ಬೆಂಗಳೂರು: ಮೊಬೈಲ್ ಫೋನ್ ಮೂಲಕ ದುಬಾರಿ ಬಡ್ಡಿಯ ಸಾಲ ವ್ಯವಹಾರ ನಡೆಸುವ ಮೂರು ಆನ್ಲೈನ್ ಲೋನ್ ಆ್ಯಪ್ಗಳ ವಿರುದ್ಧ ಪೊಲೀಸರು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ಕಾನೂನುಬಾಹಿರವಾಗಿ ದುಬಾರಿ ಬಡ್ಡಿ ದರದಲ್ಲಿಸಾಲ ನೀಡುವುದು, ನಂತರ ಸಾಲದ ಅಸಲು ಮತ್ತು ಬಡ್ಡಿ ಪಡೆಯಲು ಬೆದರಿಕೆ, ಬಲ ಪ್ರಯೋಗ, ಕಿರುಕುಳ, ದಬ್ಬಾಳಿಕೆ ನಡೆಸುವ ಕುರಿತು ದೂರುಗಳು ಬಂದಿದ್ದವು. ಆನ್ಲೈನ್ ಲೋನ್ ಕಂಪನಿಗಳು ತಮ್ಮ ಗ್ರಾಹಕರ ಫೋನ್ ನಂಬರ್, ಫೋಟೊಗಳನ್ನು ಪಡೆದುಕೊಂಡು ದುರ್ಬಳಕೆ ಮಾಡಿಕೊಳ್ಳುತ್ತಿರುವ ಆರೋಪ ಕೂಡ ಕೇಳಿ ಬಂದಿವೆ. ದೂರು ಆಧರಿಸಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಲಾಗಿದೆ ಎಂದು ಸಿಸಿಬಿ ಜಂಟಿ ಪೊಲೀಸ್ ಆಯುಕ್ತ ಸಂದೀಪ್ ಪಾಟೀಲ್ ತಿಳಿಸಿದರು. ಇತ್ತೀಚೆಗೆ ಪ್ಲೇ ಸ್ಟೋರ್ನಲ್ಲಿ ಹತ್ತಾರು ಲೋನ್ ಆ್ಯಪ್ಗಳು ಹುಟ್ಟಿಕೊಂಡಿವೆ. ಸುಲಭವಾಗಿ ಯಾವುದೇ ದಾಖಲೆಗಳು ಇಲ್ಲದೇ ಸಾಲ ಸೌಲಭ್ಯ ಒದಗಿಸುವುದಾಗಿ ಹೇಳಿ ವಿವರ ಪಡೆದುಕೊಳ್ಳುತ್ತವೆ. ನಂತರ ಬಡ್ಡಿ, ಪ್ರೊಸೆಸಿಂಗ್ ಶುಲ್ಕದ ನೆಪದಲ್ಲಿ ಹಣ ವಸೂಲಿ ಜತೆಗೆ ದುಬಾರಿ ದರದ ಬಡ್ಡಿ ವಸೂಲಿ ಮಾಡುತ್ತಿವೆ. ಸಾಲ ಪಡೆದ ನಾಗರಿಕರು ಕಿರುಕುಳ ಅನುಭವಿಸಿದ್ದಾರೆ. ಕೆಲವರಿಗೆ ನಕಲಿ ಲೀಗಲ್ ನೋಟಿಸ್ ಬಂದಿದ್ದರೆ, ಮತ್ತೆ ಕೆಲವರಿಗೆ ಫೋನ್ ಕರೆ ಮಾಡಿ ಬೆದರಿಕೆ ಹಾಕಲಾಗುತ್ತಿದೆ ಎಂದು ಅಧಿಕಾರಿ ತಿಳಿಸಿದರು. ಲೋನ್ ಆ್ಯಪ್ಗಳ ವಿರುದ್ಧ ಪ್ರಕರಣ ದಾಖಲಿಸಿರುವ ಕುರಿತು ಜಂಟಿ ಆಯುಕ್ತರ ಟ್ವೀಟ್ಗೆ ಹಲವರು ಪ್ರತಿಕ್ರಿಯಿಸಿದ್ದು, ಸಾಲ ನೀಡುವ ಹೆಸರಿನಲ್ಲಿ ಕಾನೂನುಬಾಹಿರ ಚಟುವಟಿಕೆಗಳನ್ನು ನಡೆಸಲಾಗುತ್ತಿದೆ. ಕಿರುಕುಳ ನೀಡಲಾಗುತ್ತಿದೆ ಎಂದು ಪ್ರತಿಕ್ರಿಯಿಸಿದ್ದಾರೆ. ಅಲ್ಲದೆ, ಕೆಲ ಆ್ಯಪ್ಗಳ ಕಚೇರಿ ವಿಳಾಸ ನೀಡಿ ಕ್ರಮ ಕೈಗೊಳ್ಳುವಂತೆ ಕೋರಿದ್ದಾರೆ. 7 ದಿನಗಳ ಅವಧಿಯ ಸಾಲ ಆ್ಯಪ್ಗಳು ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗಿದ್ದು, ಕೇವಲ 7 ದಿನಗಳ ಅವಧಿಯ ಸಾಲಕ್ಕೆ ಶೇ.35ರಷ್ಟು ಬಡ್ಡಿ ವಿಧಿಸುತ್ತಿರುವ ಕುರಿತು ಜಂಟಿ ಆಯುಕ್ತರ ಟ್ವೀಟ್ಗೆ ಪ್ರತಿಕ್ರಿಯಿಸಲಾಗಿದೆ. ಸಾಲ ನೀಡಿರುವ ಆ್ಯಪ್ಗಳ ಮೂಲಕ ಗ್ರಾಹಕರಿಗೆ ಪೊಲೀಸ್ ನೋಟಿಸ್ ಮತ್ತು ಲೀಗಲ್ ನೋಟಿಸ್ಗಳೆಂದು ಕಳುಹಿಸಿ ಬೆದರಿಕೆ ಹಾಕಲಾಗುತ್ತಿದೆ. ಯಾವ ಆ್ಯಪ್ಗಳ ವಿರುದ್ಧ ಪ್ರಕರಣ ಲೆಂಡ್ ನೌ, ಕ್ವಿಕ್ ಕ್ಯಾಷ್, ಕ್ಯಾಷ್ ಎರಾ, ಕ್ಯಾಷ್ ಮ್ಯಾಪ್ ಆ್ಯಪ್. ಸಾಲದ ಮೊತ್ತ 5ರಿಂದ 10 ಸಾವಿರ ರೂ. ಲೋನ್ ಆ್ಯಪ್ಗಳಿಂದ ತೊಂದರೆಗೊಳಗಾದವರು ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ ಭೇಟಿ ನೀಡಿ ದೂರು ನೀಡಬಹುದು. ಸಂದೀಪ್ ಪಾಟೀಲ್, ಜಂಟಿ ಪೊಲೀಸ್ ಆಯುಕ್ತ, ಸಿಸಿಬಿ
from India & World News in Kannada | VK Polls https://ift.tt/3hd1vbt
