ಚಿಕ್ಕಮಗಳೂರು: ವಿಧಾನ ಪರಿಷತ್ ಉಪ ಸಭಾಪತಿ ಎಸ್‌.ಎಲ್‌.ಧರ್ಮೇಗೌಡ (65) ಸೋಮವಾರ ರಾತ್ರಿ ಕಡೂರು ತಾಲೂಕು ಗುಣಸಾಗರದ ರೈಲ್ವೆ ಮೇಲ್ಸೆತುವೆ ಪಕ್ಕದ ಕಂಬೇನಹಳ್ಳಿ ಬಳಿ ರೈಲಿಗೆ ಸಿಲುಕಿ ಆತ್ಮಹತ್ಯೆ ಮಾಡಿಕೊಂಡಿದ್ದು, ಮಂಗಳವಾರ ಸಂಜೆ ಸ್ವಗೃಹ ಸರಪನಹಳ್ಳಿಯ ಎವರ್‌ಗ್ರೀನ್‌ ಫಾರಂ ಹೌಸ್‌ ಬಳಿ ಅಂತ್ಯಸಂಸ್ಕಾರ ನೆರವೇರಿತು. ಸಂಪೂರ್ಣ ಛಿದ್ರಗೊಂಡಿದ್ದ ಅವರ ಮೃತದೇಹದ ರುಂಡ, ಹೊಟ್ಟೆಯ ಸ್ವಲ್ಪ ಭಾಗ, ಕೈ ಸೇರಿದಂತೆ ಸಿಕ್ಕಿದಷ್ಟು ಅಂಗಾಂಗಳನ್ನು ಸಂಗ್ರಹಿಸಿ ಶಿವಮೊಗ್ಗದ ಮೆಗ್ಗಾನ್‌ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಲಾಯಿತು. ಅಲ್ಲಿನ ವೈದ್ಯರು ಮುಖಕ್ಕೆ ಒಂದಷ್ಟು ರಿಶೇಪ್‌ ಕೊಟ್ಟರೂ ಭೀಕರವಾಗಿದ್ದ ಕಾರಣ ಸಾರ್ವಜನಿಕರಿಗೆ ಮುಖ ದರ್ಶನಕ್ಕೆ ಅವಕಾಶ ನೀಡಲಿಲ್ಲ. ಸಖರಾಯಪಟ್ಟಣದ ಸರಕಾರಿ ಪದವಿ ಪೂರ್ವ ಕಾಲೇಜು ಆವರಣದಲ್ಲಿಸಹಸ್ರಾರು ಮಂದಿ ಪಾರ್ಥಿವ ಶರೀರದ ಅಂತಿಮ ದರ್ಶನ ಪಡೆದರು. ನಂತರ ಅದೇ ಸ್ಥಳದಲ್ಲಿಸಕಲ ಸರಕಾರಿ ಗೌರವಗಳನ್ನು ಸಲ್ಲಿಸಿದ್ದು, ಸ್ವಗ್ರಾಮ ಸರಪನಹಳ್ಳಿಯ ಎವರ್‌ಗ್ರೀನ್‌ ಫಾರಂ ಹೌಸ್‌ ಬಳಿ ಪುತ್ರ ಸೊನಾಲ್‌ ಚಿತೆಗೆ ಅಗ್ನಿಸ್ಪರ್ಶ ಮಾಡಿದರು. ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ, ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡ, ಮಾಜಿ ಮುಖ್ಯಮಂತ್ರಿಗಳಾದ ಸಿದ್ದರಾಮಯ್ಯ, ಎಚ್‌.ಡಿ.ಕುಮಾರಸ್ವಾಮಿ ಮತ್ತಿತರರು ಪುಷ್ಪಗುಚ್ಛ ಅರ್ಪಿಸಿ ನಮನ ಸಲ್ಲಿಸಿದರು. ಪಾರ್ಥಿವ ಶರೀರಕ್ಕೆ ರಾಷ್ಟ್ರಧ್ವಜ ಹೊದಿಸಿ, ಕುಶಾಲತೋಪು ಹಾರಿಸಿ ಸಲ್ಲಿಸಲಾಯಿತು. ಸಾವಿಗೆ ಯಾರು ಹೊಣೆ? ವಿಧಾನ ಪರಿಷತ್‌ನಲ್ಲಿಸಭಾಪತಿ ವಿರುದ್ಧದ ಅವಿಶ್ವಾಸ ಪ್ರಕರಣದಲ್ಲಿತಮ್ಮನ್ನು ಸಭಾಪತಿ ಪೀಠದಲ್ಲಿಕುಳ್ಳಿರಿಸಿದ್ದು, ನಂತರ ಕೆಲವು ಸದಸ್ಯರು ಎಳೆದಾಡಿ, ಕುರ್ಚಿಯಿಂದ ಅನಾಮತ್ತು ಹೊತ್ತುಕೊಂಡು ಬಂದ ಬಗ್ಗೆ ತೀವ್ರ ನೊಂದುಕೊಂಡಿದ್ದರು. ಎರಡು ಪುಟಗಳ ಡೆತ್‌ ನೋಟ್‌ನಲ್ಲಿವಿಧಾನ ಪರಿಷತ್‌ನಲ್ಲಿ ನಡೆದ ಘಟನೆಯಿಂದ ಮನ ನೊಂದಿರುವುದಾಗಿ ಬರೆದಿದ್ದಾರೆ ಎನ್ನಲಾಗಿದ್ದು, ಈ ಸಾವಿಗೆ ಹೊಣೆ ಯಾರು ಎಂಬ ಪ್ರಶ್ನೆ ಎದ್ದಿದೆ. ಅನಾರೋಗ್ಯ ಬಾಧಿಸುತ್ತಿದ್ದರೂ ಅಪಾರ ಜೀವನ ಪ್ರೀತಿ ಹೊಂದಿದ್ದ ಎಸ್‌.ಎಲ್‌.ಧರ್ಮೇಗೌಡ ಭೀಕರ ರೀತಿಯಲ್ಲಿಆತ್ಮಹತ್ಯೆ ಮಾಡಿಕೊಳ್ಳುವಷ್ಟು ದುರ್ಬಲ ಮನಸ್ಸಿನವರಲ್ಲ ಎಂಬುದು ಬಹುತೇಕರ ಅಭಿಪ್ರಾಯ. ಆದರೆ, ವಿಧಾನ ಪರಿಷತ್ ಘಟನೆಯಿಂದ ತಮಗೆ ಆಗಿರುವ ನೋವಿನ ಬಗ್ಗೆ ಹಲವರ ಬಳಿ ದುಃಖ ತೋಡಿಕೊಂಡಿದ್ದರು. ಇಡೀ ಪ್ರಕರಣ ಉಪ ಸಭಾಪತಿಯ ದುರಂತ ಅಂತ್ಯದೊಂದಿಗೆ ತೆರೆ ಕಂಡಿದೆ. ಕರ್ನಾಟಕದ ವಿಧಾನ ಪರಿಷತ್ ಇತಿಹಾಸದಲ್ಲಿ ಇದೊಂದು ಕಪ್ಪುಚುಕ್ಕೆ. ಆತ್ಮಹತ್ಯೆಗೂ ಮುನ್ನ, ಆ ದಿನ ಕಡೂರು ತಾಲೂಕು ಸಖರಾಯಪಟ್ಟಣ ಸಮೀಪದ ಸರಪನಹಳ್ಳಿಯ ಮನೆಯ ಸಮೀಪದಲ್ಲೇ ಮತ್ತೊಂದು ಹೊಸಮನೆ ನಿರ್ಮಿಸಲು ಸೋಮವಾರ ಬೆಳಗ್ಗೆ ಪತ್ನಿ ಮಮತ, ಮಗ ಸೊನಾಲ್‌ ಜತೆ ಉಪ ಸಭಾಪತಿ ಎಸ್‌.ಎಲ್‌.ಧರ್ಮೇಗೌಡ ಭೂಮಿ ಪೂಜೆ ನೆರವೇರಿಸಿದ್ದರು. ನಂತರ ಚಿಕ್ಕಮಗಳೂರು ನಗರದಲ್ಲಿ ಹೈಟೆಕ್‌ ಮಲ್ಟಿ ಜಿಮ್‌, ಜಿಲ್ಲಾ ಯುವಜನೋತ್ಸವ ಉದ್ಘಾಟನಾ ಸಮಾರಂಭದಲ್ಲಿ ಉತ್ಸಾಹದಿಂದ ಪಾಲ್ಗೊಂಡಿದ್ದರು. ಕಾರ‍್ಯಕ್ರಮದಲ್ಲಿ ಹಲವರ ಜತೆ ಸಾಕಷ್ಟು ಹೊತ್ತು ಸಂತಸದಿಂದ ಮಾತನಾಡಿದ್ದರು. ವೇದಿಕೆಯಲ್ಲಿ ಕೂಡ ಸೋಲಿಗೆ ಯಾರೂ ಅಂಜಬಾರದು. ಸೋಲು-ಗೆಲುವನ್ನು ಸಮಾನವಾಗಿ ಸ್ವೀಕರಿಸಬೇಕು ಎಂದು ಸ್ಪರ್ಧಿಗಳಿಗೆ ಕಿವಿಮಾತು ಹೇಳಿದ್ದರು. ಇದೇ ಅವರ ಕೊನೆಯ ಸಾರ್ವಜನಿಕ ಕಾರ‍್ಯಕ್ರಮ. ಮಧ್ಯಾಹ್ನ 12.30ರ ನಂತರ ಮತ್ತೆ ಸರಪನಹಳ್ಳಿಯ ಮನೆಗೆ ಆಗಮಿಸಿದ್ದರು. 2 ಗಂಟೆ ಹೊತ್ತಿಗೆ ತಮ್ಮ ಖಾಸಗಿ ಚಾಲಕನಿಗೆ ಕರೆ ಮಾಡಿದ್ದು, ಆತ ತಾನು ಹೊರಗಡೆ ಇದ್ದು ಬರುವುದು ತಡವಾಗುತ್ತದೆ ಎಂದು ಹೇಳಿದ್ದ. ನಂತರ ಸಖರಾಯಪಟ್ಟಣದ ಆತ್ಮೀಯರೊಬ್ಬರಿಗೆ ಕರೆ ಮಾಡಿ ಚಾಲಕ ಧರ್ಮರಾಜ್‌ನನ್ನು ಫಾರಂ ಹೌಸ್‌ಗೆ ಬರಲು ಹೇಳಿದ್ದರು. ಸಂಜೆ 4 ಗಂಟೆ ಹೊತ್ತಿಗೆ ಧರ್ಮರಾಜ್‌ ಫಾರಂ ಹೌಸ್‌ ಬಳಿ ಬರುವಾಗ ಸ್ವತಃ ಧರ್ಮೇಗೌಡರೇ ಹಳೆಯ ಸ್ಯಾಂಟ್ರೊ ಕಾರನ್ನು ಚಾಲನೆ ಮಾಡಿಕೊಂಡು ಗೇಟ್‌ ಬಳಿಗೆ ಬಂದಿದ್ದರು. ಚಾಲಕ ಧರ್ಮರಾಜ್‌ನನ್ನು ಕೂರಿಸಿಕೊಂಡು ಸಖರಾಯಪಟ್ಟಣದ ಬಂಕ್‌ನಲ್ಲಿ ಪೆಟ್ರೋಲ್‌ ಹಾಕಿಸಿಕೊಂಡು ಅಲ್ಲಿದ್ದ ಕೃಷ್ಣಪ್ಪ ಅವರನ್ನು ಮಾತನಾಡಿಸಿದ್ದರು. ಅಲ್ಲಿಂದ ಚಾಲಕ ಧರ್ಮರಾಜ್‌ ಕಾರು ಚಾಲನೆ ಮಾಡಿದ್ದು, ಗುಣಸಾಗರಕ್ಕೆ ಹೋಗುವಂತೆ ಹೇಳಿದ್ದರು. ಕಳೆದ ಎರಡು ವರ್ಷಗಳಿಂದ ಡ್ರೈವಿಂಗ್‌ ಕೆಲಸದಿಂದ ದೂರ ಉಳಿದಿದ್ದ ಧರ್ಮರಾಜ್‌ನನ್ನು ಕರೆದುಕೊಂಡು ಹೋಗಿದ್ದು, ಗುಣಸಾಗರ ಸಮೀಪದ ಕಂಬೇನಹಳ್ಳಿಯ ರೈಲು ಹಳಿ ಬಳಿ ಹೋದಾಗ ಇಬ್ಬರು ಗ್ರಾಮಸ್ಥರು ಧರ್ಮೇಗೌಡರನ್ನು ಮಾತನಾಡಿಸಿದ್ದರು. ಇಲ್ಲಿಯೇ ಇದ್ದರೆ ಗ್ರಾಮಸ್ಥರು ಜಮಾಯಿಸುತ್ತಾರೆ ಎಂಬುದನ್ನು ಅರಿತು ದೇವನೂರಿಗೆ ಹೋಗಿ ಕುಡಿಯಲು ನೀರು ತೆಗೆದುಕೊಂಡು ಬರೋಣ ಎಂದು ಕರೆದುಕೊಂಡು ಹೋಗಿದ್ದರು. ಈ ನಡುವೆ ಬೀರೂರಿನ ವ್ಯಕ್ತಿಯೊಬ್ಬರಿಗೆ ನಾಲ್ಕೈದು ಬಾರಿ ಕರೆ ಮಾಡಿ ರೈಲು ಎಷ್ಟು ಹೊತ್ತಿಗೆ ಬರುತ್ತದೆ ಎಂದು ವಿಚಾರಿಸಿದ್ದರು. ಸಂಜೆ 6.30ರ ಹೊತ್ತಿಗೆ ಪುನಃ ಕಂಬೇನಹಳ್ಳಿಯ ರೈಲ್ವೆ ಹಳಿ ಬಳಿ ಬಂದಿದ್ದು, ಇಲ್ಲಿ ಯಾರೋ ಇಬ್ಬರು ವ್ಯಕ್ತಿಗಳು ಬರುತ್ತಾರೆ. ನನಗೆ ಅವರ ಜತೆ ಖಾಸಗಿಯಾಗಿ ಮಾತನಾಡುವುದಿದೆ. ನೀನು ರೈಲ್ವೆ ಹಳಿ ಪಕ್ಕದಲ್ಲೇ ಇರುವ ಮಣ್ಣಿನ ರಸ್ತೆಯಲ್ಲಿ ಮುಂದಕ್ಕೆ ಹೋಗಿರು ಎಂದು ಧರ್ಮರಾಜ್‌ನನ್ನು ಕಳಿಸಿದ್ದರು. ಮುಂದಕ್ಕೆ ಹೋದ ಧರ್ಮರಾಜ್‌ ಕಾರಿನಲ್ಲಿ ಕುಳಿತು ಕಾಯುತ್ತಿದ್ದರು. ಬಹಳ ಹೊತ್ತಾದರೂ ಧರ್ಮೇಗೌಡರು ಬಾರದ ಕಾರಣ ಚಾಲಕ ಧರ್ಮರಾಜ್‌ ಫೋನ್‌ ಮಾಡಿದಾಗ ಮೊಬೈಲ್‌ ಸ್ವಿಚ್‌ ಆಫ್‌ ಆಗಿತ್ತು. ನಂತರವೂ ಬಹಳ ಹೊತ್ತು ಧರ್ಮರಾಜ್‌ ಕಾರಿನಲ್ಲೇ ಕುಳಿತಿದ್ದು, ರಾತ್ರಿ 10 ಗಂಟೆ ಹೊತ್ತಿಗೆ ಮಗ ಸೊನಾಲ್‌ ಕರೆ ಮಾಡಿ ಅಪ್ಪ ಎಲ್ಲಿ ಎಂದು ಕೇಳಿದಾಗ ಇಂತಹ ಸ್ಥಳದಲ್ಲಿದ್ದೇವೆ. ಇಷ್ಟು ಹೊತ್ತಾದರೂ ಬಂದಿಲ್ಲ ಎಂದು ಧರ್ಮರಾಜ್‌ ಹೇಳಿದ್ದರು. ಸ್ಥಳಕ್ಕೆ ಆಗಮಿಸಿದ ಮಗ ಸೊನಾಲ್‌ ಧರ್ಮರಾಜ್‌ ಜತೆ ಸೇರಿ ಹುಡುಕಾಟ ನಡೆಸಿದಾಗ ರೈಲ್ವೆ ಹಳಿ ಮೇಲೆ ತಲೆಯ ಭಾಗ ಬಿದ್ದಿರುವುದು ಕಂಡುಬಂದಿದೆ. ರಾತ್ರಿ 7 ಗಂಟೆಗಾಗಲೇ ಧರ್ಮೇಗೌಡ ರೈಲಿಗೆ ಕೊರಳೊಡ್ಡಿದ್ದು, ನಂತರ 8ಕ್ಕೂ ಹೆಚ್ಚು ರೈಲುಗಳು ಅದೇ ಹಳಿಯಲ್ಲಿ ಸಾಗಿದ್ದವು. ಪೊಲೀಸರು ಪರಿಶೀಲನೆ ನಡೆಸಿದಾಗ ಇಡೀ ದೇಹ ಛಿದ್ರಗೊಂಡು ರೈಲ್ವೆ ಹಳಿಯ ಮೇಲೆ ರುಂಡ, ಒಂದು ಕೈ, ಪಕ್ಕದ ಚರಂಡಿಯಲ್ಲಿ ಹೊಟ್ಟೆಯ ಒಂದಷ್ಟು ಭಾಗ ಪತ್ತೆಯಾಗಿದೆ. ಹತ್ತಾರು ಮೀಟರ್‌ವರೆಗೂ ಹಳಿಯ ಮೇಲೆ ದೇಹ ಉಜ್ಜಿಕೊಂಡು ಹೋಗಿದೆ. ಉದ್ದಕ್ಕೂ ರಕ್ತ, ಮಾಂಸ, ಮೂಳೆಯ ತುಣುಕುಗಳು ಬಿದ್ದಿದ್ದು, ಭೀಕರ ದೃಶ್ಯ ನೋಡಿದವರ ಎದೆ ನಡುಗಿಸುತ್ತಿತ್ತು. ಅರಸೀಕೆರೆ ರೈಲ್ವೆ ಪೊಲೀಸ್‌ ಠಾಣೆಯಲ್ಲಿಆತ್ಮಹತ್ಯೆ ಪ್ರಕರಣ ದಾಖಲಾಗಿದೆ. ಕಾಗೆ, ನಾಯಿಗಳ ಪಾಲು ಶಾಲಾ ಕಾಲೇಜುಗಳ ಪರೀಕ್ಷೆಯಲ್ಲಿ ಅನುತ್ತೀರ್ಣರಾಗಿ, ಜೀವನದಲ್ಲಿ ಕಷ್ಟಗಳನ್ನು ಎದುರಿಸಲಾಗದೆ ಆತ್ಮಹತ್ಯೆ ಹಾದಿ ಹಿಡಿಯಬಾರದು. ಸವಾಲುಗಳನ್ನು ಆತ್ಮಸ್ಥೈರ‍್ಯದಿಂದ ಎದುರಿಸಬೇಕು ಎಂದು ಪದೇ ಪದೆ ಹೇಳುತ್ತಿದ್ದ ಉಪ ಸಭಾಪತಿ ಎಸ್‌.ಎಲ್‌.ಧರ್ಮೇಗೌಡ ಅತ್ಯಂತ ಭಯಾನಕ ರೀತಿಯಲ್ಲಿ ರೈಲು ಹಳಿಗೆ ಕೊರಳೊಡ್ಡಿ ಆತ್ಮಹತ್ಯೆ ಮಾಡಿಕೊಂಡಿರುವುದು ಅಚ್ಚರಿಗೆ ಕಾರಣವಾಗಿದೆ. ರೈಲ್ವೆ ಹಳಿಯ ಮೇಲೆ ಹಾಗೂ ಅಕ್ಕಪಕ್ಕದಲ್ಲಿ ಪುಡಿ ಪುಡಿಯಾಗಿ ಬಿದ್ದಿದ್ದ ಮೂಳೆ, ಮಾಂಸದ ತುಣುಕುಗಳನ್ನು ಕಾಗೆಗಳು, ನಾಯಿಗಳು ಹೊತ್ತೊಯ್ದು ತಿನ್ನುತ್ತಿದ್ದ ದೃಶ್ಯ ಸ್ಥಳೀಯರ ಮನಕಲಕುತ್ತಿತ್ತು. ಖಿನ್ನತೆ ಕಾಡುತ್ತಿತ್ತ? ಉಪ ಸಭಾಪತಿ ಎಸ್‌.ಎಲ್‌.ಧರ್ಮೇಗೌಡರಿಗೆ ಮಾನಸಿಕ ಖಿನ್ನತೆ ಕಾಡುತ್ತಿತ್ತೆ? ವಿಧಾನ ಪರಿಷತ್‌ನಲ್ಲಿನಡೆದ ಘಟನೆಯಿಂದ ಮತ್ತಷ್ಟು ಮಾನಸಿಕ ಖಿನ್ನತೆಗೆ ಒಳಗಾಗಿ ಆತ್ಮಹತ್ಯೆ ಹಾದಿ ಹಿಡಿದರೆ? ಜಿಲ್ಲಾಕೇಂದ್ರ ಸಹಕಾರ ಬ್ಯಾಂಕ್‌ ನಿರ್ದೇಶಕ ಮಂಡಳಿ ಚುನಾವಣೆಯಲ್ಲಿ ಆಗಿದ್ದ ಹೀನಾಯ ಸೋಲು, ವಿಧಾನ ಪರಿಷತ್‌ನಲ್ಲಿ ನಡೆದಿದ್ದ ಘಟನೆಯಿಂದ ಬಹಳಷ್ಟು ನೊಂದಿದ್ದ ಎಸ್‌.ಎಲ್‌.ಧರ್ಮೇಗೌಡ ಈ ವಿಷಯವನ್ನು ಸೋದರ ಎಸ್‌.ಎಲ್‌.ಬೋಜೇಗೌಡ ಅವರ ಬಳಿ ಹೇಳಿಕೊಂಡಿದ್ದರು. ರಾಜಕೀಯ ಕಟ್ಟಿಕೊಂಡು ಏನಾಗಬೇಕು? ನಿನಗೆ ಇಷ್ಟವಿಲ್ಲದಿದ್ದರೆ ಉಪ ಸಭಾಪತಿ ಹುದ್ದೆಗೆ ರಾಜೀನಾಮೆ ಕೊಟ್ಟು ತೋಟ ನೋಡಿಕೊಂಡು ಆರಾಮವಾಗಿರು. ಬೇಕಿದ್ದರೆ ನಾನೂ ರಾಜೀನಾಮೆ ಕೊಡುತ್ತೇನೆ ಎಂದು ವಿಧಾನ ಪರಿಷತ್ ಸದಸ್ಯರೂ ಆಗಿರುವ ಸೋದರ ಎಸ್‌.ಎಲ್‌.ಬೋಜೇಗೌಡ ಸಮಾಧಾನ ಹೇಳಿದ್ದರು. ಮಂಗಳವಾರ ಬೆಂಗಳೂರಿಗೆ ಹೋಗಿ ರಾಜೀನಾಮೆ ಕೊಡೋಣ ಎಂದು ಕೂಡ ಧರ್ಮೇಗೌಡರಿಗೆ ಹೇಳಿದ್ದು, ಅಷ್ಟರಲ್ಲೇ ಆತ್ಮಹತ್ಯೆ ಹಾದಿ ಹಿಡಿದಿದ್ದಾರೆ. ಕಳೆದ ನಾಲ್ಕೂವರೆ ವರ್ಷಗಳ ಹಿಂದೆ ಮಾನಸಿಕ ಖಿನ್ನತೆಯಿಂದ ಬಳಲುತ್ತಿದ್ದ ಎಸ್‌.ಎಲ್‌.ಧರ್ಮೇಗೌಡ ಶಿವಮೊಗ್ಗದಲ್ಲಿ ಮಾನಸಿಕ ರೋಗ ತಜ್ಞರಾಗಿದ್ದ ಅಶೋಕ್‌ ಪೈ ಅವರಿಂದ ಚಿಕಿತ್ಸೆ ಪಡೆದುಕೊಂಡಿದ್ದರು. ಧರ್ಮೇಗೌಡರು ದಿಢೀರ್‌ ಆತ್ಮಹತ್ಯೆ ಮಾಡಿಕೊಳ್ಳಲು ಇಂತಹ ಖಿನ್ನತೆಯೇ ಕಾರಣವಿರಬಹುದು ಎನ್ನಲಾಗುತ್ತಿದೆ. ಡೆತ್‌ನೋಟ್‌ ಮುಚ್ಚಿಟ್ಟಿದ್ದೇಕೆ?ಆತ್ಮಹತ್ಯೆಗೂ ಮುನ್ನ ಉಪ ಸಭಾಪತಿ ಎಸ್‌.ಎಲ್‌.ಧರ್ಮೇಗೌಡ ಎರಡು ಪುಟಗಳ ಡೆತ್‌ನೋಟ್‌ ಬರೆದಿದ್ದು, ಅವರು ಧರಿಸಿದ್ದ ಅಂಗಿ ಜೇಬಿನಲ್ಲಿ ಅದು ಪತ್ತೆಯಾಗಿದೆ. ಅರಸೀಕೆರೆ ರೈಲ್ವೆ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಡೆತ್‌ನೋಟ್‌ನ್ನು ವಶಕ್ಕೆ ಪಡೆದುಕೊಂಡಿದ್ದು, ಅದರಲ್ಲಿ ಏನು ಬರೆದಿದ್ದಾರೆ ಎಂಬ ಬಗ್ಗೆ ಯಾವುದೇ ಮಾಹಿತಿ ಬಿಟ್ಟುಕೊಟ್ಟಿಲ್ಲ. ವಿಧಾನ ಪರಿಷತ್ ಘಟನೆಯಿಂದ ಮನನೊಂದು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದಾಗಿ ಬರೆದಿದ್ದಾರೆ ಎಂದು ಶಾಸಕ ಸಿ.ಟಿ.ರವಿ ಹೇಳಿದ್ದು ಬಿಟ್ಟರೆ ಎರಡು ಪುಟಗಳ ಡೆತ್‌ನೋಟ್‌ನ ಪೂರ್ಣಪಾಠ ಬಹಿರಂಗಗೊಂಡಿಲ್ಲ. ವಿಧಾನ ಪರಿಷತ್ ಘಟನೆಯೇ ಆತ್ಮಹತ್ಯೆಗೆ ಕಾರಣ. ಕುಟುಂಬದ ಯಾರಾರ‍ಯರಿಗೆ ಯಾವ ಯಾವ ಆಸ್ತಿ ಹಂಚಿಕೆ ಮಾಡಬೇಕು ಎಂಬ ಬಗ್ಗೆ ಬರೆದಿದ್ದಾರೆ ಎಂದು ಪೊಲೀಸ್‌ ಇಲಾಖೆಯ ಉನ್ನತ ಮೂಲಗಳು 'ವಿಕ'ಗೆ ತಿಳಿಸಿವೆ. ಆದರೆ, ಆ ಪತ್ರದಲ್ಲಿ ಮತ್ತಷ್ಟು ಸೂಕ್ಷ್ಮ ವಿಚಾರಗಳು ಇರುವ ಸಾಧ್ಯತೆ ಇದ್ದು, ಸಾರ್ವಜನಿಕ ಜೀವನದಲ್ಲಿದ್ದ ಎಸ್‌.ಎಲ್‌.ಧರ್ಮೇಗೌಡರು ಬರೆದ ಡೆತ್‌ನೋಟ್‌ನ್ನು ಬಹಿರಂಗ ಮಾಡದೆ ಮುಚ್ಚಿಟ್ಟಿದ್ದೇಕೆ ಎಂಬ ಪ್ರಶ್ನೆ ಜನರನ್ನು ಕಾಡುತ್ತಿದೆ. ಸುದ್ದಿಗಾರರೊಂದಿಗೆ ಮಾತನಾಡಿದ ಸಂಸದೆ ಶೋಭಾ ಕರಂದ್ಲಾಜೆ ಕೂಡ ಡೆತ್‌ನೋಟ್‌ ಮುಚ್ಚಿಡುವುದು ಸರಿಯಲ್ಲ. ಅದನ್ನು ಬಹಿರಂಗ ಮಾಡುವುದು ಸೂಕ್ತ ಎಂದು ಅಭಿಪ್ರಾಯಪಟ್ಟಿದ್ದಾರೆ.
from India & World News in Kannada | VK Polls https://ift.tt/3hrvVGZ
