- ಕೆಂಪೇಗೌಡ ಎನ್‌., ವೆಂಕಟೇನಹಳ್ಳಿ ಚಿಕ್ಕಬಳ್ಳಾಪುರ: ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಬಿಪಿಎಲ್‌, ಅಂತ್ಯೋದಯ ಮತ್ತು ಎಪಿಎಲ್‌ ಕಾರ್ಡ್‌ ಫಲಾನುಭವಿಗಳಿಗೆ ಎರಡು ತಿಂಗಳ ಪಡಿತರ ಏಕಕಾಲಕ್ಕೆ ವಿತರಿಸುವುದಾಗಿ ರಾಜ್ಯ ಸರಕಾರ ಈಗಾಗಲೇ ಪ್ರಕಟಿಸಿದ್ದು, ಜಿಲ್ಲೆಯ ಫಲಾನುಭವಿಗಳಿಗೆ ಇಂದಿನಿಂದ ಪಡಿತರ ವಿತರಿಸಲು ಜಿಲ್ಲಾ ಆಹಾರ, ನಾಗರಿಕ ಸರಬರಾಜು ಇಲಾಖೆ ಸಿದ್ಧತೆ ಕೈಗೊಂಡಿದೆ. ಯಾರಿಗೆ ಎಷ್ಟೇಷ್ಟು?: ಬಿಪಿಎಲ್‌ ಕಾರ್ಡ್‌ದಾರರಿಗೆ ಪ್ರತಿಯೊಬ್ಬ ಸದಸ್ಯನಿಗೆ ತಲಾ 10 ಕೆಜಿ ಅಕ್ಕಿ (ರಾಜ್ಯ ಮತ್ತು ಕೇಂದ್ರದ 5 ಕೆಜಿ), ಪ್ರತಿ ಕಾರ್ಡ್‌ಗೆ 4 ಕೆಜಿಯಂತೆ (ತಿಂಗಳಿಗೆ 2 ಕೆಜಿ) ಗೋಧಿ ಕೂಡಾ ವಿತರಿಸಲಿದೆ. ಪ್ರತಿಯೊಂದು ಅಂತ್ಯೋದಯ ಕಾರ್ಡ್‌ಗಳಿಗೆ ಒಟ್ಟು 70 ಕೆಜಿ ಅಕ್ಕಿ (ರಾಜ್ಯ ಮತ್ತು ಕೇಂದ್ರದ ತಲಾ 35 ಕೆಜಿ) ಹಂಚಿಕೆ ಆಗಲಿದ್ದು, ಈ ಕಾರ್ಡ್‌ಗೆ ಗೋಧಿ ಬದಲಿಗೆ ಫಲಾನುಭವಿ ಆನ್‌ಲೈನ್‌ ಮೂಲಕ ಸೀಮೆ ಎಣ್ಣೆ ಪಡೆಯಲು ಕೋರಿಕೆ ಮೇರೆಗೆ ಇಲಾಖೆಗೆ ಮಾಹಿತಿ ಸಲ್ಲಿಸಿದ್ದರೆ 2 ಲೀಟರ್‌ ಸೀಮೆಎಣ್ಣೆ (ತಿಂಗಳಿಗೆ 1 ಲೀ.) ದೊರೆಯಲಿದೆ. ಎಪಿಎಲ್‌ ಕಾರ್ಡ್‌ಗೂ ಅಕ್ಕಿ: ಎಪಿಎಲ್‌ ಕಾರ್ಡ್‌ಗಳಿಗೆ (ತಿಂಗಳಿಗೆ) ಒಬ್ಬರು ಸದಸ್ಯರು ಇದ್ದರೆ 5 ಕೆಜಿ, ಒಬ್ಬರಿಗಿಂತ ಜಾಸ್ತಿ ಇದ್ದರೆ ಒಂದು ಕಾರ್ಡ್‌ಗೆ 10 ಕೆಜಿ ನೀಡಲಾಗುವುದು. ಪ್ರತಿ ಕೆಜಿಗೆ 15 ರೂ., ಕೊಟ್ಟು ಖರೀದಿಸಬೇಕು. ಅವರೂ ಎರಡು ತಿಂಗಳ ಪಡಿತರ ಒಟ್ಟಿಗೆ ಪಡೆದುಕೊಳ್ಳಬಹುದು ಆಹಾರ ಇಲಾಖೆ ಮಾಹಿತಿ ನೀಡಿದೆ. ಕಾರ್ಡ್‌ಗಳ ಸಂಖ್ಯೆ ಎಷ್ಟಿದೆ: ಜಿಲ್ಲೆಯಲ್ಲಿ ಒಟ್ಟು 28,590 ಅಂತ್ಯೋದಯ ಕಾರ್ಡ್‌ಗಳಿದ್ದು, 2,81,162 ಬಿಪಿಎಲ್‌ ಕಾರ್ಡ್‌ ಹಾಗೂ 11,410 ಎಪಿಎಲ್‌ ಕಾರ್ಡ್‌ದಾರರಿದ್ದಾರೆ. ಈ ಎಲ್ಲ ಫಲಾನುಭವಿಗಳಿಗೆ ಇಂದಿನಿಂದಲೇ ಏಪ್ರಿಲ್‌ ಮತ್ತು ಮೇ ತಿಂಗಳ ಪಡಿತರ ಒಟ್ಟಿಗೆ ಸಿಗಲಿದೆ ಎಂದು ಆಹಾರ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಕೊರೊನಾ ಜಾಗೃತಿ: ಜಿಲ್ಲೆಯಲ್ಲಿ ಕೊರೊನಾ ವೈರಸ್‌ ಸೋಂಕು ಹರಡುವಿಕೆ ತಡೆಗಟ್ಟುವ ನಿಟ್ಟಿನಲ್ಲಿ ಮುಂಜಾಗ್ರತಾ ಕ್ರಮಗಳ ಅನುಸರಿಸುವ ಬಗ್ಗೆ ಜಿಲ್ಲೆಯ ಎಲ್ಲ ನ್ಯಾಯಬೆಲೆ ಅಂಗಡಿಗಳ ಎದುರು ಕರಪತ್ರ ಅಂಟಿಸಿ, ಸಾರ್ವಜನಿಕರಿಗೆ ಜಾಗೃತಿ ಮೂಡಿಸಲಾಗುತ್ತಿದೆ. ಇಲ್ಲಿಯೂ ಸಾಮಾಜಿಕ ಅಂತರ: ಜಿಲ್ಲೆಯ ಎಲ್ಲನ್ಯಾಯಬೆಲೆ ಅಂಗಡಿಗಳಲ್ಲಿ ಪಡಿತರ ಪಡೆಯಲು ಫಲಾನುಭವಿಗಳು ಗುಂಪು ಗುಂಪಾಗಿ ಅಥವಾ ಸರತಿ ಸಾಲಿನಲ್ಲಿ ನಿಲ್ಲುವಂತಿಲ್ಲ. ಇಲ್ಲೂ ಕೂಡ ಫಲಾನುಭವಿಗಳು ಸಾಮಾಜಿಕ ಅಂತರ ಕಾಯ್ದುಕೊಂಡು ಪಡಿತರ ಪಡೆಯಬೇಕು ಎಂದು ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಬಯೋಮೆಟ್ರಿಕ್‌ ಕಡ್ಡಾಯವಿಲ್ಲ!ಪ್ರಸ್ತುತ ಜಿಲ್ಲೆಯಲ್ಲಿ 539 ನ್ಯಾಯಬೆಲೆ ಅಂಗಡಿಗಳಿದ್ದು, ಈ ಹಿಂದೆ ಆನ್‌ಲೈನ್‌ ಮೂಲಕ ಫಲಾನುಭವಿಯ ಬೆರಳಚ್ಚು ಪಡೆದು ಪಡಿತರ ವಿತರಿಸಲಾಗುತ್ತಿತ್ತು. ಆದರೆ, ಇದೀಗ ಕೊರೊನಾ ಸೋಂಕು ಹರಡುವುದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಬಯೋಮೆಟ್ರಿಕ್‌ ವ್ಯವಸ್ಥೆಯನ್ನು ತಾತ್ಕಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಮೊದಲ ಹಂತದಲ್ಲಿ ಬಯೋಮೆಟ್ರಿಕ್‌ ಬದಲು ಮೊಬೈಲ್‌ ಸಂಖ್ಯೆಗೆ ಬರುವ ಓಟಿಪಿ ಪಡೆದು ಆಹಾರ ಧಾನ್ಯ ವಿತರಿಸಲಾಗುತ್ತಿದೆ. ಆಧಾರ್‌ ಕಾರ್ಡ್‌ಗೆ ಲಿಂಕ್‌ ಆಗಿರುವ ಫಲಾನುಭವಿಗಳ ಮೊಬೈಲ್‌ ನಂಬರ್‌ಗೆ ಓಟಿಪಿ ಸಂಖ್ಯೆ ಬರುತ್ತದೆ. ಅದನ್ನು ನ್ಯಾಯಬೆಲೆ ಅಂಗಡಿಗಳಲ್ಲಿ ನೀಡಿ ಪಡಿತರ ಪಡೆಯಬಹುದು. ಇದಲ್ಲದೇ ಎರಡನೇ ಹಂತದಲ್ಲಿ ಫಲಾನುಭವಿ ಆಹಾರ ಇಲಾಖೆಯ ಮೊಬೈಲ್‌ ಆ್ಯಪ್‌ ಬಳಸಿ ಪಡಿತರ ಪಡೆದುಕೊಳ್ಳಬಹುದು. ಕೊನೆಯ ಮೂರನೇ ಹಂತದಲ್ಲಿಅಗತ್ಯವಿದ್ದರೆ ಮಾತ್ರ ಬಯೋಮೆಟ್ರಿಕ್‌ ಬಳಕೆ ಮಾಡಲಾಗುತ್ತದೆ. ಇಲ್ಲಿ ಪಡಿತರ ಪಡೆಯಲು ಬರುವ ಕುಟುಂಬದ ಫಲಾನುಭವಿ ಸದಸ್ಯ ಕೈಗಳನ್ನು ಚೆನ್ನಾಗಿ ಸಾಬೂನು, ಸ್ಯಾನಿಟೈಸರ್‌ನಿಂದ ತೊಳೆದು ಆನ್‌ಲೈನ್‌ ಮೂಲಕ ಬೆರಳಚ್ಚು ಪಡೆದು ವಿತರಿಸಲಾಗುತ್ತದೆ. ಜಿಲ್ಲೆಯಲ್ಲಿ ಕೊರೊನಾ ಸೋಂಕು ಹರಡುವಿಕೆ ತಡೆಗಟ್ಟುವ ನಿಟ್ಟಿನಲ್ಲಿ ಇಲಾಖೆಯಿಂದ ಹಲವು ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡಿದೆ. ಪ್ರತಿಯೊಬ್ಬ ಫಲಾನುಭವಿಗೂ ಪಡಿತರ ಸಿಗಲಿದೆ. ವಿತರಣೆ ಸಂದರ್ಭದಲ್ಲಿ ನ್ಯಾಯಬೆಲೆ ಅಂಗಡಿಗಳ ಎದುರು ಸಾಮಾಜಿಕ ಅಂತರ ಕಾಯ್ದುಕೊಳ್ಳಬೇಕು. - ಸೋಮಶೇಖರಪ್ಪ, ಉಪನಿರ್ದೇಶಕ, ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ, ಚಿಕ್ಕಬಳ್ಳಾಪುರ
from India & World News in Kannada | VK Polls https://ift.tt/2UBtojz
