ಹೊಸದಿಲ್ಲಿ: ದೀಪಾವಳಿ ಹಬ್ಬದ ಸಂಭ್ರಮದ ಬೆನ್ನಲ್ಲೇ ರಾಷ್ಟ್ರ ರಾಜಧಾನಿ ಹೊಸದಿಲ್ಲಿಯಲ್ಲಿ ವಾಯು ಗುಣಮಟ್ಟ ತೀವ್ರವಾಗಿ ಹದೆಗೆಟ್ಟಿದೆ. ಈ ಮಧ್ಯೆ ನವೆಂಬರ್ 3ರಂದು ನಡೆಯಲಿರುವ ಭಾರತ ಹಾಗೂ ಬಾಂಗ್ಲಾದೇಶ ನಡುವಣ ಮೊದಲ ಟ್ವೆಂಟಿ-20 ಪಂದ್ಯವನ್ನು ಸ್ಥಳಾಂತರಿಸಲು ಬಲವಾದ ಬೇಡಿಕೆ ಕೇಳಿಬಂದಿದೆ. ಇದೀಗ ಎದ್ದಿರುವ ಗೊಂದಲಗಳಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ () ನೂತನ ಅಧ್ಯಕ್ಷ ಇತಿಶ್ರೀ ಹಾಡಿದ್ದಾರೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವೆ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆಯಲಿರುವ ಮೊದಲ ಟ್ವೆಂಟಿ-20 ಪಂದ್ಯವು ಪೂರ್ವ ನಿಗದಿಯಂತೆ ನವೆಂಬರ್ 3ರಂದು ನಡೆಯಲಿದೆ ಎಂಬುದನ್ನು ಖಚಿತಪಡಿಸಿದ್ದಾರೆ. ಇದರೊಂದಿಗೆ ದಿಲ್ಲಿ ಟ್ವೆಂಟಿ-20 ಪಂದ್ಯಕ್ಕೆ ಸಂಬಂಧಿಸಿದಂತೆ ಉಂಟಾಗಿರುವ ಆತಂಕವು ನಿವಾರಣೆಯಾಗಿದೆ. ನವೆಂಬರ್ 3 ಭಾನುವಾರದಂದು ರಾತ್ರಿ 7ರ ಹೊತ್ತಿಗೆ ಪಂದ್ಯ ಆರಂಭವಾಗಲಿದೆ. ಈ ಮೊದಲು ಪರಿಸರ ಮಾಲಿನ್ಯ ಹೆಚ್ಚಾಗಿರುವ ಹಿನ್ನಲೆಯಲ್ಲಿ ಮೊದಲ ಟ್ವೆಂಟಿ-20 ಪಂದ್ಯವನ್ನು ದಿಲ್ಲಿಯಿಂದ ಸ್ಥಳಾಂತರ ಮಾಡುವಂತೆ ಪರಿಸರವಾದಿಗಳು ಮನವಿ ಮಾಡಿಕೊಂಡಿದ್ದರು. ಈ ಸಂಬಂಧ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿಗೆ ಪತ್ರವನ್ನು ಬರೆದಿದ್ದರು. ಪರಿಸರ ಮಾಲಿನ್ಯದಿಂದಾಗಿ ಆಟಗಾರರು ಸೇರಿದಂತೆ ಸಾವಿರಾರು ಅಭಿಮಾನಿಗಳ ಆರೋಗ್ಯಕ್ಕೆ ಹಾನಿಯಾಗುವ ಸಾಧ್ಯತೆಯಿದೆ ಎಂದು ಪರಿಸರವಾದಿಗಳು ಎಚ್ಚರಿಸಿದ್ದರು. ಇದಕ್ಕೆ ಕೈಜೋಡಿಸಿರುವ ಭಾರತದ ಮಾಜಿ ವಿಶ್ವಕಪ್ ಹೀರೊ ಹಾಗೂ ದಿಲ್ಲಿ ಸಂಸದ ಗೌತಮ್ ಗಂಭೀರ್, ಪಂದ್ಯ ಆಯೋಜನೆಗಿಂತಲೂ ಮಿಗಿಲಾಗಿ ವಾಯು ಗುಣಮಟ್ಟ ವೃದ್ಧಿಗೆ ಮೊದಲ ಆದ್ಯತೆ ನೀಡಬೇಕು ಎಂದಿದ್ದರು. ದೀಪಾವಳಿ ಸಂಭ್ರಮಾಚರಣೆಯ ಬೆನ್ನಲ್ಲೇ ದಿಲ್ಲಿಯಲ್ಲಿ ವಾಯು ಮಾಲಿನ್ಯ ಮಟ್ಟವು ತೀವ್ರವಾಗಿ ಹೆಚ್ಚಾಗಿದೆ. ದೀಪಾವಳಿಯ ಹಬ್ಬಕ್ಕೆ ಸಿಡಿಸಿದ ಪಟಾಯಿಂದಾಗಿ ವಾಯು ಮಾಲಿನ್ಯ ಗಗನಕ್ಕೇರಿದೆ. ಇದರಿಂದ ಆಟಗಾರರಿಗೆ ಸೇರಿದಂತೆ ಪ್ರೇಕ್ಷಕರಿಗೆ ಉಸಿರಾಟದ ತೊಂದರೆ ಕಾಡಲಿದೆ ಎಂಬ ಬಗ್ಗೆ ಅಪಾಯ ಉಂಟಾಗಿದೆ. ಈ ಮಧ್ಯೆ ವಾಯು ಗುಣಮಟ್ಟ ಹದೆಗೆಟ್ಟಿರುವ ಹಿನ್ನಲೆಯಲ್ಲಿ ಟೀಮ್ ಇಂಡಿಯಾ ನೆಟ್ ಅಭ್ಯಾಸದ ಬದಲು ಜಿಮ್ ಕಸರತ್ತಿಗೆ ಹೆಚ್ಚಿನ ಆದತ್ಯೆ ನೀಡುವ ಸಾಧ್ಯತೆಯಿದೆ ಎನ್ನಲಾಗಿದೆ. ಎರಡು ವರ್ಷಗಳ ಹಿಂದೆ 2017ರಲ್ಲಿ ಫಿರೋಜ್ ಷಾ ಕೋಟ್ಲಾ ಮೈದಾನದಲ್ಲಿ ಟೆಸ್ಟ್ ಪಂದ್ಯ ನಡೆಯುತ್ತಿರುವ ವೇಳೆಯಲ್ಲಿ ಶ್ರೀಲಂಕಾ ತಂಡದ ಉಸಿರಾಟ ತೊಂದರೆಯನ್ನು ಎದುರಿಸಿ ಮೈದಾನ ತೊರೆದಿದ್ದರು. ಬಳಿಕ ಮುಖಕ್ಕೆ ರಕ್ಷಣಾ ಗವಸುಗಳನ್ನು ಧರಿಸಿ ಪಂದ್ಯ ಮುಂದುವರಿಸಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2PxUqq0
