ವಾಷಿಂಗ್‌ಟನ್‌ ಡಿಸಿ: ಕೊರೊನಾ ವೈರಸ್‌ನಿಂದ ಅಮೆರಿಕಕ್ಕೆ ಆಗಿರುವ ನಷ್ಟ ತುಂಬಿಕೊಡಲು ಚೀನಾವನ್ನು ಆಗ್ರಹಿಸುತ್ತೇವೆ ಎಂದು ಅಧ್ಯಕ್ಷ ಪುನರುಚ್ಚರಿಸಿದ್ದಾರೆ. ಪರಿಸ್ಥಿತಿಯನ್ನು ಉತ್ತಮವಾಗಿ ನಿಭಾಯಿಸಿದ್ದರೆ ವಿಶ್ವ ಸಮಸ್ಯೆಗೆ ತುತ್ತಾಗುತ್ತಿದ್ದಿಲ್ಲ ಎಂದು ಅವರು ಹೇಳಿದ್ದಾರೆ. ಬಗ್ಗೆ ಶ್ವೇತ ಭವನದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿರುವ ಡೊನಾಲ್ಡ್‌ ಟ್ರಂಪ್‌ ಚೀನಾದೊಂದಿಗೆ ನಮ್ಮ ಸಂಬಂಧ ಉತ್ತಮವಾಗಿಲ್ಲ. ಅವರ ಮೇಲೆ ಗಂಭೀರವಾದ ತನಿಖೆ ನಡೆಸುತ್ತಿದ್ದೇವೆ. ಇಷ್ಟೆಲ್ಲಾ ಸಮಸ್ಯೆಗೆ ಚೀನಾವನ್ನು ಜವಾಬ್ದಾರಿ ಮಾಡಲು ಬಹಳಷ್ಟು ಅಂಶಗಳಿವೆ ಎಂದು ಅವರು ಆರೋಪಿಸಿದರು. ಜಗತ್ತನು ನರಕಕ್ಕೆ ದೂಡಿರುವ ಕೊರೊನಾ ವೈರಸ್‌ನ್ನು ಮೂಲದಲ್ಲಿಯೇ ಚೀನಾ ಸ್ಥಗಿತಗೊಳಿಸಬಹುದಿತ್ತು. ವೈರಸ್‌ ಕಾಣಿಸಿಕೊಂಡ ತಕ್ಷಣ ಚೀನಾ ಅಗತ್ಯ ಕ್ರಮಗಳನ್ನು ತೆಗೆದುಕೊಂಡಿದ್ದರೆ, ವಿಶ್ವಕ್ಕೆ ಕೊರೊನಾ ಪಸರಿಸುತ್ತಿದ್ದಿಲ್ಲ. ಅದಕ್ಕಾಗಿ ನಮಗಾದ ನಷ್ಟವನ್ನು ತುಂಬಿಕೊಡುವಂತೆ ಚೀನಾವನ್ನು ಆಗ್ರಹಿಸುತ್ತೇವೆ ಎಂದು ಟ್ರಂಪ್‌ ಹೇಳಿದ್ದಾರೆ. ಇತ್ತೀಚಿಷ್ಟೇ ಜರ್ಮನ್‌ ಪತ್ರಿಕೆಯೊಂದು ತನ್ನ ಸಂಪಾದಕೀಯದಲ್ಲಿ ಕೊರೊನಾದಿಂದ ಜರ್ಮನಿಗಾದ ಆರ್ಥಿಕ ನಷ್ಟವನ್ನು ತುಂಬಿಕೊಡುವಂತೆ ಆಗ್ರಹಿಸಿ, 165 ಬಿಲಿಯನ್‌ ಡಾಲರ್‌ ಪರಿಹಾರ ನೀಡುವಂತೆ ಚೀನಾವನ್ನು ಕೇಳಿತ್ತು. ಈ ಬಗ್ಗೆ ಟ್ರಂಪ್‌ ಅವರನ್ನು ಕೇಳಿದಾಗ ಅದಕ್ಕಿಂತ ಸುಲಭವಾದ ಕಾರ್ಯವನ್ನು ನಾವು ಮಾಡುತ್ತೇವೆ ಎಂದಿದ್ದಾರೆ. ಜರ್ಮನಿಗಿಂತಲೂ ಹೆಚ್ಚಿನ ಪರಿಹಾರವನ್ನು ಅಮೆರಿಕ ಕೇಳಲಿದೆ. ಇದುವರೆಗೂ ನಾವು ಹಣದ ಅಂದಾಜನ್ನು ಅಂತಿಮ ಮಾಡಿಲ್ಲ. ಆದರೆ, ಹಣದ ಪ್ರಮಾಣ ಬಹಳಷ್ಟು ಇರಲಿದೆ ಎಂಬುದಂತೂ ಸತ್ಯ. ಈ ನಷ್ಟ ಅಮೆರಿಕಕ್ಕೆ ಉಂಟಾಗಿದ್ದದರೂ, ಅದು ವಿಶ್ವಕ್ಕೆ ಆದ ನಷ್ಟವೂ ಆಗಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ಟ್ರಂಪ್‌ ತಿಳಿಸಿದರು. ಅಮೆರಿಕದಲ್ಲಿ ಇದುವರೆಗೂ ಕೊರೊನಾ ವೈರಸ್‌ನಿಂದ ಸಾವನ್ನಪ್ಪಿದವರು 55 ಸಾವಿರಕ್ಕಿಂತ ಹೆಚ್ಚು. ಜಗತ್ತಿನಲ್ಲಿಯೇ ಕೊರೊನಾದಿಂದ ಅತಿ ಹೆಚ್ಚು ಸಮಸ್ಯೆ ಅನುಭವಿಸಿದ ರಾಷ್ಟ್ರ ಅಮೆರಿಕ ಆಗಿದ್ದು, ಆರ್ಥಿಕತೆ ಕೊರೊನಾ ಹೊಡೆತಕ್ಕೆ ತತ್ತರಿಸಿ ಹೋಗಿದೆ. ಕೋಟ್ಯಂತರ ಜನ ನಿರುದ್ಯೋಗಿಗಳಾಗಿ ಮನೆಯಲ್ಲಿ ಕುಳಿತಿದ್ದಾರೆ.
from India & World News in Kannada | VK Polls https://ift.tt/3bLmcaK
