ನವದೆಹಲಿ: ಪ್ರಾರಂಭವಾದ ಒಂದೇ ದಿನಕ್ಕೆ ದೆಹಲಿಯಲ್ಲಿ ಮಬ್ಬು ಕವಿಯಲು ಆರಂಭಿಸಿದೆ. ಮೊದಲೇ ತೀವ್ರ ವಾಯುಮಾಲಿನ್ಯ ಎದುರಿಸುತ್ತಿರುವ ರಾಷ್ಟ್ರ ರಾಜಧಾನಿ , ಇದಿಗ ದೀಪಾವಳಿಯ ಪಟಾಕಿಗಳ ಹೊಗೆಯಿಂದ ಮತ್ತಷ್ಟು ಗಂಭೀರ ಸ್ಥಿತಿ ತಲುಪಿದೆ. ಆದರೆ ಸೂಚ್ಯಂಕ ಕಳೆದ ಮೂರು ವರ್ಷಗಳಿಗಿಂತ ಸ್ವಲ್ಪ ಮಟ್ಟಿಗೆ ಸುಧಾರಿಸಿದೆ. ವಿಪರೀತ ವಾಯುಮಾಲಿನ್ಯದಿಂದಾಗಿ ತತ್ತರಿಸಿಹೋಗಿರುವ ದೆಹಲಿಗೆ ಮತ್ತೆ ದೀಪಾವಳಿ ಪಟಾಕಿಗಳ ಹೆಚ್ಚುವರಿಯಾಗಿ ಸೇರುತ್ತಿದೆ. ಇದನ್ನು ಮನಗಂಡೇ ಸುಪ್ರೀಂ ಕೋರ್ಟ್ ಪಟಾಕಿ ಸಿಡಿಸಲು ಸಮಯ ನಿಗದಿ ಮಾಡಿತ್ತು. ಕೇವಲ ಹಸಿರು ಪಟಾಕಿಗಳನ್ನು ಅಂದರೆ, ಶೇ.30ರಷ್ಟು ಕಡಿಮೆ ಮಾಲಿನ್ಯ ಉಂಟುಮಾಡುವ ಪಟಾಕಿಗಳನ್ನಷ್ಟೇ ಸಿಡಿಸಲು ಕೋರ್ಟ್ ಆದೇಶ ನೀಡಿತ್ತು. ಆದರೆ, ಕೋರ್ಟ್ ಆದೇಶವನ್ನು ಮೀರಿ ಹೆಚ್ಚಿನ ಕಾಲ ಪಟಾಕಿ ಸಿಡಿಸಲಾಗುತ್ತಿದೆ. ದೆಹಲಿಯ ಮಾಲಿನ್ಯ ನಿಯಂತ್ರಣ ಮಂಡಳಿಯ ಮಾಹಿತಿಯಂತೆ, ಸೋಮವಾರ ವಾಯು ಗುಣಮಟ್ಟ ಸೂಚ್ಯಂಕ (ಎಕ್ಯುಐ) ಗಣನೀಯ ಪ್ರಮಾಣದಲ್ಲಿ ಕುಸಿದೆ. ದೆಹಲಿ ವಿಶ್ವವಿದ್ಯಾಲಯದ ಬಳಿ ಒಂದು ಘನ ಮೀಟರ್‌ ಗಾಳಿಯಲ್ಲಿ 2.5 ಮೈಕ್ರಾನ್‌ಗಿಂತ ಕಡಿಮೆ ಗಾತ್ರದ ಸೂಕ್ಷ್ಮಕಣಗಳ ಪ್ರಮಾಣ 735ರಷ್ಟಿದೆ. ವಾಯು ಗುಣಮಟ್ಟ, ಹವಾಮಾನ ಮುನ್ಸೂಚನೆ ಮತ್ತು ಸಂಶೋಧನಾ ವ್ಯವಸ್ಥೆ (SAFAR)ಪ್ರಕಾರ ಸೋಮವಾರ ಬೆಳಗ್ಗೆ 11:30 ರ ವೇಳೆಗೆ ವಾಯು ಗುಣಮಟ್ಟ ಸೂಚ್ಯಂಕ () 463ಕ್ಕೆ ಕುಸಿದೆ. ಇದು ವಿಶ್ವ ಆರೋಗ್ಯ ಸಂಸ್ಥೆ ನಿಗದಿಮಾಡಿರುವ ಅಪಾಯಕಾರಿ ಮಟ್ಟಕ್ಕಿಂತಲೂ ಹಲವು ಪಟ್ಟು ಹೆಚ್ಚಿದೆ. ಆದರೆ ಕಳದ ಮೂರು ವರ್ಷಗಳಲ್ಲಿ ಇದೇ ಸಮಯದಲ್ಲಿ ಇದ್ದ ವಾಯು ಗುಣಮಟ್ಟಕ್ಕೆ ಹೋಲಿಸಿದರೆ ಸ್ವಲ್ಪ ಪ್ರಮಾಣದ ಸುಧಾರಣೆ ಕಂಡಿದೆ. ದೆಹಲಿಯ ಹಲವಾರು ಪ್ರದೇಶಗಳಲ್ಲಿ ವಾಯು ಗುಣಮಟ್ಟ ಸೂಚ್ಯಂಕ ಕುಸಿದೆ. ಪೂಸಾ ಬಳಿ 480, ಲೂದಿ ರಸ್ತೆ 436, ವಿಮಾನನಿಲ್ದಾಣ ಟರ್ಮಿನಲ್‌ ಟಿ3 460, ನೋಯ್ಡಾ 668, ಮಥುರಾ ರಸ್ತೆ 413, ಆಯಾನಗರ್‌ 477, ದೆಹಲಿ ಐಐಟಿ 483, ಧೀರ್‌ಪುರ 553ರಷ್ಟಿದೆ. ಕೇಂದ್ರೀಯ ಮಾಲಿನ್ಯ ನಿಯಂತ್ರಣ ಮಂಡಳಿಯ ಅಂಕಿಅಂಶ ಕೂಡ ದೆಹಲಿ ವಾತಾವರಣ ಹದಗೆಟ್ಟಿರುವುದನ್ನು ಸೂಚಿಸುತ್ತಿದೆ. ಭಾನುವಾರ ಸಂಜೆ 4 ಗಂಟೆ ವೇಳೆಗೆ 337ರಷ್ಟಿದ್ದ ದಹೆಲಿಯ ಸರಾಸರಿ ವಾಯು ಗುಣಮಟ್ಟ ಸೂಚ್ಯಂಕ ಸೋಮವಾರ ಬೆಳಗ್ಗೆ 11.30ರ ವೇಳೆಗೆ 348ಕ್ಕೆ ಏರಿಕೆಯಾಗಿದೆ. ಗಾಳಿಯಲ್ಲಿನ 2.5 ಮೈಕ್ರಾನ್‌ಗಿಂತ ಕಡಿಮೆ ಗಾತ್ರದ ಸೂಕ್ಷ್ಮ ಕಣಗಳು ನೇರವಾಗಿ ಶ್ವಾಶಕೋಶವನ್ನು ತಲುಪಿ ಉಸಿರಾಟದ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ಎಕ್ಯೂಐ ಎಂದರೇನು ? ಎಕ್ಯೂಐ ಎಂದರೆ ವಾಯು ಗುಣಮಟ್ಟವನ್ನು ಅಳೆಯುವ ಸೂಚಕ. ಇದು ಮಾನವನ ಆರೋಗ್ಯ ಮತ್ತು ಪರಿಸರದ ಮೇಲೆ ಪ್ರತಿಕೂಲ ಪರಿಣಾಮ ಬೀರುವ ವಾಯು ಮಾಲಿನ್ಯಗಳ ಬಗ್ಗೆ ಮಾನಿಟರ್ ಮಾಡುತ್ತದೆ. ಗಾಳಿಯಲ್ಲಿರುವ ಓಝೋನ್, ಸಣ್ಣ ಕಣಗಳಿಂದಾದ ವಸ್ತುಗಳು, ಸಾರಜನಕ ಡೈ ಆಕ್ಸೈಡ್, ಕಾರ್ಬನ್ ಮಾನಾಕ್ಸೈಡ್, ಸಲ್ಫರ್ ಡೈ ಆಕ್ಸೈಡ್ ಮತ್ತು ಸಲ್ಫರ್ ಸಂಯುಕ್ತಗಳಂತ ಮಾಲಿನ್ಯಗಳ ಬಗ್ಗೆ ಮಾಹಿತಿಯನ್ನು ಒದಗಿಸುತ್ತದೆ. ಹೇಗೆ ಕಾರ್ಯನಿರ್ವಹಿಸುತ್ತದೆ ? ಎಕ್ಯೂ ಅನ್ನು ಆರು ವಿಭಾಗಗಳಾಗಿ ವಿಂಗಡಣೆ ಮಾಡಲಾಗಿದೆ. ಅವುಗಳೆಂದರೆ ಉತ್ತಮ, ತೃಪ್ತಿದಾಯಕ, ಮಧ್ಯಮ, ಕಲುಷಿತ, ಕಳಪೆ, ತೀವ್ರ ಕಳಪೆ ಮತ್ತು ತೀವ್ರಕ್ಕಿಂತ ಹೆಚ್ಚಿನ ಕಳಪೆ ಎಂದು ವಿಂಗಡಿಸಲಾಗಿದೆ. ಈ ವಿಭಾಗಗಳಿಗೆ ವಿವಿಧ ಬಣ್ಣಗಳ ಕೋಡ್‌ಗಳನ್ನು ಜೋಡಿಸಲಾಗಿದೆ. ಹಸಿರು ಬಣ್ಣ ಉತ್ತಮ ಗಾಳಿಯ ಗುಣಮಟ್ಟವನ್ನು , ಕಂದು ಬಣ್ಣ ತೀವ್ರ ಮಾಲಿನ್ಯವನ್ನು ಸೂಚಿಸುತ್ತದೆ. ಹಳದಿ, ಕೇಸರಿ, ಕೆಂಪು ಮತ್ತು ನೇರಳೆ ಬಣ್ಣವು ಮಧ್ಯಮದಿಂದ ಹಿಡಿದು ಅನಾರೋಗ್ಯಕರ ಮಾಲಿನ್ಯವನ್ನು ಸೂಚಿಸುತ್ತದೆ. ವಾಯು ಗುಣಮಟ್ಟ ಎಷ್ಟಿದ್ದರೆ ಏನು?
- ಉತ್ತಮ : 0-50
- ತೃಪ್ತಿದಾಯಕ : 51-100
- ಕಲುಷಿತ : 101-200
- ಕಳಪೆ: 201-300
- ತೀವ್ರ ಕಳಪೆ: 301-400
- ಗಂಭೀರ: 401-500
- ಗಂಭೀರ ತುರ್ತು ಪರಿಸ್ಥಿತಿ: 500ಕ್ಕಿಂತ ಹೆಚ್ಚು
from India & World News in Kannada | VK Polls https://ift.tt/2WpCCPh
