ಪಾಟ್ನಾ: ಮಾರಕ ಕೊರೊನಾ ವೈರಸ್ ಕುರಿತು ಜನರಲ್ಲಿ ಆತಂಕ, ಅನುಮಾನಗಳು ಇರುವುದು ಸಹಜ. ದೇಶದಲ್ಲಿ ವೇಗವಾಗಿ ಪಸರಿಸುತ್ತಿರುವ ಈ ವೈರಾಣು ಏನೆಲ್ಲಾ ಅನಾಹುತ ತಂದೊಡ್ಡಬಹುದು ಎಂಬ ಕುರಿತು ಸಹಜವಾಗಿಯೇ ಜನ ಆತಂಕಿತರಾಗಿದ್ದಾರೆ. ದೇಶದಲ್ಲಿ ದಿನದಿಂದ ದಿನಕ್ಕೆ ಏರುತ್ತಿರುವ ಕೊರೊನಾ ವೈರಸ್ ಸೋಂಕು ಪ್ರಕರಣಗಳು ಹಾಗೂ ಸಾವಿನ ಸಂಖ್ಯೆಯಲ್ಲಿನ ಏರಿಕೆ ಸಹಜವಾಗಿ ಜನರ ಮನಸ್ಸಲ್ಲಿ ಭಯ ಹುಟ್ಟಿಸಿದೆ. ಅಲ್ಲದೇ ತಮಗೂ ಸೋಂಕು ತಗುಲಿದರೆ ಏನು ಎಂಬ ಭಯ ಬಹುತೇಕರನ್ನು ಕಾಡುತ್ತಿದೆ. ಅಲ್ಲದೇ ಈಗಾಗಲೇ ಕೊರೊನಾ ಸೋಂಕಿತ ವ್ಯಕ್ತಿಗಳು ಮುಂದೇನಾಗುವುದೋ ಎಂಬ ಭಯದಲ್ಲೇ ಕ್ವಾರಂಟೈನ್ ಶಿಬಿರಗಳಲ್ಲಿ ಕಾಲ ಕಳೆಯುತ್ತಿದ್ದಾರೆ. ಆದರೆ ಈ ಎಲ್ಲಾ ಭಯ, ಆತಂಕ ಹಾಗೂ ಅನುಮಾನಗಳಿಗೆ ಕೊರೊನಾ ವೈರಸ್‌ನ್ನು ಯಶಸ್ವಿಯಾಗಿ ಗೆದ್ದ ಬಿಹಾರ ರಾಜಧಾನಿ ಪಾಟ್ನಾದ ಯುವಕ ರಾಹುಲ್ ಉತ್ತರ ನೀಡಿದ್ದಾರೆ. ಹೌದು, ಪಾಟ್ನಾದ ರಾಹುಲ್ ಎಂಬ ಯುವಕನಿಗೆ ಮಾರಕ ಕೊರೊನಾ ವೈರಸ್ ತಗುಲಿತ್ತು. ಆದರೆ ಇದರಿಂದ ಗಾಬರಿಗೊಳ್ಳದ ರಾಹುಲ್, ಸೂಕ್ತ ಸಮಯಕ್ಕೆ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆದು ಕೊರೊನಾ ವರಸ್‌ನ್ನು ತನ್ನ ದೇಹದಿಂದ ಹೊರ ಹಾಕುವಲ್ಲಿ ಯಶಸ್ವಿಯಾಗಿದ್ದಾರೆ.. ಈ ಕುರಿತು ನಿಮ್ಮ ವಿಜಯ ಕರ್ನಾಟಕದ ಸಹೋದರ ಸಂಸ್ಥೆ 'ನವಭಾರತ್ ಟೈಮ್ಸ್‌'ನೊಂದಿಗೆ ಮಾತನಾಡಿರುವ ರಾಹುಲ್, ಕ್ವಾರಂಟೈನ್ ಸಮಯದಲ್ಲಿ ವೈದ್ಯರ ಸಲಹೆಗಳನ್ನು ಚಾಚೂ ತಪ್ಪದೇ ಪಾಲಿಸುತ್ತಿದ್ದ ಪರಿಣಾಮವಾಗಿಯೇ ಕೊರೊನಾ ವಿರುದ್ಧ ಜಯಗಳಿಸಲು ಸಾಧ್ಯವಾಯಿತು ಎಂದು ಹೇಳುತ್ತಾರೆ. ಸ್ಕಾಟ್‌ಲ್ಯಾಂಡ್‌ನಲ್ಲಿ ಕಂಪ್ಯೂಟರ್ ಇಂಜಿನಿಯರಿಂಗ್ ಓದುತ್ತಿರುವ ರಾಹುಲ್, ಕಳೆದ ಮಾ.20ರಂದು ತವರಿಗೆ ಮರಳುತ್ತಿದ್ದಂತೇ ಅನಾರೋಗ್ಯಕ್ಕೆ ತುತ್ತಾಗಿದ್ದರು. ಕೂಡಲೇ ಅವರನ್ನು ಪಾಟ್ನಾದ ಏಮ್ಸ್ ಆಸ್ಪತ್ರೆಗೆ ಸೇರಿಸಲಾಯಿತು. ಬಳಿಕ ಮಾ.22ರಂದು ಎನ್‌ಎಮ್‌ಸಿಹೆಚ್‌ ಆಸ್ಪತ್ರೆಗೆ ದಾಖಲಿಸಿ ಕ್ವಾರಂಟೈನ್‌ನಲ್ಲಿ ಇರಿಸಿ ರಾಹುಲ್ ಅವರಿಗೆ ಚಿಕಿತ್ಸೆ ನೀಡಲಾಯಿತು. ಕೇವಲ 10 ದಿನದಲ್ಲಿ ರಾಹುಲ್ ಸಂಪೂರ್ಣವಾಗಿ ಚೇತರಿಸಿಕೊಂಡಿದ್ದು, ಈ ಕುರಿತು ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಕೊರೊನಾ ಕುರಿತು ಭಯಪಡುವ ಅಗತ್ಯವಿಲ್ಲ ಎಂದು ಅಭಿಪ್ರಾಯಪಟ್ಟಿರುವ ರಾಹುಲ್, ಕೊರೊನಾ ವಿರುದ್ಧ ಹೋರಾಡಲು ಸ್ಯಾನಿಟೈಸೇಶನ್ ಪ್ರಾಥಮಿಕ ಅಸ್ತ್ರ ಎಂದು ಹೇಳಿದ್ದಾರೆ. ಲಾಕ್‌ಡೌನ್ ಸಮಯದಲ್ಲಿ ಸರ್ಕಾರದ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು ಅತ್ಯಂತ ಅವಶ್ಯ ಎಂದು ರಾಹುಲ್ ಸಲಹೆ ನೀಡಿದ್ದಾರೆ. ಸೋಶಿಯಲ್ ಡಿಸ್ಟನ್ಸಿಂಗ್(ಸಾಮಾಜಿಕ ಅಂತರ) ಅತ್ಯಂತ ಅವಶ್ಯಕ ಎಂದಿರುವ ರಾಹುಲ್, ಯಾವುದೇ ಕಾರಣಕ್ಕೂ ಭಯಪಡದೇ ಸೂಕ್ತ ಮಾರ್ಗಸೂಚಿಗಳನ್ನು ಅನುಸರಿಸುತ್ತಾ ಕೊರೊನಾ ವಿರುದ್ಧದ ಹೋರಾಟದಲ್ಲಿ ನಾವೆಲ್ಲಾ ಒಗ್ಗಟ್ಟಾಗಿ ಜಯ ಸಾಧಿಸಬಹುದು ಎಂದು ಕರೆ ಕೊಟ್ಟಿದ್ದಾರೆ.
from India & World News in Kannada | VK Polls https://ift.tt/39EVX3Y
