ಹೊಸದಿಲ್ಲಿ: ಆಸ್ಟ್ರೇಲಿಯಾ ತಂಡದ ಆಟವೇ ವಿಭಿನ್ನ. ಪಂದ್ಯ ಗೆಲ್ಲಲು ಯಾವ ಹಂತಕ್ಕಾದರೂ ಇಳಿದು ಎದುರಾಳಿಯ ಮೇಲೆ ಪ್ರಾಬಲ್ಯ ಮೆರೆಯಲು ಎದುರು ನೋಡುತ್ತಿರುತ್ತದೆ. ಆದರೆ, 2018ರಲ್ಲಿ ನಡೆದ ಸ್ಯಾಂಡ್‌ಪೇಪರ್‌ ಗೇಟ್‌ ವಿವಾದದ ಬಳಿಕ ಆಸ್ಟ್ರೇಲಿಯಾ ತಂಡದ ವರ್ತನೆ ಕೊಂಚ ಸುಧಾರಿಸಿದೆ ಎನ್ನಬಹುದು. ಅಂದಹಾಗೆ ಕ್ರಿಕೆಟ್ ಲೋಕದಲ್ಲಿ ಸ್ಲೆಡ್ಜಿಂಗ್‌ಗೆ ಹೆಸರುವಾಸಿಯಾದ ತಂಡ ಆಸ್ಟ್ರೇಲಿಯಾ. ಮೆರ್ವ್‌ ಹ್ಯೂಸ್‌ರಿಂದ ಗ್ಲೆನ್‌ ಮೆಗ್ರಾತ್‌, ಬ್ರೆಟ್‌ ಲೀಯಿಂದ ಶೇನ್‌ ವಾರ್ನ್‌ ಹೀಗೆ ಘಟಾನುಘಟಿ ಬೌಲರ್‌ಗಳು ತಮ್ಮ ಅದ್ಭುತ ಬೌಲಿಂಗ್‌ ದಾಳಿಯ ಜೊತೆಗೆ ಸ್ಲೆಡ್ಜಿಂಗ್‌ ಅಸ್ತ್ರಗಳನ್ನು ಸಮರ್ಪಕವಾಗಿ ಬಳಿಸಿಕೊಂಡು ಎದುರಾಳಿ ಬ್ಯಾಟ್ಸ್‌ಮನ್‌ಗಳಿಗೆ ಕಂಟಕವಾದವರು. ಅಂದಹಾಗೆ ಟೀಮ್‌ ಇಂಡಿಯಾದ ಒಬ್ಬ ಬ್ಯಾಟ್ಸ್‌ಮನ್‌ ಮಾತ್ರ ಆಸೀಸ್‌ ಬೌಲರ್‌ಗಳ ಈ ಸ್ಲೆಡ್ಜಿಂಗ್‌ ಅಸ್ತ್ರಗಳಿಗೆ ಕಿಂಚಿತ್ತೂ ಬಗ್ಗುತ್ತಿರಲಿಲ್ಲ. ಹೀಗಾಗಿ ಆಸ್ಟ್ರೇಲಿಯಾ ತಂಡದ ಆಟಗಾರರು ಆತನ ವಿರುದ್ಧ ಯಾವುದೇ ರೀತಿಯಲ್ಲಿ ಸ್ಲೆಡ್ಜಿಂಗ್‌ ಅಸ್ತ್ರ ಬಳಕೆ ಮಾಡದಿರಲು ನಿರ್ಧರಿಸಿದ್ದರಂತೆ. ಏಕೆಂದರೆ ಸ್ಲೆಡ್ಜ್‌ ಮಾಡಿದಷ್ಟೂ ಭರ್ಜರಿಯಾಗಿ ಆತ ಬ್ಯಾಟ್‌ ಬೀಸುತ್ತಿದ್ದ. ಅಂದು ಆಸ್ಟ್ರೇಲಿಯಾ ತಂಡದ ಯುವ ವೇಗದ ಬೌಲರ್‌ ಬ್ರೆಟ್‌ ಲೀಗೆ ತಂಡದ ಅನುಭವಿ ವೇಗದ ಬೌಲರ್‌ ಗ್ಲೆನ್‌ ಮೆಗ್ರಾತ್‌ ಇಂಥದ್ದೊಂದು ಎಚ್ಚರಿಕೆ ನೀಡಿದ್ದರು. ಟೀಮ್‌ ಇಂಡಿಯಾದ ಬ್ಯಾಟಿಂಗ್‌ ದಿಗ್ಗಜ ಸಚಿನ್ ತೆಂಡೂಲ್ಕರ್‌ ಎದುರು ಯಾವುದೇ ಕಾರಣಕ್ಕೂ ಸ್ಲೆಡ್ಜ್‌ ಮಾಡದೇ ಇರುವಂತೆ ಲೀಗೆ ಮೆಗ್ರಾ ಕಿವಿಮಾತನ್ನು ಹೇಳಿದ್ದರಂತೆ. ಈ ಸಂಗತಿಯನ್ನು ಲೀ ಸ್ಟಾರ್‌ ಸ್ಪೋರ್ಟ್ಸ್‌ನ ಆನ್‌ಲೈನ್‌ ಕಾರ್ಯಕ್ರಮ ಕ್ರಿಕೆಟ್ ಕನೆಕ್ಟ್‌ನಲ್ಲಿ ಹೇಳಿಕೊಂಡಿದ್ದಾರೆ. "ತಂಡದಲ್ಲಿ ಬೌಲಿಂಗ್‌ ವಿಭಾಗದಲ್ಲೂ ಒಬ್ಬ ನಾಯಕನಿರುತ್ತಾನೆ. ನನ್ನ ವೃತ್ತಿ ಬದುಕಿನ ಆರಂಭಿಕ ದಿನಗಳಲ್ಲಿ ಮೆಗ್ರಾತ್‌ ನನಗೆ ಮಾರ್ಗದರ್ಶನ ನೀಡುತ್ತಿದ್ದರು. ಸಚಿನ್ ಜೊತೆಗೆ ಹೆಚ್ಚು ಮಾತನಾಡಬೇಡಿ ಎಂದೇ ಅವರು ಎಚ್ಚರಿಸುತ್ತಿದ್ದರು. ನೀವು ಅವರನ್ನು ಕೆಣಕ್ಕಿದ್ದೇ ಆದರೆ ದಿನವಿಡೀ ನಿಮಗೇ ನೋವಾಗುತ್ತದೆ. ಅಂದು ಟೀಮ್‌ ಇಂಡಿಯಾ ವಿರುದ್ಧದ ಪಂದ್ಯಗಳ ಸಲುವಾಗಿ ನಡೆಯುತ್ತಿದ್ದ ಬೌಲಿಂಗ್‌ ಸಭೆಯಲ್ಲಿ ನಾವು ಮಾತನಾಡಿಕೊಳ್ಳುತ್ತಿದ್ದದ್ದು ಇದನ್ನೇ," ಎಂದು ಲೀ ಹೇಳಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 100 ಶತಕಗಳನ್ನು ಬಾರಿಸಿದ ವಿಶ್ವದ ಏಕಮಾತ್ರ ಬ್ಯಾಟ್ಸ್‌ಮನ್‌ ಸಚಿನ್. ಮಾಸ್ಟರ್‌ ಬ್ಲಾಸ್ಟರ್‌ ಆಸ್ಟ್ರೇಲಿಯಾದ ಬಲಿಷ್ಠ ಬೌಲರ್‌ಗಳ ಎದುರು ಅದ್ಭುತ ಬ್ಯಾಟಿಂಗ್‌ ಪ್ರದರ್ಶನ ನೀಡಿದ ದಾಖಲೆ ಹೊಂದಿದ್ದಾರೆ. ಮೆಗ್ರಾತ್‌, ಲೀ ಮತ್ತು ಶೇನ್‌ ವಾರ್ನ್‌ ಎದುರು ಹಲವು ಬಾರಿ ಬ್ಯಾಟ್‌ ಬೀಸಿ ಮೇಲುಗೈ ಸಾಧಿಸಿದ್ದಾರೆ. ಇನ್ನು ಆಸ್ಟ್ರೇಲಿಯಾ ವಿರುದ್ಧ ಸಚಿನ್ ಬ್ಯಾಟಿಂಗ್‌ ದಾಖಲೆಯೂ ಅಮೋಘವಾಗಿದೆ. ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಆಡಿದ 39 ಪಂದ್ಯಗಳಿಂದ 55ರ ಸರಾಸರಿಯಲ್ಲಿ ಬ್ಯಾಟ್‌ ಬೀಸಿರುವ ಸಚಿನ್ ಕಾಂಗರೂಗಳ ಎದುರು 3630 ರನ್‌ಗಳನ್ನು ಗಳಿಸಿದ್ದಾರೆ. ಇದರಲ್ಲಿ 11 ಶತಕ ಮತ್ತೊಂದು ದ್ವಿಶತಕವಿದೆ. ಏಕದಿನ ಕ್ರಿಕೆಟ್‌ನಲ್ಲೂ 71 ಪಂದ್ಯಗಳಿಂದ 3077 ರನ್‌ಗಳನ್ನು ಬಾರಿಸಿದ್ದಾರೆ. ಇದರಲ್ಲಿ 9 ಶತಕಗಳು ಸೇರಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3cL9k4H
