- ಕೆಂಚೇಗೌಡ, ಬೆಂಗಳೂರು ಸಚಿವಾಲಯ, ಸರಕಾರಿ ಕಚೇರಿಗಳಲ್ಲಿ ಮೂರನೇ ಒಂದರಷ್ಟು ಸಿಬ್ಬಂದಿ ಕಾರ್ಯನಿರ್ವಹಣೆಗೆ ವಿಧಾನಸೌಧ 3ನೇ ಮಹಡಿಯಿಂದ ಹೊರಬಿದ್ದಿರುವ ಆದೇಶಕ್ಕೆ ಮೊದಲ ಮಹಡಿಯಲ್ಲೇ ಕಿಮ್ಮತ್ತು ಸಿಕ್ಕಿಲ್ಲ. ಲಾಕ್‌ಡೌನ್‌ ಘೋಷಣೆ ಹಿನ್ನೆಲೆಯಲ್ಲಿ ಮಾ.24 ರಂದು ಮುಚ್ಚಿದ ವಿಧಾನಸಭೆ ಸಚಿವಾಲಯದ ಕಚೇರಿಗಳು ಇನ್ನೂ ತೆಗೆದಿಲ್ಲ. ಅಧಿವೇಶನ ಬಳಿಕ ವಿಧಾನಸಭೆ ಸಚಿವಾಲಯ ಸಂಪೂರ್ಣ ಬಂದ್‌ ಆಗಿವೆ. ಲಾಕ್‌ ಡೌನ್‌-2 ಅವಧಿಯಲ್ಲಿ ಸಚಿವಾಲಯ ಮತ್ತು ಕಚೇರಿಗಳ ಕಾರ್ಯಾರಂಭಕ್ಕೆ ಡಿಪಿಎಆರ್‌ ಹೊರಡಿಸಿದ ಆದೇಶಕ್ಕೆ ವಿಧಾನಸಭೆ ಸಚಿವಾಲಯಲ್ಲಿ ಕವಡೆ ಕಾಸಿನ ಕಿಮ್ಮತ್ತು ಕೊಟ್ಟಿಲ್ಲಎಂಬ ಆರೋಪಗಳು ಕೇಳಿಬರುತ್ತಿವೆ. ಉಪ ಕಾರ್ಯದರ್ಶಿ, ಅಧೀನ ಕಾರ್ಯದರ್ಶಿ, ಶಾಖಾಧಿಕಾರಿ ಮಟ್ಟದ ಅಧಿಕಾರಿಗಳೂ ವಿಧಾನಸೌಧ ಕಚೇರಿಗಳತ್ತ ಸುಳಿದಿಲ್ಲ. ಶಾಸಕರು ಶಾಸಕರ ಭವನದಲ್ಲಿ ತಂಗಿಲ್ಲ. ನಾನಾ ಸಮಿತಿ ಸಭೆಗಳು ನಡೆಯುತ್ತಿಲ್ಲ. ಭರವಸೆಗಳ ಸಮಿತಿ ಸೇರಿ ಹತ್ತಾರು ಸಮಿತಿಗಳ ಕೆಲಸ ಬೆಟ್ಟದಷ್ಟಿರುತ್ತದೆ. ಅಧಿವೇಶನದಲ್ಲಿ ಸಚಿವರು ನೀಡಿದ ಭರವಸೆ ಆಧರಿಸಿ ಸಂಬಂಧಿತ ಇಲಾಖೆಗಳ ಕ್ರಮಗಳ ಫಾಲೋಅಪ್‌ ಮಾಹಿತಿ ಕ್ರೋಡೀಕರಿಸುವುದು, ಉತ್ತರ ಪಡೆದು ಸಮಿತಿ ಮುಂದಿಡಲು ತಯಾರಿಸಬೇಕಾಗುತ್ತದೆ. ಐದು ವಾರಗಳಿಂದ ಎಲ್ಲ ಕೆಲಸವೂ ಬಂದ್‌ ಆಗಿವೆ. ಕಾರಣವೇ ಬೇರೆ..! ಪರಿಷತ್‌ ಸಚಿವಾಲಯ ಕೆಲಸ ನಿರ್ವಹಿಸುತ್ತಿದೆ. ಆದರೆ, ವಿಧಾನಸಭೆ ಸಚಿವಾಲಯ ಬಾಗಿಲು ಮುಚ್ಚಿರಲು ಬೇರೆಯದೇ ಕಾರಣವಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ವಿಧಾನಸಭೆ ಕಾರ್ಯದರ್ಶಿಯಾಗಿದ್ದ ಎಸ್‌. ಮೂರ್ತಿ ಅವರನ್ನು ನಾನಾ ಆಪಾದನೆಯಡಿ ಅಮಾನತು ಮಾಡಲಾಗಿದೆ. ಅಮಾನತು ಮಾಡಿ 16 ತಿಂಗಳು ಕಳೆದರೂ ವಿಚಾರಣೆ ಮುಗಿದಿಲ್ಲ. ನಿಯಮಾವಳಿ ಪ್ರಕಾರ 6 ತಿಂಗಳ ಬಳಿಕವೂ ಅಮಾನತು ಮುಂದುವರಿಸುವಂತಿಲ್ಲಎಂಬ ಕಾರಣಕ್ಕೆ ಹೈಕೋರ್ಟ್‌ ವಿಭಾಗೀಯ ಪೀಠ ಬೇಗ ವಿಚಾರಣೆ ಮುಗಿಸಲು ಆದೇಶಿಸಿದೆ. ಮೇ 3 ರ ಬಳಿಕ ಮತ್ತೆ ಪ್ರಕರಣ ವಿಚಾರಣೆಗೆ ಬರುತ್ತಿದೆ. ಆದಷ್ಟು ಬೇಗ ವಿಚಾರಣೆ ಪ್ರಕ್ರಿಯೆ ಮುಗಿಸಲು ಕೋರ್ಟ್‌ ಆದೇಶಿಸಿರುವ ಕಾರಣ ಲಾಕ್‌ಡೌನ್‌ನಿಂದಾಗಿ ವಿಚಾರಣೆ ಪ್ರಕ್ರಿಯೆ ನಡೆದಿಲ್ಲ ಎಂಬ ನೆಪವೊಡ್ಡಬಹುದು ಎಂಬ ಆಪಾದನೆಗಳು ಕೇಳಿಬರುತ್ತಿವೆ.
from India & World News in Kannada | VK Polls https://ift.tt/2We9JFV
