ಇಸ್ರೇಲಿ ಸ್ಪೈವೇರ್‌ ಮೂಲಕ ದೇಶದ ಪ್ರಮುಖರ ಸಂವಹನಗಳ ಮೇಲೆ ನಿಗಾ ಇರಿಸಲಾಗಿದೆ ಎಂ ಆತಂಕಕಾರ ಅಂಶವನ್ನು ಇದೀಗ ಫೇಸ್‌ಬುಕ್‌ ಮಾಲಿಕತ್ವದ ವಾಟ್ಸಾಪ್‌ ಬಹಿರಂಗಗೊಳಿಸಿದೆ. ಪ್ರಮುಖ ಮಾಧ್ಯಮದ ಪ್ರಮುಖ ವ್ಯಕ್ತಿಗಳು, ದಲಿತ ನಾಯಕರು ಹಾಗೂ ಮಾನವ ಹಕ್ಕುಗಳ ಕಾರ್ಯಕರ್ತರ ಫೋನ್‌ಗಳನ್ನು ವಾಟ್ಸಾಪ್‌ಗಳ ಮೂಲಕ ನಿಗಾ ಇರಿಸಲಾಗಿದೆ. ಇದು 2019 ಮೇ ನಲ್ಲಿ 2 ವಾರಗಳ ಕಾಲ ನಡೆದಿದೆ ಎಂದು ವಾಟ್ಸಾಪ್‌ ಅಮೆರಿಕದ ನ್ಯಾಯಾಲಯದಲ್ಲಿ ಧಾವೆ ಹೂಡಿದೆ ಎಂದು ಇಂಡಿಯನ್‌ ಎಕ್ಸ್‌ಪ್ರೆಸ್‌ ವರದಿ ಮಾಡಿದೆ. ಹ್ಯಾಕರ್ಸ್‌ಗಳು ಇದಕ್ಕಾಗಿ ಇಸ್ರೇಲ್‌ ಟೆಕ್ನಾಲಜಿಯನ್ನು ಬಳಸಿ ನಿಗಾ ಇರಿಸಿದ್ದಾರೆ. ಈ ಸಂಬಂಧ ವಾಟ್ಸಾಪ್‌ ಬಳಕೆದಾರರಿಗೆ ಈ ವಿಚಾರದ ಬಗ್ಗೆ ಎಚ್ಚರಿಕೆ ನೀಡಿದೆ ಎಂದು ತಿಳಿದು ಬಂದಿದೆ. ಆದರೆ ಸರ್ವಿಲೆನ್ಸ್‌ನಲ್ಲಿದ್ದ ನಂಬರ್‌ಗಳ ಮಾಹಿತಿಯನ್ನು ವಾಟ್ಸಾಪ್‌ ತಿಳಿಸಲಾಗುವುದಿಲ್ಲ ಎಂದು ವಾಟ್ಸಾಪ್‌ ವಕ್ತಾರರು ಮಾಹಿತಿ ನೀಡಿದ್ದಾರೆ. ಇಸ್ರೇಲ್‌ನ ಎನ್‌ಎಸ್‌ಒ ಗ್ರೂಪ್‌ನ ವಿರುದ್ಧ ವಾಟ್ಸಾಪ್‌ ಕಾನೂನು ಕ್ರಮ ಕೈಗೊಂಡಿದ್ದು, ಯುಎಸ್‌ ಫೆಡೆರಲ್‌ ಕೋರ್ಟ್‌ನಲ್ಲಿ ಪ್ರಕರಣ ದಾಖಲಿಸಿದೆ. ಬಳಕೆದಾರರ ಫೋನ್‌ನನ್ನು ನಿಗಾವಹಿಸಲು ವಿಶೇಷ ಲಿಂಕ್‌ನ್ನು ವಾಟ್ಸಾಪ್‌ ಮೂಲಕ ಕಳಿಸಲಾಗುತ್ತದೆ. ಈ ಲಿಂಕ್‌ ಕ್ಲಿಕ್‌ ಮಾಡಿದಲ್ಲಿ, ಹೊಸ ಸೆಕ್ಯುರಿಟಿ ಫೀಚರ್ ಫೋನ್‌ಗೆ ಇನ್‌ಸ್ಟಾಲ್‌ ಮಾಡುವಂತೆ ಸೂಚನೆ ಬರುತ್ತದೆ. ಈ ಫೀಚರ್ ಇನ್‌ಸ್ಟಾಲ್‌ ಮಾಡಿದಲ್ಲಿ ಬಳಕೆದಾರರ ಖಾಸಗಿ ಮಾಹಿತಿಗಳನ್ನು ತಿಳಿಯಲಾಗುತ್ತದೆ. ಮೆಸೇಜ್, ಪಾಸ್‌ವರ್ಡ್‌, ಕರೆ ಮಾಡಿದ ಮಾಹಿತಿ, ವಾಯ್ಸ್‌ ರೆಕಾರ್ಡ್‌ಗಳನ್ನು ಪಡೆಯಬಹುದಾಗಿದೆ. ಇದಲ್ಲದೆ ವಾಟ್ಸಾಪ್‌ಗೆ ಮಿಸ್ಡ್‌ ಕಾಲ್‌ ನೀಡುವ ಮೂಲಕವೂ ಈ ಫೋನ್‌ ಸರ್ವಿಲೆನ್ಸ್‌ನಲ್ಲಿ ಇಡುವ ತಂತ್ರಜ್ಞಾನವನ್ನು ಬಳಕೆ ಮಾಡಲಾಗಿದೆ. ಈ ವಿಧಾನದಲ್ಲಿ ಬಳಕೆದಾರರು ಲಿಂಕ್‌ಗೆ ಕ್ಲಿಕ್‌ ಮಾಡಿ, ಸೆಕ್ಯುರಿಟಿ ಫೀಚರ್ ಡೌನ್‌ಲೋಡ್‌ ಮಾಡುವ ಅಗತ್ಯವೂ ಇಲ್ಲವಾಗಿದೆ ಎಂದು ವಾಟ್ಸಾಪ್‌ ಕೋರ್ಟ್‌ಗೆ ವಿವರ ಸಲ್ಲಿಸಿದೆ. ಸುಮಾರು 1400 ಮಂದಿ ಬಳಕೆದಾರರ ಫೋನ್‌ಗಳನ್ನು ವಾಟ್ಸಾಪ್‌ ಮೂಲಕ ಸರ್ವಿಲೆನ್ಸ್‌ನಲ್ಲಿ ಇಡಲಾಗಿದೆ. ಇದು ವಾಟ್ಸಾಪ್‌ ನಿಯಮಗಳಿಗೆ ಬಾಹಿರವಾಗಿದ್ದು, ಯುಎಸ್‌ ಹಾಗೂ ಕ್ಯಾಲಿಫೋರ್ನಿಯಾದ ನಿಯಮಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ. ಇದೊಂದು ತಾಂತ್ರಿಕತೆಯ ದುರುಪಯೋಗವಾಗಿದೆ ಎಂದು ಕೋರ್ಟ್‌ನಲ್ಲಿ ಧಾವೆ ಹೂಡಲಾಗಿದೆ. ಈ ಆರೋಪವನ್ನು ಎನ್‌ಎಸ್‌ಒ ಗ್ರೂಪ್‌ ತಳ್ಳಿಹಾಕಿದ್ದು, ಈ ಸಾಫ್ಟ್‌ವೇರ್‌ನನ್ನು ಸರಕಾರಿ ಇಂಟಲಿಜೆನ್ಸ್‌ ಸಂಸ್ಥೆಗೆ ಕೆಲ ವರ್ಷಗಳ ಹಿಂದೆಯೇ ಮಾರಾಟ ಮಾಡಲಾಗಿದೆ. ಕೇವಲ ಉಗ್ರವಾದದ ವಿರುದ್ಧ ಹೋರಾಡಲು ಅಗತ್ಯವಾದ ಸಾಫ್ಟ್‌ವೇರ್‌ಗಳನ್ನಷ್ಟೇ ರೂಪುಗೊಳಿಸುತ್ತದೆ. ಹೀಗಾಗಿ ವಾಟ್ಸಾಪ್‌ನಿಂದ ಮಾಡಲಾಗಿರುವ ಆರೋಪಗಳ ಬಗ್ಗೆ ಕಾನೂನು ಹೋರಾಟ ನಡೆಸಲಾಗುವುದು. ಸಂಸ್ಥೆಯ ತಂತ್ರಜ್ಞಾನಗಳು ಮಾನವ ಹಕ್ಕುಗಳ ಕಾರ್ಯಕರ್ತರು, ಮಾಧ್ಯಮದ ವಿರುದ್ಧ ಕೆಲಸ ಮಾಡುವಂತೆ ರೂಪುಗೊಳಿಸಿಲ್ಲ. ಇದಕ್ಕಾಗಿಯೇ ಸಂಸ್ಥೆ ಅಭಿವೃದ್ಧಿ ಪಡಿಸಿದ ತಂತ್ರಜ್ಞಾನದಲ್ಲಿ ಹ್ಯೂಮನ್‌ ರೈಟ್ಸ್‌ ಪಾಲಿಸಿಯನ್ನು ಸೆಪ್ಟೆಂಬರ್‌ನಲ್ಲಿ ಅಳವಡಿಸಲಾಗಿದೆ
from India & World News in Kannada | VK Polls https://ift.tt/31V71WU
