ತಿರುವನಂತಪುರ: ವಿವಾದಗ್ರಸ್ತ ಭೂಮಿ ತೆರವುಗೊಳಿಸಲು ಬಂದ ಪೊಲೀಸರನ್ನು ಸೀಮೆಎಣ್ಣೆ ಸುರಿದುಕೊಂಡು ಬೆದರಿಸಿ ಹಿಮ್ಮೆಟ್ಟಿಸಲು ಯತ್ನಿಸಿದ ದಂಪತಿ ಆಕಸ್ಮಿಕವಾಗಿ ಅಗ್ನಿ ಸ್ಪರ್ಶಕ್ಕೆ ತುತ್ತಾಗಿ ಮೃತಪಟ್ಟ ಘಟನೆ ಕೇರಳದ ನಯ್ಯತ್ತಿಂಕರ ಸಮೀಪದ ನೆಲ್ಲಿಮೂಡುನಲ್ಲಿ ನಡೆದಿದೆ. ರಂಜನ್‌ (47) ಮತ್ತು ಆತನ ಪತ್ನಿ ಅಂಬಿಲಿ (40) ಮೃತಪಟ್ಟ ದುರ್ದೈವಿಗಳು. ನೆಲ್ಲಿಮೂಡುವಿನಲ್ಲಿ ಈ ದಂಪತಿ ನಾಲ್ಕು ಸೆಂಟ್‌ ಜಾಗ ಹೊಂದಿದ್ದರು. ಅದು ಸರಕಾರಕ್ಕೆ ಸೇರಿದ ಸ್ಥಳ ಎಂದು ನೆರೆಯವರು ಕ್ಯಾತೆ ತೆಗೆದು ದೂರು ನೀಡಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ್ದ ಸ್ಥಳೀಯ ನ್ಯಾಯಾಲಯ ಜಾಗ ತೆರವಿಗೆ ಆದೇಶ ನೀಡಿತ್ತು. ಸ್ಥಳಕ್ಕೆ ಬಂದ ಕೋರ್ಟ್‌ ಆದೇಶದ ಮೇರೆ ಜಾಗ ಖಾಲಿ ಮಾಡುವಂತೆ ರಂಜನ್‌ ಕುಟುಂಬಕ್ಕೆ ತಾಕೀತು ಮಾಡಿದ್ದರು. ಬಳಿಕ ಬಲವಂತದ ತೆರವಿಗೆ ಮುಂದಾಗ ಹತಾಶಗೊಂಡ ರಂಜನ್‌ ದಂಪತಿ ಸುರಿದುಕೊಂಡು, ತಮ್ಮ ನಿವಾಸ ಮುಟ್ಟದಂತೆ ಪೊಲೀಸರಿಗೆ ಬೆದರಿಕೆ ಒಡ್ಡಿದರು. ಈ ವೇಳೆ ರಂಜನ್‌ ಕೈಯಲ್ಲಿ ಹಿಡಿದುಕೊಂಡಿದ್ದ ಲೈಟರ್‌ ಅನ್ನು ಪೊಲೀಸರು ಕಿತ್ತುಕೊಳ್ಳಲು ಯತ್ನಿಸಿದಾಗ ಅದು ಹಠಾತ್ತನೆ ಆನ್‌ ಆಗಿ ಬೆಂಕಿ ಹೊತ್ತಿಕೊಂಡಿತ್ತು. ಅಗ್ನಿ ಸ್ಪರ್ಶದಿಂದ ಚಡಪಡಿಸಿದ ರಂಜನ್‌ ರಕ್ಷಣೆಗೆ ಆತನ ಪತ್ನಿ ಅಂಬಿಲಿ ಧಾವಿಸಿದಾಗ ಅವರಿಗೂ ಬೆಂಕಿ ಹೊತ್ತಿಕೊಂಡಿತು. ತೀವ್ರ ಸುಟ್ಟಗಾಯಗಳಿಂದ ಬಳಲುತ್ತಿದ್ದ ಅವರು ತಿರುವನಂತಪುರದ ಆಸ್ಪತ್ರೆ ಯಲ್ಲಿ ಕೊನೆಯುಸಿರೆಳೆದಿದ್ದಾರೆ. ಈ ದಂಪತಿಗೆ ಇಬ್ಬರು ಚಿಕ್ಕ ಮಕ್ಕಳಿದ್ದು, ಅವರ ಭವಿಷ್ಯದ ಬಗ್ಗೆ ಕಳವಳ ವ್ಯಕ್ತವಾಗಿದೆ. ಆ ಇಬ್ಬರ ಶಿಕ್ಷಣ ಮತ್ತಿತರ ವೆಚ್ಚವನ್ನು ಸರಕಾರವೇ ನೋಡಿ ಕೊಳ್ಳಲಿದೆ ಎಂದು ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಭರವಸೆ ನೀಡಿದ್ದಾರೆ. ಕಾಂಗ್ರೆಸ್‌ ಕೂಡ ಅನಾಥ ಮಕ್ಕಳಿಗೆ ಮನೆ ಕಟ್ಟಿಕೊಡುವುದಾಗಿ ಆಶ್ವಾಸನೆ ನೀಡಿದೆ. ಇಷ್ಟೆಲ್ಲದರ ನಡುವೆಯೇ ಸ್ಥಳೀಯ ಕೋರ್ಟ್‌ ನೀಡಿದ್ದ ತೆರವು ಆದೇಶಕ್ಕೆ ಜಿಲ್ಲಾ ನ್ಯಾಯಾಲಯ ತಡೆ ನೀಡಿದ್ದು, ಇಡೀ ಪ್ರಕರಣ ಈಗ ರಾಜಕೀಯ ವಾಗ್ವಾದಕ್ಕೆ ಎಡೆಮಾಡಿಕೊಟ್ಟಿದೆ.
from India & World News in Kannada | VK Polls https://ift.tt/34WqdI3
