ಮೆಲ್ಬೋರ್ನ್: ನಾಯಕನ ಜವಾಬ್ದಾರಿ ಹೊತ್ತು ಮನಮೋಹಕ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಇಲ್ಲಿ ನಡೆಯುತ್ತಿರುವ ಬಾರ್ಡರ್ ಗವಾಸ್ಕರ್ ಟ್ರೋಫಿ ಟೆಸ್ಟ್ ಸರಣಿಯ 2ನೇ ಪಂದ್ಯದಲ್ಲಿ ತಮ್ಮ ಟೆಸ್ಟ್ ಕ್ರಿಕೆಟ್ ವೃತ್ತಿಬದುಕಿನ 12ನೇ ಶತಕ ಬಾರಿಸಿ ಮಿಂಚಿದ್ದಾರೆ. ಪಂದ್ಯದ ಮೊದಲ ದಿನದಲ್ಲೇ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದ ಆಸ್ಟ್ರೇಲಿಯಾ ತಂಡವನ್ನು 195 ರನ್ಗಳಿಗೆ ಆಲ್ಔಟ್ ಮಾಡಿದ ಟೀಮ್ ಇಂಡಿಯಾ, ಇದೀಗ ಅಜಿಂಕ್ಯ ರಹಾನೆ ಅವರ ಅದ್ಭುತ ಶತಕದ ಬಲದಿಂದ ಪ್ರಥಮ ಇನಿಂಗ್ಸ್ನಲ್ಲಿ 82 ರನ್ಗಳ ಭರ್ಜರಿ ಮುನ್ನಡೆ ಪಡೆದುಕೊಂಡಿದೆ. ಶನಿವಾರದ ಆಟದ ಅಂತ್ಯಕ್ಕೆ ಭಾರತ ತಂಡ ಮೊದಲ ಇನಿಂಗ್ಸ್ನಲ್ಲಿ 1 ವಿಕೆಟ್ಗೆ 26 ರನ್ಗಳಿಸಿತ್ತು. ಬಳಿಕ ಎರಡನೇ ದಿನವಾದ ಭಾನುವಾರ ಮೊದಲ ಅವಧಿಯಲ್ಲೇ ಶುಭಮನ್ ಗಿಲ್ (45) ಮತ್ತು ಚೇತೇಶ್ವರ್ ಪೂಜಾರ (17) ವಿಕೆಟ್ ಪತನವಾಗಿ ಸಂಕಷ್ಟಕ್ಕೆ ಸಿಲುಕಿತ್ತು. ಈ ಒತ್ತಡದ ಪರಿಸ್ಥಿತಿಯಲ್ಲಿ ಬ್ಯಾಟಿಂಗ್ಗೆ ಇಳಿದ ಹಂಗಾಮಿ ನಾಯಕ ಅಜಿಂಕ್ಯ ರಹಾನೆ, 4ನೇ ವಿಕೆಟ್ಗೆ ಹನುಮ ವಿಹಾರಿ (21) ಜೊತೆಗೆ ಮತ್ತು 5ನೇ ವಿಕೆಟ್ಗೆ ರಿಷಭ್ ಪಂತ್ (29) ಜೊತೆಗೆ ಅರ್ಧಶತಕದ ಜೊತೆಯಾಟಗಳನ್ನು ಆಡಿ ಚೇತರಿಕೆ ನೀಡಿದರಲ್ಲದೆ, 6ನೇ ವಿಕೆಟ್ಗೆ ಆಲ್ರೌಂಡರ್ (40*) ರವೀಂದ್ರ ಜಡೇಜಾ ಅವರೊಟ್ಟಿಗೆ ಶತಕದ ಜೊತೆಯಾಟವಾಡಿ ಮೊದಲ ಇನಿಂಗ್ಸ್ನಲ್ಲಿ ಟೀಮ್ ಇಂಡಿಯಾಗೆ ಇನಿಂಗ್ಸ್ ಮುನ್ನಡೆ ಲಭ್ಯವಾಗುವಂತೆ ಮಾಡಿದರು. ಕಳೆದ ಪಂದ್ಯದಲ್ಲಿ ಅಬ್ಬರಿಸಿ ಬೊಬ್ಬರಿಸಿದ್ದ ಆಸೀಸ್ ವೇಗಿಗಳಾದ ಮಿಚೆಲ್ ಸ್ಟಾರ್ಕ್, ಪ್ಯಾಟ್ ಕಮಿನ್ಸ್ ಮತ್ತು ಜಾಶ್ ಹೇಝಲ್ವುಡ್ ಎದುರು ತಾಳ್ಮೆಯ ಮೂರ್ತಿಯಂತೆ ನೆಲೆನಿಂತು ರನ್ ಹೆಕ್ಕಿದ ರಹಾನೆ ಆಗಾಗ ಸಿಕ್ಕ ಜೀವದಾನಗಳ ಸಂಪೂರ್ಣ ಲಾಭ ಪಡೆದು ಟೆಸ್ಟ್ ಕ್ರಿಕೆಟ್ ವೃತ್ತಿ ಬದುಕಿನ 12ನೇ ಶತಕ ಬಾರಿಸಿ ಮಿಂಚಿದರು. 111 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ರಹಾನೆ, 195 ಎಸೆತಗಳಲ್ಲಿ 11 ಫೋರ್ಗಳ ನೆರವಿನಿಂದ ಶತಕ ಸಂಭ್ರಮ ಆಚರಿಸಿದರು. ಇದು ಭಾರತದಿಂದ ಆಚೆ ರಹಾನೆ ಬಾರಿಸಿದ 8ನೇ ಶತಕವಾಗಿದ್ದು, ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್ನಲ್ಲಿ ಅಂಜಿಕ್ಯ ಅವರಿಂದ ಮೂಡಿಬಂದ ಎರಡನೇ ಶತಕವಾಗಿದೆ. ಈ ಮೂಲಕ ಎಂಸಿಜಿಯಲ್ಲಿ 2 ಶತಕ ಬಾರಿಸಿದ ಎರಡನೇ ಭಾರತೀಯ ಬ್ಯಾಟ್ಸ್ಮನ್ ಎನಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ ವಿನೂ ಮಂಕಡ್ ಈ ಸಾಧನೆ ಮಾಡಿದ್ದರು. ಅಷ್ಟೇ ಅಲ್ಲದೆ ಟೆಸ್ಟ್ ಕ್ರಿಕೆಟ್ನಲ್ಲಿ ಶತಕ ಬಾರಿಸಿದ ಭಾರತದ 12ನೇ ನಾಯಕ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ. ಪರಿಣಾಮ ಮಳೆ ಕಾರಣ ಅವಧಿಗೂ ಮುನ್ನ ಅಂತ್ಯಗೊಂಡ ಪಂದ್ಯದ ಎರಡನೇ ದಿನದಾಟದಲ್ಲಿ ಭಾರತ ತಂಡ 91.3 ಓವರ್ಗಳಲ್ಲಿ 5 ವಿಕೆಟ್ಗೆ 277 ರನ್ಗಳನ್ನು ಗಳಿಸಿದ್ದು ಒಟ್ಟು 82 ರನ್ಗಳ ಮೊದಲ ಇನಿಂಗ್ಸ್ ಮುನ್ನಡೆ ಪಡೆದುಕೊಂಡಿದೆ. ಆಸ್ಟ್ರೇಲಿಯಾದಲ್ಲಿ ಟೆಸ್ಟ್ ಶತಕ ಬಾರಿಸಿದ ಟೀಮ್ ಇಂಡಿಯಾ ನಾಯಕರು
- ಮೊಹಮ್ಮದ್ ಅಝರುದ್ದೀನ್ - 106 (ಅಡಿಲೇಡ್, 1991/92)
- ಸಚಿನ್ ತೆಂಡೂಲ್ಕರ್ - 116 (ಎಂಸಿಜಿ, 1999/2000)
- ಸೌರವ್ ಗಂಗೂಲಿ - 144 (ಗಬ್ಬಾ, 2003-04)
- ವಿರಾಟ್ ಕೊಹ್ಲಿ - 115 ಮತ್ತು 141 (ಅಡಿಲೇಡ್, 2014/15)
- ವಿರಾಟ್ ಕೊಹ್ಲಿ - 147 (ಎಸ್ಸಿಜಿ, 2014/15)
- ವಿರಾಟ್ ಕೊಹ್ಲಿ - 123 (ಪರ್ತ್, 2018/19)
- ಅಜಿಂಕ್ಯ ರಹಾನೆ - 104* (ಎಂಸಿಜಿ, 2020/21)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3rtrmR3
