ಹೊಸದಿಲ್ಲಿ: ಸೋಂಕು ದೇಶವ್ಯಾಪಿ ಹರಡುವಲ್ಲಿ ನಿಜಾಮುದ್ದೀನ್‌ ತಬ್ಲಿಘಿ ಜಮಾತ್‌ ಸಮಾವೇಶದ ಪಾತ್ರ ಇನ್ನಷ್ಟು ವಿಸ್ತಾರಗೊಂಡಿದೆ. ದೇಶದಲ್ಲಿ ಗುರುವಾರ ಪತ್ತೆಯಾದ 414 ಹೊಸ ಪ್ರಕರಣಗಳಲ್ಲಿ 400 ಈ ಸಮಾವೇಶದಲ್ಲಿ ಭಾಗಿಯಾದವರು ಮತ್ತು ಅವರ ಸಂಪರ್ಕಿತರಿಗೆ ಸಂಬಂಧಿಸಿದ್ದಾಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿವೆ. ಈ ನಡುವೆ, ಸಮಾವೇಶದಲ್ಲಿ ಭಾಗಿಯಾದವರ ಪತ್ತೆಗಾಗಿ ದೇಶಾದ್ಯಂತ ಹುಡುಕಾಟ ಮುಂದುವರಿದಿದೆ. ಕರ್ನಾಟಕದಿಂದ ಸಮಾವೇಶದಲ್ಲಿ ಭಾಗವಹಿಸಿದವರನ್ನು ಪತ್ತೆ ಹಚ್ಚುವ ಕೆಲಸ ತೀವ್ರಗತಿಯಲ್ಲಿದ್ದು, ಅವರ ಸಂಬಂಧಿಕರೂ ಸೇರಿದಂತೆ 1000 ಮಂದಿಯನ್ನು ತಪಾಸಣೆಗೆ ಒಳಪಡಿಸಲಾಗಿದೆ. ಏಪ್ರಿಲ್‌ 1ರವರೆಗಿನ ಕಾರ್ಯಾಚರಣೆಯಲ್ಲಿ ದಿಲ್ಲಿ ಒಂದರಲ್ಲಿಯೇ 1,804 ತಬ್ಲಿಘಿ ಸದಸ್ಯರನ್ನು ಗುರುತಿಸಲಾಗಿದೆ. ಈ ಪೈಕಿ 1,051 ಮಂದಿಯನ್ನು ಕ್ವಾರಂಟೈನ್‌ ಮಾಡಲಾಗಿದೆ. 23 ರಾಜ್ಯಗಳು ಮತ್ತು 4 ಕೇಂದ್ರಾಡಳಿತ ಪ್ರದೇಶಗಳ ಅಧಿಕಾರಿಗಳ ನೆರವಿನ ಮೂಲಕ ಸಾವಿರಾರು ಜನರನ್ನು ಕ್ವಾರಂಟೈನ್‌ ಮಾಡಲಾಗಿದೆ ಎಂದು ಕೇಂದ್ರ ಗೃಹ ಸಚಿವಾಲಯ ಮಾಹಿತಿ ನೀಡಿದೆ. ದಿಲ್ಲಿಯಲ್ಲಿ ಇಬ್ಬರು ಮೃತಪಟ್ಟಿರುವುದು ಸಹ ಸಮಾವೇಶದಲ್ಲಿ ಭಾಗಿಯಾಗಿದ್ದವರೇ ಆಗಿದೆ. ತಬ್ಲಿಘಿಯ ಸ್ಥಳೀಯ ಸದಸ್ಯರು ಹಾಗೂ ಅವರ ಜತೆ ಸಂಪರ್ಕ ಹೊಂದಿದ 7,688 ಮಂದಿಯನ್ನು ಗುರುತಿಸಲಾಗಿದೆ. ಇವರೆಲ್ಲರನ್ನು ಕ್ವಾರಂಟೈನ್‌ ಮಾಡಿ ಪರೀಕ್ಷೆಗೆ ಒಳಪಡಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಪ್ರಧಾನಿ ಕಾರ್ಯಾಲಯ ಮಾಹಿತಿ ನೀಡಿದೆ.
ಕೊರೊನಾ ಬೆಳವಣಿಗೆ
- ತಮಿಳುನಾಡಿನಲ್ಲಿ ಮತ್ತೆ 75 ಹೊಸ ಕೇಸ್‌. 74 ಮಂದಿಗೆ ದಿಲ್ಲಿ ಮಸೀದಿ ಲಿಂಕ್‌.
- ದಿಲ್ಲಿಯಲ್ಲಿ ಸತ್ತ ಇಬ್ಬರು ಸಮಾವೇಶದಲ್ಲಿ ಪಾಲ್ಗೊಂಡಿದ್ದವರು.
- ಮುಂಬಯಿ ಧಾರಾವಿಯಲ್ಲಿ ಮತ್ತೊಬ್ಬರಿಗೆ ಸೋಂಕು. ಹೆಚ್ಚಿದ ಆತಂಕ.
- ದಿಲ್ಲಿ ಸಿಆರ್‌ಪಿಎಫ್‌ ಆಸ್ಪತ್ರೆ ವೈದ್ಯರಿಗೆ ಸೋಂಕು.
- ಸ್ಪೇನ್‌ನಲ್ಲಿ 10 ಸಾವಿರ ಗಡಿ ದಾಟಿದ ಸಾವಿನ ಸಂಖ್ಯೆ
- 960 ವಿದೇಶಿಯರ ವೀಸಾ ರದ್ದು
ಪ್ರವಾಸಿ ವೀಸಾದಡಿ ಬಂದು, ತಬ್ಲಿಘಿ ಜಮಾತ್‌ನ ಧಾರ್ಮಿಕ ಸಮಾವೇಶದಲ್ಲಿ ಪಾಲ್ಗೊಂಡು ನಿಯಮ ಉಲ್ಲಂಘಿಸಿದ 960 ವಿದೇಶಿಯರ ವೀಸಾವನ್ನು ಕೇಂದ್ರ ಗೃಹ ಸಚಿವಾಲಯ ರದ್ದುಪಡಿಸಿ, ಅವರನ್ನು ಕಪ್ಪುಪಟ್ಟಿಗೆ ಸೇರಿಸಿದೆ. ಕೆಲವು ರಾಜ್ಯಗಳಿಗೆ ಚುದುರಿ ಹೋಗಿರುವ ಇವರ ವಿರುದ್ಧ ರಾಜ್ಯ ಸರಕಾರಗಳು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕೆಂದು ಸೂಚಿಸಿದೆ. ಇದೇ ವೇಳೆ ಲಾಕ್‌ಡೌನ್‌ ಆದೇಶ ಉಲ್ಲಂಘಿಸಿದವರ ವಿರುದ್ಧ ಕಠಿಣ ಕ್ರಮಕ್ಕೆ ಕೇಂದ್ರ ಸೂಚನೆ ನೀಡಿದೆ.
ಇಂದು ಪ್ರಧಾನಿ ವಿಡಿಯೊ ಸಂದೇಶಪ್ರಧಾನಿ ಮೋದಿ ಶುಕ್ರವಾರ ಬೆಳಗ್ಗೆ 9 ಗಂಟೆಗೆ ದೇಶವಾಸಿಗಳೊಂದಿಗೆ ವಿಡಿಯೊ ಸಂದೇಶ ಹಂಚಿಕೊಳ್ಳಲಿದ್ದು, ಕುತೂಹಲ ಹುಟ್ಟಿಸಿದೆ. ಕೊರೊನಾ ಮಣಿಸುವಲ್ಲಿ ಕೇಂದ್ರ ಸರಕಾರ ದಿಟ್ಟ ಹೆಜ್ಜೆ ಇಟ್ಟಿದ್ದು, ಗುರುವಾರ ರಾಜ್ಯ/ಕೇಂದ್ರಾಡಳಿತ ಪ್ರದೇಶಗಳ ಮುಖ್ಯಮಂತ್ರಿಗಳ ಜತೆ ವಿಡಿಯೊ ಕಾನ್ಫರೆನ್ಸ್‌ ಸಭೆ ನಡೆಸಿದ ಬಳಿಕ ಪ್ರಧಾನಿ ಅವರೇ ಟ್ವೀಟ್‌ ಮೂಲಕ ಈ ವಿಷಯ ಪ್ರಕಟಿಸಿದರು. ಈ ಮಧ್ಯೆ ಕೊರೊನಾ ಬಿಕ್ಕಟ್ಟಿನಿಂದ ಪಾರಾಗಲು ಭಾರತ ನಡೆಸುತ್ತಿರುವ ಪ್ರಯತ್ನಗಳಿಗೆ ವಿಶ್ವಸಂಸ್ಥೆ ಮೆಚ್ಚುಗೆ ವ್ಯಕ್ತಪಡಿಸಿದೆ.
ಸೂರತ್‌ನಲ್ಲೂ ಸಮಾವೇಶ ಗುಜರಾತಿನ ಸೂರತ್‌ನಲ್ಲೂ ಕಳೆದ ತಿಂಗಳು ಇಂತಹದ್ದೊಂದು ಸಮಾವೇಶ ನಡೆದಿತ್ತು. ಈ ಕಾರ‍್ಯಕ್ರಮದಲ್ಲಿ ರಾಜ್ಯದಿಂದ 20ಕ್ಕೂ ಹೆಚ್ಚು ಪಾಲ್ಗೊಂಡಿದ್ದರು ಹೇಳಲಾಗುತ್ತಿದೆ. ಇಲ್ಲಿಂದಲೂ ಹಲವರಿಗೆ ಸೋಂಕು ಹರಡಿರುವ ಸಾಧ್ಯತೆಗಳಿದ್ದು, ಪಾಲ್ಗೊಂಡಿದ್ದವರ ಪತ್ತೆ ಕಾರ್ಯ ಮುಂದುವರಿದಿದೆ.
ಲಾಕ್‌ಡೌನ್‌ ಬಳಿಕ ಬೀದಿಗಿಳಿಯಲು ಅವಸರ ಬೇಡಎಲ್ಲರಾಜ್ಯ/ಕೇಂದ್ರಾಡಳಿತ ಪ್ರದೇಶಗಳ ಮುಖ್ಯಮಂತ್ರಿಗಳ ಜತೆ ವಿಡಿಯೊ ಕಾನ್ಫರೆನ್ಸ್‌ ಮೂಲಕ ಸಭೆ ನಡೆಸಿದ ಪ್ರಧಾನಿ ಮೋದಿ, ಲಾಕ್‌ಡೌನ್‌ ಏ.14ಕ್ಕೆ ಅಂತ್ಯಗೊಳ್ಳಲಿದೆ. ಇಷ್ಟು ದಿನ ಮನೆಯಲ್ಲೇ ಇರುವ ಜನತೆ ಒಮ್ಮೆಲೆ ರಸ್ತೆಗೆ ಇಳಿಯುವ, ವಹಿವಾಟು ನಡೆಸುವ ಸಾಧ್ಯತೆ ಇರುತ್ತದೆ. ಇಂತಹ ಜನದಟ್ಟಣೆ ತಡೆಯಲು ಜನ ಸಂಚಾರ ಸ್ವರೂಪದ ಕುರಿತು ಒಮ್ಮತದ ಯೋಜನೆ ರೂಪಿಸಿ ಎಂದು ರಾಜ್ಯಗಳಿಗೆ ಸೂಚಿಸಿದರು. ಜನ ಜೀವನವನ್ನು ನಿಧಾನವಾಗಿ ಸಹಜ ಸ್ಥಿತಿಗೆ ತರಬೇಕಿದ್ದು, ಸೋಂಕು ಹರಡದಂತೆ ಎಚ್ಚರ ವಹಿಸುವ ಕಾರ್ಯತಂತ್ರಗಳನ್ನು ಈಗಲೇ ರೂಪಿಸುವಂತೆ ಸಲಹೆ ನೀಡಿದರು. ಕೆಲವು ವಾರವೂ ಕೊರೊನಾ ಪರೀಕ್ಷೆ, ಸೋಂಕಿತರ ಸಂಪರ್ಕಗಳ ಟ್ರೇಸಿಂಗ್‌, ಐಸೊಲೇಷನ್‌ ಹಾಗೂ ಕ್ವಾರಂಟೈನ್‌ ಬಗ್ಗೆ ಹೆಚ್ಚಿನ ಗಮನ ಹರಿಸುವ ಅಗತ್ಯವಿದೆ ಎಂದರು.
ಉಲ್ಟಾ ಹೊಡೆದ ಮೌಲಾನ ಸಾದ್‌ಸಮಾವೇಶ ಸಂಘಟಿಸುವ ಮುನ್ನ, ''ಮುಸ್ಲಿಮರು ಸಾಯುವುದೇ ಆದರೆ ಮಸೀದಿಯೇ ಅತ್ಯುತ್ತಮ ಸ್ಥಳ. ಆದರೆ ನನ್ನ ಪಂಥದ ಅನುಯಾಯಿಗಳಿಗೆ ಕೊರೊನಾ ಸೋಂಕು ಬಾಧಿಸುವುದಿಲ್ಲ,'' ಎಂದಿದ್ದ ಮೌಲಾನ ಸಾದ್‌ ಕಂಧಲ್ವಿ ಈಗ, ''ನಾನು ಸ್ವಯಂ ಕ್ವಾರಂಟೈನ್‌ ಆಗಿದ್ದೇನೆ. ನೀವೆಲ್ಲರೂ ಸರಕಾರದ ಆದೇಶ ಪಾಲಿಸಿ. ನಿಮ್ಮ ನಿಮ್ಮ ಮನೆಯಲ್ಲಿ ದಿಗ್ಬಂಧನಕ್ಕೆ ಒಳಗಾಗಿ,'' ಎಂದಿದ್ದಾನೆ.
ಬೀದರ್‌ ಸೋಂಕುಪೀಡಿತತಬ್ಲಿಘಿ ಸಮಾವೇಶದ ದೊಡ್ಡ ಹೊಡೆತ ರಾಜ್ಯದ ಬೀದರ್‌ನ ಮೇಲೆ ಬಿದ್ದಿದ್ದು, ಗುರುವಾರ 11 ಪ್ರಕರಣಗಳು ಪತ್ತೆಯಾಗಿವೆ. ದಿನದಲ್ಲಿಪತ್ತೆಯಾದ 14 ಪ್ರಕರಣಗಳಲ್ಲಿ ಬೀದರ್‌ನದೇ ಸಿಂಹಪಾಲು. ರಾಜ್ಯದ 1,000 ಮಂದಿಯನ್ನು ಸಂಪರ್ಕಿಸಿ ವೈದ್ಯಕೀಯ ತಪಾಸಣೆಗೆ ಒಳಪಡಿಸಲಾಗಿದೆ. 200 ಮಂದಿಯ ಮಾದರಿಗಳಲ್ಲಿ 100 ಮಂದಿಯ ವರದಿ ಬಂದಿದ್ದು, 11 ಮಂದಿಗೆ ಸೋಂಕು ತಗುಲಿದೆ. ಇದೀಗ ಬೀದರ್‌ನ ಹಳೆ ನಗರದ 3 ಕಿ.ಮೀ. ವ್ಯಾಪ್ತಿಯನ್ನು ಸೋಂಕು ಪೀಡಿತ ಎಂದು ಘೋಷಿಸಲಾಗಿದೆ. ಇಲ್ಲಿಕಠಿಣ ನಿರ್ಬಂಧ ವಿಧಿಸಲಾಗಿದೆ.
