ಪ್ಯಾರಿಸ್‌: ನಿರೀಕ್ಷೆಗೂ ಮೀರಿದ ಪ್ರದರ್ಶನ ನೀಡಿದ ಭಾರತದ ಡಬಲ್ಸ್‌ ಜೋಡಿ ಮತ್ತು , ಇಲ್ಲಿ ನಡೆಯುತ್ತಿರುವ ವಿಶ್ವ ಟೂರ್‌ ಸೂಪರ್‌ 750 ಫ್ರೆಂಚ್‌ ಓಪನ್‌ ಟೂರ್ನಿಯ ಫೈನಲ್‌ಗೆ ದಾಪುಗಾಲಿಟ್ಟಿದ್ದಾರೆ. ಒಟ್ಟಾರೆ 5 ಕೋಟಿ ರೂ. ಬಹುಮಾನ ಮೊತ್ತ ಹೊಂದಿರುವ ಟೂರ್ನಿಯ ಪುರುಷರ ಡಬಲ್ಸ್‌ ವಿಭಾಗದ ಸೆಮಿಫೈನಲ್‌ ಪಂದ್ಯದಲ್ಲಿ ಮಿಂಚಿನ ಆಟವಾಡಿದ ಸಾತ್ವಿಕ್‌-ಚಿರಾಗ್‌ ಜೋಡಿ, 21-11, 25-23 ಅಂತರದ ನೇರ ಗೇಮ್‌ಗಳಿಂದ 5ನೇ ಶ್ರೇಯಾಂಕಿತ ಜೋಡಿ ಜಪಾನ್‌ನ ಹಿರೊಯುಕಿ ಎನ್ಡೋ ಮತ್ತು ಯುಟೊ ವತಾಂಬೆಗೆ ಆಘಾತ ನೀಡಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದಿದೆ. ಸಾತ್ವಿಕ್‌ ಮತ್ತು ಚಿರಾಗ್‌ ಈ ವರ್ಷ ಫೈನಲ್‌ ತಲುಪಿರುವ ಎರಡನೇ ಟೂರ್ನಿ ಇದಾಗಿದೆ. ವಿಶ್ವದ 11ನೇ ಶ್ರೇಯಾಂಕ ಹೊಂದಿರುವ ಸಾತ್ವಿಕ್‌ ಮತ್ತು ಚಿರಾಗ್‌ ಜೋಡಿ, ಇದೇ ವರ್ಷ ಥಾಯ್ಲೆಂಡ್‌ ಓಪನ್‌ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದು ಮಿಂಚು ಮೂಡಿಸಿದ್ದರು. ಇದೀಗ ತಮ್ಮ ಎರಡನೇ ಫೈನಲ್‌ನಲ್ಲೂ ಪ್ರಶಸ್ತಿ ಗೆಲುವನ್ನು ಎದುರು ನೋಡುತ್ತಿದ್ದಾರೆ. ಆದರೆ, ಭಾರತೀಯ ಜೋಡಿಗೆ ಈ ಹಾದಿ ಅಷ್ಟು ಸುಲಭವಾಗಿಲ್ಲ. ಏಕೆಂದರೆ ಫೈನಲ್‌ ಪಂದ್ಯದಲ್ಲಿ ವಿಶ್ವದ ನಂ.1 ಶ್ರೇಯಾಂಕ ಹೊಂದಿರುವ ಮಾರ್ಕಸ್ ಫರ್ನಾಲ್ಡಿ ಗಿಡೆಯೊನ್‌ ಮತ್ತು ಕೆವಿನ್‌ ಸಂಜಯ ಸುಕಮುಲ್ಜೊ ಅವರ ಕಠಿಣ ಸವಾಲು ಎದುರಿಸಲಿದ್ದಾರೆ. ಇಂಡೊನೇಷ್ಯಾದ ಈ ಜೋಡಿ ಭಾರತೀಯ ಆಟಗಾರರ ಮುಖಾಮುಖಿ ದಾಖಲೆಯಲ್ಲಿ 6-0 ಅಂತರದ ಮೇಲುಗೈ ಹೊಂದಿದ್ದಾರೆ. ಈ ಮಧ್ಯೆ ಮಹಿಳಾ ಸಿಂಗಲ್ಸ್‌ ವಿಭಾಗದಲ್ಲಿ ಭಾರತೀಯರ ಅಭಿಯಾನ ಕೊನೆಗೊಂಡಿದ್ದು ಸ್ಟಾರ್‌ಗಳಾದ ಪಿವಿ ಸಿಂಧೂ ಮತ್ತು ಸೈನಾ ನೆಹ್ವಾಲ್‌ ಕ್ವಾರ್ಟರ್‌ಫೈನಲ್ಸ್‌ ಹಂತದಲ್ಲಿ ತಮ್ಮ ಹೋರಾಟ ಕೊನೆಗೊಳಿಸಿದ್ದಾರೆ. ಸತತ ಮೂರು ಟೂರ್ನಿಗಳಲ್ಲಿ ಆರಂಭಿಮ ಸುತ್ತಿನಲ್ಲೇ ಸೋತು ನಿರಾಸೆ ಅನುಭವಿಸಿದ್ದ ಸೈನಾ ಮತ್ತು ಸಿಂಧೂ, ಅಂಗಣದಲ್ಲಿ ಕ್ವಾರ್ಟರ್‌ಫೈನಲ್ಸ್‌ಗೆ ಕಾಲಿಟ್ಟು ಪ್ರಶಸ್ತಿ ಗೆಲ್ಲುವ ಭರವಸೆ ಮೂಡಿಸಿದ್ದರು. ಆದರೆ, ಸ್ಥಿರತೆ ಕಾಯ್ಉಕೊಳ್ಳಲಾಗದೆ ಸ್ಪರ್ಧೆಯಿಂದ ಹೊರಬಿದ್ದಿದ್ದಾರೆ. ಸೈನಾ ನೆಹ್ವಾಲ್‌, ದಕ್ಷಿಣ ಕೊರಿಯಾದ ಆಟಗಾರ್ತಿ ಆನ್‌ ಸೆ ಯಂಗ್‌ 20-22, 21-23 ವಿರುದ್ಧ ಸೋಲುಂಡರು. ಮತ್ತೊಂದೆಡೆ ಹಾಲಿ ವಿಶ್ವ ಚಾಂಪಿಯನ್‌ ಸಿಂಧೂ, ತೈವಾನ್‌ನ ಆಟಗಾರ್ತಿ ತಾಯ್‌ ತ್ಸು ಯಿಂಗ್‌ ವಿರುದ್ಧ 16-21, 26-14, 17-21ರಲ್ಲಿ ಸೋಲೊಪ್ಪಿಕೊಂಡರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2BIPtme
