ಕೋಲ್ಕೊತಾ: ಭಾರತ ಚೊಚ್ಚಲ ಡೇ-ಟೆಸ್ಟ್ ಪಂದ್ಯ ಆಯೋಜನೆಗೆ ಸಜ್ಜಾಗಿದೆ. ಕೋಲ್ಕೊತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ನವೆಂಬರ್ 22ರಿಂದ 26ರ ವರೆಗೆ ಭಾರತ ಹಾಗೂ ಬಾಂಗ್ಲಾದೇಶ ನಡುವೆ ಅಹರ್ನಿಶಿ ಟೆಸ್ಟ್ ಪಂದ್ಯವು ಆಯೋಜನೆಯಾಗಲಿದೆ. ಇದೇ ಮೊದಲ ಬಾರಿಗೆ ಪಿಂಕ್ ಟೆಸ್ಟ್ ಪಂದ್ಯವನ್ನು ಭಾರತ ಆಡುತ್ತಿದೆ. ಅತ್ತ ಬಾಂಗ್ಲಾದೇಶ ತಂಡಕ್ಕೂ ಮೊದಲ ಅನುಭವವಾಗಿದೆ. ಹಾಗಾಗಿ ಇತ್ತಂಡಗಳ ಪಾಲಿಗೆ ಗುಲಾಬಿ ಚೆಂಡಿನಾಟ ಹೊಸತನವೆನಿಸಿದೆ. ಹಾಗಿದ್ದರೂ ಈ ಭಾರತೀಯ ಕ್ರಿಕೆಟರುಗಳು ನೆರವಾಗಬಲ್ಲರು. ಈಗಿನ ಭಾರತ ತಂಡದಲ್ಲಿರುವ ಪೈಕಿ ವೃದ್ಧಿಮಾನ್ ಸಹಾ ಹಾಗೂ ಮೊಹಮ್ಮದ್ ಶಮಿ ದೇಶೀಯ ಕ್ರಿಕೆಟ್‌ನಲ್ಲಿ ಗುಲಾಬಿ ಚಂಡಿನಾಟವನ್ನು ಆಡಿರುವ ಅನುಭವವನ್ನು ಹೊಂದಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ವೃದ್ಧಿಮಾನ್ ಸಹಾ, ಪಿಂಕ್ ಚೆಂಡಿನಾಟ ಸವಾಲಿನಿಂದ ಕೂಡಿರಲಿದೆ ಎಂದಿದ್ದಾರೆ. ಗುಲಾಬಿ ಚೆಂಡಿನಾಟ ನಮ್ಮ ಮುಂದಿರುವ ಹೊಸ ಚಾಲೆಂಜ್ ಆಗಿದೆ. ಪಿಂಕ್ ಬಾಲ್‌ನಲ್ಲಿ ನಾವು ಟೆಸ್ಟ್ ಪಂದ್ಯವನ್ನಾಡಿಲ್ಲ. ಆದರೂ ದೇಶೀಯ ಕ್ರಿಕೆಟ್‌ನಲ್ಲಿ ಇದರ ಭಾಗವಾಗಿದ್ದೇನೆ. ಪ್ರತಿ ಕ್ರೀಡೆಯಲ್ಲೂ ಸವಾಲು ಇದ್ದೇ ಇರುತ್ತದೆ. ಹೆಚ್ಚೆಚ್ಚು ಸವಾಲುಗಳನ್ನು ಇದ್ದಷ್ಟು ಮತ್ತಷ್ಟು ಉತ್ತಮ ಫಲಿತಾಂಶವನ್ನು ನೀಡಬಹುದಾಗಿದೆ ಎಂದರು. ಭಾರತದ ಮೊಟ್ಟ ಮೊದಲ ಪಿಕ್ ಬಾಲ್ ಟೆಸ್ಟ್ ಆಯೋಜನೆಯಲ್ಲಿ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಮಹತ್ವದ ಪಾತ್ರ ವಹಿಸಿದ್ದರು. ಅಲ್ಲದೆ ಟೀಮ್ ಇಂಡಿಯಾ ಜತೆಗೆ ಬಾಂಗ್ಲಾದೇಶ ಕ್ರಿಕೆಟ್ ಸಂಸ್ಥೆಯ ಮನವೊಳಿಸಲು ಯಶಸ್ವಿಯಾಗಿದ್ದರು. 2016ರಲ್ಲಿ ಬಂಗಾಳ ಕ್ರಿಕೆಟ್ ಸಂಸ್ಥೆ ಆಯೋಜಿಸಿದ ಸೂಪರ್ ಲೀಗ್ ಫೈನಲ್ ಪಂದ್ಯದಲ್ಲಿ ಮೊಹನ್ ಬಗಾನ್ ಹಾಗೂ ಬೋವನಿಪೂರ್ ಕ್ಲಬ್ ತಂಡಗಳು ಪಿಂಕ್ ಬಾಲ್ ಪಂದ್ಯವನ್ನಾಡಿದ್ದವು. ಮೊಹಮ್ಮದ್ ಶಮಿ ಹಾಗೂ ವೃದ್ಧಿಮಾನ್ ಸಹಾ ಇದರ ಭಾಗವಾಗಿದ್ದರು. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ ನನಗದರ ಬಗ್ಗೆ ನೆನಪಿಲ್ಲ. ಮೊಹಮ್ಮದ್ ಶಮಿ ನಿಜಕ್ಕೂ ವೇಗದಲ್ಲಿ ದಾಳಿ ನಡೆಸಿದರು. ಬಳಿಕ ನಮ್ಮ ಮೊಹನ್ ಬಗಾನ್ ತಂಡವು ವಿಜಯಿಯಾಯಿತು. ನನ್ನ ನೆನಪಿಗೆ ಬಂದಿರುವ ಒಂದೇ ಒಂದು ಅಂಶವೆಂದರೆ, ಕೆಲವೊಮ್ಮೆ ಕಷ್ಟಕರವೆನಿಸುತ್ತಿತ್ತು ಎಂದು ಸಹಾ ವಿವರಿಸಿದರು. ಮೊದಲ ಇನ್ನಿಂಗ್ಸ್‌ನಲ್ಲಿ ಐದು ವಿಕೆಟ್ ಕಬಳಿಸಿರುವ ಶಮಿ, ಪಂದ್ಯದಲ್ಲಿ ಒಟ್ಟು ಏಳು ವಿಕೆಟುಗಳನ್ನು ಪಡೆದಿದ್ದರು. ಸದ್ಯ ವಿಶ್ವದಲ್ಲೇ ಶ್ರೇಷ್ಠ ಬೌಲಿಂಗ್ ಪಡೆಯನ್ನು ಭಾರತ ಹೊಂದಿದೆ. ಗುಲಾಬಿ ಚೆಂಡಿನಾಟವನ್ನು ನಾವು ಆಡಬಹುದು. ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲೆಂಡ್ ತಂಡಗಳು ಈಗಾಗಲೇ ಆಡಿವೆ. ಪ್ರೇಕ್ಷಕರನ್ನು ಹೆಚ್ಚೆಚ್ಚು ಆಕರ್ಷಿಸಲು ಸಾಧ್ಯವಾದರೆ ಅದು ಕ್ರಿಕೆಟ್ ಪಾಲಿಗೆ ಉತ್ತಮವಾಗಿರಲಿದೆ ಎಂದರು. 2015ನೇ ಇಸವಿಯಲ್ಲಿ ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲೆಂಡ್ ನಡುವೆ ಮೊದಲು ಡೇ-ನೈಟ್ ಟೆಸ್ಟ್ ಪಂದ್ಯ ಆಯೋಜನೆಯಾಗಿತ್ತು. ಬಳಿಕದ ನಾಲ್ಕು ವರ್ಷಗಳಲ್ಲಿ ಒಟ್ಟು 11 ಆಯೋಜನೆಯಾಗಿದ್ದು, ಪಾಕಿಸ್ತಾನ, ವೆಸ್ಟ್‌ಇಂಡೀಸ್, ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ಶ್ರೀಲಂಕಾ ಹಾಗೂ ಜಿಂಬಾಬ್ವೆ ತಂಡಗಳು ಪ್ರಯೋಗ ನಡೆಸಿದೆ. ಇದೇ ಸಂದರ್ಭದಲ್ಲಿ ಗಂಗೂಲಿಯನ್ನು ಪ್ರಶಂಸಿಸಲು ಸಹಾ ಮರೆಯಲಿಲ್ಲ. ಅವರು ವಿಶ್ವ ಕ್ರಿಕೆಟನ್ನು ಆಳಿದರು. ಇದೀಗ ಆಡಳಿತಗಾರನಾಗಿ ಜನರು ಅದನ್ನೇ ನಿರೀಕ್ಷಿಸುತ್ತಾರೆ. ಎಲ್ಲರೂ ಹೊಸತನವನ್ನು ಬಯಸುತ್ತಾರೆ. ಇದೀಗ ಆರಂಭವಾಗಿದ್ದು, ಕ್ರಿಕೆಟಿಗರೂ ಇದರ ಪ್ರಯೋಜನ ಪಡೆಯಲಿದ್ದಾರೆ ಎಂದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2BWpbgj
