ಮುಂಬಯಿ: ಕ್ರಿಕೆಟ್ ವೃತ್ತಿ ಜೀವನದ ಮೊದಲ ಆಯ್ಕೆ ಪ್ರಕ್ರಿಯೆಯಲ್ಲೇ ತಾವು ತಿರಸ್ಕೃತಗೊಂಡಿದ್ದಾಗಿ ಹಲವು ದಾಖಲೆಗಳ ಸರದಾರ ಮಾಜಿ ಕ್ರಿಕೆಟ್ ಐಕಾನ್ ಸಚಿನ್ ತೆಂಡೂಲ್ಕರ್ ಶುಕ್ರವಾರ ಹೇಳಿದ್ದಾರೆ. ''ಶಾಲಾ ದಿನಗಳಲ್ಲೇ ನನಗೆ ಭಾರತ ತಂಡದ ಪರ ಆಡುವ ಕನಸಿತ್ತು. 11ನೇ ವರ್ಷದಲ್ಲೇ ನನ್ನ ಕ್ರಿಕೆಟ್ ಪ್ರಯಾಣ ಆರಂಭವಾಗಿತ್ತು. ಮೊದಲ ಬಾರಿ ಆಯ್ಕೆ ಪರೀಕ್ಷೆಗೆ ಹೋಗಿದ್ದಾಗ ಆಯ್ಕೆಗಾರರು ನನ್ನನ್ನು ತಿರಸ್ಕರಿದ್ದರು. ಇನ್ನಷ್ಟು ಶ್ರಮ ಹಾಕುವಂತೆ ಹೇಳಿ ವಾಪಸ್ ಕಳಿಸಿದ್ದರು,'' ಎಂದು ಮಹಾರಾಷ್ಟ್ರದ ಶಾಲೆಯೊಂದರಲ್ಲಿ ವಿದ್ಯಾರ್ಥಿಗಳ ಜತೆಗಿನ ಸಂವಾದದ ವೇಳೆ ಸಚಿನ್ ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳನ್ನು ಸ್ಮರಿಸಿದರು. ಸಚಿನ್ ತೆಂಡೂಲ್ಕರ್ ಎರಡು ದಶಕಗಳ ಸುದೀರ್ಘ ಕ್ರಿಕೆಟ್ ವೃತ್ತಿಜೀವನದಲ್ಲಿ ಟೆಸ್ಟ್ (15,921) ಹಾಗೂ ಏಕದಿನ ಮಾದರಿ(18,426)ಗಳಲ್ಲಿಅತ್ಯಧಿಕ ರನ್ ಪೇರಿಸಿದ ದಾಖಲೆ ಸೇರಿದಂತೆ ಹಲವು ಚಾರಿತ್ರಿಕ ದಾಖಲೆಗಳನ್ನು ನಿರ್ಮಿಸಿದ್ದಾರೆ. ನಾನು ವಿದ್ಯಾರ್ಥಿಯಾಗಿದ್ದಾಗ ಭಾರತಕ್ಕಾಗಿ ಆಡುವ ಕನಸನ್ನು ಹೊತ್ತುಕೊಂಡಿದ್ದೆ. 11ನೇ ವಯಸ್ಸಿನಲ್ಲಿ ಕ್ರಿಕೆಟ್ ಪ್ರಯಾಣ ಆರಂಭವಾಯಿತು. ನನಗೀಗಲೂ ನೆನಪಿದೆ, ಮೊದಲ ಬಾರಿಗೆ ಆಯ್ಕೆಗೆ ಹೋದಾಗ ನನ್ನನ್ನು ಆಯ್ಕೆದಾರರು ತಿರಸ್ಕರಿಸಿದ್ದರು ಎಂದು ಹಳೆಯ ನೆನಪುಗಳನ್ನು ನೆನಪಿಸಿಕೊಂಡರು. ಆ ಸಂದರ್ಭದಲ್ಲಿ ನಾನು ಸಾಕಷ್ಟು ನಿರಾಸೆಗೊಂಡಿದ್ದೆ. ಏಕಂದರೆ ನಾನು ಉತ್ತಮವಾಗಿ ಬ್ಯಾಟಿಂಗ್ ಮಾಡಿದ್ದೆ ಎಂದು ಭಾವಿಸುತ್ತೇನೆ. ಆದರೆ ಫಲಿತಾಂಶವು ನಾನು ನಿರೀಕ್ಷೆಗೆ ತಕ್ಕಂತೆ ಇರಲಿಲ್ಲ. ಮೊದಲ ಬಾರಿಗೆ ನಾನು ಆಯ್ಕೆಯಾಗಿಲ್ಲ. ಆದರೆ ಅಲ್ಲಿಂದ ಬಳಿಕ ನನ್ನ ಗಮನ, ಬದ್ಧತೆ ಮತ್ತು ಕಠಿಣ ಪರಿಶ್ರಮ ಮಾಡುವ ಸಾಮರ್ಥ್ಯ ಮತ್ತಷ್ಟು ಹೆಚ್ಚಾಯಿತು. ನಿಮ್ಮ ಕನಸುಗಳನ್ನು ಸಾಕಾರಗೊಳ್ಳಲು ಬಯಸುವುದಾದರೆ, ಅಡ್ಡ-ದಾರಿಗಳು ಎಂದಿಗೂ ಸಹಾಯ ಮಾಡುವುದಿಲ್ಲ ಎಂದು ಸಚಿನ್ ಉಲ್ಲೇಖಿಸಿದರು. ಕ್ರಿಕೆಟ್ನಲ್ಲಿ ನನ್ನ ಯಶಸ್ಸಿಗೆ ಕುಟುಂಬದ ಎಲ್ಲ ಸದಸ್ಯರಿಗೆ ಋಣಿಯಾಗಿದ್ದೇನೆ. ನನ್ನ ಹೆತ್ತವರು, ನನ್ನ ಸೋದರ ಅಜಿತ್, ಹಿರಿಯ ಸೋದರ ನಿತಿನ್ ನನಗೆ ಬೆಂಬಲ ನೀಡಿದರು. ನನ್ನ ಹಿರಿಯಕ್ಕ ಸಹ (ಮದುವೆಯ ನಂತರ ಪುಣೆಯಲ್ಲಿ ನೆಲೆಸಿರುವ) ಬೆಂಬಲಿಸಿದರು. ವಾಸ್ತವವಾಗಿ, ಅಕ್ಕ ನನ್ನ ಜೀವನದಲ್ಲಿ ಮೊದಲ ಬಾರಿಗೆ ಕ್ರಿಕೆಟ್ ಬ್ಯಾಟ್ ಉಡುಗೊರೆಯಾಗಿ ನೀಡಿದ್ದರು ಎಂದು ತಿಳಿಸಿದರು. ಮದುವೆಯ ನಂತರ ಪತ್ನಿ ಅಂಜಲಿ, ಮಕ್ಕಳಾದ ಸಾರಾ, ಅರ್ಜುನ್, ಅಂಜಲಿಯ ಪೋಷಕರು ಬೆಂಬಲಿಸಿದರು. ನನ್ನ ಚಿಕ್ಕಪ್ಪ ಸೇರಿದಂತೆ ಅನೇಕ ಜನರ ಬೆಂಬಲವಿತ್ತು. ಖಂಡಿತವಾಗಿಯೂ, ಲಾಸ್ಟ್ ಬಟ್ ನಾಟ್ ಲಿಸ್ಟ್ ಎಂಬಂತೆ ರಾಮಕಾಂತ್ ಅಚ್ರೇಕರ್ (ಸಚಿನ್ ಬಾಲ್ಯದ ಕೋಚ್) ಅದರಲ್ಲಿದ್ದಾರೆ ಎಂದು ಸೇರಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2JozPkh
