ಇತ್ತೀಚಿನ ವರ್ಷಗಳಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಅಕ್ರಮ ಮದ್ಯ ಮಾರಾಟದ ಹಾವಳಿ ಹೆಚ್ಚಿತ್ತು. ಅದ್ಯಾವ ಪರಿಯೆಂದರೆ ಬಾರ್‌ಗಳೇ ಇಲ್ಲದ ಊರಲ್ಲಿ 'ಮನೆ ಅಂಗಡಿ'ಗಳಲ್ಲಿ ಯಾವುದೇ ಎಗ್ಗು ಸಿಗ್ಗು ಇಲ್ಲದೆ ಎಣ್ಣೆ ಮಾರಾಟವಾಗುತ್ತಿತ್ತು. ಇದಕ್ಕೆ ಕಡಿವಾಣ ಹಾಕಿ ಎಂದು ಸ್ತ್ರೀಶಕ್ತಿ ಸಂಘಗಳು ಪಾದಯಾತ್ರೆ ನಡೆಸಿದವು. ಪ್ರತಿಭಟನೆ ನಡೆಸಿದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ. ಸರಕಾರ ನೀಡುತ್ತಿದ್ದ ಟಾರ್ಗೆಟ್‌ ಮುಟ್ಟಬೇಕಾದ ಒತ್ತಡದಿಂದಾಗಿ ಅಬಕಾರಿ ಇಲಾಖೆ ಅಧಿಕಾರಿಗಳು ಕೂಡ ಜಾಣ ಕುರುಡರಂತೆ ವರ್ತಿಸುತ್ತಿದ್ದರು. ಆದರೀಗ ಲಾಕ್‌ಡೌನ್‌ನಿಂದ ಮದ್ಯ ಮಾರಾಟಕ್ಕೆ ತಡೆ ಬಿದ್ದಿದೆ. ಇದರಿಂದ ಕುಡಿತದ ಹಾವಳಿಯೂ ಕಡಿಮೆ ಆಗಿದೆ. ಈ ಬಿಗಿಯನ್ನು ಬಳಸಿಕೊಂಡು ಎಚ್ಚರ ಮೂಡಿಸಿದರೆ ಮದ್ಯದ ಹಾವಳಿಗೆ ಖಂಡಿತ ಕಡಿವಾಣ ಹಾಕಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ. ಹಳ್ಳಿಗಳ ಚಾ-ತಿಂಡಿ ಹೋಟೆಲ್‌ಗಳು, ಕಿರಾಣಿ ಅಂಗಡಿಗಳಲ್ಲೂ ದಿನಸಿ ಸಿಕ್ಕ ರೀತಿಯಲ್ಲಿ ಮದ್ಯ ಸಿಗುವಂತಾಗಿತ್ತು. ಸಂಸದರ ಆದರ್ಶ ಗ್ರಾಮಗಳೂ ಇದಕ್ಕೆ ಹೊರತಗಾಗಿರಲಿಲ್ಲ. ಅಕ್ರಮವಾಗಿ ಸುಲಭವಾಗಿ ಮದ್ಯ ಕೈಗೆ ಸಿಗುವಂತಿದ್ದರಿಂದ ಗ್ರಾಮಗಳಲ್ಲಿ ಕುಡಿತದ ಹಾವಳಿಯೂ ಹೆಚ್ಚಿತ್ತು. ಬಾರುಗಳಿಗೆ ದೂರದೂರಿಗೆ ಹೋಗದಂತೆ ಸುಲಭವಾಗಿ ಮದ್ಯ ಸಿಗುತ್ತಿದ್ದರಿಂದ ಅನೇಕ ಯುವಕರು ಕುಡಿತ ಶುರು ಹಚ್ಚಿಕೊಂಡು ಸಂಜೆ ವೇಳೆಗೆ ಹಳ್ಳಿಗಳ ಚಿತ್ರಣವೇ ಬದಲಾಗುತ್ತಿತ್ತು. ಇದು ಹಳ್ಳಿಯ ಜೀವಾಳವಾದ ಕೃಷಿ ಮೇಲೂ ವ್ಯತಿರಿಕ್ತ ಪರಿಣಾಮ ಬೀರುತ್ತಿತ್ತುಎಂದು ಗ್ರಾಮಗಳ ಹಿರಿಯರು ಹೇಳುತ್ತಾರೆ. ಇದೀಗ ಲಾಕ್‌ ಡೌನ್‌ನಿಂದ ಇಂಥ ರಗಳೆಗಳಿಗೆ ಮುಕ್ತಿ ಸಿಕ್ಕಿದೆ. ಶೇ. 89 ಕುಟುಂಬಗಳಲ್ಲಿ ಶಾಂತಿಗ್ರಾಮೀಣ ಪ್ರದೇಶದಲ್ಲಿ ಕುಡಿತದ ಚಟ ಬಿಡಿಸುವ ಮದ್ಯ ವರ್ಜನ ಶಿಬಿರಗಳನ್ನು ಕೆಲ ಸಂಸ್ಥೆಗಳು ಮಾಡುತ್ತವೆ. ಅದರಲ್ಲೂ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆಯುವರು ಕೆಲವು ದಶಕದಿಂದ ಕುಡಿತದ ಚಟ ಅಂಟಿಸಿಕೊಂಡಿದ್ದವರ ಬಿಡಿಸುವ ಕಾಯಕದಲ್ಲಿ ತೊಡಗಿದ್ದಾರೆ. ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯಿಂದ ಮದ್ಯ ಇಲ್ಲದ ವೇಳೆಯ ಸರ್ವೆ ನಡೆಸಿದ್ದು , ಕುಡಿತ ಚಟ ಅಂಟಿಸಿಕೊಂಡಿದ್ದವರ ಶೇ.89ರಷ್ಟು ಕುಟುಂಬಗಳಲ್ಲಿ ಶಾಂತಿ ನೆಲೆಸಿದ್ದು, ಬದುಕಿನಲ್ಲಿ ತೃಪ್ತಿಯೂ ಕಂಡು ಬಂದಿದೆ ಎಂದು ಸಂಸ್ಥೆಯ ಕಾರ್ಯ ನಿರ್ವಾಹಕ ನಿರ್ದೇಶಕ ಡಾ.ಎಲ್‌.ಎಚ್‌. ಮಂಜುನಾಥ್‌ ಹೇಳಿದ್ದಾರೆ. ಈ ಕುರಿತು ವಿಜಯ ಕರ್ನಾಟಕದ ಜತೆ ಮಾತನಾಡಿ ರಾಜ್ಯದ ಎಲ್ಲ ಜಿಲ್ಲೆಗಳು ಸೇರಿ 9,402 ಜನರನ್ನು ಸರ್ವೆಗೆ ಒಳಪಡಿಸಲಾಗಿತ್ತು ಎಂದು ಹೇಳಿದರು. ಅರ್ಧದಷ್ಟು ಮದ್ಯ ಹಳ್ಳಿಗಾಡಿಗೆದಾವಣಗೆರೆ ಜಿಲ್ಲೆಯಲ್ಲಿಎಂಎಸ್‌ಐಎಲ್‌ನಿಂದ ಹಿಡಿದು ಎಲ್ಲ ರೀತಿ ಸೇರಿ ಒಟ್ಟು 259 ಬಾರ್‌ಗಳಿವೆ. ಇದರಲ್ಲಿ 96 ಗ್ರಾಮಗಳು ಗ್ರಾಮೀಣ ಪ್ರದೇಶದಲ್ಲಿವೆ. ಜಿಲ್ಲೆಗೆ ಪ್ರತಿ ತಿಂಗಳು 1.25 ಲಕ್ಷ ಬಾಕ್ಸ್‌ ಲಿಕ್ಕರ್‌ (ಬಿಯರ್‌ ಹೊರತು ಪಡಿಸಿ) ಮಾರಾಟದ ಟಾರ್ಗೆಟ್‌ ಇದೆ. ಇಲಾಖೆ ಅಂಕಿಸಂಖ್ಯೆ ಪ್ರಕಾರ ಇದರಲ್ಲಿ ಶೇ. 30ರಷ್ಟು ಗ್ರಾಮೀಣ ಪ್ರದೇಶದ ಬಾರ್‌ಗಳಿಗೆ ಹಂಚಿಕೆ ಆಗುತ್ತದೆ, ಇದು ಸಕ್ರಮ. ಇನ್ನು ಅಕ್ರಮವೂ ಸೇರಿದರೆ ಒಂದು ಜಿಲ್ಲೆಯ ಮದ್ಯ ಮಾರಾಟದ ಗುರಿಯ ಶೇ.40ಕ್ಕಿಂತ ಹೆಚ್ಚು ಇಲ್ಲವೇ ಅರ್ಧದಷ್ಟು ಮದ್ಯ ಹಳ್ಳಿಗಾಡಿಗೆ ಪೂರೈಕೆ ಆಗುತ್ತದೆ. ರಾಜ್ಯದ ಇತರ ಜಿಲ್ಲೆಗಳ ಚಿತ್ರಣವೂ ಇದಕ್ಕಿಂತ ಭಿನ್ನವಿಲ್ಲ.
from India & World News in Kannada | VK Polls https://ift.tt/2VJpqGi
