ಬೆಂಗಳೂರು: ಕೊರೊನಾ ಲಾಕ್‌ಡೌನ್‌ನಿಂದಾಗಿ ಕ್ಯಾಬ್ ಚಾಲಕರು ಸಂಕಷ್ಟದಲ್ಲಿದ್ದಾರೆ. ನಿತ್ಯ ಬಾಡಿಗೆ ನಂಬಿಕೊಂಡು ಬದುಕು ಸಾಗಿಸುತ್ತಿದ್ದ ಇವರ ಜೀವನ ಲಾಕ್‌ಡೌನ್‌ನಿಂದಾಗಿ ದುಸ್ತರವಾಗಿದೆ. ಸಾಲ ಮಾಡಿ ಖರೀದಿಸಿದ ವಾಹನದ ಬ್ಯಾಂಕ್ ಕಂತು ಪಾವತಿಸಲು ಸಾಧ್ಯವಾಗದೆ, ಕುಟುಂಬ ನಿರ್ವಹಣೆಗೂ ಪರದಾಡುವ ಪರಿಸ್ಥಿತಿ ಬಂದೊದಗಿದೆ. ಇದರಿಂದ ಕಂಗಾಲಾಗಿರುವ ಕ್ಯಾಬ್ ಚಾಲಕರು ಖಾಲಿ ಪಾತ್ರೆಗಳನ್ನು ಹಿಡಿದುಕೊಂಡು ಸೆಲ್ಫಿ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್‌ ಮಾಡುವ ಮೂಲಕ ಸರ್ಕಾರದ ಗಮನ ಸೆಳೆಯುವ ಪ್ರಯತ್ನಕ್ಕೆ ಕೈಹಾಕಿದ್ದಾರೆ. ಸಾಕಷ್ಟು ಮಂದಿ ಕ್ಯಾಬ್ ಚಾಲಕರು ಫೇಸ್‌ ಬುಕ್‌ ಹಾಗೂ ವಾಟ್ಸಪ್‌ಗಳಲ್ಲಿ ಖಾಲಿ ಪಾತ್ರೆ ಜೊತೆಗೆ ಫೋಟೋಗಳನ್ನು ಹಾಕಿದ್ದಾರೆ. ಕೊರೊನಾ ಲಾಕ್‌ಡೌನ್‌ನಿಂದಾಗಿ ಮನೆಯಲ್ಲಿ ದಿನಸಿ ಸಾಮಾಗ್ರಿಗಳನ್ನು ಖರೀದಿ ಮಾಡಲು ಸಾಧ್ಯವಾಗುತ್ತಿಲ್ಲ, ದಿನನಿತ್ಯದ ಜೀವನ ಸಾಗಿಸಲೂ ಪರದಾಡುತ್ತಿದ್ದೇವೆ ಎಂದು ಸಾಂಕೇತಿಕವಾಗಿ ತಮ್ಮ ನೋವನ್ನು ತೋಡಿಕೊಂಡಿದ್ದಾರೆ. ಕೊರೊನಾ ಲಾಕ್‌ಡೌನ್ ಅವಧಿ ಆರಂಭವಾದ ದಿನದಿಂದ ಕ್ಯಾಬ್ ಚಾಲಕರಿಗೆ ಬಾಡಿಗೆ ಇಲ್ಲ. ಬೆಂಗಳೂರು ನಗರದಲ್ಲಿರುವ ಕೆಲವು ಚಾಲಕರು ತಮ್ಮ ಊರುಗಳಿಗೆ ತೆರಳಿದ್ದರೆ ಮತ್ತೆ ಕೆಲವರು ಬೆಂಗಳೂರಿನಲ್ಲೇ ಉಳಿದುಕೊಂಡಿದ್ದಾರೆ. ಆದರೆ ಇವರ ಪರಿಸ್ಥಿತಿಯ ಕುರಿತಾಗಿ ಯಾರೂ ತಲೆಕೆಡಿಸಿಕೊಳ್ಳುತ್ತಿಲ್ಲ ಎಂದು ಅಳಲು ತೋಡಿಕೊಳ್ಳುತ್ತಿದ್ದಾರೆ. "ಮಾರ್ಚ್‌ 6 ರಂದು ಕ್ಯಾಬ್ ಓಡಾಟ ಸ್ಥಗಿತಗೊಂಡಿದೆ. ಊರಿಗೆ ಬಂದು ಒಂದು ತಿಂಗಳು ಕಳೆದಿದೆ. ಆದರೆ ಟ್ರಾವೆಲ್ ಕಂಪನಿಗಳು ನಮ್ಮ ಪರಿಸ್ಥಿತಿಯ ಬಗ್ಗೆ ವಿಚಾರಣೆ ಮಾಡಿಲ್ಲ. ಸಾಲ ಮಾಡಿ ಕಾರು ಖರೀದಿ ಮಾಡಿದ್ದು ಬ್ಯಾಂಕ್ ಕಂತು ಪಾವತಿ ಮಾಡಬೇಕು, ಕುಟುಂಬವನ್ನು ನಿರ್ವಹಣೆ ಮಾಡಬೇಕು, ಕೈಯಲ್ಲಿ ಹಣವಿಲ್ಲದೆ ಮುಂದಿನ ಜೀವನ ಹೇಗೆ ಎಂಬುವುದು ಚಿಂತೆಯಾಗಿದೆ" ಎನ್ನುತ್ತಾರೆ ಕ್ಯಾಬ್ ಚಾಲಕ ನಾಗರಾಜ್. ಮತ್ತೋರ್ವ ಕ್ಯಾಬ್ ಚಾಲಕ ಸೋಮಶೇಖರ್ ಅವರ ಕಥೆಯೂ ಇದಕ್ಕಿಂತ ಭಿನ್ನವಾಗಿಲ್ಲ. ಇವರು ಕಾರು ಖರೀದಿ ಮಾಡಿ ಎರಡು ತಿಂಗಳು ಆಗಿಲ್ಲ, "ಪ್ರತಿ ತಿಂಗಳು 20,000 ಸಾಲದ ಕಂತು ಕಟ್ಟಬೇಕು, ಜೊತೆಗೆ ಕುಟುಂಬ ನಿರ್ವಹಣೆ ಮಾಡಬೇಕು. ಬೇರೆ ಆದಾಯ ಮೂಲವಿಲ್ಲದೆ ಬದುಕುವ ನಮ್ಮಂತವರ ಪರಿಸ್ಥಿತಿ ಏನು" ಎಂದು ಆತಂಕ ವ್ಯಕ್ತಪಡಿಸಿಸುತ್ತಾರೆ ಅವರು. ಈ ಕುರಿತಾಗಿ ವಿಜಯ ಕರ್ನಾಟಕದ ಜೊತೆಗೆ ಮಾತನಾಡಿದ ಓಲಾ, ಉಬರ್ ಕ್ಯಾಬ್ ಚಾಲಕ, ಮಾಲಕರ ಸಂಘದ ಅಧ್ಯಕ್ಷ ತನ್ವೀರ್ “ಕೊರೊನಾ ಲಾಕ್‌ಡೌನ್‌ನಿಂದಾಗಿ ಕ್ಯಾಬ್ ಚಾಲಕರು ಸಾಕಷ್ಟು ಸಮಸ್ಯೆಯಲ್ಲಿದ್ದಾರೆ. ದಿನನಿತ್ಯದ ಜೀವನಕ್ಕೂ ಪರದಾಡುವ ಪರಿಸ್ಥಿತಿಯಲ್ಲಿದ್ದಾರೆ. ಆಹಾರ ಪದಾರ್ಥಗಳಿಂದ ಹಿಡಿದು ದಿನನಿತ್ಯ ವಸ್ತುಗಳನ್ನು ಖರೀದಿ ಮಾಡಲು ಅವರಲ್ಲಿ ಹಣ ಇಲ್ಲ. ಕ್ಯಾಬ್ ಬಾಡಿಗೆ ನಂಬಿಕೊಂಡು ಬದುಕುತ್ತಿರುವ ಚಾಲಕರ ಸಮಸ್ಯೆಗೆ ಸರ್ಕಾರ ಸ್ಪಂದಿಸಬೇಕಾಗಿದೆ. ಬೆಂಗಳೂರಿನಲ್ಲಿ ಸುಮಾರು 1,75,000 ಓಲಾ, ಉಬರ್ ಅಟೋ ಹಾಗೂ ಕ್ಯಾಬ್ ಚಾಲಕರಿದ್ದಾರೆ. ಈ ಪೈಕಿ ಶೇಕಡಾ 80 ರಷ್ಟು ಮಂದಿಗೆ ಬಿಪಿಎಲ್‌ ಕಾರ್ಡ್‌ ಇಲ್ಲ. ಇದರಿಂದ ಉಚಿತ ಪಡಿತರ ಪಡೆಯಲೂ ಇವರು ಅರ್ಹರಾಗಿಲ್ಲ. ನಿತ್ಯದ ಜೀವನ ನಡೆಸಲು ಚಾಲಕರು ತಮ್ಮ ಸ್ನೇಹಿತರಿಂದ ಸಾಲ ಮಾಡಿ ಸುಸ್ತಾಗಿದ್ದಾರೆ” ಎನ್ನುತ್ತಾರೆ. ಲಾಕ್‌ಡೌನ್‌ನಿಂದ ಸಂಕಷ್ಟದಲ್ಲಿರುವ ಕ್ಯಾಬ್ ಚಾಲಕರಿಗೆ ಸರ್ಕಾರ ಪರಿಹಾರವನ್ನು ನೀಡಬೇಕು ಎಂಬುವುದು ಚಾಲಕರ ಬೇಡಿಕೆಯಾಗಿದೆ. ಈ ಕುರಿತಾಗಿ ಚರ್ಚೆಯನ್ನು ನಡೆಸಲು ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಅವರನ್ನು ಓಲಾ, ಉಬರ್ ಕ್ಯಾಬ್ ಚಾಲಕ, ಮಾಲಕರ ಸಂಘದ ಪ್ರತಿನಿಧಿಗಳು ಭೇಟಿಯಾಗಿದ್ದಾರೆ. ನಮ್ಮ ಸಮಸ್ಯೆಗಳನ್ನು ಹಂಚಿಕೊಂಡಿದ್ದಾರೆ. ಈ ನಿಟ್ಟಿನಲ್ಲಿ ಸರ್ಕಾರವೂ ಗಮನಹರಿಸಬೇಕಾಗಿದೆ.
from India & World News in Kannada | VK Polls https://ift.tt/3eYYHx9
