ಎರಡು ದಿನಗಳ ರಿಯಾದ್‌ ಭೇಟಿಗಾಗಿ ಸೌದಿಗೆ ಆಗಮಿಸಿರುವ ಪ್ರಧಾನಿ, ತೈಲ ವ್ಯವಹಾರದೊಂದಿಗೆ ರಕ್ಷಣಾ ಸಹಕಾರಕ್ಕೂ ಸಂಬಂಧಿಸಿದ ಹಲವು ಒಪ್ಪಂದ ಮಾಡಿಕೊಳ್ಳುವ ಸೂಚನೆಯನ್ನು ನೀಡಿದ್ದಾರೆ. ಮಂಗಳವಾರ ನಡೆದ 'ದಾವೋಸ್‌ ಇನ್‌ ಡೆಸರ್ಟ್‌' ಹೂಡಿಕೆ ಸಮಾವೇಶದಲ್ಲಿ ಭಾಗವಹಿಸಿದ ಪ್ರಧಾನಿ ಮೋದಿ, ಸೌದಿ ಅರೇಬಿಯದ ದೊರೆ ಸಲ್ಮಾನ್‌ ಬಿನ್‌ ಅಬ್ದುಲಜೀಜ್‌ ಅಲ್‌ ಸೌದ್‌, ತೈಲ ಸಚಿವ, ಕಾರ್ಮಿಕ ಸಚಿವ, ಪರಿಸರ ಸಚಿವ ಹಾಗೂ ಜೋರ್ಡಾನ್‌ನ ದೊರೆ ಕಿಂಗ್‌ ಅಬ್ದುಲ್ಲಾರನ್ನು ಭೇಟಿಯಾದರು. ಮತ್ತು ಸೌದಿ ಅರೇಬಿಯಾದ ಸ್ನೇಹ ಸಂಬಂಧ ವೃದ್ಧಿಯಾಗುತ್ತಿದ್ದು, ಅದಕ್ಕೆ ಸಾಕ್ಷಿಯೆಂಬಂತೆ ವ್ಯೂಹಾತ್ಮಕ ಸಹಭಾಗಿತ್ವ ಸಮಿತಿ ರಚನೆ, ಭಾರತೀಯ ವಲಸಿಗರ ಅತ್ಯುತ್ತಮ ನಿರ್ವಹಣೆ ಮತ್ತು ತೈಲ ರಿಸರ್ವ್‌ ಭಾಗೀದಾರಿಕೆಗೆ ಅವಕಾಶ ಕಲ್ಪಿಸುತ್ತಿರುವುದು ನಮ್ಮ ಕಣ್ಣ ಮುಂದಿವೆ. 1. ವ್ಯೂಹಾತ್ಮಕ ಸಹಭಾಗಿತ್ವ ಸಮಿತಿ: ಇದು ಕಳೆದ ಫೆಬ್ರವರಿಯಲ್ಲಿ ಪ್ರಿನ್ಸ್‌ ಮೊಹಮ್ಮದ್‌ ಭಾರತಕ್ಕೆ ಭೇಟಿ ನೀಡಿದಾಗ ಸ್ಥಾಪನೆಯಾದ ಸಮಿತಿ. ಸೌದಿಯ ರಾಜಕುಮಾರ ಹಾಗೂ ಭಾರತದ ಪ್ರಧಾನಿ ಇದರ ಮುಖ್ಯಸ್ಥರು. ಎರಡೂ ದೇಶಗಳಿಂದ ಉಭಯ ಕಡೆಗಳಲ್ಲಿ ನಡೆಯುವ ಯೋಜನೆಗಳ ಸಮಗ್ರ ಮೇಲ್ವಿಚಾರಣೆ ಇದರ ಹೊಣೆ. ಇದರಲ್ಲಿ ಎರಡು ವಿಭಾಗಗಳಿದ್ದು, ವಿತ್ತ ಸಚಿವರ ವಿಭಾಗವು ವಾಣಿಜ್ಯ ವ್ಯವಹಾರಗಳನ್ನು ಹಾಗೂ ವಿದೇಶಾಂಗ ಸಚಿವರ ವಿಭಾಗವು ವಿದೇಶಾಂಗ ವ್ಯವಹಾರಗಳನ್ನು ನೋಡಿಕೊಳ್ಳುತ್ತದೆ. 2. ಭಾರತೀಯ ವಲಸಿಗರ ನಿರ್ವಹಣೆ: ಭಾರತದ ಇ-ಮೈಗ್ರೇಟ್‌ ಹಾಗೂ ಸೌದಿ ಅರೇಬಿಯದ ಇ-ತೌತೀಕ್‌ ಆನ್‌ಲೈನ್‌ ವ್ಯವಸ್ಥೆಗಳು ಭಾರತದಿಂದ ಸೌದಿಗೆ ಹೋಗುವ ಕೆಲಸಗಾರರ ನಿರ್ವಹಣೆ, ಯೋಗಕ್ಷೇಮಗಳನ್ನು ನೋಡಿಕೊಳ್ಳುತ್ತದೆ. ಈ ವ್ಯವಸ್ಥೆಯನ್ನು ಇನ್ನಷ್ಟು ಕಾರ್ಮಿಕಸ್ನೇಹಿ ಹಾಗೂ ಬಂಡವಾಳಸ್ನೇಹಿಯಾಗಿಸುವುದು ಈ ಒಪ್ಪಂದದಲ್ಲಿದೆ. ಭಾರತದ ರುಪೇ ಪಾವತಿ ಕಾರ್ಡನ್ನು ಸೌದಿಯಲ್ಲಿ ಪರಿಚಯಿಸುವುದು, ಅದರ ಮೂಲಕ ಅಲ್ಲಿನ ವಸಲಿಗರು ಮಾತೃದೇಶದೊಂದಿಗೆ ಹಣಕಾಸಿನ ಸಂಬಂಧ ಕಲ್ಪಿಸಲು ಅನುಕೂಲ ಮಾಡಿಕೊಡುವ ವ್ಯವಸ್ಥೆಯನ್ನು ಏರ್ಪಡಿಸಲಾಗುತ್ತಿದೆ. 3. ತೈಲ ರಿಸರ್ವ್‌: ದೇಶದ ವ್ಯೂಹಾತ್ಮಕ ತೈಲ ರಿಸರ್ವ್‌ನಲ್ಲಿ ಸೌದಿಯ ಆರಾಮ್ಕೋ ಸಂಸ್ಥೆಗೆ ಭಾಗೀದಾರಿಕೆ ಪಡೆಯಲು ಅವಕಾಶ ಕಲ್ಪಿಸಲಾಗುತ್ತಿದೆ. ರಕ್ಷಣಾ ಕಾರ್ಯಾಚರಣೆಗಳಿಗೆ ಅಗತ್ಯವಾದ ದೊಡ್ಡ ಪ್ರಮಾಣದ ತೈಲ ಸಂಗ್ರಹವನ್ನು ಮಾಡಿಕೊಳ್ಳಲು ಭಾರತಕ್ಕೆ ಆರಾಮ್ಕೋ ನೆರವಾಗಲಿದೆ. ಇದರ ಜೊತೆಗೆ ನಮ್ಮ ಮಹಾರಾಷ್ಟ್ರದ ರಾಯಗಢದಲ್ಲಿ ಕಚ್ಚಾ ತೈಲದ ದೊಡ್ಡ ರಿಫೈನರಿಯನ್ನು ತೆರೆಯಲೂ ಸೌದಿ ನೆರವಾಗಲಿದೆ. ಸೌದಿಯ ಅಲ್‌ ಜೇರಿ ಗ್ರೂಪ್‌ ಹಾಗೂ ಇಂಡಿಯನ್‌ ಆಯಿಲ್‌ ಕಾರ್ಪೊರೇಶನ್‌ಗಳು ಜೊತೆ ಸೇರಿ ಉಭಯ ದೇಶಗಳಲ್ಲಿ ತೈಲ ಕೇಂದ್ರಗಳನ್ನು ತೆರೆಯಲಿವೆ.
from India & World News in Kannada | VK Polls https://ift.tt/34bgmvc
