ವಾಷಿಂಗ್ಟನ್: ಇದೇ ನವೆಂಬರ್‌ನಲ್ಲಿ ಅಮೆರಿಕದಲ್ಲಿ ನಡೆಯಲಿದ್ದು, ಈಗಾಗಲೇ ತಮ್ಮ ಚುನಾವಣಾ ಪ್ರಚಾರವನ್ನು ಆರಂಭಿಸಿ ಬಿಟ್ಟಿದ್ದಾರೆ. ಟ್ರಂಪ್ ಅವರ ಚುನಾವಣಾ ಪ್ರಚಾರದಲ್ಲಿ ಈ ಬಾರೊ ಕೊರೊನಾ ವೈರಸ್ ಮತ್ತು ಚೀನಾದ ಉಲ್ಲೇಖವೇ ಅಧಿಕವಾಗಿರಲಿದೆ ಎಂಬುದು ಅವರ ಮಾತುಗಳಿಂದ ಸ್ಪಷ್ಟವಾಗುತ್ತಿದೆ. ಈ ಬಾರಿಯ ಅಧ್ಯಕ್ಷೀಯ ಚುನಾವಣೆಯಲ್ಲಿ ನಾನು ಸೋಲಬೇಕೆಂಬುದು ಚೀನಾದ ಬಯಕೆಯಾಗಿದ್ದು, ಅದಕ್ಕಾಗಿ ಅವರು ಯಾವ ಮಟ್ಟಕ್ಕಾದರೂ ಹೋಗಬಹುದು ಎಂದು ಟ್ರಂಪ್ ಹೇಳಿದ್ದಾರೆ. ಮಾರಕ ಕೊರೊನಾ ವೈರಸ್‌ನ್ನು ವಿಶ್ವಕ್ಕೆ ಕೊಡುಗೆಯಾಗಿ ಕೊಟ್ಟಿರುವ ಚೀನಾವನ್ನು ಸದ್ಯ ತಾವೊಬ್ಬರೇ ಎದುರು ಹಾಕಿಕೊಂಡಿದ್ದು, ಇದೇ ಕಾರಣಕ್ಕೆ ಈ ಬಾರಿಯ ಅಧ್ಯಕ್ಷೀಯ ಚುನಾವಣೆಯಲ್ಲಿ ನನ್ನ ಸೋಲಿಗೆ ಸಾಧ್ಯವಾದ ಎಲ್ಲಾ ಪ್ರಯತ್ನಗಳನ್ನೂ ಮಾಡಲಿದೆ ಎಂದು ಟ್ರಂಪ್ ಅನುಮಾನ ವ್ಯಕ್ತಪಡಿಸಿದ್ದಾರೆ. ನಾನು ಸೋತರೆ ಚೀನಾ ನಿರಾಳವಾಗಿ ಬಿಡುತ್ತದೆ. ಆದರೆ ಹೀಗಾಗಬಾರದು ಎಂದರೆ ಅಮೆರಿಕದ ಜನತೆ ತಮ್ಮನ್ನು ಮರು ಆಯ್ಕೆ ಮಾಡಬೇಕು ಎಂದು ಟ್ರಂಪ್ ಮನವಿ ಮಾಡಿದ್ದಾರೆ. ನಾನು ಮರು ಆಯ್ಕೆಯಾದರೆ ಅಮೆರಿಕವೂ ಸೇರಿದಂತೆ ಇಡೀ ಜಗತ್ತಿಗೆ ಕೊರೊನಾ ವೈರಸ್ ಹರಿಬಿಟ್ಟಿರುವ ಚೀನಾವನ್ನು ಇದರ ಜವಾಬ್ದಾರಿ ಹೊರುವಂತೆ ಮಾಡುವುದು ಖಚಿತ ಎಂದೂ ಟ್ರಂಪ್ ಈ ವೇಳೆ ಭರವಸೆ ನೀಡಿದ್ದಾರೆ. ನಮಗೆ ಆಸಕ್ತಿಯೇ ಇಲ್ಲ ಎಂದ ಚೀನಾ: ಇನ್ನು ಟ್ರಂಪ್ ಅವರ ಆರೋಪವನ್ನು ಅಲ್ಲಗಳೆದಿರುವ ಚೀನಾ, ಅಮೆರಿಕದ ಆಂತರಿಕ ರಾಜಕೀಯದಲ್ಲಿ ತನಗೆ ಎಳ್ಳಷ್ಟೂ ಆಸಕ್ತಿ ಇಲ್ಲ ಎಂದು ಹೇಳಿದೆ. ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಯಾರು ಗೆಲ್ಲುತ್ತಾರೆ ಯಾರೂ ಸೋಲುತ್ತಾರೆ ಎಂದು ತಲೆಕೆಡಿಸಕೊಳ್ಳಲು ತನ್ನ ಬಳಿ ಸಮಯವಿಲ್ಲ ಎಂದು ಚೀನಾ ತಿರುಗೇಟು ನೀಡಿದೆ. ಈ ಕುರಿತು ಮಾತನಾಡಿರುವ ಚೀನಾದ ವಿದೇಶಾಂಗ ಸಚಿವ ಜೆಂಗ್ ಶುವಾಂಗ್, ಅಮೆರಿಕದ ಜನತೆ ಚೀನಾವನ್ನು ತನ್ನ ಚುನಾವಣಾ ಚರ್ಚಾ ವಿಷಯವನ್ನಾಗಿ ಮಾಡಿಕೊಳ್ಳುವ ಹುನ್ನಾರವನ್ನು ಒಪ್ಪುವುದಿಲ್ಲ ಎಂಬ ನಂಬಿಕೆ ಇದೆ ಎಂದು ಹೇಳಿದ್ದಾರೆ. ಒಟ್ಟಿನಲ್ಲಿ ಈ ಬಾರಿಯ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕೊರೊನಾ ವೈರಸ್ ಮತ್ತು ಚೀನಾ ಚರ್ಚಾ ವಿಷಯಗಳಾಗುವುದು ಖಚಿತವಾಗಿದ್ದು, ಟ್ರಂಪ್ ಇದಕ್ಕಾಗಿ ವೇದಿಕೆ ಸಿದ್ಧಮಾಡಿಕೊಳ್ಳುತ್ತಿದ್ದಾರೆ ಎಂಬುದು ಮೇಲ್ನೋಟಕ್ಕೆ ಕಂಡುಬರುತ್ತಿರುವ ಸತ್ಯವಾಗಿದೆ.
from India & World News in Kannada | VK Polls https://ift.tt/2zKbmnr
