ಬೆಂಗಳೂರು: ಒಳಚರಂಡಿ ಮೂಲಕ ಕೊರೊನಾ ಹರಡುವ ಸಾಧ್ಯತೆಗಳ ಕುರಿತಾಗಿ ಅಧ್ಯಯನ ನಡೆಸಬೇಕು ಎಂದು ಎನ್ವಿರಾನ್ಮೆಂಟ್ ಟ್ರಸ್ಟ್ ( BET ) ರಾಜ್ಯ ಸರ್ಕಾರವನ್ನು ಒತ್ತಾಯಿಸಿದೆ. ಈ ಕುರಿತಾಗಿ ಪರಿಸರ ತಜ್ಞ ಹಾಗೂ ಬೆಂಗಳೂರು ಎನ್ವಿರಾನ್ಮೆಂಟ್ ಟ್ರಸ್ಟ್ ಅಧ್ಯಕ್ಷ ಡಾ. ಎ. ಎನ್ ಯಲ್ಲಪ್ಪ ರೆಡ್ಡಿ ನೇತೃತ್ವದ ತಂಡ ಸುದೀರ್ಘ ವರದಿಯೊಂದನ್ನು ಸರ್ಕಾರಕ್ಕೆ ಸಲ್ಲಿಸಿದ್ದು ಪರಿಶೀಲನೆ ನಡೆಸುವಂತೆ ಕೋರಿದೆ. ಬೆಂಗಳೂರು ನಗರದಿಂದ ಶೇ 30 ರಷ್ಟು ಮನುಷ್ಯ ತ್ಯಾಜ್ಯಗಳು ಒಳಚರಂಡಿಯ ಮೂಲಕ ವೃಷಭಾವತಿ ಹಾಗೂ ಆರ್ಕಾವತಿ ನದಿ ಸೇರುತ್ತದೆ. ಪೀಣ್ಯ, ಯಶವಂತಪುರ, ವಿಜಯನಗರ, ಚಾಮರಾಜಪೇಟೆ, ಕೆ.ಆರ್ ಮಾರ್ಕೆಟ್‌, ಕೆಂಗೇರಿ ಉಪನಗರ, ರಾಜಾಜಿನಗರ ಭಾಗದ ಕೈಗಾರಿಕಾ ತ್ಯಾಜ್ಯ ಹಾಗೂ ಮನುಷ್ಯ ತ್ಯಾಜ್ಯಗಳು ಇವುಗಳಲ್ಲಿ ಸೇರಿವೆ. ಈ ನಿಟ್ಟಿನಲ್ಲಿ ವೃಷಭಾವತಿ ನದಿ ನೀರನ್ನು ಒಳಸುವ ರೈತರು ಆತಂಕಕ್ಕೆ ಒಳಗಾಗಿದ್ದರು. ಈ ಕುರಿತಾಗಿ ಅಧ್ಯಯನ ನಡೆಸುವಂತೆ ಸರ್ಕಾರವನ್ನು ಒತ್ತಾಯಿಸಿದ್ದರು. ಅದರಲ್ಲೂ ನಗರದ ಕೊರೊನಾ ಹಾಟ್‌ಸ್ಪಾಟ್‌ಗಳಾದ ಪಾದರಾಯನಪುರ, ಬಾಪೂಜಿನಗರದ ಒಳಚರಂಡಿಗಳು ವೃಷಭಾವತಿ ನದಿ ಸೇರುತ್ತಿದೆ. ಸದ್ಯ ಲಾಕ್‌ಡೌನ್ ಜಾರಿಯಲ್ಲಿರುವುದರಿಂದ ಒಳಚರಂಡಿ ಸಂಸ್ಕರಣಾ ಘಟಕ ಕಾರ್ಯನಿರ್ವಹಿಸುತ್ತಿಲ್ಲ. ಕೊಳಚೆ ನೀರು ನೇರವಾಗಿ ನದಿ ಸೇರುತ್ತಿರುವುದರಿಂದ ಈ ಮೂಲಕ ಕೊರೊನಾ ಹರಡಬಹುದಾ ಎಂಬ ಆತಂಕ ರೈತರಲ್ಲಿದೆ. ರೈತರ ಆತಂಕದ ಹಿನ್ನೆಲೆಯಲ್ಲಿ ಪರಿಸರ ತಜ್ಞ ಯಲ್ಲಪ್ಪ ರೆಡ್ಡಿ ನೇತೃತ್ವದಲ್ಲಿ ನಿರ್ಮಲಾ ಗೌಡ, ಡಾ. ನಿಧಿ ಪಾಲಿವಾಲ್‌, ರಜನಿ ಸಂತೋಷ್, ಸಂಧ್ಯಾ ಬಾಲಸುಬ್ರಹ್ಮಣ್ಯ ಅವರನ್ನು ಒಳಗೊಂಡಿರುವ ತಂಡ ಒಂದು ವರದಿ ಸಿದ್ದಪಡಿಸಿದೆ. ವರದಿಯಲ್ಲಿ ಕೊರೊನಾ ಸೋಂಕಿತ ವ್ಯಕ್ತಿಯ ಮಲ ಮೂತ್ರ ಒಳಚರಂಡಿ ಮೂಲಕ ನದಿ ಸೇರುವುದರಿಂದ ಅವರನ್ನು ಬಳಸುವ ಮನುಷ್ಯ ಹಾಗೂ ಪ್ರಾಣಿಗಳಿಗೆ ಸೋಂಕು ಹರಡುವ ಸಾಧ್ಯತೆ ಇದೆಯಾ ಎಂಬ ಕುರಿತಾಗಿ ಅಧ್ಯಯನ ನಡೆಸುವಂತೆ ಒತ್ತಾಯಿಸಿದೆ. ತ್ಯಾಜ್ಯದ ಮೂಲಕ ಹರಡುತ್ತಾ ಕೊರೊನಾ ವೈರಸ್ ? ಗಾಳಿಯ ಮೂಲಕ ಹಾಗೂ ಸಂಪರ್ಕದಿಂದ ಹರಡುತ್ತದೆ ಎಂದು ಅಧ್ಯಯನ ಅಧಿಕೃತಗೊಳಿಸಿದೆ. ಆದರೆ ನೀರಿನ ಮೂಲಕವೂ ಕೊರೊನಾ ಹರಡುವ ಸಾಧ್ಯತೆಗಳ ಕುರಿತಾಗಿ ಕೆಲವು ದೇಶಗಳಲ್ಲಿ ನಡೆದಿರುವ ಅಧ್ಯಯನ ವರದಿಗಳು ತಿಳಿಸುತ್ತವೆ. ಈ ಕುರಿತಾಗಿ ಬೆಂಗಳೂರು ಎನ್ವಿರಾನ್ಮೆಂಟ್ ಟ್ರಸ್ಟ್ ಮಾಹಿತಿಗಳನ್ನು ಸಂಗ್ರಹ ಮಾಡಿ ಸುದೀರ್ಘ ವರದಿಯನ್ನು ತಯಾರಿಸಿದೆ. ವಿಶ್ವದ ಇತರ ದೇಶಗಳ ಅಧ್ಯಯನ ವರದಿಗಳ ಸಾರಾಂಶವನ್ನು ಸಂಗ್ರಹಿಸಿರುವ ತಂಡ ಇದನ್ನು ತಮ್ಮ ವರದಿಯಲ್ಲಿ ಉಲ್ಲೇಖಿಸಿದೆ. ನೆದರ್‌ಲ್ಯಾಂಡ್, ಬೆಲ್ಜಿಯಂ, ಫ್ರಾನ್ಸ್ ಹಾಗೂ ಅಮೆರಿಕಾದಲ್ಲಿ ರೋಗಿಯ ಮಲ ಮೂತ್ರ ಸೇರಿದ ತ್ಯಾಜ್ಯ ನೀರಿನಲ್ಲಿ ಸೋಂಕು ಹರಡುವುದು ಸಾಬೀತಾಗಿದೆ. ಇದು ವಿಶ್ವ ಆರೋಗ್ಯ ಸಂಸ್ಥೆಯ ಗಮನಕ್ಕೂ ಬಂದಿದ್ದೂ ಆದರೆ ಅಧಿಕೃತ ಮಾರ್ಗಸೂಚಿಯನ್ನು ಹೊರಡಿಸಿಲ್ಲ. ಹೀಗಿದ್ದರೂ ಇತರ ದೇಶಗಳು ತ್ಯಾಜ್ಯ ನೀರನ್ನು ಸಂಸ್ಕರಣಾ ಘಟಕಗಳ ಮೂಲಕ ಕೊರೊನಾ ಮುಕ್ತಗೊಳಿಸುತ್ತಿವೆ. ಆದರೆ ಭಾರತದಲ್ಲಿ ಇದು ನಡೆಯುತ್ತಿಲ್ಲ ಎಂದು ವರದಿಯಲ್ಲಿ ಆತಂಕ ವ್ಯಕ್ತಪಡಿಸಲಾಗಿದೆ. ಸಿಟಿಜನ್ ಸೈಂಟಿಫಿಕ್ ಇನ್‌ ವೆಸ್ಟಿಗೇಷನ್ ತಂಡ ಅಧ್ಯಯನದ ಪ್ರಕಾರ ವೃಷಭಾವತಿ, ಮೈಲುಸಂದ್ರ, ಕೆಂಗೇರಿ ಹಾಗೂ ದೊಡ್ಡಬೆಲೆ ಬಳಿ ಇರುವ ತ್ಯಾಜ್ಯ ಸಂರಸ್ಕಣಾ ಘಟಕಗಳು ಕಾರ್ಯ ನಿರ್ವಹಿಸುತ್ತಿಲ್ಲ. ಪರಿಣಾಮ ಕೊರೊನಾ ಸೋಂಕಿತರ ಮಲ ಮೂತ್ರ ಒಳಚರಂಡಿ ಸೇರಿ ಸೋಂಕು ಹರಡುವ ಸಾಧ್ಯತೆ ಇದೆ ಎಂದು ಆತಂಕ ವ್ಯಕ್ತಪಡಿಸಿದೆ. " ತ್ಯಾಜ್ಯ ನೀರಲ್ಲಿ ವೈರಸ್ ಇರುವ ಸಾಧ್ಯತೆಗಳ ಹಿನ್ನೆಲೆಯಲ್ಲಿ ಇತರ ದೇಶಗಳು ಹೆಚ್ಚು ಮುನ್ನೆಚ್ಚರಿಕೆಯನ್ನು ವಹಿಸಿಕೊಳ್ಳುತ್ತಿವೆ. ಈ ನಿಟ್ಟಿನಲ್ಲಿ ಈ ಅಂಶವನ್ನು ನಿರ್ಲಕ್ಷ್ಯ ಮಾಡಿದರೆ ಅಪಾಯ ಕಟ್ಟಿಟ್ಟಬುತ್ತಿ. ಇದನ್ನು ಗಂಭೀರವಾಗಿ ಪರಿಗಣಿಸಿ ಸರ್ಕಾರ ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ. ಒಳಚರಂಡಿ ಮೂಲಕ ತ್ಯಾಜ್ಯ ನದಿ ನೀರನ್ನು ಸೇರುತ್ತಿದ್ದು ಕೃಷಿ ಚಟುವಟಿಕೆಗಾಗಿ ರೈತರು ಈ ನೀರನ್ನು ಬಳಸುತ್ತಿದ್ದಾರೆ. ಈ ಕಾರಣದಿಂದಾಗಿ ಸರ್ಕಾರ ಕೂಡಲೇ ಅಧ್ಯಯನ ನಡೆಸಿ ನದಿ ನೀರಿ ಬಳಕೆ ಮಾಡಲು ಸುರಕ್ಷಿತ ಎಂಬುವುದನ್ನು ಸಾಬೀತು ಪಡಿಸಬೇಕಾಗಿದೆ" ಎನ್ನುತ್ತಾರೆ ಬೆಂಗಳೂರು ಎನ್ವಿರಾನ್ಮೆಂಟ್ ಟ್ರಸ್ಟ್ ಪರಿಸರ ತಜ್ಞೆ ನಿರ್ಮಲಾ ಗೌಡ. ಈ ನಿಟ್ಟಿನಲ್ಲಿ ಬಿಬಿಎಂಪಿ, ಬಿಡಬ್ಲ್ಯೂಎಸ್‌ಎಸ್‌ಬಿ ಹಾಗೂ ಕರ್ನಾಟಕ ಮಾಲಿನ್ಯ ನಿಯಂತ್ರಣ ಮಂಡಳಿ ಹಾಗೂ ಸಂಬಂಧಪಟ್ಟ ಇಲಾಖೆ ಎಚ್ಚರಿಕೆಯನ್ನು ವಹಿಸಬೇಕಾಗಿದೆ. ಕೂಡಲೇ ಈ ಕುರಿತಾಗಿ ಅಧ್ಯಯನ ನಡೆಸಿ ಜನರ ಗೊಂದಲವನ್ನು ಬಗೆಹರಿಸಬೇಕಾಗಿದೆ.
from India & World News in Kannada | VK Polls https://ift.tt/3d9fUCn
