ಹೊಸದಿಲ್ಲಿ: ಎರಡು ವರ್ಷಗಳ ಹಿಂದೆ ಮ್ಯಾಚ್ ಫಿಕ್ಸಿಂಗ್ ಸಂಬಂಧ ಬುಕ್ಕಿಗಳು ಸಂಪರ್ಕಿಸಿದ ವಿವರವನ್ನು ಬಚ್ಚಿಟ್ಟುಕೊಂಡಿರುವ ಬಾಂಗ್ಲಾದೇಶ ಟ್ವೆಂಟಿ-20 ಹಾಗೂ ಟೆಸ್ಟ್ ನಾಯಕ ಮೇಲೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಎರಡು ವರ್ಷಗಳ ನಿಷೇಧವನ್ನು ಹೇರಿದೆ. ಐಸಿಸಿ ಭ್ರಷ್ಟಾಚಾರ ತಡೆ ಘಟಕದ ನಿಯಮಗಳನ್ನು ಉಲ್ಲಂಘಿಸಿರುವ ಹಿನ್ನಲೆಯಲ್ಲಿ ಕಠಿಣ ಕ್ರಮ ಕೈಗೊಳ್ಳಲಾಗಿದೆ. ಪ್ರಸ್ತುತ ಭಾರತ ವಿರುದ್ಧದ ಸರಣಿಗೆ ಶಕಿಬ್ ಅಲ್ ಹಸನ್ ಅಲಭ್ಯವಾಗಿದ್ದಾರೆ. ಇದರಿಂದಾಗಿ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ ತಾಜಾ ತಂಡವನ್ನು ಘೋಷಿಸಿದೆ. ಹಾಗೆಯೇ ಟ್ವೆಂಟಿ-20 ನಾಯಕರನ್ನಾಗಿ ರಿಯಾದ್ ಮತ್ತು ಟೆಸ್ಟ್ ಕಪ್ತಾನರಾಗಿ ಮೊಮಿನುಲ್‌ರನ್ನು ಹೆಸರಿಸಿದೆ. ಏಕದಿನದಲ್ಲಿ ನಂ.1 ಆಲ್‌ರೌಂಡರ್ ಅಲಭ್ಯದಿಂದಾಗಿ ಬಾಂಗ್ಲಾದೇಶಕ್ಕೆ ಭಾರಿ ಹಿನ್ನಡೆಯುಂಟಾಗಿದೆ. ಆದರೆ ನೂತನ ನಾಯಕ ಮಹಮಹುದುಲ್ಲಾ, ಇದನ್ನೇ ತಂಡದ ಉತ್ತೇಜನವಾಗಿ ಪರಿವರ್ತಿಸುವ ಇರಾದೆಯಲ್ಲಿದ್ದಾರೆ. ಬಾಂಗ್ಲಾದೇಶ ಕ್ರಿಕೆಟ್ ತಂಡವು ಅಕ್ಟೋಬರ್ 30ರಂದು ಭಾರತಕ್ಕೆ ಬಂದಿಳಿದೆ. ಈ ವೇಳೆಯಲ್ಲಿ ಪ್ರತಿಕ್ರಿಯಿಸಿರುವ ಮಹಮುದುಲ್ಲಾ, ದೇಶಕ್ಕಾಗಿ ನಮ್ಮ ಹೃದಯದಿಂದ ಆಡಬೇಕಿದೆ ಎಂದಿದ್ದಾರೆ. ನನಗನಿಸುತ್ತದೆ ಶಕಿಬ್ ಅನುಪಸ್ಥಿಯು ನಮಗೆ ಉತ್ತೇಜನವಾಗಿ ಪರಿಣಮಿಸಲಿದೆ. ದೇಶಕ್ಕಾಗಿ ಆಡುವುದಕ್ಕಿಂತ ಮಿಗಿಲಾದ ಗೌರವ ಇನ್ನೊಂದಿಲ್ಲ. ತಂಡವನ್ನು ಮುನ್ನಡೆಸುವ ಜಬಾಬ್ದಾರಿ ನನ್ನ ಮೇಲಿದೆ. ಹಾಗಾಗಿ ನನ್ನ ಸರ್ವಸ್ವವನ್ನು ಮುಡಿಪಾಗಿಡಲಿದ್ದೇನೆ ಎಂದರು. ಹಾಗಿದ್ದರೂ ಭಾರತದ ವಿರುದ್ಧ ಸರಣಿ ಸವಾಲಿನಿಂದ ಕೂಡಿರಲಿದೆ ಎಂದರು. ಅಂಕಿಅಂಶಗಳು ಸುಳ್ಳನ್ನು ಹೇಳಲಾರದು. ಇದೊಂದು ಕಠಿಣ ಸರಣಿಯಾಗಿದ್ದು, ಹಾಗಿದ್ದರೂ ಅಸಾಧ್ಯವೇನಲ್ಲ. ಒಂದು ತಂಡವಾಗಿ ಆಡಿ ಪ್ರತಿಯೊಂದು ಅವಕಾಶದ ಪ್ರಯೋಜನ ಪಡೆಯಬೇಕಿದೆ ಎಂದರು. ಈ ಸಂದರ್ಭದಲ್ಲಿ ಪ್ರತಿಕ್ರಿಯಿಸಿರುವ ಹಿರಿಯ ವಿಕೆಟ್ ಕೀಪರ್ ಮುಶ್ಪಿಕರ್ ರಹೀಂ, ಖಂಡಿತವಾಗಿಯೂ ಶಕಿಬ್‌ರನ್ನು ಮಿಸ್ ಮಾಡಲಿದ್ದೇವೆ. ನಾವಿಬ್ಬರೂ ಸುದೀರ್ಘ ಅವಧಿಯ ವರೆಗೂ ಜತೆಯಾಗಿ ಆಡಿದ್ದೇವೆ ಎಂದರು. ನಂ.1 ಆಟಗಾರನ ಅನುಪಸ್ಥಿತಿಯಲ್ಲಿ ಆಡುವುದು ಕಷ್ಟ. ಹಾಗೊಂದು ವೇಳೆ ಗಾಯದಿಂದಾಗಿ ಯಾವನೇ ಒಬ್ಬ ಆಟಗಾರ ಒಂದು ವರ್ಷದ ವರೆಗೆ ಅಲಭ್ಯವಾದರೆ ಯುವ ಆಟಗಾರರಿಗೆ ಹೆಚ್ಚಿನ ಅವಕಾಶ ದೊರಕುತ್ತದೆ. ಭಾರತವನ್ನು ಅವರದ್ದೇ ದೇಶದಲ್ಲಿ ಮಣಿಸುವುದು ನಿಜಕ್ಕೂ ಸವಾಲಿನಿಂದ ಕೂಡಿರಲಿದೆ. ಆದರೆ ಸವಾಲಿನ ಎಂದರೆ ಅವಕಾಶ ಎಂದರ್ಥ ಎಂದು ತಿಳಿಸಿದರು. ನವೆಂಬರ್‌ 3ರಂದು ದಿಲ್ಲಿಯ ಅರುಣ್‌ ಜೇಟ್ಲಿಸ್ಟೇಡಿಯಮ್‌ನಲ್ಲಿ ಟಿ20 ಸರಣಿಗೆ ಚಾಲನೆ ದೊರೆಯಲಿದೆ. ನ.7 ಮತ್ತು 10ರಂದು ಕ್ರಮವಾಗಿ ರಾಜ್‌ಕೋಟ್‌ ಹಾಗೂ ನಾಗಪುರದಲ್ಲಿಸರಣಿಯ 2 ಮತ್ತು 3ನೇ ಪಂದ್ಯ ನಡೆಯಲಿವೆ. ನವೆಂಬರ್‌ 14ರಿಂದ 18ರವರೆಗೆ ಇಂದೋರ್‌ನಲ್ಲಿ ಮೊದಲ ಟೆಸ್ಟ್ ಹಾಗೂ ನ.22ರಿಂದ 26ರವರೆಗೆ ಕೋಲ್ಕೊತಾದಲ್ಲಿಎರಡನೇ ಟೆಸ್ಟ್ ನಿಗದಿಯಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2N3I6fm
