ಕೋಲ್ಕೊತಾ: ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ () ನೂತನ ಅಧ್ಯಕ್ಷರಾಗಿ ಪದಗ್ರಹಣ ಮಾಡಿದ ಕೇವಲ ಒಂದು ವಾರದೊಳಗೆ ಮಾಜಿ ನಾಯಕ ಇತಿಹಾಸದ ಪುಟ ಸೇರಿದ್ದಾರೆ. ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿಯೆಂಬಂತೆ ಕೋಲ್ಕೊತಾದಲ್ಲಿ ಡೇ-ನೈಟ್ ಟೆಸ್ಟ್ ಪಂದ್ಯವು ಆಯೋಜನೆಯಾಗಲಿದೆ. ಇದುವರೆಗೆ ಅಹರ್ನಿಶಿ ಟೆಸ್ಟ್ ಪಂದ್ಯಕ್ಕೆ ವಿರೋಧ ವ್ಯಕ್ತಪಡಿಸುತ್ತಲೇ ಬಂದಿರುವ ಟೀಮ್ ಇಂಡಿಯಾ ಕೊನೆಗೂ ಗುಲಾಬಿ ಚೆಂಡಿನಾಟಕ್ಕೆ ಹಸಿರು ನಿಶಾನೆ ತೋರಿದೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವೆ ಈಡನ್ ಗಾರ್ಡೆರ್ನ್ಸ್‌ನಲ್ಲಿ ನವೆಂಬರ್ 22ರಿಂದ 26ರ ವರೆಗೆ ಐತಿಹಾಸಿಕ ಅಹರ್ನಿಶಿ ಟೆಸ್ಟ್ ಪಂದ್ಯವು ನಡೆಯಲಿದೆ. ಇದರಂತೆ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಜತೆಗೆ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ಮನವೊಳಿಸುವಲ್ಲಿ ಗಂಗೂಲಿ ಯಶಸ್ವಿಯಾಗಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ದಾದಾ, "ಇದೇ ನನ್ನ ಕರ್ತವ್ಯ, ಅದಕ್ಕಾಗಿಯೇ ಇಲ್ಲಿದ್ದೇನೆ" ಎಂದು ತಿಳಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್‌ಗೆ ಪುನಶ್ಚೇತನ ನೀಡುವುದು ಗಂಗೂಲಿ ಉದ್ದೇಶವಾಗಿದೆ. "ನಾನು ಅನೇಕ ವರ್ಷಗಳ ಕಾಲ ಕ್ರಿಕೆಟ್ ಆಡಿದ್ದೇನೆ. ನನಗನಿಸುತ್ತಿದೆ ಸಾಮಾನ್ಯ ಜ್ಞಾನ ಮುಖ್ಯ. ಟೆಸ್ಟ್ ಕ್ರಿಕೆಟ್ ಪಾಲಿಗೆ ಇದೊಂದು ಉತ್ತಮ ನಡೆಯಾಗಿದ್ದು, ಪ್ರೇಕ್ಷಕರು ಮತ್ತೆ ಸ್ಟೇಡಿಯಂನತ್ತ ಮರಳುವ ನಂಬಿಕೆಯಿಂದೆ" ಎಂದರು. "ಟೆಸ್ಟ್ ಕ್ರಿಕೆಟ್‌ಗೆ ಉತ್ತೇಜನದ ಅಗತ್ಯವಿತ್ತು. ನಾನು ಹಾಗೂ ಕಾರ್ಯದರ್ಶಿ ಜಯ್ ಶಾ ಸೇರಿದಂತೆ ನಮ್ಮ ತಂಡ ಈ ನಿರ್ಧಾರಕ್ಕೆ ಬದ್ದರಾಗಿದ್ದೇವೆ. ಈ ವೇಳೆಯಲ್ಲಿ ನಾಯಕ ವಿರಾಟ್ ಕೊಹ್ಲಿಗೂ ಧನ್ಯವಾದ ಹೇಳಲಿಚ್ಛಿಸುತ್ತೇನೆ. ನಮ್ಮ ಪ್ರಸ್ತಾಪವನ್ನು ಯಾವುದೇ ವಿರೋಧವಿಲ್ಲದೆ ಒಪ್ಪಿಕೊಂಡರು. ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿಯೂ ಒಪ್ಪಿಗೆ ಸೂಚಿಸಿದೆ. ಒಟ್ಟಾರೆಯಾಗಿ ಉತ್ತಮ ನಡೆಯಾಗಿದೆ" ಎಂದರು. "ಇದು ಏಷ್ಯಾ ಉಪಖಂಡದಲ್ಲಿ ಟೆಸ್ಟ್ ಕ್ರಿಕೆಟ್ ಪಾಲಿಗೆ ಉತ್ತಮ ಆರಂಭವಾಗಿರಲಿದೆ. ನಾವು ಉತ್ತಮ ಉದ್ದೇಶವನ್ನು ಇಟ್ಟುಕೊಂಡಿದ್ದೇವೆ. ಯಾವುದೇ ರೀತಿಯ ಸಮಸ್ಯೆಗಳು ಎದುರಾಗಿಲ್ಲ. ಎಲ್ಲವೂ ಸರಿಯಾಗಿ ನಡೆಯಲಿದೆ" ಎಂದು ಗಂಗೂಲಿ ವಿವರಿಸಿದರು. ಆಸಕ್ತಿದಾಯಕ ಸಂಗತಿಯೆಂದರೆ 2016ರಲ್ಲಿ ಸೌರವ್ ಗಂಗೂಲಿ ಬಂಗಾಳ ಕ್ರಿಕೆಟ್ ಸಂಸ್ಥೆಯ (ಸಿಎಬಿ) ಅಧ್ಯಕ್ಷರಾದ ಸಂದರ್ಭದಲ್ಲೇ ಮೊದಲ ಬಾರಿಗೆ ಗುಲಾಬಿ ಚೆಂಡಿನಾಟವನ್ನು ಪರಿಚಯಿಸಲಾಗಿತ್ತು. ಅಂದು ಮೊಹನ್ ಬಗಾನ್ ಹಾಗೂ ಬೋವನ್‌ಪೂರ್ ನಡುವಣ ಸೂಪರ್ ಲೀಗ್ ಪಂದ್ಯದಲ್ಲಿ ವೃದ್ಧಿಮಾನ್ ಸಹಾ ಹಾಗೂ ಮೊಹಮ್ಮದ್ ಶಮಿ ಭಾಗಿಯಾಗಿದ್ದರು. ಬಳಿಕ 2016, 2017 ಹಾಗೂ 2018ನೇ ಸಾಲಿನಲ್ಲಿ ಬಿಸಿಸಿಐ ದುಲೀಪ್ ಟ್ರೋಫಿನಲ್ಲೂ ಪಿಂಕ್ ಬಾಲ್ ಪರಿಚಯಿಸಿತ್ತು. ಈಗಿನ ಭಾರತ ತಂಡದಲ್ಲಿರುವ ಮಯಾಂಕ್ ಅಗರ್ವಾಲ್, ರವಿಚಂದ್ರನ್ ಅಶ್ವಿನ್, ಕುಲ್‌ದೀಪ್ ಯಾದವ್ ಮತ್ತು ಇಶಾಂತ್ ಶರ್ಮಾ ಇದರ ಭಾಗವಾಗಿದ್ದರು. ಮಂಜಿನಿಂದಾಗಿ ಸ್ಪಿನ್ನರ್‌ಗಳಿಗೆ ತೊಂದರೆ ಎದುರಾಗುತ್ತಿದೆ ಎಂಬ ಬಗ್ಗೆ ಆರೋಪಗಳು ಎದ್ದಿದ್ದವು. ಇದರಿಂದ ಪಿಂಕ್ ಚೆಂಡಿನಾಟಕ್ಕೆ ಹಿನ್ನಡೆಯಾಗಿದೆ. ಆದರೆ ಮಂಜಿನಿಂದ ಯಾವುದೇ ತೊಂದರೆ ಎದುರಾಗದಂತೆ ನೋಡಿಕೊಳ್ಳಲಾಗುವುದು ಎಂದು ಗಂಗೂಲಿ ಭರವಸೆ ನೀಡಿದರು. ಅದೇ ಹೊತ್ತಿಗೆ 'ಎಸ್‌ಜಿ ಟೆಸ್ಟ್' ಗುಲಾಬಿ ಬಣ್ಣದ ಚೆಂಡನ್ನು ಬಳಕೆ ಮಾಡುವಂತೆ ಸೂಚನೆ ನೀಡಿದ್ದಾರೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವಣ ಐತಿಹಾಸಿಕ ಟೆಸ್ಟ್ ಪಂದ್ಯಕ್ಕೆ ಬಾಂಗ್ಲಾ ಪ್ರಧಾನಿ ಕೂಡಾ ಸಾಕ್ಷಿಯಾಗಲಿದ್ದಾರೆ. ಜತೆಗೆ ಒಲಿಂಪಿಕ್‌ನಲ್ಲಿ ಅಮೋಘ ಸಾಧನೆ ಮಾಡಿರುವ ಅಭಿನವ್ ಬಿಂದ್ರಾ, ಎಸಿ ಮೇರಿ ಕೋಮ್ ಮತ್ತು ಪಿವಿ ಸಿಂಧೂ ಅವರನ್ನು ಸನ್ಮಾನಿಸಲಾಗುವುದು. ಅಂದ ಹಾಗೆ ಅಂತಾರಾಷ್ಟ್ರೀಯವಾಗಿ ಇದುವರೆಗೆ 11 ಡೇ-ನೈಟ್ ಟೆಸ್ಟ್ ಪಂದ್ಯಗಳು ನಡೆದಿವೆ. 2015ರಲ್ಲಿ ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲೆಂಡ್ ನಡುವೆ ಮೊದಲ ಅಹರ್ನಿಶಿ ಟೆಸ್ಟ್ ಪಂದ್ಯವು ಆಯೋಜನೆಯಾಗಿತ್ತು. ಕೊನೆಯದಾಗಿ ಆಸ್ಟ್ರೇಲಿಯಾ ಹಾಗೂ ಶ್ರೀಲಂಕಾ ತಂಡಗಳು ಜನವರಿ ತಿಂಗಳಲ್ಲಿ ಡೇ-ನೈಟ್ ಟೆಸ್ಟ್ ಪಂದ್ಯದಲ್ಲಿ ಭಾಗವಹಿಸಿತ್ತು. ಕಳೆದ ವರ್ಷ ಡೇ-ನೈಟ್ ಟೆಸ್ಟ್ ಪಂದ್ಯವನ್ನು ಆಡುವಂತೆ ಆಸ್ಟ್ರೇಲಿಯಾ ವಿನಂತಿ ಮಾಡಿದ್ದರೂ ಭಾರತ ನಿರಾಕರಿಸಿತ್ತು. ಆದರೆ ಗಂಗೂಲಿ ಬಿಸಿಸಿಐ ಅಧ್ಯಕ್ಷ ಗಾದಿಗೇರಿದ ಬೆನ್ನಲ್ಲೇ ಚಿತ್ರಣ ಬದಲಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2osewXy
