ಕೋಲ್ಕೊತಾ: ಚೊಚ್ಚಲ ಡೇ-ನೈಟ್ ಟೆಸ್ಟ್ ಪಂದ್ಯಕ್ಕೆ ಆತಿಥ್ಯ ವಹಿಸಲು ಭಾರತ ಸಜ್ಜಾಗಿದೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವೆ ಕೋಲ್ಕೊತಾದಲ್ಲಿ ನಡೆಯಲಿರುವ ಎರಡನೇ ಟೆಸ್ಟ್ ಪಂದ್ಯ ಹೊನಲು ಬೆಳಕಿನಲ್ಲಿ ಆಯೋಜನೆಯಾಗಲಿದೆ. ಇದನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ () ನೂತನ ಅಧ್ಯಕ್ಷ ಸೌರವ್ ಗಂಗೂಲಿ ಖಚಿತಪಡಿಸಿದ್ದಾರೆ. ನವೆಂಬರ್ 22ರಿಂದ 26ರ ವರೆಗೆ ಗುಲಾಬಿ ಚೆಂಡಿನಾಟ ನಡೆಯಲಿದೆ. ಭಾರತದಲ್ಲಿ ನಡೆಯಲಿರುವ ಮೊಟ್ಟ ಮೊದಲ ಅಹರ್ನಿಶಿ ಟೆಸ್ಟ್ ಪಂದ್ಯ ಯಶಸ್ಸು ಗಳಿಸುವುದು ಅತಿ ಮುಖ್ಯವೆನಿಸುತ್ತದೆ. ಇದರಂತೆ ಪ್ರೇಕ್ಷಕರನ್ನು ಹೆಚ್ಚೆಚ್ಚು ಆಕರ್ಷಿಸಲು ಕಾರ್ಯತಂತ್ರ ರೂಪಿಸಲಾಗುತ್ತಿದೆ. ಇದರಂತೆ ಕೇವಲ 50 ರೂ.ಗಳಿಗೆ ಟಿಕೆಟ್‌ಗಳನ್ನು ಒದಗಿಸಲು ಆಯೋಜಕರು ನಿರ್ಧರಿಸಿದ್ದಾರೆ. ಡೇ-ನೈಟ್ ಟೆಸ್ಟ್ ವಿಶೇಷತೆ ಏನು? ಹೊನಳು ಬೆಳಕಿನ ಏಕದಿನ ಪಂದ್ಯದಂತೆ ಟೆಸ್ಟ್ ಕ್ರಿಕೆಟ್ ಆಯೋಜನೆಯಾಗಲಿದೆ. ಪಂದ್ಯಾರಂಭದ ಸಮಯವನ್ನು ಬಿಸಿಸಿಐ ಇನ್ನಷ್ಟೇ ನಿಗದಿ ಮಾಡಬೇಕಿದೆ. ಮಧ್ಯಾಹ್ನ ಸರಿ ಸುಮಾರು 1.30 ತಾಸಿಗೆ ಆರಂಭವಾಗುವ ಸಾಧ್ಯತೆಯಿದೆ. 68000 ಪ್ರೇಕ್ಷಕರು ಸಾಕ್ಷಿ? ಕೋಲ್ಕೊತಾದ ಈಡನ್ ಗಾರ್ಡೆನ್ಸ್ ಸ್ಟೇಡಿಯಂ 68000 ಪ್ರೇಕ್ಷಕರ ಸಾಮರ್ಥ್ಯವನ್ನು ಹೊಂದಿದೆ. ಬಂಗಾಳ ಕ್ರಿಕೆಟ್ ಸಂಸ್ಥೆ (ಸಿಎಬಿ) ಐದು ದಿನಗಳ ಪರ್ಯಂತ ಫುಲ್ ಹೌಸ್ ಸ್ಟೇಡಿಯಂ ಗುರಿಯಾಗಿಸಿದೆ. ಸಾಮಾನ್ಯ ಡೇ-ನೈಟ್ ಪಂದ್ಯಗಿಂತಲೂ ಮುಂಚಿತವಾಗಿ ಪಂದ್ಯಾರಂಭವನ್ನು ನಿರೀಕ್ಷೆ ಮಾಡಬಹುದಾಗಿದೆ. ರಾತ್ರಿ 8.30ರ ಸುಮಾರಿಗೆ ದಿನದಾಟ ಮುಕ್ತಾಯಗೊಂಡರೆ ಪ್ರೇಕ್ಷಕರು ಬೇಗನೇ ತಮ್ಮ ತಮ್ಮ ಮನೆಗಳಿಗೆ ಹಿಂತಿರುಗಬಹುದಾಗಿದೆ ಎಂದು ಸಿಎಬಿ ಕಾರ್ಯದರ್ಶಿ ಅವಿಶೇಕ್ ದಾಲ್ಮಿಯಾ ತಿಳಿಸಿದ್ದಾರೆ. ಬಿಸಿಸಿಐ ಹಾಗೂ ಜಾಹೀರಾತು ಹಕ್ಕುದಾರರಿಂದ ಸಮಯದ ಬಗ್ಗೆ ಅನುಮೋದನೆ ದೊರಕಿದ ಬಳಿಕ ಟಿಕೆಟ್‌ಗಳನ್ನು ಮುದ್ರಣಕ್ಕೆ ಕಳುಹಿಸಲಾಗುವುದು. ಐತಿಹಾಸಿಕ ಟೆಸ್ಟ್ ಪಂದ್ಯ ವೀಕ್ಷೆಣೆಗೆ ಶಾಲಾ ಮಕ್ಕಳನ್ನು ಕರೆ ತರುವ ಯೋಜನೆಯಿದೆ ಎಂದವರು ತಿಳಿಸಿದರು. ದಿನವೊಂದಕ್ಕೆ 50, 100, 150 ಹೀಗೆ ಬೆಲೆ ನಿಗದಿಪಡಿಸಲಾಗಿದೆ. ಸಾಧ್ಯವಾದಷ್ಟು ಪ್ರೇಕ್ಷಕರನ್ನು ಕರೆತರಲು ಯೋಜನೆ ಇರಿಸಲಾಗಿದೆ. ಈ ಮೂಲಕ ಡೇ-ನೈಟ್ ಕ್ರಿಕೆಟ್ ಯಶಸ್ಸಿಗೆ ಪ್ರಯತ್ನಿಸಲಾಗುವುದು ಎಂದರು. ಸಾಂಪ್ರಾದಾಯಿಕ ಟೆಸ್ಟ್‌ಗಳಿಗೆ ವಿರುದ್ಧವಾಗಿ ಡೇ-ನೈಟ್ ಟೆಸ್ಟ್ ಪಂದ್ಯಗಳಲ್ಲಿ ಮೊದಲ ಬ್ರೇಕ್ 20 ನಿಮಿಷಗಳ ಟೀ ವಿರಾಮವಾಗಿರಲಿದೆ. ತದಾ ಬಳಿಕ 40 ನಿಮಿಷಗಳ ಸೂಪರ್ ಬ್ರೇಕ್ ಇರಲಿದೆ. ಅಂದರೆ ಹೊನಲು ಬೆಳಕಿನಲ್ಲಿ ಒಂದು ವರೆ ಸೆಶನ್‌ಗಳನ್ನು ಆಡಬೇಕಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2NpxMNL
