ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ಮನದಲ್ಲಿ 'ಹಿಟ್ಮ್ಯಾನ್' ಎಂದೇ ಖ್ಯಾತಿ ಪಡೆದಿರುವ ಸ್ಫೋಟಕ ಆರಂಭಿಕ ಬ್ಯಾಟ್ಸ್‌ಮನ್‌ ರೋಹಿತ್‌ ಶರ್ಮಾ ಗುರುವಾರ ತಮ್ಮ 33ನೇ ಹುಟ್ಟು ಹಬ್ಬ ಆಚರಿಸಿಕೊಂಡಿದ್ದಾರೆ. ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ಭಾರತ ತಂಡದ ಉಪನಾಯಕ ಆಗಿರುವ ರೋಹಿತ್‌ ಶರ್ಮಾ, ಅವರ 33ನೇ ಹುಟ್ಟು ಹಬ್ಬದ ಸಂದರ್ಭದಲ್ಲಿ ಒಡಿಐ ಕ್ರಿಕೆಟ್‌ನಲ್ಲಿ ಅವರ 3 ದ್ವಿಶತಕಗಳ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ. 2007ರ ಜೂನ್‌ 23ರಂದು ಭಾರತ ತಂಡಕ್ಕೆ ಪದಾರ್ಪಣೆ ಮಾಡಿದ ರೋಹಿತ್‌, ಒಡಿಐನಲ್ಲಿ ಮೂರು ದ್ವಿಶತಕ ಬಾರಿಸಿದ ವಿಶ್ವದ ಏಕಮಾತ್ರ ಬ್ಯಾಟ್ಸ್‌ಮನ್‌ ಆಗಿದ್ದಾರೆ. ಐಪಿಎಲ್‌ ಟೂರ್ನಿಯಲ್ಲಿ ತಂಡದ ನಾಯಕನಾಗಿರುವ ಸ್ಟೈಲಿಷ್‌ ಬಲಗೈ ಬ್ಯಾಟ್ಸ್‌ಮನ್‌ನ ಮೂರು ಒಡಿಐ ಮಾಸ್ಟರ್‌ ಕ್ಲಾಸ್‌ ಇನಿಂಗ್ಸ್‌ಗಳು ಹೀಗಿವೆ. 2013ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಬೆಂಗಳೂರಿನಲ್ಲಿ 203 ರನ್‌ಅಂದು ದೇಶದಲ್ಲಿ ದೀಪಾವಳಿಯ ಸಂಭ್ರಮ. ಸರಣಿ ನಿರ್ಣಾಯಕ ಪಂದ್ಯದಲ್ಲಿ ಟೀಮ್‌ ಇಂಡಿಯಾಗೆ ಗೆಲುವು ಅನಿವಾರ್ಯವಾಗಿತ್ತು. ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡ ಓಪನರ್‌ ಶಿಖರ್‌ ಧವನ್‌ ವಿಕೆಟ್‌ ಕಳೆದುಕೊಂಡಿತ್ತು. ಬಳಿಕ ವಿರಾಟ್‌ ಕೊಹ್ಲಿ ಕೂಡ ರನ್‌ಔಟ್‌ ಆಗಿದ್ದರು. ಹೀಗಾಗಿ ತಂಡಕ್ಕೆ ಗೆಲ್ಲಲು ಕನಿಷ್ಠ 350+ ರನ್‌ ತಂದುಕೊಡುವ ಜವಾಬ್ದಾರಿ ರೋಹಿತ್‌ ಮೇಲಿತ್ತು. ಆಗಷ್ಟೇ ಕೈಬೆರಳಿನ ಗಾಯದ ಸಮಸ್ಯೆಯಿಂದ ಚೇತರಿಸಿ ತಂಡ ಸೇರಿದ್ದ ರೋಹಿತ್‌ ಆರಂಭದಲ್ಲಿ ನಿಧಾನವಾಗಿ ಬ್ಯಾಟ್‌ ಮಾಡುವ ಮೂಲಕ ಬಳಿಕ ಸ್ಪಿನ್ನರ್‌ಗಳ ಎದುರು ಬಿರುಸಿನ ಆಟವಾಡಿ ಶತಕ ದಾಖಲಿಸಿದರು. ಶತಕ ಬಾರಿಸಿದ ಬಳಿಕ ತಮ್ಮ ರನ್‌ ಗತಿಯ ಗಿಯರ್‌ ಬದಲಾಯಿಸಿಕೊಂಡ ರೋಹಿತ್‌ ಮೊತ್ತ ಮೊದಲ ಬಾರಿ 'ಹಿಟ್ಮ್ಯಾನ್ ರೂಪ ತಾಳಿದ್ದರು. ನೋಡ ನೋಡುತ್ತಿದ್ದಂತೆಯೇ 158 ಎಸೆತಗಳಲ್ಲಿ 209 ರನ್‌ ಚಚ್ಚಿ ಭಾರತದ ಪರ ಒಡಿಐನಲ್ಲಿ ದ್ವಿಶತಕ ಬಾರಿಸಿದ ಮೂರನೇ ಬ್ಯಾಟ್ಸ್‌ಮನ್‌ ಎನಿಸಿದರು. ರೋಹಿತ್‌ ವೀರಾವೇಶದ ಬ್ಯಾಟಿಂಗ್‌ ನೆರವಿನಿಂದ ಭಾರತ ತಂಡ 383 ರನ್‌ಗಳ ಬೃಹತ್‌ ಮೊತ್ತ ದಾಖಲಿಸಿ ಆಸ್ಟ್ರೇಲಿಯಾ ಎದುರು 57 ರನ್‌ಗಳ ಭರ್ಜರಿ ಜಯ ದಾಖಲಿಸಿತು. ರೋಹಿತ್‌ ಇನಿಂಗ್ಸ್‌ನಲ್ಲಿ 12 ಫೋರ್‌ ಮತ್ತು 16 ಸಿಕ್ಸರ್‌ಗಳು ಹೊರಹೊಮ್ಮಿದ್ದವು. 2014ರಲ್ಲಿ ಈಡನ್‌ ಗಾರ್ಡನ್ಸ್‌ನಲ್ಲಿ ಶ್ರೀಲಂಕಾ ವಿರುದ್ಧ 264 ರನ್ಕೋಲ್ಕೊತಾದ ಈಡನ್‌ ಗಾರ್ಡನ್ಸ್‌ ಕ್ರೀಡಾಂಗಣ ರೋಹಿತ್‌ ಶರ್ಮಾಗೆ ಅಚ್ಚು ಮೆಚ್ಚಿನ ಅಂಗಣ. ಇದೇ ಕ್ರೀಡಾಂಗಣದಲ್ಲಿ ಹಿಟ್ಮ್ಯಾನ್ ಹಲವು ಅದ್ಭುತ ಬ್ಯಾಟಿಂಗ್‌ ಪ್ರದರ್ಶನಗಳನ್ನು ನೀಡಿದ್ದಾರೆ. ಅಂತೆಯೇ ಈಡನ್‌ ಪಿಚ್‌ನಲ್ಲಿ ವಿಶ್ವ ದಾಖಲೆಯ ಬ್ಯಾಟಿಂಗ್‌ ಪ್ರದರ್ಶನವನ್ನೂ ನೀಡಿದ್ದಾರೆ. 2014ರಲ್ಲಿ ನಡೆದ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ 173 ಎಸೆತಗಳಲ್ಲಿ 264 ರನ್‌ ಸಿಡಿಸಿದ್ದ ರೋಹಿತ್‌, ಒಡಿಐ ಕ್ರಿಕೆಟ್‌ನ ಚೊಚ್ಚಲ ತ್ರಿಶತಕದಿಂದ ವಂಚಿತರಾಗಿದ್ದರು. ಇದು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಬ್ಯಾಟ್ಸ್‌ಮನ್‌ ಒಬ್ಬ ಇನಿಂಗ್ಸ್‌ ಒಂದರಲ್ಲಿ ದಾಖಲಿಸಿದ ಅತಿ ಹೆಚ್ಚು ರನ್‌ಗಳ ವಿಶ್ವದಾಖಲೆ ಆಗಿದೆ. ಬಹುಶಃ ದಶಕಗಳ ಕಾಲ ಈ ದಾಖಲೆ ಹಾಗೇ ಉಳಿಯಲಿದೆ. ಅಂದಹಾಗೆ ಆ ಇನಿಂಗ್ಸ್‌ನಲ್ಲಿ 4 ರನ್‌ಗಳಿಗೆ ಜೀವದಾನ ಪಡೆದಿದ್ದ ರೋಹಿತ್‌, ತಮ್ಮ ಖಾತೆಗೆ 260 ರನ್‌ಗಳನ್ನು ಜೋಡಿಸಿಕೊಳ್ಳುತ್ತಾರೆ ಎಂದು ಯಾರೊಬ್ಬರೂ ಅಂದಾಜಿಸಿರಲಿಲ್ಲ. ಅವರ ಆ ಮನಮೋಹಕ ಇನಿಂಗ್ಸ್‌ನಲ್ಲಿ ಬರೋಬ್ಬರಿ 33 ಫೋರ್‌ಗಳು ಸಿಡಿದರೆ, 9 ಸಿಕ್ಸರ್‌ಗಳು ಸ್ಫೋಟಗೊಂಡಿದ್ದವು. 2017ರಲ್ಲಿ ಮೊಹಾಲಿಯಲ್ಲಿ ಶ್ರೀಲಂಕಾ ವಿರುದ್ಧ 208 ರನ್‌ ಶ್ರೀಲಂಕಾ ತಂಡದ ಬೌಲಿಂಗ್‌ ದಾಳಿಯನ್ನು ಧೂಳೀಪಟ ಮಾಡಿದ್ದ ರೋಹಿತ್‌ ಶರ್ಮಾ ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡಿದ್ದ ಭಾರತ ತಂಡಕ್ಕೆ 392/4 ರನ್‌ಗಳ ಬೃಹತ್‌ ಮೊತ್ತ ತಂದುಕೊಟ್ಟಿದ್ದರು. ಈ ಸಲುವಾಗಿ ಅವರು 153 ಎಸೆತಗಳಲ್ಲಿ 208 ರನ್‌ಗಳ ವಿಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶನ ನೀಡಿದ್ದರು. ಈ ಇನಿಂಗ್ಸ್‌ನಲ್ಲಿ 13 ಫೋರ್‌ ಮತ್ತು 12 ಸಿಕ್ಸರ್‌ಗಳು ಚಿಮ್ಮಿದ್ದು ವಿಶೇಷ. ಪರಿಣಾಮ ಭಾರತಕ್ಕೆ 141 ರನ್‌ಗಳ ಭರ್ಜರಿ ಜಯ ಪ್ರಾಪ್ತಿಯಾಗಿತ್ತು. ವಿಶ್ವಕಪ್‌ನಲ್ಲಿ ರೋಹಿತ್‌ ವಿಶ್ವರೂಪ ಪರ ರನ್‌ ಹೊಳೆಯನ್ನೇ ಹರಿಸಿದ ರೋಹಿತ್‌ ಶರ್ಮಾ, 2019ರಲ್ಲಿ ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಆತಿಥ್ಯದಲ್ಲಿ ನಡೆದ ಐಸಿಸಿ ಏಕದಿನ ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ 81.00ರ ಸರಾಸರಿಯಲ್ಲಿ 648 ರನ್‌ಗಳನ್ನು ಸಿಡಿಸಿದ್ದರು. ಇದರಲ್ಲಿ ವಿಶ್ವ ದಾಖಲೆಯ 5 ಶತಕಗಳು ಸೇರಿವೆ. ಈ ಮೂಲಕ ವಿಶ್ವಕಪ್‌ನ ಒಂದೇ ಆವೃತ್ತಿಯಲ್ಲಿ 5 ಶತಕಗಳನ್ನು ಬಾರಿಸಿದ ಏಕಮಾತ್ರ ಬ್ಯಾಟ್ಸ್‌ಮನ್‌ ಎಂಬ ಹೆಗ್ಗಳಿಕೆಗೆ ರೋಹಿತ್‌ ಪಾತ್ರರಾದರು. ಭಾರತ ತಂಡದ ಪರ 224 ಒಡಿಐ, 108 ಅಂತಾರಾಷ್ಟ್ರೀಯ ಟಿ20 ಮತ್ತು 32 ಟೆಸ್ಟ್‌ ಪಂದ್ಯಗಳನ್ನು ಆಡಿರುವ ಮುಂಬೈಕರ್‌ ರೋಹಿತ್‌, ಕ್ರಮವಾಗಿ 9,115, 2,773 ಮತ್ತು 2,141 ರನ್‌ಗಳನ್ನು ಗಳಿಸಿದ್ದಾರೆ. ರೋಹಿತ್‌ ಶರ್ಮಾ ಅವರ 33ನೇ ಹುಟ್ಟು ಹಬ್ಬದ ದಿನದಂದು ಟ್ವಿಟರ್‌ ಮೂಲಕ ಹರಿದುಬಂದ ಶುಭ ಹಾರೈಕೆಗಳು ಹೀಗಿವೆ. ಟೆಸ್ಟ್‌ ತಂಡದಲ್ಲಿ ಓಪನಿಂಗ್‌ ಪಾರ್ಟ್ನರ್‌ ಮಯಾಂಗ್‌ ಅಗರ್ವಾಲ್ ಶುಭಾಶಯ. ಶುಭ ಹಾರೈಸಿದ ಟೀಮ್‌ ಇಂಡಿಯಾ ಕೋಚ್‌ ರವಿ ಶಾಸ್ತ್ರಿ. ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್‌ ತಂಡದ ಮಾಜಿ ಸಹ ಆಟಗಾರ ಕರಣ್‌ ಶರ್ಮಾ ಶುಭ ಹಾರೈಕೆ ಶುಭ ಕೋರಿದ ಭಾರತ ಟೆಸ್ಟ್‌ ತಂಡದ ಬ್ಯಾಟ್ಸ್‌ಮನ್‌ ಹನುಮ ವಿಹಾರಿ ವಿಶೇಷ ವಿಡಿಯೋ ಮೂಲಕ ಹುಟ್ಟು ಹಬ್ಬದ ಶುಭ ಕೋರಿದ ಕ್ರಿಕೆಟ್ ಆಸ್ಟ್ರೇಲಿಯಾ ರೋಹಿತ್‌ ಶರ್ಮಾ ಅವರ ವೃತ್ತಿ ಬದುಕಿನ ಕೆಲ ವಿಶೇಷ ಅಂಕಿ ಅಂಶಗಳು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3bSfP5t
