ಬಾನುಪ್ರಸಾದ ಕೆ.ಎನ್‌. ಬೆಂಗಳೂರು: ಕನ್ನಡಕ್ಕೆ ಮಾನ್ಯಗತೆ ಸಿಗಬೇಕೆಂದರೆ ರಾಜ್ಯದ ಉದ್ಯೋಗಗಳು ಕನ್ನಡಿಗರಿಗೇ ಮೀಸಲಾಗಬೇಕು. ಯಾವ ಕಾರಣಕ್ಕೂ ರಾಜ್ಯದಲ್ಲಿ ಪರಭಾಷಾ ಹೇರಿಕೆ ಸಲ್ಲದು. ಭಾಷಾ ಕಲಿಕೆ ಆಯ್ಕೆಯಾಗಬೇಕೇ ವಿನಃ ಹೇರಿಕೆಯಾಗಬಾರದು. ಕನ್ನಡವನ್ನು ಕನ್ನಡಿಗರೇ ಬೆಳಸಬೇಕೇ ಹೊರತು ಅನ್ಯರಿಂದಾಗದು ಎಂದು ಕರ್ನಾಟಕ ಸಾಹಿತ್ಯ ಪರಿಷತ್ ಅಧ್ಯಕ್ಷ ಅಭಿಪ್ರಾಯ ಪಟ್ಟಿದ್ದಾರೆ. ಕೆಎಎಸ್ ಅಧಿಕಾರಿಯಾಗಿದ್ದ ಮನು ಬಳಿಗಾರ್‌ ಅವರಿಗೆ ಮೊದಲಿಂದಲೂ ಕನ್ನಡ ಮೇಲೆ ಅತೀವ ಪ್ರೀತಿ. ಇವರು 14ನೇ ವಯಸ್ಸಿನಿಂದಲೇ ಸಾಹಿತ್ಯ ಕೃಷಿ ಆರಂಭಿಸಿದವರು. ಕೆಎಎಸ್ ಹುದ್ದೆ ಸೇರುವ ಮೊದಲೇ 50 ಹೆಚ್ಚು ಕವನಗಳನ್ನು ಬರೆದಿದ್ದರು. ಜೊತೆಗೆ ಒಂದು ಕವನ ಸಂಕಲನವೂ ತಯಾರಾಗಿತ್ತು. ಅವರೇ ತಿಳಿಸಿರುವಂತೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಆಯುಕ್ತ ಹುದ್ದೆ ಹಾಗೂ ನಿರ್ದೇಶಕ ಹುದ್ದೆಗಳು ಇವರಿಗೆ ಹೆಚ್ಚು ತೃಪ್ತಿ ನೀಡಿದ ಹುದ್ದೆಗಳಂತೆ. ತಮ್ಮ ಸರ್ಕಾರಿ ಸೇವೆ ಇನ್ನೂ 6 ತಿಂಗಳು ಬಾಕಿ ಇದ್ದರೂ ಕನ್ನಡದ ಮೇಲಿನ ಪ್ರೀತಿಗೆ ಹುದ್ದೆಗೆ ರಾಜೀನಾಮೆ ನೀಡಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ ಇವರು ಅತಿ ಹೆಚ್ಚು ಮತಗಳನ್ನು ಪಡೆಯುವ ಮೂಲಕ ಆಯ್ಕೆಯಾಗಿದ್ದಾರೆ. 3 ವರ್ಷ ಇದ್ದ ಕಸಾಪ ಅಧ್ಯಕ್ಷರ ಅಧಿಕಾರಾವಧಿಯನ್ನು 5 ವರ್ಷಕ್ಕೆ ವಿಸ್ತರಿಸುವ ಮೂಲಕ ಕನ್ನಡ ನಾಡು ನುಡಿಯ ಅಭಿವೃದ್ಧಿಗೆ ಹಲವು ವಿಭಿನ್ನ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದ್ದಾರೆ. ಕನ್ನಡ, ಕನ್ನಡ ನಾಡಿನ ಕುರಿತ ಹಲವಾರು ವಿಚಾರಗಳನ್ನು ಕುರಿತಂತೆ ವಿಜಯ ಕರ್ನಾಟಕದೊಟ್ಟಿಗೆ ವಿವರವಾಗಿ ಮಾತನಾಡಿದ್ದಾರೆ. ಈ ಕುರಿತ ಸಮಗ್ರ ವರದಿ ಇಲ್ಲಿದೆ. ಕರ್ನಾಟಕದ ಉದ್ಯೋಗಗಳು ಕನ್ನಡಗರಿಗೇ ಮೀಸಲಿರಲಿ ಈಗಾಗಲೇ ಹಲವು ಬಾರಿ ಈ ಕುರಿತು ಹೋರಾಟಗಳನ್ನು ಮಾಡಲಾಗಿದೆ. ಆದರೂ, ಪಲೂರ್ಣಪ್ರಮಾಣದಲ್ಲಿ ಜಾರಿಗೆ ತರಲು ಸಾಧ್ಯವಾಗಿಲ್ಲ. ರಾಷ್ಟ್ರೀಯ ಮತ್ತು ಬಹುರಾಷ್ಟ್ರೀಯ ಕಂಪನಿಗಳಿಗೆ ಪ್ರತ್ಯೇಕ ಕಾನೂನು ಚೌಕಟ್ಟುಗಳಿರುವ ಕಾರಣ ಇದಕ್ಕೆ ಸಮಗ್ರ ನೀತಿ ನಿಯಮಗಳನ್ನು ರೂಪಿಸುವುದು ಅಗತ್ಯ. ಆದರೆ ಸಾಹಿತ್ಯ ಪರಿಷತ್ ನಿಲುವು ಸ್ಪಷ್ಟವಾಗಿದೆ. ಕರ್ನಾಟಕದಲ್ಲಿರುವ ಸಿ ಮತ್ತು ಡಿ ದರ್ಜೆ ಉದ್ಯೋಗಗಳು ಕನ್ನಡಿಗರಿಗೇ ಮೀಸಲಾಗಬೇಕು ಎಂಬುದು ಸಾಹಿತ್ಯ ಪರಿಷತ್ ನಿಲುವಾಗಿದೆ. ಕೇಂದ್ರ ಸರ್ಕಾರಿ ಉದ್ಯೋಗ ನೇಮಕಾತಿಯಲ್ಲಿ ಪ್ರಾದೇಶಿಕ ಭಾಷಾ ವಿದ್ಯಾರ್ಥಿಗಳಿಗೆ ಅನ್ಯಾಯವಾಗುತ್ತಿದೆ. ಈ ಕುರಿತಂತೆ ಸಾ.ಪರಿಷತ್ ಧರಣಿಯನ್ನೂ ನಡೆಸಿದೆ. ಆಂಗ್ಲ ಮಾಧ್ಯಮ ಶಾಲೆಗಳಿಂದ ಕನ್ನಡಕ್ಕೆ ಕುತ್ತು ಪ್ರಾಥಮಿಕ ಶಿಕ್ಷಣ ಹತ್ತದಲ್ಲಿ ಮಾಧ್ಯಮವಾಗಿ ಇಂಗ್ಲೆಷ್‌ ಬೇಡ. ಆದರೆ ಒಂದನೇ ತರಗತಿಯಿಂದಲೇ ಇಂಗ್ಲಿಷ್‌ ಅನ್ನು ಒಂದು ಭಾಷೆಯಾಗಿ ಕಲಿಸವಾಗಲಿ. ಆದರೆ, ಬೋಧನಾ ಮಾಧ್ಯಮವಾಗಿ ಇಂಗ್ಲಿಷ್‌ ಇರಕೂಡದು. ಪ್ರಾಥಮಿಕ ಹಂತದಲ್ಲೇ ಇಂಗ್ಲಿಷ್‌ ಮಾಧ್ಯಮವನ್ನು ಅಳವಡಿಸಿದರೆ ಕನ್ನಡ ಮಾಧ್ಯಮ ಶಾಲೆಗಳಿಗೆ ಖಂಡಿತವಾಗಿಯೂ ಕುತ್ತು ಬರಲಿದೆ. ಮಖ್ಯಮತ್ರಿ ಹಾಗೂ ಶಿಕ್ಷಣ ಸಚಿವರು ಈ ಕುರಿತು ಗಮನಹರಿಸುವುದಾಗಿ ತಿಳಿಸಿದ್ದಾರೆ. ಬಲಪಂಥ- ಎಡಪಂಥ ಎರಡೂ ಕನ್ನಡವೇ,,, ನಮ್ಮ ಒಂದೇ ಪಂಥ ಅದು ಕನ್ನಡದ ಪಂಥ. ಕುವೆಂಪು ಹೇಳಿದಂತೆ ಸರ್ವರಿಗೆ ಸಮಬಾಳು, ಸರ್ವರಿಗೆ ಸಮಪಾಲು ಎಂಬುದು ಕಸಾಪ ನೀತಿ. ಇಲ್ಲಿ ಇವನ್ಯಾರವ ಇವನ್ಯಾರವ ಎನ್ನುವಂತಿಲ್ಲ. ಇವ ನಮ್ಮವ, ಇವ ನಮ್ಮವ ಎನ್ನಬೇಕು. ಆದರೂ, ಸಾಹಿತ್ಯದಲ್ಲಿ ಇಂತಹ ಆರೋಗ್ಯಕರ ಸ್ಪರ್ಧೆ ಇದ್ದಾಗಲೇ ಸಾಹಿತ್ಯದ ಬೆಳವಣಿಗೆಗೆ ಪೂರಕವಾಗುತ್ತದೆ. ಆದರೆ, ಈ ಸ್ಪರ್ಧೆ ಆರೋಗ್ಯಕರವಾಗಿರಬೇಕಷ್ಟೆ. ಪರಭಾಷಾ ಹೇರಿಕೆ ಸಲ್ಲದು ನಾವು ಹತ್ತಲ್ಲದಿದ್ದರೆ, ಇಪ್ಪತ್ತು ಭಾಷೆ ಕಲಿಯೋಣ. ಆದರೆ ಇಂಥದೇ ಭಾಷೆ ಕಲಿಯಬೇಕು ಎಂದು ಒತ್ತಾಯದ ಹೇರಿಕೆ ಸರಿಯಲ್ಲಿ. ಕೆಲವೊಮ್ಮೆ ಹಿಂದಿಯನ್ನು ರಾಷ್ಟ್ರಭಾಷೆ ಮಾಡಬೇಕೆಂಬ ವಿಚಾರಗಳು ಬಂದಿವೆ. ಆಗೆಲ್ಲ ಸಾಹಿತ್ಯ ಪರಿಷತ್ ವಿರೋಧಿಸಿದೆ. ಆಡಳಿತದಲ್ಲಾಗಲಿ, ವ್ಯವಹಾರದಲ್ಲಾಗಲಿ ಹಿಂದಿಯನ್ನು ಹೇರಕೂಡದು, ಕನ್ನಡಕ್ಕೇ ನಮ್ಮ ಆದ್ಯತೆ ನೀಡಬೇಕು ಎಂಬುದು ಸಾಹಿತ್ಯ ಪರಿಷತ್ತಿನ ಅಚಲ ನಿರ್ಧಾರವಾಗಿದೆ. ಗೋವಾ ಕನ್ನಡ ಪರಿಷತ್ತು ಘಟಕ ಇದುವರೆಗೂ ಗೂವಾದಲ್ಲಿ ಸಾ.ಪರಿಷತ್ ಘಟಕ ಇರಲಿಲ್ಲ. ಪಾಟೀಲ್‌ ಪುಟ್ಟಪ್ಪ ಅವರ ಅಧ್ಯಯಲ್ಲಿ ಗೋವಾದಲ್ಲಿ ಘಟಕ ಸ್ಥಾಪನೆ ಮಾಡಿ ಬಂದಿದ್ದೇನೆ. ಗೋವಾ ಘಟಕಕ್ಕೆ ಮಲ್ಲಿಕಾರ್ಜುನ ಬದಾಮಿ ಎಂಬುವರನ್ನು ಅಧ್ಯಕ್ಷ ಸ್ಥಾನಕ್ಕೆ ನಾಮನಿರ್ದೇಶನ ಮಾಡಲಾಗಿದೆ. ಮುಂದಿನ ಅವಧಿಗೆ ಪ್ರಥಮ ಬಾರಿಗೆ ಗೋವಾ ಸಾಹಿತ್ಯ ಪರಿಷತ್ ಅಧ್ಯಕ್ಷ ಸ್ಥಾನಕ್ಕೆ ಚುನಾವಣೆ ನಡೆಯಲಿದೆ. ಈ ಘಟಕಕ್ಕೆ ಗೋವಾ ಕನ್ನಡಿಗರೆಲ್ಲರೂ ಸ್ವಾಗತಿಸಿದ್ದಾರೆ. ಕೆಎಎಸ್ ಹುದ್ದೆಯಿಂದ - ಕಸಾಪ ಅಧ್ಯಕ್ಷ ಸ್ಥಾನದವರೆಗೆ ನಾನು ಪ್ರೌಢಶಾಲಾ ಹಂತದಲ್ಲೇ ಸಾಹಿತ್ಯದಲ್ಲಿ ಅಭಿರುಚಿ ಉಳ್ಳವನಾಗಿದ್ದೆ. 14ನೇ ವಯಸ್ಸಿನಿಂದಲೇ ಕವನ ಮತ್ತು ಕಥೆಗಳನ್ನು ಬರೆಯುತ್ತಿದೆ. ದಿನಪತ್ರಿಕೆ, ವಾರಪತ್ರಿಕೆಗಳು ನನ್ನ ಕವನ ಮತ್ತು ಕಥೆಗಳನ್ನು ಪ್ರಕಟಿಸುತ್ತಿದ್ದವು ಅವುಗಳಿಗೆ ನಾನು ಋಣಿಯಾಗಿರಬೇಕು. 1978 ರಲ್ಲಿ ಕೆಎಎಸ್ ಅಧಿಕಾರಿಯಾಗಿ ಆಯ್ಕೆಯಾದೆ. ಈ ವೇಳೆಗಾಗಲೇ 60ಕ್ಕೂ ಹೆಚ್ಚು ಕವನ ಬರೆದಿದ್ದೆ, ಒಂದು ಕವನ ಸಂಕಲನ ತಯಾರಾಗಿತ್ತು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಲ್ಲಿ ಆಯುಕ್ತ ಹುದ್ದೆ ಮತ್ತು ನಿರ್ದೇಶಕ ಹುದ್ದೆ ನನಗೆ ಅತಿ ಹೆಚ್ಚು ಹಿಡಿಸಿದ ಹುದ್ದೆಯಾಗಿವೆ. ಇನ್ನು 6 ತಿಂಗಳ ಸೇವೆ ಬಾಕಿ ಇತ್ತು. ಕಸಾಪ ಅಧ್ಯಕ್ಷ ಸ್ಥಾನಕ್ಕೆ ಚುನಾವಣೆ ಬಂತು. ಸೇವೆಗೆ ರಾಜೀನಾಮೆ ನೀಡಿ ಚುನಾವಣೆಗೆ ನಿಂತೆ. ಶೇ.60ಕ್ಕೂ ಹೆಚ್ಚು ಮತಗಳನ್ನು ಪಡೆಯುವ ಮೂಲಕ ಅಭೂತಪೂರ್ವ ಗೆಲುವಾಯಿತು. ಇದಕ್ಕೆ ಸಹಕರಿಸಿದ ಸರ್ವರಿಗೂ ನಾನು ಆಭಾರಿಯಾಗಿದ್ದೇನೆ. ಕನ್ನಡಿಗರಿಗೆಂದೇ ಇದೆ ಕಸಾಪ ಉದ್ಯೊಗ ಪೋರ್ಟಲ್‌ ಉದ್ಯೋಗ ನೀಡುವುದು ಸಾಹಿತ್ಯ ಪರಿಷತ್‌ನ ಕೆಲಸವಲ್ಲ. ಬಹುತೇಕರೇ ಸಾಹಿತ್ಯ ಪರಿಷತ್ತೇ ಉದ್ಯೋಗ ಕೊಡಿಸುತ್ತದೆ ಎಂಬ ತಪ್ಪು ಕಲ್ಪನೆ ಇದೆ. ನಮ್ಮಲ್ಲಿ ಉದ್ಯೋಗಕ್ಕೆ ಅರ್ಹವಿರು ಯುವಕರಿದ್ದಾರೆ. ಉದ್ಯೋಗ ನೀಡುವ ಕಂಪನಿಗಳೂ ಇದ್ದಾರೆ. ಇವರಿಬ್ಬರ ನಡುವ ಸಂಪರ್ಕ ಕಲ್ಪಿಸಲೆಂದೇ ಸಾಹಿತ್ಯ ಪರಿಷತ್ ಉದ್ಯೋಗ ಪೋರ್ಟಲ್‌ ಆರಂಭಿಸಿದೆ. ಇದುವರೆಗೂ ೪೦೦೦ ಕ್ಕೂ ಹೆಚ್ಚು ಬಯೋಡಾಟಾಗಳನ್ನು ವಿವಿಧ ಕಂಪನಿಗಳಿಗೆ ವರ್ಗಾಯಿಸಲಾಗಿದೆ. ೪೦೦ಕ್ಕೂ ಹೆಚ್ಚು ಜನರಿಗೆ ಉದ್ಯೋಗಗಳೂ ದೊರಕಿವೆ. ಟೊಯೋಟಾ ಹಾಗೂ ಮಾರುತಿ ಸುಜುಕಿಯಂತಹ ಕಂಪನಿಗಳು ಕನ್ನಡಿಗರಿಗೆ ಉದ್ಯೋಗ ನೀಡಿರುವ ಕುರಿತು ವರದಿ ನೀಡಿವೆ. ಈ ಎಲ್ಲ ಮಾಹಿತಿಗಳೂ ಕಸಾಪ ವೆಬ್‌ವೈಟ್‌ನಲ್ಲಿ ಲಭ್ಯವಿವೆ. ಪರಿಷತ್‌ನ ಮುಂದಿನ ಯೋಜನೆಗಳು ಸುಮಾರು 20 ವರ್ಷಗಳ ಹಿಂದೆಯೇ ಪೂರ್ಣಚಂದ್ರ ತೇಜಸ್ವಿ, ಚಂದ್ರಶೇಖರ ಕಂಬಾರರು ಸೇರಿ ಕನ್ನಡ ತಂತ್ರಾಂಶವನ್ನು ಹೇಗೆ ಅಭಿವೃದ್ಧಿ ಮಾಡಬೇಕು ಎಂಬುದರ ಚರ್ಚೆಯನ್ನು ಆರಂಭಿಸಿದ್ದರು. ಕುವೆಂಪು ವಿವಿ ಕುಲಪತಿಗಳಾಗಿದ್ದ, ಡಾ.ಚಿದಾನಂದಗೌಡ ಅಧ್ಯಕ್ಷತೆಯಲ್ಲಿ ಕನ್ನಡ ತಂತ್ರಾಂಶ ಅಭಿವೃದ್ಧಿಗೆ ಸಮಿತಿ ರಚನೆ ಮಾಡಲಾಗಿತ್ತು. ಈ ಸಮಿತಿ ವರದಿಯನ್ನೂ ನೀಡಿದೆ. ಆದರೆ, ಈ ಸಮಿತಿಯ ವರದಿಯನ್ನು ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ತರಲಾಗಿಲ್ಲ. ನನ್ನ ಅವಧಿಯಲ್ಲಿ ಕನ್ನಡ ಸಾಹಿತ್ಯದ ಪ್ರಮುಖ ಪುಸ್ತಕಗಳನ್ನು ಡಿಜಿಟಲೀಕರಣ ಮಾಡಲಾಗುತ್ತಿದೆ. ಮೈಸೂರಿನ ಭಾರತೀಯ ಭಾಷಾ ಸಂಸ್ಥಾನವು ಕನ್ನಡ ನಿಘಂಟಿನ 8 ಸಂಪುಟಗಳನ್ನು ಸಿದ್ಧಪಡಿಸಲಾಗುತ್ತಿದೆ. ಎಲ್ಲ ಸಂಪುಟಗಳೂ ಡಿಜಿಟಲ್‌ ರೂಪದಲ್ಲಿ ಲಭ್ಯವಾಗಲಿವೆ. 85ನೇ ಸಾ. ಸಮ್ಮೇಳನಕ್ಕೆ ಕಲಬುರಗಿ ಸಜ್ಜು ಈ ಬಾರಿ ಕಲಬುರಗಿಯಲ್ಲಿ ಸಾಹಿತ್ಯ ಸಮ್ಮೇಳನ ನಡೆಯಬೇಕೆಂದು ನಿರ್ಧಾರವಾಗಿದೆ. ಈ ಕುರಿತು ಈಗಾಗಲೇ ಚರ್ಚೆ ಮಾಡಿದ್ದೇನೆ. ಈ ಬಾರಿ ಸಮ್ಮೇಳನದ ಅಧ್ಯಕ್ಷರು ಯಾರಾಗಬೇಕು ಎಂಬುದನ್ನು ಕಾರ್ಯಕಾರಿ ಸಮಿತಿ ನಿರ್ಧರಿಸಲಿದೆ. ಇದರಲ್ಲಿ ನನ್ನದು ಯಾವುದೇ ಪಾತ್ರವಿಲ್ಲ. ಜಾನಪದ ಕಲೆಗಳತ್ತಲೂ ಗಮನ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಇದಕ್ಕಾಗಿಯೇ ಇದೆ. ಆದಾಗ್ಯೂ ಸಾಹಿತ್ಯ ಸಮ್ಮೇಳನಗಳ ಸಂದರ್ಭದಲ್ಲಿ ನೂರಾರು ಜಾನಪದ ಕಲಾವಿದರಿಗೆ ಅವಕಾಶ ನೀಡಲಾಗುತ್ತಿದೆ. ಸಾಹಿತ್ಯ ಪರಿಷತ್ತಿನ ಸೀಮಿತ ಸಂಪನ್ಮೂಲಗಳಲ್ಲೇ ಕಲೆ ಮತ್ತು ಸಂಸ್ಕೃತಿಯ ಉಳಿವಿಗೆ ಕ್ರಮ ಕೈಗೊಳ್ಳಲಾಗಿದೆ. ಅಭಿವೃದ್ಧಿ ಪ್ರಾಧಿಕಾರ, ಪುಸ್ತಕ ಪ್ರಾಧಿಕಾರದ ಉತ್ತಮ ಸಹಯೋಗ ಈ ಎರಡೂ ಸರ್ಕಾರಿ ಅಂಗಗಳು ಸಾಹಿತ್ಯ ಪರಿಷತ್ ಜತೆಗೆ ಉತ್ತಮ ಸಹಕಾರವಿದೆ. ಅಭಿವೃದ್ಧಿ ಪ್ರಾಧಿಕಾರದ ಜತೆಗೆ ಹಲವಾರು ಕಾರ್ಮಕ್ರಮಗಳನ್ನು ಮಾಡಿದ್ದೇವೆ. ದೆಹಲಿಗೆ ನೀಯೋಗ ಹೋದಾಗಲೆಲ್ಲ ನನ್ನನ್ನೂ ಜತೆಗೆ ಕರೆದುಕೊಂಡು ಹೋಗಿದ್ದಾರೆ. ಕನ್ನಡಿಗರಿಗೆ ಕಿವಿಮಾತು ಸಮಸ್ತ ಕನ್ನಡದ ಜನತೆ ಮೊದಲು ಎಲ್ಲ ಕಡೆ ಕನ್ನಡದಲ್ಲಿ ಮಾತನಾಡಲು ಪ್ರಾರಂಭಿಸಿ. ರಾಜ್ಯ ಸರ್ಕಾರ ಈಗಲೇ ಕನ್ನಡವನ್ನು ಆಡಳಿತ ಭಾಷೆಯಾಗಿಸಿದೆ. ಆಡಳಿತದಲ್ಲಾಗಲಿ, ವ್ಯವಹಾರದಲ್ಲಾಗಲಿ, ಸ್ನೇಹಿತರೊಟ್ಟಿಗೆ ಕನ್ನಡ ಬಳಸಿ. ಬೆಂಗಳೂರಿಲ್ಲಂತೂ ಕನ್ನಡ ಮರೆಯಾಗುತ್ತಿದೆ. ಕನ್ನಡಿಗರಾದ ನಾವೇ ಬೇರೆ ಭಾಷೆಯಲ್ಲಿ ಮಾತನಾಡಲು ಮೊದಲು ಮಾಡುತ್ತೇವೆ ಇದಾಗಬಾರದು. ಕನ್ನಡವನ್ನು ಉಳಿಸಿ ಬೆಳೆಸುವುದು ನಮ್ಮ ಕೈಯಲ್ಲೇ ಇದೆ.
from India & World News in Kannada | VK Polls https://ift.tt/2JBZbLm
