ಹೊಸದಿಲ್ಲಿ: ವಿಶ್ವದ ಯಾವುದೇ ಭಾಗದಲ್ಲಿ ಟೀಮ್‌ ಇಂಡಿಯಾದ ವೇಗಿಗಳು ಮಿಂಚುವ ಸಾಮರ್ಥ್ಯ ಹೊಂದಿದ್ದಾರೆ, ಜೊತೆಗೆ ವಿಶ್ವ ಶ್ರೇಷ್ಠ ಸ್ಪಿನ್ನರ್‌ಗಳು ತಂಡದಲ್ಲಿದ್ದು ಭಾರತದ ಬೌಲಿಂಗ್ ವಿಭಾಗದ ಎದುರು ಸರಿಸಾಟಿಯಾಗಿ ನಿಲ್ಲುವುದು ಕಷ್ಟ ಎಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ಇಯಾನ್‌ ಚಾಲಪ್‌ ಹೇಳಿದ್ದಾರೆ. ಇತ್ತೀಚೆಗಷ್ಟೇ ಅಂತ್ಯಗೊಂಡ ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ 3 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಭಾರತ ತಂಡ 3-0 ಅಂತರದ ವೈಟ್‌ವಾಷ್‌ ಗೆಲುವು ದಾಖಲಿಸಿತ್ತು. ಈ ಮೂಲಕ ಅಂಕಪಟ್ಟಿಯಲ್ಲಿ ಒಟ್ಟಾರೆ 240 ಅಂಕಗಳನ್ನು ಗಳಿಸುವ ಮೂಲಕ ಅಗ್ರಸ್ಥಾನವನ್ನು ಮತ್ತಷ್ಟು ಭದ್ರ ಪಡಿಸಿಕೊಂಡಿದೆ. ಹರಿಣಗಳ ವಿರುದ್ಧದ ಸರಣಿಯಲ್ಲಿ ಆಫ್‌ ಸ್ಪಿನ್ನರ್‌ ರವಿಚಂದ್ರನ್‌ ಅಶ್ವಿನ್‌ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಎನಿಸಿದರೆ, ಆಲ್‌ರೌಂಡರ್‌ ರವೀಂದ್ರ ಜಡೇಜಾ ಕೂಡ ವಿಕೆಟ್‌ಗಳನ್ನು ಬಾಚಿಕೊಂಡರು. ಆದರೆ, ಸರಣಿಯಲ್ಲಿ ಹರಿಣ ಪಡೆಯ ಬ್ಯಾಟಿಂಗ್‌ ಬೆನ್ನೆಲುಬನ್ನು ಮುರಿದುದ್ದು ಟೀಮ್‌ ಇಂಡಿಯಾದ ವೇಗಿಗಳಾದ ಮೊಹಮ್ಮದ್‌ ಶಮಿ ಮತ್ತು ಉಮೇಶ್‌ ಯಾದವ್‌, ಸ್ಪಿನ್ನರ್‌ಗಳಿಗೆ ನೆರವಾಗುವ ಪಿಚ್‌ನಲ್ಲೂ ಅದ್ಭುತ ವೇಗದ ಬೌಲಿಂಗ್ ದಾಳಿ ಸಂಘಟಿಸಿ ಭಾರತ ತಂಡದ ಗೆಲುವಿಗೆ ಬಲವಾದರು. ಟೀಮ್‌ ಇಂಡಿಯಾದ ಈ ಭರ್ಜರಿ ಬೌಲಿಂಗ್ ಪ್ರದರ್ಶನ ಮೂಡಿಬಂದಿರುವುದು ಸ್ಟಾರ್‌ ವೇಗದ ಬೌಲರ್‌ ಜಸ್‌ಪ್ರೀತ್‌ ಬುಮ್ರಾ ಅವರ ಅನುಪಸ್ಥಿತಿಯಲ್ಲಿ ಎಂಬುದು ವಿಶೇಷ. ಸರಣಿಗೂ ಮುನ್ನ ಬೆನ್ನು ನೋವಿನ ಸಮಸ್ಯೆಗೆ ಚಿಕಿತ್ಸೆ ಸಲುವಾಗಿ ಬುಮ್ರಾ ಇಂಗ್ಲೆಂಡ್‌ಗೆ ತೆರಳಿದ್ದರು. " ತನ್ನ ಬೌಲಿಂಗ್ ಅಸ್ತ್ರಗಳ ಬತ್ತಳಿಕೆಯಲ್ಲಿ ವೇಗದ ಬೌಲರ್‌ಗಳ ಬಲ ಹೆಚ್ಚಿಸಿಕೊಂಡಿದೆ. ಜಸ್‌ಪ್ರೀತ್‌ ಬುಮ್ರಾ ಅನುಪಸ್ಥಿತಿಯಲ್ಲೂ ತಂಡದ ಬೌಲಿಂಗ್ ಅದ್ಭುತವಾಗಿದೆ. ಹಲವು ವರ್ಷಗಳ ಪ್ರಯತ್ನದ ಫಲವಾಗಿ ಭಾರತ ತಂಡ ಶ್ರೇಷ್ಠ ವೇಗದ ಬೌಲರ್‌ಗಳ ಗುಂಪನ್ನು ನಿರ್ಮಿಸಿದ್ದು, ಯಾವುದೇ ಪಿಚ್‌ಗಳಲ್ಲಿ ಈ ಬೌಲರ್‌ಗಳು ತಂಡಕ್ಕೆ ಯಶಸ್ಸು ತಂದುಕೊಡಬಲ್ಲ ಸಾಮರ್ಥ್ಯ ಹೊಂದಿದ್ದಾರೆ," ಎಂದು ವಿವರಿಸಿದ್ದಾರೆ. "ಬುಮ್ರಾ ಫಿಟ್ನೆಸ್‌ಗೆ ಮರಳಿದರೆ, ಮೊಹಮ್ಮದ್‌ ಶಮಿ ಮತ್ತು ಅದ್ಭುತ ರೀತಿಯಲ್ಲಿ ಸುಧಾರಿಸಿರುವ ಇಶಾಂತ್‌ ಶಮಾ ಮತ್ತು ಉಮೇಶ್‌ ಯಾದವ್‌ ಅವರನ್ನು ಒಳಗೊಂಡ ಭಾರತದ ಬೌಲಿಂಗ್ ವಿಭಾಗಗಕ್ಕೆ ವಿಶ್ವದ ಯಾವುದೇ ಭಾಗದಲ್ಲಿ ಗೌರವ ಸಿಗಲಿದೆ. ಟೀಮ್‌ ಇಂಡಿಯಾದ ಸ್ಪಿನ್ನರ್‌ಗಳು ಸದಾ ಗುಣಮಟ್ಟ ಹೊಂದಿದ್ದಾರೆ. ಅವರೊಟ್ಟಿಗೆ ವಿಶ್ವ ಶ್ರೇಷ್ಠ ವೇಗಿಗಳ ಸೇರ್ಪಡೆಯಾಗಿದ್ದು. ಈ ಬಲಿಷ್ಠ ಬೌಲಿಂಗ್ ವಿಭಾಗಕ್ಕೆ ಇತರ ಯಾವುದೇ ತಂಡಗಳಿಂದ ಸರಿ ದೂಗಿಸಲು ಸಾಧ್ಯವಿಲ್ಲ," ಎಂದು ಚಾಪಲ್‌ ಹೇಳಿದ್ದಾರೆ. ಇದೇ ವೇಳೆ ಭಾರತೀಯ ಕ್ರಿಕೆಟ್‌ನಲ್ಲಿ ಮೂಡಿಬರುತ್ತಿರುವ ಹೊಸ ಪ್ರತಿಭೆಗಳ ಕುರಿತಾಗಿಯೂ ಮಾತನಾಡಿರುವ ಚಾಪಲ್‌, "ಐಪಿಎಲ್‌ನಲ್ಲಿ ಅಂತಾರಾಷ್ಟ್ರೀಯ ಆಟಗಾರರೊಂದಿಗೆ ಬೆರೆಯುವ ಮೂಲಕ ಭಾರತದ ಯುವ ಪ್ರತಿಭೆಗಳಿಗೆ ಅಮೋಘ ಅನುಭವ ಲಭ್ಯವಾಗುತ್ತಿದೆ. ಹೀಗಾಗಿ ಪ್ರತಿಭೆಗಳ ಭಂಡಾರವೇ ಭಾರತದಲ್ಲಿದೆ. ಭವಿಷ್ಯದಲ್ಲಿ ಭಾರತ ಕ್ರಿಕೆಟ್ ಜಗತ್ತಿನ ಬಲಿಷ್ಠ ತಂಡವಾಗಿ ದೀರ್ಘ ಕಾಲದ ವರೆಗೆ ಉಳಿಯಲಿದೆ." ಎಂದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Jr88XY
