ಬೆಂಗಳೂರು: ಭಾರತದ ವಿವಿಧ ಬ್ಯಾಂಕುಗಳ 13 ಲಕ್ಷ ಗ್ರಾಹಕರ ಡೆಬಿಟ್ ಮತ್ತು ಕ್ರೆಡಿಟ್ ಕಾರ್ಡುಗಳ ಮಾಹಿತಿ ಸೋರಿಕೆಯಾಗಿರುವ ಆಘಾತಕಾರಿ ಸುದ್ದಿ ಬಹಿರಂಗಗೊಂಡಿದೆ. ಈ ಎಲ್ಲ ಕಾರ್ಡ್‌ಗಳ ಮಾಹಿತಿಯನ್ನು 'ಜೋಕರ್ಸ್‌ ಸ್ಟಾಶ್‌' ಎಂದೇ ಕರೆಯಲಾಗುವ ಡಾರ್ಕ್ನೆಟ್ನಲ್ಲಿ ಹರಾಜಿಗೆ ಇಡಲಾಗಿದೆ. ಈ ಆಘಾತಕಾರಿ ಮಾಹಿತಿಯನ್ನು ಸಿಂಗಾಪುರ ಮೂಲದ 'ಸೈಬರ್‌ ದಾಳಿ ಮತ್ತು ತಡೆಗಟ್ಟುವಿಕೆ ಸಂಸ್ಥೆ'ಯಾದ ಗ್ರೂಪ್‌ - ಐಬಿ ಈ ಕುರಿತು ಅಚ್ಚರಿಯ ಮಾಹಿತಿ ನೀಡಿದೆ. ಸುಮಾರು 13 ಲಕ್ಷ ಕಾರ್ಡುಗಳ ಮಾಹಿತಿ ಸೋರಿಕೆಯಾಗಿದ್ದು, ಈ ಪೈಕಿ ಶೇ.98ರಷ್ಟು ಕಾರ್ಡುಗಳು ಭಾರತದ್ದಾಗಿವೆ ಎಂದು ಸ್ಪಷ್ಟಪಡಿಸಿದೆ. 2019ರ ಸೆಪ್ಟೆಂಬರ್ ವೇಳೆಗೆ ಭಾರತದಲ್ಲಿ ಚಾಲಾವಣೆಯಲ್ಲಿರುವ ಡೆಬಿಟ್ (ಎಟಿಎಂ) ಮತ್ತು ಕ್ರೆಡಿಟ್ ಕಾರ್ಡುಗಳ ಸಂಖ್ಯೆ ಸುಮಾರು 97.2 ಕೋಟಿಯಷ್ಟಿವೆ. ದುಷ್ಕರ್ಮಿಗಳು ಕಾರ್ಡುಗಳ ಮಾಹಿತಿಗೆ ಕನ್ನ ಹಾಕಿದ್ದು, ಕದ್ದಿರುವ ಮಾಹಿತಿಯಿಂದ ಹಣದ ಆನ್‌ಲೈನ್‌ ಚಲಾವಣೆ ಮಾಡಬಹುದು. ಅಥವಾ ಕಾರ್ಡನ್ನೇ ನಕಲು ಮಾಡಬಹುದಾಗಿದೆ. ಕಾರ್ಡುಗಳಿಂದ ಕದ್ದಿರುವ ಮಾಹಿತಿ ಸಂಗ್ರಹಕ್ಕೆ ಇಂಡಿಯಾ ಮಿಕ್ಸ್‌ ನ್ಯೂ 01 ಎಂದು ಹೆಸರಿಡಲಾಗಿದೆ. ದತ್ತಾಂಶಗಳನ್ನು ಟ್ರ್ಯಾಕ್‌ -1 ಮತ್ತು ಟ್ರ್ಯಾಕ್‌ 2 ಎಂಬ ಎರಡು ಸಂಪುಗಳಲ್ಲಿ ಡಾರ್ಕ್ನೆಟ್ನಲ್ಲಿ ಮಾರಾಟಕ್ಕಿಡಲಾಗಿದೆ. ಎಷ್ಟು ರುಪಾಯಿಗೆ ಮಾರಟಕ್ಕಿವೆ? ಐಟಿ ಸೆಕ್ಯೂರಿಟಿ ನೀಡಿರುವ ಮಾಹಿತಿಯಂತೆ ಪ್ರತಿಯೊಂದು ಕಾರ್ಡ್‌ನ ಮಾಹಿತಿಗೆ 100 ಡಾಲರ್‌ಗೆ ಮಾರಾಟಕ್ಕೆ ಇಡಲಾಗಿದೆ. ಅಂದರೆ ಯಾವುದೇ ಒಂದು ಕಾರ್ಡ್‌ನ ಮಾಹಿತಿಯಲ್ಲಿ ಡಾರ್ಕ್‌ವೆಬ್‌ನಲ್ಲಿ ಪಡೆಯಲು ಭಾರತೀಯ ರೂಪಾಯಿಯಲ್ಲಿ7000 ರೂಪಾಯಿಗೂ ಹೆಚ್ಚು ಪಾವತಿ ಮಾಡಬೇಕಾಗುತ್ತದೆ. ಅ.28ರಿಂದಲೇ ಕಾರ್ಡುಗಳ ಮಹಿತಿಯನ್ನು ಮಾರಾಟಕ್ಕೆ ಇಡಲಾಗಿದೆ. ಡಾರ್ಕ್‌ನೆಟ್‌ನಲ್ಲಿರುವ ಎಲ್ಲ ಕಾರ್ಡುಗಳನ್ನು ಮಾರಾಟ ಮಾಡಿದರೆ 1.3 ಕೋಟಿ ಡಾಲರ್‌ ತಲುಪಲಿದೆ. ಅಂದರೆ ಸುಮಾರು 922 ಕೋಟಿ ರೂಪಾಯಿ ಬೆಲೆಬಾಳುತ್ತವೆ. ಈವರೆಗೆ ಡಾರ್ಕ್ನೆಟ್ನಲ್ಲಿ ಮಾರಾಟ ಮಾಡಲಾಗುತ್ತಿರುವ ಅತಿ ಹೆಚ್ಚು ಮೌಲ್ಯದ ಹಾಗೂ ಅತಿ ಸೂಕ್ಷ್ಮ ಹಣಕಾಸು ದತ್ತಾಂಶ ಇದಾಗಿದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ. ಮಾಹಿತಿ ಸೋರಿಕೆಯಾಗಿದ್ದು ಹೇಗೆ? ಹ್ಯಾಕರ್‌ಗಳು ಹೇಗೆ ಇಷ್ಟು ದೊಡ್ಡ ಮೊತ್ತದ ಕಾರ್ಡುಗಳನ್ನು ಮಾಹಿತಿಯನ್ನು ಕದ್ದರು ಎಂಬುದನ್ನು ನಿಖರವಾಗಿ ಹೇಳಲಾಗಿಲ್ಲ. ಆದರೆ ಎಟಿಎಂ ಮತ್ತು ಪಿಒಎಸ್‌ (ಅಂಗಡಿಗಳಲ್ಲಿ ಸ್ವೈಪ್‌ ಮಾಡುವ ಮಷಿನ್‌ಗಳು) ಗಳ ಮೂಲಕ ಕಾರ್ಡ್‌ ಸ್ಕಿಮ್ಮಿಂಗ್‌ (ಮಾಹಿತಿ ಕಳವು) ತಂತ್ರದ ಮೂಲಕ ಮಾಹಿತಿ ಕದ್ದಿರಬಹುದು ಎಂದು ಊಹಿಸಲಾಗಿದೆ. ಏನಿದು ? ಟೊರ್‌ ಮತ್ತು ಐ2ಪಿ ಬ್ರೌಸರ್‌ಗಳ ಮೂಲಕ ನಡೆಯುವ ಸಾವಿರಾರು ವೆಬ್‌ಸೈಟ್‌ಗಳ ಗುಚ್ಛ ವೇ ಈ ಡಾರ್ಕ್‌ವೆಬ್‌. ಇಲ್ಲಿ ಈ ವೆಬ್‌ಸೈಟ್‌ಗಳ ಬಳಕೆಯ ಐಪಿ ಅಡ್ರೆಸ್‌ ಪತ್ತೆ ಹಚ್ಚಲು ಆಗುವುದಿಲ್ಲ. ಡಾರ್ಕ್‌ ವೆಬ್‌ ಅನ್ನು ಹೆಚ್ಚಾಗಿ ಡ್ರಗ್ಸ್‌ ಮಾರಾಟ ಮತ್ತು ಬಾಲ ಅಶ್ಲೀಲ ವೆಬ್‌ಸೈಟ್‌ಗಳಿಗೆ ಬಳಸಲಾಗುತ್ತದೆ. ರಟ್ಟುಗಾರರ ಅನಾಮಧೇಯತೆಯನ್ನು ಮತ್ತು ಬಳಕೆದಾರರನ್ನು ಸರಕಾರಿ ಸವೀರ್‍ಕ್ಷ ಣೆ ಮತ್ತು ಸೆನ್ಸಾರ್‌ಶಿಪ್‌ನಿಂದ ಡಾರ್ಕ್‌ವೆಬ್‌ ಕಾಪಾಡುತ್ತದೆ. ಭಯೋತ್ಪಾದನೆಗೆ ಬಳಕೆ ಡಾರ್ಕ್‌ವೆಬ್‌ನಲ್ಲಿ ಭಯೋತ್ಪಾದಕರ ವೆಬ್‌ಸೈಟ್‌ಗಳು ಸಕ್ರಿಯವಾಗಿವೆ. 2015ರ ನವೆಂಬರ್‌ನಲ್ಲಿ ನಡೆದ ಪ್ಯಾರಿಸ್‌ ದಾಳಿಯ ವೇಳೆ ಆಪರೇಷನ್‌ ಆನಿಮಸ್‌ ಎಂಬ ವೆಬ್‌ತಾಣವನ್ನು ಐಸಿಸ್‌ ಬಳಸಿಕೊಂಡಿತ್ತು ಎಂಬ ಆರೋಪವಿದೆ. ವಾಸ್ತವದಲ್ಲಿ ಆಪರೇಷನ್‌ ಆನಿಮಸ್‌ ಎಂಬ ತಾಣವನ್ನು ಐಸಿಸ್‌ಗೆ ಸೇರಿದವರಿಂದ ಹ್ಯಾಕ್‌ ಮಾಡಲಾಗಿತ್ತು ಎಂದು ಬಳಿಕ ಗೊತ್ತಾಗಿತ್ತು. ಇದರ ಹೊರತಾಗಿಯೂ ಡಾರ್ಕ್‌ವೆಬ್‌ ಬಳಸಿಕೊಂಡು ಉಗ್ರ ಸಂಘಟನೆಗಳು ತಮ್ಮ ಚಟುವಟಿಕೆಗಳನ್ನು ನಡೆಸುತ್ತಿವೆ ಎಂಬ ವರದಿಗಳೂ ಇವೆ.
from India & World News in Kannada | VK Polls https://ift.tt/2PzRTfc
