ಹೊಸದಿಲ್ಲಿ: ಏಕದಿನ ವಿಶ್ವಕಪ್ ಸೆಮಿಫೈನಲ್ ಸೋಲಿನ ಬಳಿಕ ಕ್ರಿಕೆಟ್ ರಂಗದಿಂದ ದೂರವಾಗಿರುವ ಮಾಜಿ ನಾಯಕ ಹಾಗೂ ಹಿರಿಯ ಅನುಭವಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಯಾವಾಗ ಮರಳಲಿದ್ದಾರೆ ಅಥವಾ ನಿವೃತ್ತಿ ಸಲ್ಲಿಸುವರೇ ಎಂಬುದು ಬಹಳಷ್ಟು ಚರ್ಚೆಗೆ ಗ್ರಾಸವಾಗಿದೆ. ಬಾಂಗ್ಲಾದೇಶ ವಿರುದ್ಧದ ಟ್ವೆಂಟಿ-20 ಸರಣಿಗೂ ಧೋನಿ ಆಯ್ಕೆಯನ್ನು ಪರಿಗಣಿಸಲಾಗಿಲ್ಲ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಆಯ್ಕೆ ಸಮಿತಿ ಮುಖ್ಯಸ್ಥ ಎಂಎಸ್ಕೆ ಪ್ರಸಾದ್, ನಾವು ಧೋನಿಯಿಂದ ಮುಂದಕ್ಕೆ ಸಾಗುತ್ತಿದ್ದು, ಭವಿಷ್ಯದ ರೋಡ್ಮ್ಯಾಪ್ ಸ್ಪಷ್ಟವಾಗಿದೆ ಎಂದು ಹೇಳಿದ್ದರು. ರಿಷಬ್ ಪಂತ್ ಅವರಂತಹ ಯುವ ವಿಕೆಟ್ ಕೀಪರ್ಗಳನ್ನು ಬೆಂಬಲಿಸಿ ಹೆಚ್ಚಿನ ಅವಕಾಶ ನೀಡಲಿದ್ದೇವೆ ಎಂಬದನ್ನು ಪ್ರಸಾದ್ ಸ್ಪಷ್ಟಪಡಿಸಿದ್ದರು. ಇದರಿಂದಾಗಿ ಇನ್ನೊಂದು ಬಾರಿ ಧೋನಿ ಕಮ್ಬ್ಯಾಕ್ ಸಾಧ್ಯವೇ ಎಂಬುದು ಬಹಳಷ್ಟು ಗೊಂದಲಕ್ಕೀಡು ಮಾಡಿದೆ. ಈ ಮಧ್ಯೆ ಯಾವಾಗ ನಿವೃತ್ತಿ ಸಲ್ಲಿಸಬೇಕೆಂಬ ಹಕ್ಕು ಧೋನಿ ಅವರಿಗಿದೆ ಎಂದು ಕೋಚ್ ಅಭಿಪ್ರಾಯಪಟ್ಟಿದ್ದಾರೆ. ವಿಜಯ ಕರ್ನಾಟಕ ಸೋದರ ಸಂಸ್ಥೆ ಟೈಮ್ಸ್ ಆಫ್ ಇಂಡಿಯಾಗೆ ನೀಡಿದ ಸಂದರ್ಶನದಲ್ಲಿ ರವಿ ಶಾಸ್ತ್ರಿ ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಮಹೇಂದ್ರ ಸಿಂಗ್ ಧೋನಿ ಬಗ್ಗೆ ಕಾಮೆಂಟ್ ಮಾಡುವವರು ತಮ್ಮ ಶೂ ಲೇಸ್ ಸಹ ಕಟ್ಟಲು ಸಾಧ್ಯವಿಲ್ಲ. ನೋಡಿ, ಅವರು ದೇಶಕ್ಕಾಗಿ ಏನನ್ನು ಸಾಧಿಸಿದ್ದಾರೆಂಬುದನ್ನು? ಅವರು ಬಿಟ್ಟು ಹೋಗಲು ಜನರು ಆತುರದಲ್ಲಿದ್ದಾರೆ ಏಕೆ? ಬಹುಶ: ಅವರ ಬಗ್ಗೆ ಮಾತನಾಡುವ ಅವಕಾಶ ಸಿಗುವುದಿಲ್ಲ. ಧೋನಿ ಹಾಗೂ ಅವರ ಬಗ್ಗೆ ಗೊತ್ತಿರುವ ಪ್ರತಿಯೊಬ್ಬರಿಗೂ ಅವರು ಬೇಗನೇ ಹೋಗಲಿದ್ದಾರೆ ಎಂಬುದು ತಿಳಿದಿದೆ. ಆದ್ದರಿಂದ ಅದು ಸಂಭವಿಸುವಾಗ ಸಂಭವಿಸಲಿ ಎಂದು ವಿವರಿಸಿದರು. ಧೋನಿ ಬಗ್ಗೆ ಹೇಳಿಕೆಗಳನ್ನು ನೀಡಿ ಅಗೌರವ ತೋರಬಾರದು. ಭಾರತಕ್ಕಾಗಿ 15 ವರ್ಷ ಆಡಿದ ಬಳಿಕ ಯಾವುದು ಸರಿಯಾದ ಕೆಲಸ ಎಂಬುದು ಅವರಿಗೆ ತಿಳಿದಿಲ್ಲವೇ? ಟೆಸ್ಟ್ ಕ್ರಿಕೆಟ್ನಿಂದ ಯಾವಾಗ ನಿವೃತ್ತಿ ಸಲ್ಲಿಸಬೇಕು? ಎಂದು ಶಾಸ್ತ್ರಿ ಬೊಟ್ಟು ಮಾಡಿದರು. ನಾಲ್ಕು ವರ್ಷಗಳ ಹಿಂದೆ ಟೆಸ್ಟ್ ಕ್ರಿಕೆಟ್ಗೆ ನಿವೃತ್ತಿ ಸಲ್ಲಿಸಿದಾಗ ವೃದ್ಧಿಮಾನ್ ಸಹ ವಿಕೆಟ್ ಕೀಪಿಂಗ್ ಜವಾಬ್ದಾರಿ ನಿಭಾಯಿಸಲು ಸಮರ್ಥರಾಗಿದ್ದಾರೆ ಎಂದು ಹೇಳಿದ್ದರು. ಧೋನಿ ನಿರ್ಧಾರ ಸರಿಯಾಗಿಯೇ ಇತ್ತು. ತಂಡದ ಪಾಲಿಗೆ ಅವರು ನೆರಳಾಗಿದ್ದಾರೆ. ಯಾವತ್ತೂ ತಮ್ಮ ಅನುಭವವನ್ನು ಹಂಚಿಕೊಳ್ಳುತ್ತಾರೆ ಎಂದರು. ರಾಂಚಿ ಟೆಸ್ಟ್ ಪಂದ್ಯದ ಬಳಿಕ ಡ್ರೆಸ್ಸಿಂಗ್ ಕೊಠಡಿಗೆ ಆಗಮಿಸಿದ ಧೋನಿ, ಡೆಬ್ಯು ಬೌಲರ್ ಶಹಬಾಜ್ ನದೀಂಗೆ ಸಲಹೆಗಳನ್ನು ನೀಡಿದರು. ತವರಿನ ಮೈದಾನದಲ್ಲಿ ಡೆಬ್ಯು ಬೌಲರ್ನ್ನು ಹೇಗೆ ಹುರಿದುಂಬಿಸುತ್ತಿದ್ದಾರೆ ನೋಡಿ, ನಾನಿದನ್ನು ಖಡಾಖಂಡಿತವಾಗಿ ಹೇಳುತ್ತೇನೆ. ಯಾವಾಗ ನಿವೃತ್ತಿ ಸಲ್ಲಿಸಬೇಕೆಂಬ ಹಕ್ಕು ಧೋನಿ ಅವರಿಗಿದೆ. ಹಾಗಾಗಿ ಈ ಬಗೆಗಿನ ಚರ್ಚೆಯು ಇಲ್ಲಿಗೆ ಕೊನೆಗೊಳ್ಳಲಿ ಎಂದು ಉತ್ತರಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/366hli7
