ಷಗಳ ನಿಷೇಧ ಶಿಕ್ಷೆ ಕುರಿತಾಗಿ ಮಾತನಾಡಿ, ಅಸಮಾಧಾನ ಹೊರಹಾಕಿದ್ದರು. ಈ ವೇಳೆ ಆಟಗಾರರು ಮತ್ತು ಪಿಸಿಬಿ ನಡುವೆ ಸದಾ ಭಿನ್ನಾಭಿಪ್ರಾಯ ತಂದೊಡ್ಡುವುದಾಗಿ ಆರೋಪಿಸಿ ಕಾನೂನು ಕ್ಷೇತ್ರದಲ್ಲಿ ರಿಝ್ವಿ ಅವರ ಅನುಭವವನ್ನು ಪ್ರಶ್ನಿಸಿದ್ದರು. ಅಕ್ಮಲ್‌ ವಿರುದ್ಧದ 3 ವರ್ಷಗಳ ನಿಷೇಧ ಶಿಕ್ಷೆ ಬಹಳ ಕಠಿಣವಾದದ್ದು ಎಂದು ಅಖ್ತರ್ ಟೀಕಿಸಿದ್ದರು. ಮ್ಯಾಚ್‌ ಫಿಕ್ಸಿಂಗ್‌ ಸಲುವಾಗಿ ಬುಕ್ಕೀಗಳು ಸಂಪರ್ಕಿಸಿದ್ದ ವಿಚಾರವನ್ನು ಪಿಸಿಬಿ ಗಮನಕ್ಕೆ ತರದೇ ಇದ್ದ ಕಾರಣಕ್ಕೆ ಉಮರ್‌ ಅಕ್ಮಲ್‌ಗೆ 3 ವರ್ಷ ನಿಷೇಧ ಶಿಕ್ಷೆ ಎದುರಾಗಿದೆ. "ಪಿಸಿಬಿ ಕಾನೂನು ವಿಭಾಗ ಮೂರು ಪೈಸಕ್ಕೆ ಬೆಲೆ ಬಾಳುವುದಿಲ್ಲ. ಕೇವಲ ಅನಗತ್ಯ ಕೇಸ್‌ಗಳ ಮೂಲಕ ಹಣ ಸುಲಿಗೆ ಮಾಡುವುದನ್ನು ರೂಡಿಸಿಕೊಂಡಿದೆ. ಕಾನೂನು ಸಲೆಗಾರ ರಿಝ್ವಿ, ಆ ಕೆಲಸಕ್ಕೆ ನಾಲಾಯಕ್. ಆತ ಈ ಹಿಂದೆಯೂ ಹಲವು ಎಡವಟ್ಟಿನ ಕೆಲಸಗಳನ್ನು ಮಾಡಿ ಪಾಕಿಸ್ತಾನದ ಸಂವಿಧಾನದ ಉಲ್ಲಂಘನೆ ಮಾಡಿರುವ ಮೂರ್ಖ," ಎಂದೆಲ್ಲಾ ಅಖ್ತರ್ ಮಾತಿನ ಚಾಟಿ ಬೀಸಿದ್ದರು. ಪಿಸಿಬಿ ಕಾನೂನು ವಿಭಾಗದ ವಿರುದ್ಧ ಅಖ್ತರ್ ಹರಿಹಾಯ್ದ ಸಂಪೂರ್ಣ ವಿಡಿಯೋ ಇಲ್ಲಿದೆ
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2VMV31I
