ಬೆಂಗಳೂರು: ಕೇವಲ ಮೂರು ತಿಂಗಳ ಅವಧಿಯಲ್ಲಿ ರಾಜ್ಯಾದ್ಯಂತ 74 ಮಕ್ಕಳು ನೀರು ಪಾಲಾಗಿದ್ದಾರೆ. ಇದು ಮಳೆ-ಪ್ರವಾಹಕ್ಕೆ ಸಿಲುಕಿ ಉಂಟಾದ ಸಾವಲ್ಲ. ಪೋಷಕರ ಮೈಮರೆವು, ಆಟವಾಡುವ ಧಾವಂತ, ಈಜುವ ಕೌತುಕ, ಗಣೇಶನನ್ನು ವಿಸರ್ಜಿಸುವ ಅತ್ಯುತ್ಸಾಹ ಮತ್ತು ಕಾಲು ಜಾರಿ ಬಿದ್ದು ಉಂಟಾದ ದಾರುಣ ಸಾವುಗಳು. ಈ ಕುರಿತು ವಿಕ ನಡೆಸಿದ ‘ರಿಯಾಲಿಟಿ ಚೆಕ್‌’ ಆನೇಕ ಆತಂಕಕಾರಿ ಸಂಗತಿಗಳನ್ನು ಗುರುತಿಸಿದೆ. ಮಳೆಗಾಲದಲ್ಲಿ ಇಂಗು ಗುಂಡಿ, ಕಂದಕ, ಚರಂಡಿಗಳನ್ನು ಸರಿಯಾಗಿ ನಿರ್ವಹಿಸದೆ ಇರುವ ವ್ಯವಸ್ಥೆಯ ನಿರ್ಲಕ್ಷ್ಯವೂ ಹಲವು ಮಕ್ಕಳನ್ನು ಬಲಿ ತೆಗೆದುಕೊಂಡಿದೆ. ಶಾಲೆಯ ತೊಟ್ಟಿಯೊಳಗೆ ಬಿದ್ದು ಪ್ರಾಣ ಕಳೆದುಕೊಂಡ ಮಕ್ಕಳ ವ್ಯಥೆಯೂ ಇದೆ. ಹೀಗೆ ಜಲಸಮಾಧಿಯಾದವರಲ್ಲಿ ಒಂದೇ ಕುಟುಂಬದ ಅಣ್ಣ - ತಮ್ಮ, ಅಕ್ಕ ತಂಗಿ, ಅಣ್ಣ- ತಮ್ಮರೂ ಇದ್ದಾರೆ. ಆ ಕುಟುಂಬಗಳ ಗೋಳು ಹೇಳತೀರದು. ಇದಕ್ಕೆಲ್ಲ ಮಕ್ಕಳ ಹುಡುಗಾಟಿಕೆ, ತುಂಟತನ, ಕೆಟ್ಟ ಕುತೂಹಲ, ಮುಗ್ಧತೆ ಕಾರಣ ಎಂಬುದು ಮೇಲ್ನೋಟಕ್ಕೆ ಅನಿಸುವ ಸಂಗತಿ. ಆದರೆ ನೈಜ ಕಾರಣ ಇದೊಂದೆ ಅಲ್ಲ. ಸಮೀದಹ ಹಳ್ಳ-ಕೊಳ್ಳ- ನದಿಗಳು ಭರ್ತಿಯಾದಾಗ ಪಾಲಕರು ವಹಿಸಬೇಕಾದ ಜಾಗೃತಿಯ ಕೊರತೆಯೇ ಪ್ರಮುಖ ಕಾರಣ ಎಂಬುದನ್ನು ಮರೆಯಬಾರದು. ಮನ ಕಲಕುವ ಮರಣಗಳು ■ ಕೆಜಿಎಫ್‌ ತಾಲೂಕಿನ ಮರದಘಟ್ಟದಲ್ಲಿ ಆರು ಮಕ್ಕಳು ರಜೆ ದಿನ ತಾವೇ ಗಣೇಶನನ್ನು ತಯಾರಿಸಿ, ಕೆರೆಯಲ್ಲಿ ವಿಸರ್ಜಿಸಲು ಹೋಗಿ ಜೀವ ಕಳೆದುಕೊಂಡರು. ■ ತುಮಕೂರು ಜಿಲ್ಲೆ ಮಧುಗಿರಿಯ ಬಾಲ್ಯದಲ್ಲಿ ಗಣೇಶ ವಿಸರ್ಜನೆಗಾಗಿ ಕೆರೆಗೆ ಇಳಿದ ಅಣ್ಣ, ತಂಗಿಯರಿಬ್ಬರು ವಾಪಸ್‌ ಬರಲೇ ಇಲ್ಲ. ■ ಚಿಕ್ಕಮಗಳೂರು ತಾಲೂಕಿನ ಬಿಳೆಕಲ್ಲು ಗ್ರಾಮದ ಕೆಂಚಿಕಟ್ಟೆ ಕೆರೆಯಲ್ಲಿ 3 ಬಾಲಕರು ಆಯುಧಪೂಜೆ ದಿನ ಈಜಲು ಹೋಗಿ ಮೃತಪಟ್ಟರು. ■ ಕೋಲಾರ ತಾಲೂಕಿನ ಕ್ಯಾಲನೂರು ಗ್ರಾಮದ ಇಬ್ಬರು ಮಕ್ಕಳು ಗಾಂಧಿ ಜಯಂತಿಯಂದು ನೀರಾಟವಾಡಲು ಹೋಗಿ ಸಾವಿಗೀಡಾದರು. ■ ಉಡುಪಿ ಜಿಲ್ಲೆ ಎಡಮಾವಿನ ಹೊಳೆಯಲ್ಲಿ ಸ್ನೇಹಿತರೊಂದಿಗೆ ಆಟವಾಡಲು ಹೋಗಿದ್ದ ಇಬ್ಬರು ಬಾಲಕರು ಜಲ ಸಮಾಧಿಯಾದರು. ■ ಚಾಮರಾಜನಗರದ ಹನೂರು ತಾಲೂಕಿನ ರಾಮೇಗೌಡನಹಳ್ಳಿಯ ಅಜ್ಜನ ಮನೆಗೆ ದಸರೆ ರಜೆಗೆ ಬಂದ ಮೂವರು ನೀರಿನಲ್ಲಿ ಮುಳುಗಿದರು. ಶಾಲೆ ತೊಟ್ಟಿಗಳೂ ಜೀವ ತೆಗೆಯುತ್ತಿವೆ ತುಮಕೂರು ಜಿಲ್ಲೆ ಪಾವಗಡ ತಾಲೂಕಿನ ಲಿಂಗದಹಳ್ಳಿ ಶಾಲೆಯಲ್ಲಿ ನೀರಿನ ತೊಟ್ಟಿಗೆ ಬಿದ್ದು ವಿದ್ಯಾರ್ಥಿಯೊಬ್ಬ ಮೃತಪಟ್ಟ. ಬಾಗಲಕೋಟೆ ಜಿಲ್ಲೆ ಹುನಗುಂದ ತಾಲೂಕಿನ ಸೂಳೇಭಾವಿಯ ಶಾಲಾ ಕಾಂಪೌಂಡ್‌ ಒಳಗೆ ತೋಡಿದ್ದ ಗುಂಡಿ ಮಳೆಯಿಂದಾಗಿ ಭರ್ತಿಯಾಗಿತ್ತು. ಅಲ್ಲಿಗೆ ಆಟವಾಡಲು ತೆರಳಿದ ಅದೇ ಶಾಲೆ ವಿದ್ಯಾರ್ಥಿ ನೀರಿನಲ್ಲಿ ಮುಳುಗಿ ಮೃತಪಟ್ಟ. ಆನೆ ಕಂದಕ, ಚರಂಡಿಗೆ ಬಿದ್ದೂ ಹಲವು ಮಕ್ಕಳು ಸತ್ತಿದ್ದಾರೆ. ಸಾವಿನ ಪಟ್ಟಿ ಕೆರೆಯಲ್ಲಿ ಮುಳುಗಿ 44 ಸಾವು, ಹಳ್ಳದಲ್ಲಿ 7, ನದಿಯಲ್ಲಿ 3, ಇಂಗುಗುಂಡಿಗೆ ಬಿದ್ದು 4, ಕಾಲುವೆಯಲ್ಲಿ 3, ಚೆಕ್‌ಡ್ಯಾಂಗೆ 3, ಹೊಳೆಯಲ್ಲಿ 2, ಶಾಲಾ ತೊಟ್ಟಿಗೆ ಬಿದ್ದು 2, ಚರಂಡಿಯಲ್ಲಿ ಮುಳುಗಿ 2, ಕಲ್ಲಿನ ಗಣಿಯಲ್ಲಿ 2, ಕಲ್ಯಾಣಿಯಲ್ಲಿ 1, ಆನೆ ಕಂದಕದಲ್ಲಿ 1 ಸಾವು ದುರಂತ ನಡೆದ ಜಿಲ್ಲೆ- 18 ಒಟ್ಟು ಸಾವು -74 ಪೋಷಕರೇ ಎಚ್ಚರ ವಹಿಸಿ ಮಕ್ಕಳ ಚಲನವಲನಗಳ ಮೇಲೆ ನಿಗಾ ಇರಿಸಿ. ನೀರಿನ ಅಪಾಯದ ಬಗ್ಗೆ ಮನೆಯಲ್ಲಿ ಮಕ್ಕಳಿಗೆ ತಿಳಿಸಿ ಹೇಳಿ. ಶಾಲಾ ಆವರಣದಲ್ಲಿ ತೊಟ್ಟಿ ಕಂಡು ಬಂದರೆ ಶಾಲಾ ಶಿಕ್ಷಕರನ್ನು ಎಚ್ಚರಿಸಿ. ಕೆರೆಯ ಆಳ ಮತ್ತು ಹೂಳಿನ ಬಗ್ಗೆ ಮಕ್ಕಳಲ್ಲಿ ಜಾಗೃತಿ ಮೂಡಿಸಿ.
from India & World News in Kannada | VK Polls https://ift.tt/2q8gOLQ
