ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾ ನೆಲದಲ್ಲಿ ನಡೆದ 2007ರ ಆವೃತ್ತಿಯ ಚೊಚ್ಚಲ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ಚಾಂಪಿಯನ್ಸ್‌ ಪಟ್ಟ ಪಡೆದ ಭಾರತ ತಂಡದ ಸದಸ್ಯರಾಗಿದ್ದ ಮಾಜಿ ಎಡಗೈ ವೇಗಿ ರುದ್ರಪ್ರತಾಪ್ ಸಿಂಗ್, ದೇಶಿ ಟೂರ್ನಿಗಳಲ್ಲಿ ಮಿಂಚಿದರೂ ಕೂಡ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ತಮ್ಮ ಛಾಪು ಮೂಡಿಸಲು ವಿಫಲರಾಗಿದ್ದರು. ತಮ್ಮ ವೃತ್ತಿ ಬದುಕಿನ ದಿನಗಳಲ್ಲಿ ಟೀಮ್ ಇಂಡಿಯಾ ನಾಯಕ ಮಹೇಂದ್ರ ಸಿಂಗ್ ಧೋನಿ ಜೊತೆಗೆ ಉತ್ತಮ ಬಾಂಧವ್ಯ ಬೆಳೆಸಿಕೊಂಡ , ಈಗಲೂ ಕೂಡ ಕ್ಯಾಪ್ಟನ್‌ ಕೂಲ್‌ ಜೊತೆಗೆ ಅಷ್ಟೇ ಉತ್ತಮ ಸ್ನೇಹ ಹೊಂದಿದ್ದಾರೆ. ನಿವೃತ್ತಿ ನಂತರ ಕೋಚಿಂಗ್‌ ಮತ್ತು ವೀಕ್ಷಕ ವಿವರಣೆಯಲ್ಲಿ ತೊಡಗಿಸಿಕೊಂಡಿರುವ ಆರ್‌ಪಿ ಸಿಂಗ್, ಇದೀಗ ಲಾಕ್‌ಡೌನ್‌ ದಿನಗಳಲ್ಲಿ ಮಾಜಿ ಕ್ರಿಕೆಟಿಗ ಆಕಾಶ್‌ ಛೋಪ್ರಾ ಜೊತೆಗಿನ ಲೈವ್‌ ಚಾಟ್‌ನಲ್ಲಿ ಧೋನಿಯೊಂದಿಗಿನ ಸ್ನೇಹದ ಕುರಿತಾಗಿ ಮಾತನಾಡಿದ್ದಾರೆ. "ನಾನು ಬಹಳ ಸಮಯ ಒಟ್ಟಿಗೆ ಕಳೆಯುತ್ತಿದ್ದೆವು. ಬಳಿಕ ಆತನಿಗೆ ಭಾರತ ತಂಡದ ನಾಯಕತ್ವ ದೊರೆಯಿತು. ಆತನ ಗ್ರಾಫ್‌ ಮೇಲೇರುತ್ತಲೇ ಸಾಗಿದರೆ ನನ್ನ ಗ್ರಾಫ್‌ ಕೆಳಗೆ ಇಳಿಯುತ್ತಾ ಹೋಯಿತು. ಆದರೆ ನಮ್ಮ ಸ್ನೇಹದಲ್ಲಿ ಯಾವುದೇ ಬದಲಾವಣೆ ಆಗಲಿಲ್ಲ. ಈಗಲೂ ನಾವು ಜೊತೆಯಾಗಿ ತಿರುಗಾಡುತ್ತೇವೆ. ಆದರೆ ಕ್ರಿಕೆಟ್ ವಿಚಾರದಲ್ಲಿ ಇಬ್ಬರ ಅಭಿಪ್ರಾಯ ಬೇರೆ ಬೇರೆ ಆಗಿದೆ," ಎಂದು ಸಿಂಗ್ ವಿವರಿಸಿದ್ದಾರೆ. ಚೆಂಡನ್ನು ಅದ್ಭುತ ರೀತಿಯಲ್ಲಿ ಸ್ವಿಂಗ್‌ ಮಾಡುವ ಸಾಮರ್ಥ್ಯ ಹೊಂದಿದ್ದ ಆರ್‌ಪಿ ಸಿಂಗ್ ಭಾರತ ತಂಡದ ಪರ 14 ಟೆಸ್ಟ್, 58 ಒಡಿಐ ಮತ್ತು 10 ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿ ಒಟ್ಟು 124 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲೂ ಮಿಂಚಿದ್ದ ಎಡಗೈ ವೇಗಿಗೆ ಭಾರತ ತಂಡದ ಪರ ಆಡುವ ಮತ್ತೊಂದು ಅವಕಾಶ ಲಭ್ಯವಾಗಲೇ ಇಲ್ಲ. "ನನ್ನ ವೃತ್ತಿ ಜೀವನದ ಶ್ರೇಷ್ಠ ಲಯದಲ್ಲಿದ್ದರೂ ಕೂಡ ಟೆಸ್ಟ್ ಮತ್ತು ಒಡಿಐನಲ್ಲಿ ಸ್ಥಾನ ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. 3ನೇ ಮತ್ತು 4ನೇ ಆವೃತ್ತಿಯ ಐಪಿಎಲ್‌ನಲ್ಲಿ ನಾನು ಗರಿಷ್ಠ ವಿಕೆಟ್‌ ಟೇಕಿಂಗ್‌ ಬೌಲರ್‌ಗಳಲ್ಲಿ ಒಬ್ಬನಾಗಿದ್ದೆ. ಆದರೆ ಆಡುವ ಹೆಚ್ಚು ಅವಕಾಶಗಳು ಲಭ್ಯವಾಗಲಿಲ್ಲ. ಏಕೆಂದರೆ ನಾಯಕರಿಗೆ ನನ್ನ ಮೇಲೆ ನನ್ನ ಪ್ರದರ್ಶನದ ಮೇಲೆ ವಿಶ್ವಾಸ ಇರಲಿಲ್ಲ. ಇದು ನನ್ನ ಆತ್ಮವಿಶ್ವಾಸವನ್ನು ಅಡಗಿಸಿತ್ತು," ಎಂದಿದ್ದಾರೆ. "ಉತ್ತಮ ಪ್ರದರ್ಶನ ನೀಡಿದ್ದರೂ ನನ್ನ ಆಯ್ಕೆ ಆಗದೇ ಇರುವುದನ್ನು ಆಯ್ಕೆ ಸಮಿತಿಯವರನ್ನು ಪ್ರಶ್ನೆ ಮಾಡಿದ್ದೆ. ಇದಕ್ಕೆ ಇನ್ನಷ್ಟು ಕಠಿಣ ಪರಿಶ್ರಮ ಮುಂದುವರಿಸು ನಿನ್ನ ಸಮಯ ಬರುತ್ತದೆ ಎಂದಷ್ಟೇ ಉತ್ತರಿಸಿದ್ದರು," ಎಂದು ಸಿಂಗ್ ತಮ್ಮ ಅಸಮಾಧಾನ ತೋಡಿಕೊಂಡಿದ್ದಾರೆ. ಇದೀಗ ಬಿಸಿಸಿಐ ನೇಮಿಸಿರುವ ಭಾರತ ತಂಡದ ಕ್ರಿಕೆಟ್ ಸಲಹಾ ಸಮಿತಿಯಲ್ಲಿ ಆರ್‌ಪಿ ಸಿಂಗ್ ಸೇರಿಕೊಂಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Ybnnwe
