ಪುಣೆ: ದೇಶಕ್ಕೆ ಸಂಕಷ್ಟ ಎದುರಾಗಿದೆ ಎಲ್ಲರೂ ಕೈಜೋಡಿಸೋಣ ಬನ್ನಿ..ಎಂಬ ಪ್ರಧಾನಿ ಮೋದಿ ಕರೆಗೆ ಇಡೀ ದೇಶ ಓಗೊಟ್ಟಿದೆ. ಮಾರಕ ಕೊರೊನಾ ವೈರಸ್‌ನ್ನು ಮಣಿಸಲು ಪ್ರತಿಭಾನ್ವಿತ ಭಾರತೀಯರು ಸರ್ವ ಸನ್ನದ್ಧವಾಗಿದ್ದಾರೆ. ತಮ್ಮ ಬುದ್ಧಿಮತ್ತೆಯನ್ನೆಲ್ಲಾ ಧಾರೆ ಎರೆದು ಕೊರೊನಾ ವೈರಸ್ ವಿರುದ್ಧದ ಹೋರಾಟವನ್ನು ಯಶಸ್ವಿಗೊಳಿಸುತ್ತಿರುವ ಭಾರತೀಯರ ಸಂಖ್ಯೆಗೇನೂ ಕಡಿಮೆಯಿಲ್ಲ. ಅದರಂತೆ ಮೂಲದ ಯುವ ಇಂಜಿನಿಯರಿಂಗ್ ಪದವಿಧರರ ಗುಂಪೊಂದು ಕೊರೊನಾ ವೈರಸ್ ವಿರುದ್ಧದ ಹೋರಾಟದ ಭಾಗವಾಗಿ ಕಡಿಮೆ ಬೆಲೆಯಲ್ಲಿ ವೆಂಟಿಲೇಟರ್‌ಗಳನ್ನು ನಿರ್ಮಿಸುತ್ತಿದೆ. NOCCA ರೊಬೋಟಿಕ್ಸ್ ಎಂಬ ಸ್ಟಾರ್ಟ್ ಅಪ್ ಸಂಸ್ಥೆಯನ್ನು ನಿರ್ಮಿಸಿರುವ ಈ ಪ್ರತಿಭಾವಂತ ಯುವಕರ ಗುಂಪು, ಕಡಿಮೆ ಬೆಲೆಯಲ್ಲಿ ವೆಂಟಿಲೇಟರ್‌ಗಳನ್ನು ನಿರ್ಮಿಸಿ ಕೊರೊನಾ ವೈರಸ್ ವಿರುದ್ಧದ ಹೋರಾಟಕ್ಕೆ ಸಾಥ್ ನೀಡಿದ್ದಾರೆ. ಈ ಕುರಿತು ಮಾಹಿತಿ ನೀಡಿರುವ NOCCA ರೊಬೋಟಿಕ್ಸ್ ಸಂಸ್ಥೆಯ ಸಹ ಸಂಸ್ಥಾಪಕ ನಿಖಿಲ್ ಕುರೆಲೆ, ಕಡಿಮೆ ಬೆಲೆಯ ವೆಂಟಿಲೇಟರ್‌ಗಳ ನಿರ್ಮಾಣದಲ್ಲಿ ನಾವು ತೊಡಗಿದ್ದು, ವೈದ್ಯಕೀಯ ಸಲಕರಣೆಗಳನ್ನು ಸಮರೋಪಾದಿಯಲ್ಲಿ ತಲುಪಿಸುವಲ್ಲಿ ಸರ್ಕಾರಗಳಿಗೆ ಸಹಾಯ ಮಾಡಲು ತಾವು ಸಿದ್ಧವಿರುವುದಾಗಿ ಭರವಸೆ ನೀಡಿದ್ದಾರೆ. ಈ ವೆಂಟಿಲೇಟರ್‌ಗಳ ಬೆಲೆ 50,000 ರೂ. ಎಂದು ಅಂದಾಜಿಲಾಗಿದ್ದು, ಸದ್ಯ ಲಕ್ಷಾಂತರ ರೂ. ವ್ಯಯಿಸಿ ವೆಂಟಿಲೇಟರ್‌ಗಳನ್ನು ಖರೀದಿಸುತ್ತಿರುವ ಸರ್ಕಾರಗಳು ಇದೀಗ ಈ ವೆಂಟಿಲೇಟರ್‌ಗಳತ್ತ ಗಮನಹರಿಸಬಹುದು. ಅದಾಗ್ಯೂ ಇದು ಸಂಪೂರ್ಣ ಅಲ್ಲ ಎಂದು ಸ್ಪಷ್ಟಪಡಿಸಿರುವ ನಿಖಿಲ್ ಕುರೆಲೆ, ಕೇವಲ ಕೋವಿಡ್-19 ರೋಗಿಗಳು ಮಾತ್ರ ಬಳಸುವಂತೆ ಇದನ್ನು ತಯಾರಿಸಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಒಟ್ಟಿನಲ್ಲಿ ಕೊರೊನಾ ವೈರಸ್ ವಿರುದ್ಧದ ಹೋರಾಟಕ್ಕೆ ತಮ್ಮ ಪ್ರತಿಭೆಯನ್ನು ಧಾರೆ ಎರೆದಿರುವ ಈ ಯುವ ಇಂಜಿನಿಯರ್‌ಗಳ ಕಾರ್ಯಕ್ಕೆ ಎಲ್ಲೆಡೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ.
from India & World News in Kannada | VK Polls https://ift.tt/2R0zkk0
