ಬೆಂಗಳೂರು: ಕೊರೊನಾದಿಂದ ಸಂಕಷ್ಟಕ್ಕೊಳಗಾದ ಜನರಿಗೆ ಸಹಕಾರ ಮಾಡುವ ನಿಟ್ಟಿನಲ್ಲಿ ಪಿಎಂ ಕೇರ್ ನಿಧಿಗೆ ತಾನು ಕೂಡಿಟ್ಟ 2,800 ರೂಪಾಯಿ ಹಣವನ್ನು ನೀಡಿದ್ದ ಹಿರಿಯ ಮಹಿಳೆ ಪದ್ಮಾವತಿ ಜಿ. ಅವರಿಗೆ ಮುಖ್ಯಮಂತ್ರಿ ಬಿ.ಎಸ್‌ ಯಡಿಯೂರಪ್ಪ ಧನ್ಯವಾದ ಸಲ್ಲಿಸಿ ಪ್ರಶಂಸೆ ಪತ್ರವನ್ನು ಬರೆದಿದ್ದಾರೆ. ಸಾಗರ ತಾಲೂಕು ಖಂಡಿಕಾ ಗ್ರಾಮದ ಪದ್ಮಾವತಿ ಜಿ. ಅವರು, ತಾವು ಕೂಡಿಟ್ಟಿದ್ದ 2,800 ರೂಪಾಯಿಗಳನ್ನು ಕೋವಿಡ್ -19ರ ವಿರುದ್ಧದ ಹೋರಾಟಕ್ಕಾಗಿ ಪಿಎಂ ಕೇರ್ ನಿಧಿಗೆ ಅರ್ಪಿಸಿದ್ದರು. ಇವರ ಈ ಕಾರ್ಯ ಜನರ ಮೆಚ್ಚುಗೆಗೆ ಪಾತ್ರವಾಗಿತ್ತು. ಸಾಮಾಜಿಕ ಜಾಲತಾಣಗಳಲ್ಲೂ ಸಾಕಷ್ಟು ಜನರು ಮೆಚ್ಚುಗೆ ಸೂಚಿಸಿದ್ದರು. ಬಡ ಮಹಿಳೆಯೊಬ್ಬರು ತಾವು ಕಷ್ಟಪಟ್ಟು ಕೂಡಿಟ್ಟ ಹಣವನ್ನು ಕೊರೊನಾ ನಿಧಿಗೆ ನೀಡಿದ್ದ ಉದಾರತನಕ್ಕೆ ನೆಟ್ಟಿಗರಿಂದಲೂ ಪ್ರಶಂಸೆ ವ್ಯಕ್ತವಾಗಿತ್ತು. ಇದು ಸಚಿವ ಸುರೇಶ್ ಕುಮಾರ್ ಮೂಲಕ ಮುಖ್ಯಮಂತ್ರಿ ಬಿಎಸ್‌ವೈ ಗಮನಕ್ಕೂ ಬಂದಿದ್ದು ಪದ್ಮಾವತಿ ಅವರಿಗೆ ಪತ್ರದ ಮೂಲಕ ಧನ್ಯವಾದಗಳನ್ನು ತಿಳಿಸಿದ್ದಾರೆ. ತಾವು ತಮ್ಮ ಪತಿ ದಿ.ಗಣಪತಿ ಭಟ್‌ ರಂತೆಯೇ ದೇಶಾಭಿಮಾನಿಯಾಗಿದ್ದೀರಿ, ತಾವು ಕಷ್ಟಕಾಲದಲ್ಲಿ ಕೂಡಿಟ್ಟ ಹಣವನ್ನು ಕೋವಿಡ್-19 ರೋಗ ನಿಯಂತ್ರಣಕ್ಕೆ ಪಿ.ಎಂ ಕೇರ್ ನಿಧಿಗೆ ಅರ್ಪಿಸಿದ್ದು ಕೇಳಿ ನನಗೆ ಅತೀವ ಸಂತೋಷವಾಗಿದೆ. ನಿಮ್ಮ ಈ ಅಳಿಲು ಸೇವೆ ದೇಶದ ಪ್ರತಿಯೊಬ್ಬ ಪ್ರಜ್ಞಾವಂತ ಪ್ರಜೆಗೂ ಮಾದರಿಯಾಗಲಿ ಮತ್ತು ಸ್ಫೂರ್ತಿದಾಯಕವಾಗಲಿ ಎಂದು ಈ ಸಂದರ್ಭದಲ್ಲಿ ಹಾರೈಸುತ್ತೇನೆ. ತಮ್ಮಂತಹ ದೇಶಾಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಬೆಳೆಯಲಿ ಹಾಗೂ ಸರ್ಕಾರದೊಂದಿಗೆ ತನು, ಮನ ಧನದೊಮದಿಗೆ ಸಹಕರಿಸಲಿ ಎಂದು ಆಶಿಸುತ್ತೇನೆ ಎಂದು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.
from India & World News in Kannada | VK Polls https://ift.tt/3d1Ih5m
