ಬೆಂಗಳೂರು: ಯಾವುದೇ ರೋಗಳಿಗೆ ಜಾತಿ- ಧರ್ಮ ಎಂಬವುದು ಇರುವುದಿಲ್ಲ. ಇದನ್ನು ಜಾತಿ- ಧರ್ಮದ ಪೂರ್ವಗ್ರಹಗಳಿಲ್ಲದೆಯೇ ಎದುರಿಸಬೇಕು ಎಂದು ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಮನವಿ ಮಾಡಿದ್ದಾರೆ. ರೋಗಕ್ಕೆ ಜಾತಿ-ಧರ್ಮಗಳಿಲ್ಲ. ಇದನ್ನು ಜಾತಿ-ಧರ್ಮದ ಪೂರ್ವಗ್ರಹಗಳಿಲ್ಲದೆಯೇ ಎದುರಿಸಬೇಕು.ಕೊರೊನಾ ವಿರುದ್ದ ದೇಶ ಒಂದಾಗಿನಡೆಸುತ್ತಿರುವ ಹೋರಾಟಕ್ಕೆ ಕೆಲವರು ಜಾತಿ-ಧರ್ಮದ ಬಣ್ಣ ಹಚ್ಚಲು ಪ್ರಯತ್ನಿಸುತ್ತಿರುವುದು ಅಪಾಯಕಾರಿ ಬೆಳವಣಿಗೆ. ಈ ಸಂಕಷ್ಟದ ಗಳಿಗೆಯಲ್ಲಿ ಒಂದಾಗಿರೋಣ, ಎಚ್ಚರವಾಗಿರೋಣ ಎಂದು ಟ್ವೀಟ್‌ ಮಾಡಿದ್ದಾರೆ. ದೆಹಲಿಯ ನಿಜಾಮುದ್ದೀನ್‌ ಪ್ರದೇಶದಲ್ಲಿರುವ ತಬ್ಲೀಗ್ ಜಮಾತ್‌ ಮಸೀದಿಯಲ್ಲಿ ಧಾರ್ಮಿಕ ಕಾರ್ಯಕ್ರಮದಲ್ಲಿ ಭಾಗಿಯಾದ ಜನರಲ್ಲಿ ಕೊರೊನಾ ಸೋಂಕು ಕಂಡು ಬಂದ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿರುವ ಚರ್ಚೆಯ ಹಿನ್ನೆಲೆಯಲ್ಲಿ ಸಿದ್ದರಾಮಯ್ಯ ಈ ರೀತಿಯಾಗಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಸಿದ್ದರಾಮಯ್ಯ ಅವರು ಅಭಿಪ್ರಾಯಕ್ಕೆ ಟ್ವಿಟ್ಟರ್‌ನಲ್ಲಿ ಪರ ಹಾಗೂ ವಿರೋಧ ಕಾಮೆಂಟ್‌ಗಳು ವ್ಯಕ್ತವಾಗಿದೆ. “ಯಾರು ಬಣ್ಣಹಚ್ಚಲು ಪ್ರಯತ್ನಿಸುತ್ತಿಲ್ಲ, ನಿಮ್ಮಂತ ರಾಜಕಾರಣಿಗಳೇ ವೋಟಿಗಾಗಿ ಒಂದು ಧರ್ಮವನ್ನು ಎತ್ತಿ ಹಿಡಿಯುವುದು. ತಾನು ಹುಟ್ಟಿದ ಧರ್ಮವನ್ನು ತುಚ್ಚವಾಗಿ ಕಾಣುವುದು. ಒಂದಂತೂ ನಿಜವಾದದು ನನ್ನ ದೇಶಕ್ಕೆ ಈ ವೈರಸ್ ಬರಲು ಕಾರಣ ನೀವು ಹೇಳಿದ ಬಣದವರು” ಎಂದು ನಾಗರಾಜ್‌ ತಲ್ವಾರ್ ಎಂಬುವವರ ಕಾಮೆಂಟ್ ಮಾಡಿದ್ದಾರೆ. “ಎಲ್ಲರೂ ಸರ್ಕಾರದ ಆದೇಶ ಪಾಲಿಸಬೇಕು, ಅದು ಬಿಟ್ಟು ಹೀಗೆ ಮಾಡಿದ್ದು ತಪ್ಪು. ಅಷ್ಟಕ್ಕೂ ವಿದೇಶ ಪ್ರವಾಸವನ್ನು ಮಾಡಿ ಬಂದ ಮೇಲೆ ಬುದ್ಧಿ ಇರಬೇಕು” ಎಂದು ವಿಶಾಲ್‌ ಎಂಬುವವರು ಪ್ರತಿಕ್ರಿಯಿಸಿದ್ದಾರೆ. “ಇಷ್ಟಾದರೂ ಮೋದಿ ಮಹಾನುಭಾವರು ಮಾತನಾಡುತ್ತಿಲ್ಲ. ದೇಶ ಒಗ್ಗಟ್ಟಾಗಿರಬೇಕಾದ ಈ ಹೊತ್ತು ಈ ಮೂರ್ಖತನ ಬಂದ್ ಮಾಡಿ ಎನ್ನುತ್ತಿಲ್ಲ. ಉಳಿದ ಭಾಷಣಗಳಿಗೆಲ್ಲ ಅವರಿಗೆ ಸಮಯ ಇದೆ” ಎಂದು ಶ್ರೀನಿವಾಸ್ ಕಾರ್ಕಳ ಎಂಬುವವರ ಕಾಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಸಿದ್ದರಾಮಯ್ಯ ಅವರ ಅಭಿಪ್ರಾಯಕ್ಕೆ ಪರ ಹಾಗೂ ವಿರೋಧವಾಗಿ ಜನರು ಪ್ರತಿಕ್ರಿಯೆ ನೀಡಿದ್ದಾರೆ.
from India & World News in Kannada | VK Polls https://ift.tt/2R3jCof
