ತಿರುಚಿ: ಪಾಳುಬಿದ್ದಿದ್ದ ಕೊಳವೆ ಬಾವಿಗೆ ಬಿದ್ದಿದ್ದ ಎರಡೂವರೆ ವರ್ಷದ ಬಾಲಕ ಸುಜಿತ್‌ ವಿಲ್ಸನ್‌ ರಕ್ಷಣಾ ಕಾರ್ಯ ಮೂರು ದಿನಗಳಿಂದ ನಿರಂತರವಾಗಿ ಮುಂದುವರಿದಿದೆ. ಕಳೆದ ಶುಕ್ರವಾರ ಸಂಜೆ ಸುಮಾರು 600 ಅಡಿಯ ಕೊಳವೆ ಬಾವಿಯಲ್ಲಿ ಆಯತಪ್ಪಿ ಬಿದ್ದಿದ್ದ ಈ ಬಾಲಕ 26 ಅಡಿ ಆಳದಲ್ಲಿ ಸಿಲುಕಿಕೊಂಡಿದ್ದ. ರಕ್ಷಣಾ ಕಾರ್ಯಾಚರಣೆ ನಡೆಯುತ್ತಿದ್ದಾಗಲೇ ಮತ್ತೂ ಆಳಕ್ಕೆ ಕುಸಿದು 88 ಅಡಿ ಆಳದಲ್ಲಿ ಸಿಲುಕಿಕೊಂಡ ಕಾರಣ ರಕ್ಷಣಾ ಕಾರ್ಯ ಮತ್ತಷ್ಟು ಸಂಕೀರ್ಣವಾಗಿತ್ತು. ತಮುಳುನಾಡಿನ ಆರೋಗ್ಯ ಸಚಿವ ಡಾ. ಸಿ. ವಿಜಯ್‌ ಭಾಸ್ಕರ್ ಮತ್ತು ಅಧಿಕಾರಿಗಳು ತಿಳಿಸಿರುವಂತೆ ಶನಿವಾರದಿಂದಲೂ ಮಗುವಿನಲ್ಲಿ ಯಾವುದೇ ಚಲನೆ ಕಂಡುಬಂದಿಲ್ಲ. ಜಿಲ್ಲಾ ಆಡಳಿತವು ಕೆಎಪಿ ಸರ್ಕಾರಿ ವೈದ್ಯಕೀಯ ಕಾಲೇಜಿನಿಂದ ಕಾರ್ಯಾಚರಣೆಯ ಸ್ಥಳಕ್ಕೆ 17 ವೈದ್ಯರು ಮತ್ತು ಸುಶ್ರೂಷಕಿಯರ ತಂಡವನ್ನು ನಿಯೋಜಿಸಿದೆ. ಎರಡು ಆಂಬುಲೆನ್ಸ್ ಹಾಗೂ ಜೀವರಕ್ಷಕ ಸಾಧನಗಳನ್ನು ಸಿದ್ದವಿರಿಸಿಕೊಳ್ಳಲಾಗಿದೆ. ರಕ್ಷಣಾ ಕಾರ್ಯದಲ್ಲಿ ರಾಜ್ಯ ವಿಪತ್ತು ನಿರ್ವಹಣಾ ಪಡೆ (ಎಸ್‌ಡಿಆರ್‌ಎಫ್‌), ರಾಷ್ಟ್ರೀಯ ವಿಪತ್ತು ನಿರ್ವಹಣಾ ದಳ ( ಎನ್‌ಡಿಆರ್‌ಎಫ್‌), ನೈವೇಲಿ ಲಿಗ್ನೈಟ್‌ ಕಾರ್ಪೋರೇಷನ್‌, ಒಎನ್‌ಜಿಸಿಯ ನುರಿತ ಸಿಬ್ಬಂದಿಗಳು ಕಾರ್ಯಾಚರಣೆಯಲ್ಲಿ ತೊಡಗಿದ್ದಾರೆ. ಕೊಳವೆ ಬಾವಿಯ ಪಕ್ಕದಲ್ಲೇ ಹೈ ಪವರ್‌ ರಿಗ್‌ ಮಷಿನರಿಗಳನ್ನು ಬಳಸಿ ಕೊಳವೆ ಮಾರ್ಗವನ್ನು ಸಿದ್ಧಪಡಿಸಲಾಗುತ್ತಿದೆ. ಆದರೆ, ಭೂಮಿಯ ಕೆಳಗೆ ಬಂಡೆಗಳಿರುವುದರಿಂದ ಈ ಕಾರ್ಯ ಕಷ್ಟವಾಗುತ್ತಿದೆ. ಈಗ 40 ಅಡಿಗಳಷ್ಟು ಕೊಳವೆ ಮಾರ್ಗ ತೆರೆದಿದ್ದು, 98 ಅಡಿ ಆಳದವರೆಗೆ ತೆರೆಯಬೇಕಿದೆ. ತಮಿಳುನಾಡಿನ ತಿರುಚಿ ಜಿಲ್ಲೆಯ ಮಣಪ್ಪರೈ ಬಳಿಯ ನಡುಕಟ್ಟುಪಟ್ಟಿಯಲ್ಲಿ ನೀರು ಬಾರದೇ ಪಾಳು ಬಿದ್ದಿದ್ದ ಕೊಳವೆ ಬಾವಿಯೊಳಗೆ 2 ವರ್ಷದ ಗಂಡು ಮಗು ಬಿದ್ದು ಬಿದ್ದಿತ್ತು. ರಕ್ಷಣಾ ಕಾರ್ಯಕ್ಕೆ ಭೂಮಿಯಾಳದಲ್ಲಿ ರಕ್ಷಣಾ ಕಾರ್ಯಗಳಿಗೆಂದೇ ಅಭಿವೃದ್ಧಿಪಡಿಸಲಾಗಿರುವ ವಿಶೇಷ ಸಾಧನ ಬಳಸಲಾಗಿತ್ತು. ಮಗು ಮತ್ತಷ್ಟು ಆಳಕ್ಕೆ ಕುಸಿದ ನಂತರ ಗಣಿಗಳಲ್ಲಿ, ತೈಲ ಬಾವಿಗಳಲ್ಲಿ ಬಳಸುವ ಭಾರೀ ಯಂತ್ರಗಳನ್ನು ಬಳಸಿ ರಕ್ಷಣಾ ಕಾರ್ಯ ಮುಂದುವರಿದಿದೆ.
from India & World News in Kannada | VK Polls https://ift.tt/2piONBl
