ಹೊಸದಿಲ್ಲಿ: ಕೊರೊನಾ ವೈರಸ್ ಹಿನ್ನೆಲೆಯಲ್ಲಿ ದೇಶದಲ್ಲಿ ಏಪ್ರಿಲ್ 14ರ ವರೆಗೆ 21 ದಿನಗಳ ಲಾಕ್ಡೌನ್ ಘೋಷಿಸಲಾಗಿದೆ. ಇದರಿಂದಾಗಿ ಎಲ್ಲ ಕ್ರೀಡಾ ಚಟುವಟಿಕೆಗಳು ರದ್ದುಗೊಂಡಿದೆ. ಜನರಲ್ಲಿ ಸಾಮಾಜಿಕ ಅಂತರದ ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಮನೆಯಲ್ಲೇ ಉಳಿಯುವಂತೆ ಸೂಚಿಸಲಾಗಿದೆ. ಅತ್ತ ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಭರ್ಜರಿ ಕಮ್ಬ್ಯಾಕ್ಗೆ ಮತ್ತಷ್ಟು ವಿಳಂಬವಾಗಿದೆ. ಈ ನಡುವೆ ಧೋನಿ ಮೇಕಪ್ ಕಲಾವಿದ ಸ್ವಪ್ನ ಭಾವ್ನನಿ ಹಳೆಯ ವಿಡಿಯೋವೊಂದನ್ನು ಹಂಚಿದ್ದಾರೆ. ಅಲ್ಲದೆ ನನ್ನ ಕೆಲಸ ನಷ್ಟವಾಗಲಿದೆ ಎಂದಿದ್ದಾರೆ. ಧೋನಿಗೆ ಮಗಳು ಮೇಕಪ್ ಮಾಡುವ ಕ್ಯೂಟ್ ವಿಡಿಯೋವನ್ನು ಹಂಚಿದ್ದಾರೆ. ಪ್ರಸ್ತುತ ವಿಡಿಯೋ ವೈರಲ್ ಆಗಿ ಹರಡುತ್ತಿದೆ. ಅಪ್ಪನಿಗೆ ಮಗಳೇ ಕ್ಯೂಟ್ ಬ್ಯೂಟಿಷಿಯನ್ ಎಂದು ಉಲ್ಲೇಖಿಸಲಾಗಿದೆ. ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಟೂರ್ನಿಯಲ್ಲಿ ಭಾಗವಹಿಸುವ ನಿಟ್ಟಿನಿಲ್ಲಿ ಧೋನಿ, ಮಾರ್ಚ್ ಮೊದಲ ವಾರದಿಂದಲೇ ಅಭ್ಯಾಸವನ್ನು ಆರಂಭಿಸಿದ್ದರು. ಇವರಿಗೆ ಸಿಎಸ್ಕೆ ಹಿರಿಯ ಆಟಗಾರರಾದ ಸುರೇಶ್ ರೈನಾ, ಅಂಬಟಿ ರಾಯುಡು ಹಾಗೂ ಮುರಳಿ ವಿಜಯ್ ಮುಂತಾದವರು ಸಾಥ್ ನೀಡಿದರು. ಈ ನಡುವೆ ಕೊರೊನಾ ವೈರಸ್ ಏಕಾಏಕಿ ಹರಡಿತ್ತು. ಪರಿಣಾಮ ಐಪಿಎಲ್ ಟೂರ್ನಿಯನ್ನು ಏಪ್ರಿಲ್ 15ರ ವರೆಗೆ ಅಮಾನತಿನಲ್ಲಿಡಲಾಗಿದೆ. ಪ್ರಸ್ತುತ ಈ ಬಾರಿ ಟೂರ್ನಿ ಆಯೋಜನೆಯಾಗುವುದು ಅನುಮಾನವೆನಿಸಿದೆ. ಕೋವಿಡ್ 19 ವೈರಸ್ ಹಿನ್ನೆಲೆಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಅಭ್ಯಾಸ ಅವಧಿಯನ್ನು ರದ್ದುಗೊಳಿಸಲಾಗಿತ್ತು. ಪರಿಣಾಮ ಚೆನ್ನೈ ನಗರದಿಂದ ಹಿಂತಿರುಗಿದ ಧೋನಿ ತವರೂರು ರಾಂಚಿಗೆ ಮರಳಿದ್ದರು. 2019ನೇ ಏಕದಿನ ವಿಶ್ವಕಪ್ನಲ್ಲಿ ಧೋನಿ ಕೊನೆಯದಾಗಿ ಆಡಿದ್ದರು. ಅಲ್ಲಿಂದ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ದೂರವುಳಿದಿರುವ ಧೋನಿ ಮಗದೊಂದು ಬಾರಿ ನೀಲಿ ಜೆರ್ಸಿ ಧರಿಸುವುದು ಬಹಳಷ್ಟು ಕುತೂಹಲಕ್ಕೆ ಕಾರಣವಾಗಿದೆ. ಕೋವಿಡ್ 19 ವೈರಸ್ ಜಾಗತಿಕ ಮಟ್ಟದಲ್ಲೂ ವ್ಯಾಪಕವಾಗಿ ಹರಡಿದ್ದರಿಂದ ಆಸ್ಟ್ರೇಲಿಯಾದಲ್ಲಿ ನಡೆಯಲಿರುವ 2020 ವಿಶ್ವಕಪ್ ಕೂಡಾ ನಡೆಯುವುದು ಅನುಮಾನವೆಸಿದೆ. ಇವೆಲ್ಲದರಿಂದಾಗಿ ಧೋನಿ ಭವಿಷ್ಯ ಡೋಲಾಯಮಾನವೆನಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2yz5psV
